1. Bua tshinyi Yehowa mmukumbane bua tumulamate anu yeye?

YEHOWA mmukumbane bua tumulamate anu yeye bualu yeye ke udi mutufuke ne mutupeshe muoyo. (Buak. 4:11) Kadi kudi njiwu ya kudimukila. Nansha mutudi banange Yehowa ne tumunemeka, kudi malu adi mua kutupangisha bua kumulamata mudibi bikengela. Bidi bikengela kumanya mudi bualu ebu mua kuenzeka. Tshia kumpala, tuanji kukonkonona tshidi kulamata anu Yehowa nkayende kumvuija.

2. Bilondeshile Ekesode 34:14, tuetu balamate anu Yehowa nkayende, netuenze tshinyi?

² Mu Bible, kulamata Nzambi kudi ne lungenyi lua kumunanga bikole. Tuetu balamate anu Yehowa nkayende, netumutendelele anu yeye. Katuakuitaba bua muntu kampanda anyi tshintu tshikuabu kuangata muaba wende mu muoyo wetu to.​—Bala Ekesode 34:14.

3. Bua tshinyi katuena balamate Yehowa mu tshijimajima?

³ Katuena balamate Yehowa mu tshijimajima to. Bua tshinyi? Bualu malu malelela adi amutangila atudi balonge ke adi matufikishe ku dimulamata. Tudi bafike ku dimona ne: udi ne ngikadilu milenga milaya! Tudi bamanye malu adiye munange ne adiye mukine, ne tudi tuamona petu mu mushindu wa muomumue. Tudi bafike ku dijingulula tshidiye mulongoluele bantu ne tutshitua mpanda. Tudi tudimona ba diese bua mudiye mutupeshe mpunga wa kulua balunda bende. (Mis. 25:14) Bualu buonso budi butangila Mufuki wetu butudi tulonga budi  anu butusemeja pabuipi nende bikole.​—Yak. 4:8.

4. a) Ntshinyi tshidi Diabolo wenza natshi mudimu bua kutekesha lulamatu luetu kudi Yehowa? b) Ntshinyi tshituamona mu tshiena-bualu etshi?

⁴ Buloba ebu budi mu bianza bia Diabolo, ne udi wenza nabu mudimu mu mushindu wa ne: bintu bitu bantu basue bilue ne mushinga wa bungi mu nsombelu wetu. Udi wenza kabidi bua bitukolele bua kukandamena majinga etu mabi. (Ef. 2:1-3; 1 Yone 5:19) Mmusue bua tuikale muoyo eku muoyo eku bua katushadi balamate anu Yehowa nkayende to. Tumonayi mishindu ibidi idiye mua kuenza nanku. Wa kumpala, utu utusaka bua kukebangana ne bubanji; muibidi, utu utusaka bua kusungula mishindu mibi ya dipitshisha kapepe.

5. Bua tshinyi tudi ne bua kudimukila dinanga dia makuta?

⁵ Muntu yonso udi wenda eu utu musue kudia kukuta, kuvualaku bimpe, ne kuikala ne kuende kudi kumueneka ne: nkua muntu. Kadi tudi ne bua kudimukila dinanga dia makuta. Bantu ba bungi ba mu bulongolodi bua Satana ‘mbanangi ba makuta,’ mbanange kabidi bintu bidi makuta au mua kubapetesha. (2 Tim. 3:2) Yezu uvua mumanye ne: bayidi bende bavua mua kudimona mu diteta dia kutuadija kunanga makuta. Wakamba ne: “Muntu nansha umue kena mua kuenzela bamfumu babidi mudimu to; bualu neakine umue ne neanange mukuabu, anyi nealamate umue ne neapetule mukuabu. Kanuena mua kuikala bapika ba Nzambi ne ba Biuma popamue to.” (Mat. 6:24) Mu ngumvuilu kampanda, muntu udi utendelela Yehowa yeye upitshisha dîba dia bungi ne uditatshisha bikole bua kulua mubanji, udi wenzela bamfumu babidi mudimu. Kakushala mulamate anu Yehowa nkayende to.

