MUMANYI wa malu a mutu kuulu udi utangila tshimfuanyi kampanda tshienda tshidivunga tshidibu bamuleja kudi tshiamu tshitu tshimuambuluisha bua kumanya mutu kuulu. Udi umona ne: tshipepele tshikole tshikadi pa kututa muaba kampanda udi bantu ba bungi. Bu mudiye uditatshisha bua bantu, udi wenza ne muende muonso bua kubadimuija kumpala kua dîba.

Bia muomumue, Yehowa udi wenda udimuija bantu lelu bua “tshipepele tshikole,” tshibi tshitambe tshitu muntu nansha umue kayi muanji kumvua bakula bua bualu buatshi. Mmunyi mudiye wenza nanku? Ntshinyi tshidi tshitujadikila ne: utu udimuija bantu kumpala kua dîba bua bobu kutapa ntala kudimuka? Bua kuandamuna nkonko eyi, tuanji kumona amue malu avua Yehowa mudimuije bantu ku kale.

Kale, Yehowa uvua udimuija bantu bua “bipepele bikole” bishilashilangane anyi manyoka avuaye ne bua kutumina bantu bonso bavua babenga bua kutumikila mikenji yende ku bukole. (Nsu. 10:25; Yel. 30:23) Misangu yonso ivuaye ukeba kupesha bantu dinyoka, uvua ubamanyisha kumpala kua dîba ne ubaleja tshia kuenza bua kushintuluka muvuaye musue. (2 Bak. 17:12-15; Neh. 9:29, 30) Bua kuambuluisha bantu bua kushintuluka, uvua utamba kutuma batendeledi bende ba lulamatu bua kubamanyisha ne: neabanyoke, ne kubaleja ne: bavua ne bua kuenza malu ne lukasa.​—Amo. 3:7.

Noa uvua pende wa ku bena lulamatu abu. Wakenza bidimu bia bungi umanyisha bantu bavua benzavi ne bena tshikisu ba tshikondo tshiende bua diloka dia Mvula wa kabutu kayi utshina. (Gen. 6:9-13, 17) Wakabambila kabidi tshivuabu ne bua kuenza bua kupanduka ku Mvula au, ubambila misangu ne misangu. Bua bualu abu, bakalua kumubikila ne: “muyishi wa buakane.”​—2 Pet. 2:5.

Nansha muvua Noa muenze bionso abi, bantu abu kabakateleja mukenji wa kudi Nzambi uvuaye ubambila to. Bakaleja muvuabu kabayi ne ditabuja nansha dia mafi. Bua bualu abu, bakafua pavua Mvula wa kabutu ‘mulue kubakomba bonso.’ (Mat. 24:39; Eb. 11:7) Bu muvua kabutu kabu kenda kasemena, kabavua ne tshia kudingila bua kuamba muvua Nzambi kayi mubadimuije to.

Bikondo bikuabu, Yehowa uvua udimuija bantu katupa kakese kumpala kua “tshipepele tshikole” tshia dinyoka diende kutuadija. Nansha nanku, uvua ushila bantu bavua bualu abu ne bua kufikila dîba dikumbane bua batape ntala badimuke. Tshilejilu, pavuaye wenda utumina bena Ejipitu wa kale Bipupu dikumi, uvua ubadimuija. Umue musangu, wakatuma Mose ne Alona kudi Palô ne bena mudimu bende bua kubadimuija bua tshipupu tshia muanda mutekete tshia mvula wa mabue uvua ne bua kunyangakaja bintu. Bu muvua mvula au ne bua kutuadija dituku divua dilonda, Nzambi uvuaku mubashile dîba dikumbane bua bobu kupeta muaba wa kusokomena anyi? Bible udi wamba ne: “Muntu yonso wa ku bena mudimu ba Palô uvua mutshine dîyi dia Yehowa wakabueja bena mudimu bende ne bimuna biende mu nzubu lukasa, kadi muntu yonso uvua kayi muangate dîyi dia Yehowa ne mushinga wakalekela bena mudimu bende ne bimuna biende mu mpata.” (Ekes. 9:18-21) Bidi bimueneka patoke ne: Yehowa uvua mubadimuije kumpala kua dîba. Ke bualu kayi bantu bavua benze malu ne lukasa bakapanduka ku tshipupu tshibi atshi.