6. Mêyi avua Yezu muambile tshisumbu tshia ku Laodikiya adi atulongesha tshinyi?

⁶ Ku ndekelu kua bidimu lukama bia kumpala, bena mu tshisumbu tshia mu tshimenga  tshia Laodikiya bavua baditumbisha bamba ne: ‘Tudi babanji, tudi bapete bubanji ne katuena dijinga ne tshintu nansha tshimue’ to. Kadi ku mêsu kua Yehowa ne Yezu, bavua ‘bena dikenga, benza luse, bapele, bampofu ne bikale butaka.’ Yezu wakababela bualu dinanga diabu dia bubanji divua dinyanga malanda abu ne Yehowa, kadi kabivua bua muvuabu babanji to. (Buak. 3:14-17) Wewe mumone ne: ukadi utuadija kunanga makuta, shintulula meji ebe musangu umue. (1 Tim. 6:7, 8) Wewe kuyi muenze nanku, neushale muoyo eku muoyo eku, ne Yehowa kakuitaba ntendelelu webe to. Udi “ulomba bua kumulamata anu yeye.” (Dut. 4:24) Nunku mmunyi mudi makuta mua kulua ne mushinga wa bungi kutudi?

7-9. Bualu buvua bufikile David budi bukulongesha tshinyi?

⁷ Tuangate tshilejilu tshia David wa mu États-Unis. Muanetu eu mmukulu muenji wa mudimu. Yeye nkayende udi wamba muvuaye wenza mudimu ku mudimu kuabu mukusu uya pa nyima. Bakamubandisha muanzu, kufikabu too ne ku dimuangata bu umue wa ku benji ba mudimu ba tshisumi mu ditunga diabu. Udi wamba ne: “Tshikondo atshi mvua ngela meji ne: masanka amvua mpeta avua tshijadiki tshia ne: Yehowa uvua umbenesha.” Kadi mmuomu anyi?

⁸ David wakabanga kumona ne: mudimu uvuaye wenza uvua wenda umunyangila malanda ende ne Yehowa. Udi wamba ne: “Pamvua mu bisangilu nansha mu buambi, mvua ndimona nkadi mutume meji ku malu a ku mudimu. Mvua mpeta makuta a bungi, kadi malu akavua antonda bikole, ne nkavua ne bilumbu mu dîku dianyi.”

⁹ David wakafika ku dimona ne: bivua bikengela amanye malu avuaye ne bua kuteka pa muaba wa kumpala. Udi wamba ne: “Ngakangata dipangadika dikole dia kuakaja malu tshiyi  nshintuluka to.” David wakajinga kuakajilula mêba avuaye wenza mudimu, kuyaye kuleja mfumuende wa mudimu bualu abu. Tshiakenzeka ntshinyi? Bakamuipata ku mudimu! Wakenza tshinyi? Udi wamba ne: “Mbuenze anu butshia panyi nguwuja dilomba dia mudimu wa bumpanda-njila buambuluishi bua tshiyi ngimanyika to.” Yeye ne mukajende bakatuadija kuenza midimu ya dikolopa nzubu ya midimu bua kupeta mushindu wa kudiambuluisha. Panyima pa matuku, wakangata bumpanda-njila bua pa tshibidilu, mukajende kuluaye pende kubuangata. Muanetu eu ne mukajende bakitaba bua kuenza mudimu uvua bantu ba bungi bapepeja, kadi tshidi ne mushinga wa bungi kudibu ki mmudimu udibu benza eu to. Nansha mudi makuta adibu bapeta mikale tshia dikumi tshia a kumpala, ngondo yonso badi bapeta makuta adi akumbana kusumba bidibu nabi dijinga. Mbasue kuteka Yehowa pa muaba wa kumpala, ne mbadimuenene ne abu abidi mudiye ukumbaja majinga a bantu badi bateka malu a Bukalenge pa muaba wa kumpala.​—Mat. 6:31-33.

10. Mmunyi mutudi mua kulama muoyo wetu?

¹⁰ Nansha tuetu ne makuta makese anyi a bungi, bidi bikengela tulame muoyo wetu. Mushindu kayi? Katunangi biuma to. Kulekedi mudimu wa bianza ulue ne mushinga wa bungi kupita mudimu wa Yehowa to. Ntshinyi tshiudi mua kuenza bua kumanya ni ukadi mukuluke mu buteyi ebu? Udi mua kudiela nkonko bu mudi eyi: ‘Pantu mu bisangilu anyi mu buambi, ntu ntamba kutuma meji ku mudimu wanyi wa bianza anyi? Ntu anu nsamisha mutu bua kumanya ni ngapeta makuta bungi bukumbane matuku adi kumpala anyi? Makuta ne bintu bia ku mubidi bikadi bikebesha bilumbu mu dibaka dianyi anyi? Ndiku mudiakaje bua kuenza mudimu udi unshila dîba dia bungi dia kuenzela Yehowa Nzambi mudimu nansha bantu bakuabu bobu bawupepeja anyi?’ (1 Tim. 6:9-12) Patudi tuelangana meji a nkonko eyi, tudi ne bua kuvuluka ne: Yehowa mmutunange ne mmulaye bantu badi bamueyemena bualu ebu: “Tshiakukushiya nansha kakese, tshiakukulekela nansha kakese.” Ke bualu kayi mupostolo Paulo wakafunda ne: “Nsombelu wenu kikadi wa dinanga dia makuta.”​—Eb. 13:5, 6.