Kumpala kua tshipupu tshia dikumi, bakadimuija Palô pende ne bena mudimu bende. Kadi bakenza malu bu bampudi matshi. (Ekes. 4:22, 23) Bua bualu abu, banabute babu bakafua. Bivua bienza muadi! (Ekes. 11:4-10; 12:29) Bavuaku ne mushindu wa kuteleja didimuija adi kumpala kua dîba anyi? Eyowa! Mose wakadimuija bena Isalele diakamue bua tshipupu tshia dikumi tshikavua pa kuenzeka, kubalejaye tshivuabu mua kuenza bua kupanduka bobu ne ba mu nzubu muabu. (Ekes. 12:21-28)  Mbantu bungi kayi bavua batumikile didimuija adi? Bilondeshile matshinka kampanda, bavua miliyo isatu. Mu bantu bavua bapanduke ku dinyoka dia Yehowa ne bapatuke mu Ejipitu muvua bena Isalele ne “tshisumbu tshinene tshia bantu basambakane” bavua kabayi bena Isalele, ne bena Ejipitu bakuabu.​—Ekes. 12:38; dim.

Anu mutudi bamone mu bilejilu ebi, misangu yonso Yehowa uvua wenza muende muonso bua bantu bapete dîba dikumbane dia kuteleja malu avuaye ubadimuija. (Dut. 32:4) Ntshinyi tshivua tshimusaka bua kuenza nanku? Mupostolo Petelo wakumvuija ne: Yehowa “ki mmusue bua muntu nansha umue abutudibue, kadi mmusue bua bonso bafike ku dinyingalala bua mpekatu yabu.” (2 Pet. 3:9) Bushuwa, Nzambi uvua utabalela bantu. Uvua musue bua banyingalale bua mpekatu yabu ne benze tshivua tshikengedibua kumpala kua kubapeshaye dinyoka.​—Yesh. 48:17, 18; Lomo 2:4.

Nansha lelu, bantu bonso badi ne bua kuteleja lubila ludi lulomba kuenza malu ne lukasa ludibu benda bela pa buloba bujima. Pavua Yezu pa buloba, wakadimuija bantu wamba ne: ndongoluelu wa malu udiku lelu eu nealue kubutudibua mu “dikenga dinene.” (Mat. 24:21) Bua kabutu kadi kalua aka, wakamba dîyi kampanda dia buprofete. Wakatelamu malu avua bayidi bende ne bua kumona anyi kutuilangana nawu pavua tshikondo atshi tshienda tshisemena. Nunku Yezu wakaleja malu manene avua ne bua kuenzeka pa buloba atudi tumona lelu.​—Mat. 24:3-12; Luka 21:10-13.

Mu dimvuangana ne dîyi dia buprofete adi, lelu Yehowa udi ulomba muntu yonso bua kumukokela bualu yeye ke Mfumu muimpe. Mmusue bua bantu badi bamutumikila bikale ne nsombelu muimpe mpindieu ne bapete kabidi masanka mu bulongolodi buende bupiabupia bua buakane. (2 Pet. 3:13) Yehowa mmufile mukenji wa lupandu bua kukankamija bantu bua kuikala ne ditabuja mu milayi yende. Mukenji au ‘ndumu luimpe lua Bukalenge’ luvua Yezu muambe ne: luvua ne bua ‘kuyishibua pa buloba bujima budi bantu basombele bua luikale bujadiki kudi bisamba bionso.’ (Mat. 24:14) Nzambi mmulongolole batendeledi balelela bua kufila “bujadiki” ebu anyi kuyisha mukenji wende udibu benda bamanyisha lelu mu matunga matue ku 240. Yehowa mmusue bua bantu ba bungi bateleje didimuija diende ne bapanduke ku “tshipepele tshikole” tshia dilumbuluisha diende dia buakane.​—Sef. 1:14, 15; 2:2, 3.

Nunku tshidi ne mushinga ki ntshia kumanya bikala Yehowa ni utu ushila bantu dîba dikumbane dia bobu kutapa ntala kudimuka padiye ubadimuija to. Malu akadi menzeke adi aleja ne: utu anu ubashila dîba. Kadi tshidi ne mushinga ntshia kudiebeja ne: Bantu nebatelejaku didimuija dia Nzambi patshidiku dîba anyi? Bu mutudi bamanyishi ba mukenji ba Nzambi, mbimpe tutungunuke ne kuambuluisha bantu ba bungi bua kupanduka ku nshikidilu wa ndongoluelu wa malu eu.