11. Mishindu ya dipitshisha kapepe idi mua kuenzela muntu tshinyi?

¹¹ Yehowa mmusue bua tuikale ne disanka, ne dipitshisha kapepe didi mua kutupeteshadi. Mu bulelela, Dîyi dia Nzambi didi diamba ne: “Kakuena bualu budi buimpe kudi muntu budi  bupite kudia, kunua ne kupetela disanka mu mudimu wende mukole.” (Muam. 2:24) Kadi mishindu ya bungi ya dipitshisha kapepe ya panu idi mua kutunyanga. Idi inyanga bikadilu bimpe bia bantu, ibasaka ku ditaba malu adi Nzambi ubenga anyi mene ku diananga.

12. Bilondeshile 1 Kolinto 10:21, 22, bua tshinyi mbimpe kusungula mishindu ya dipitshisha kapepe ne budimu buonso?

¹² Tudi basue kulamata anu Yehowa nkayende, ke bualu kayi katuena mua kudia ku “mêsa a Yehowa” ne ku “mêsa a bademon” to. (Bala 1 Kolinto 10:21, 22.) Kudia biakudia ne muntu kutu kutamba kuleja ne: tutu nende bulunda. Tuetu tusungula mishindu ya dipitshisha kapepe idi isakangana ku malu a tshikisu, a bademon, ku buenzavi, anyi ku majinga makuabu mabi ne ngenyi mibi, mu bulelela tudi tudia biakudia bilambe kudi baluishi ba Nzambi. Tuetu tuenza nanku tudi tudinyanga ne tunyanga kabidi malanda etu ne Yehowa.

13-14. Bilondeshile Yakobo 1:14, 15, bua tshinyi tudi ne bua kuikala ne budimu patudi tusungula mishindu ya dipitshisha kapepe? Fila tshilejilu.

¹³ Tukonkononayi mishindu misunguluke ibidi idi dipitshisha kapepe difuanangane ne biakudia. Patudi tudia tudi mua kusungula bintu bitudi tuela mukana. Kadi patudi anu tubimina, mubidi nkayawu udi ubanga kubitata ne bidiishi bia mubidi bidimu bidi bibuelekana mu mubidi mujima. Biakudia bimpe bidi bifila makanda a mubidi; bia bibi bidi biobi binyanga mubidi. Tshidibi bienza mu mubidi katshiena mua kumueneka diakamue to, kadi tshitu tshilua kumueneka pashishe.

¹⁴ Ke mudibi kabidi patudi tusungula mishindu ya dipitshisha kapepe; tuetu ke badi ne bukenji bua kusungula tshitudi basue kubueja mu lungenyi luetu. Padi malu au abuela mu lungenyi luetu, owu nkayawu ke adi abanga kushintulula mushindu utudi tuela meji ne utudi tudiumvua. Mushindu muimpe wa dipitshisha kapepe udi utupeshilula bukole, kadi wa mubi udi utunyanga. (Bala Yakobo 1:14, 15.) Tshitu dipitshisha kapepe mu mushindu mubi dikebesha katshitu tshimueneka diakamue to, kadi kamana kamana tshitu tshilua anu kumueneka. Ke bualu kayi Bible udi utudimuija ne: “Kanudidingi: Nzambi kabena mua kumuseka to. Bualu tshionso tshidi muntu ukuna, ke tshiapuolaye kabidi; bualu muntu udi ukunyina mubidi wende bintu neapuole dibola dia kudi mubidi wende.” (Gal. 6:7, 8) Bidi bikengela kubenga mishindu yonso ya dipitshisha kapepe idi ikankamija malu adi Yehowa mukine.​—Mis. 97:10.

15. Ntshintu kayi tshimpe tshidi Yehowa mutupeshe?

¹⁵ Batendeledi ba Yehowa ba bungi batu basue kumona TV wetu wa JW. Muanetu kampanda wa bakaji diende Marilyn wakamba ne: “TV wa JW mmungambuluishe bua kuikala muntu wa disanka, ne ntu ndonda bionso bidimu bualu kamutu tshintu tshibi to. Pantu ndimona nkaya anyi mutekeshibue mu mikolo, ntu nkeba muyuki kampanda anyi ntendelelu kampanda wa mu dîku wa meme kumona udi mua kunkankamija. Pantu ngenza nunku ntu ndiumvua pabuipi menemene ne Yehowa ne bulongolodi buende. TV wa JW mmushintulule nsombelu wanyi mujima.” Dipa dia kudi Yehowa edi ditu dikuambuluisha pebe anyi? TV wa JW utu ne ndongamu mupiamupia ngondo yonso, kabidi ne bintu bia kuteleja, filme ya kumona, ne misambu idi ikankamija biudi mua kulonda dîba kayi dionso.

16-17. Bua tshinyi mbimpe kukosa dîba ditudi tupitshisha kapepe? Mmunyi mutudi mua kuenza nanku?

¹⁶ Tudi ne bua kuikala ne budimu patudi tusungula mushindu wa kupitshisha kapepe utudi basue ne kukosa dîba dia kupitshisha kapepe. Tshianana tudi mua kupitshisha dîba dia bungi mu dipitshisha kapepe kadi tupitshisha anu dikese mu dienzela Yehowa mudimu. Bitu bikolela bantu ba bungi bua kukosa dîba dia  kupitshisha kapepe. Muanetu kampanda wa bidimu 18 diende Abigail udi wamba ne: “Pantu nkutula mudimu kua dinda too ne kua dilolo, bitu bintshiokesha. Kadi kutangila TV ku dilolo kutu kunsulakaja bikole. Meme tshiyi mudimuke, ndi mpitshishaku mêba a bungi.” Muanetu mukuabu diende Samuel udi wamba ne: “Bikadi bimfikile bua kutangila tufilme tua bungi ku Enternete kadi katuyi anu tujika to. Mvua nganji ntuadija ne kamue, ne muvua mêba asatu anyi anayi apita tshivua ngumvua to.”

¹⁷ Ntshinyi tshiudi mua kuenza bua kukosa dîba diudi upitshisha kapepe? Tshia kumpala, anji manya bungi bua mêba autu wenza kuonso eku bua kupitshisha kapepe. Anji tetabi kuafunda bua lumingu lujima. Angata kalandriye ufundapu bungi bua dîba diutu wenza ku TV, ku Enternete, ne pautu unaya manaya a mu telefone. Wewe mumone ne: udi upitshisha dîba dipite bungi, enza programe. Teka malu adi ne mushinga wa bungi pa muaba wa kumpala, mu dîba didi dishala ukebe dia kupitshisha kapepe. Pashishe lomba Yehowa akuambuluishe bua wikale unemeka programe webe au. Dîba adi neupete dîba ne bukole biudi nabi dijinga bua kudilongela Bible, kuenza Ntendelelu wa mu dîku, kubuela mu bisangilu, ne kuenza mudimu wa kuyisha ne kulongesha bantu. Pamuapa kuakutamba kabidi kudipisha bua dîba diudi wenza mu dipitshisha kapepe to.

18-19. Mmunyi mutudi mua kuleja ne: tudi balamate anu Yehowa nkayende?

¹⁸ Mupostolo Petelo mumane kufunda bua kabutu ka bulongolodi bua Satana ne bua bulongolodi bupiabupia budi bulua, wakamba ne: “Bananga, bu munudi bindile malu aa, nuenze muenu muonso bua ndekelu wa bionso [Yehowa] anusangane kanuyi katoba, kanuyi kalema, ne mu ditalala.” (2 Pet. 3:14) Patudi tutumikila mubelu eu ne tuenza ne muetu muonso bua kuikala ne bikadilu bilenga ne kutendelela Yehowa mudiye musue, tudi tuleja mutudi bamulamate anu yeye nkayende.

¹⁹ Satana ne ba mu bulongolodi buende nebatungunuke ne kutusaka bua tuteke bintu bikuabu pa muaba wa kumpala, tutume Yehowa panyima. (Luka 4:13) Kadi nansha tuetu bapete ntatu ya mushindu kayi, katuakuitaba bua muntu anyi tshintu kampanda kuangata muaba wa Yehowa mu muoyo wetu to. Tudi badisuike bua kupesha Yehowa tshidi tshimuakanyine anu yeye nkayende, tuambe ne: kumulamata anu yeye!