1. Ntshinyi tshidi Yehowa mua kuenza bua kukumbaja tshidiye mulongolole?

YEHOWA udi mua kulua tshionso tshidi tshikengela bua kukumbaja tshidiye mulongolole. Tuangate bilejilu bikese bia muvuaye mulue tshivuaye musue. Wakalua Mulongeshi, Musambi wa bantu, ne Muambi wa lumu luimpe. (Yesh. 48:17; 2 Kol. 7:6; Gal. 3:8) Kadi misangu ya bungi utu wenza mudimu ne bantu bua kukumbaja malu adiye mulongolole. (Mat. 24:14; 28:19, 20; 2 Kol. 1:3, 4) Yehowa udi kabidi mua kupesha yonso wa kutudi meji ne bukole bitudi tukengela bua kulua tshionso tshidi tshikengela bua kukumbaja disua diende. Bualu ebu ke budi bumvuija dîna dia Yehowa, anu mudi bamanyi ba bungi ba malu a mu Bible baleje pabu.

2. a) Bua tshinyi kutu misangu itudi mua kuelakana tuamba ne: Yehowa kena mua kuenza netu mudimu? b) Ntshinyi tshituamona mu tshiena-bualu etshi?

² Tuetu bonso tutu basue bua Yehowa enze netu mudimu, kadi bamue badi mua kuelakana, bamba ne: kena mua kuenza nabu mudimu to. Bua tshinyi? Bualu badi badimona kabayi bakumbane bua bukole budibu, bua nsombelu idibu nayi, anyi bua mudibu kabayi ne dimanya dia nsongo. Bakuabu bobu badi mua kumona ne: bikadibu benze mbia bungi, kabena dijinga ne kuenza bikuabu to. Mu tshiena-bualu etshi, netuakule bua mushindu udi Yehowa upaya yonso wa kutudi bua kukumbaja tshidiye mulongolole. Pashishe netukonkonone bimue bilejilu bia batendeledi ba Yehowa balume ne bakaji badi Bible mutele bidi bileja muvuaye mubapeshe bukole ne dijinga dia kuenza malu. Ku ndekelu, netumone tshitudi mua kuenza bua Yehowa enze netu mudimu.

3. Bilondeshile Filipoyi 2:13, mmushindu kayi udi Yehowa mua kukupesha dijinga dia kuenza malu?

³ Bala Filipoyi 2:13. * Yehowa udi mua kutupesha dijinga dia kuenza malu. Mushindu kayi? Tshilejilu, udi mua kumvua ne: kudi muntu mu tshisumbu udi ukengela diambuluisha anyi ne: bidi bikengela kuenza bualu kampanda mu tshisumbu. Peshi bakulu badi mua kubala mukanda udi ufumina ku Betele udi ulomba bua kuya kuambuluisha muaba udibu dijinga ne bamanyishi. Udi mua kudiebeja ne: ‘Ntshinyi tshindi mua kuenza bua kuambuluisha?’ Anyi badi mua kuikala bakupeshe mudimu kampanda mukole, kadi kuyi mumanye ni wawenza bimpe. Peshi wewe mumane kubala mvese kampanda ya mu Bible, udi mua kudiebeja ne: ‘Mmunyi mundi mua kutumikila malu aa bua kumona mua kuambuluisha bakuabu?’ Yehowa kakukuenzeja bualu nansha bumue ku bukole to. Kadi padiye umona ne: udi wela meji a kuenza bualu kampanda, udi mua kukupetesha dijinga dia kuenza tshiuvua welela meji atshi.

4. Mmushindu kayi udi Yehowa mua kutupesha bukole bua kuenza malu?

⁴ Yehowa udi kabidi mua kutupesha bukole bua kuenza malu. (Yesh. 40:29) Udi mua kutupesha nyuma wende muimpe bua kuenza malu a dikema ne bipedi bitudi nabi. (Ekes. 35:30-35) Yehowa udi mua kutulongesha mua kuenza midimu kampanda ku diambuluisha dia bulongolodi buende. Biwikala kuena muanji kumanya mua kuenza mudimu kansanga, lomba diambuluisha. Ikala kabidi mudilekelele bua kulomba Tatu wetu wa mu diulu muena tshipapayi “bukole budi bupite bua pa tshibidilu.” (2 Kol. 4:7; Luka 11:13) Mu Bible mudi bilejilu bia bungi bia muvua Yehowa mupeshe balume ne bakaji dijinga ne bukole bua kuenza malu bua kubapaya. Patudi tuenda tumona bimue bia kudibi, ela meji bua mudi Yehowa mua kuenza nebe mudimu mu mushindu wa muomumue.

5. Mushindu uvua Yehowa muenze mudimu ne Mose ne dîba divuaye muenze nende mudimu bua kusungila bantu bende bidi bitulongesha tshinyi?

⁵ Yehowa wakavuija Mose musungidi wa bena Isalele. Kadi ndîba kayi divuaye muenze nende mudimu? Ndîba divua Mose mudimone mukumbane bua mukavuabu ‘bamulongeshe meji onso a bena Ejipitu’ anyi? (Bien. 7:22-25) Tòo, Yehowa wakenza nende mudimu anu pakavuaye mumuvuije muena budipuekeshi, muena malu mapole. (Bien. 7:30, 34-36) Yehowa wakapesha Mose dikima dia kuimana kumpala kua mukalenge uvua ne bukole bua bungi menemene mu Ejipitu. (Ekes. 9:13-19) Mushindu uvua Yehowa muenze mudimu ne Mose ne dîba divuaye muenze nende mudimu bidi bitulongesha tshinyi? Yehowa udi wenza mudimu ne bantu badi bidikija ngikadilu yende ne bamueyemena bua abapeshe bukole.​—Filip. 4:13.

6. Mushindu uvua Yehowa mukuate mudimu ne Bâzilai bua kuambuluisha Davidi udi utulongesha tshinyi?

⁶ Bidimu bia bungi pashishe, Yehowa wakenza mudimu ne Bâzilai bua kuambuluisha mukalenge Davidi. Davidi ne bantu bende bavua ne ‘nzala, batshioke ne bikale ne nyota’ pavuabu benda banyema muanende Abashaloma. Tshikondo atshi, Bâzilai ukavua mukulakaje; kadi yeye ne bantu bakuabu bakateka mioyo yabu mu njiwu bua kuambuluisha Davidi ne bavuaye nabu. Bâzilai kavua muambe ne: bu mukavuaye mukulakaje, Yehowa kavua mua kuenza kabidi nende mudimu to. Kadi wakafila bintu biende ne tshianza tshilekelela bua kuambuluisha bantu ba Nzambi bavua nabi dijinga. (2 Sam. 17:27-29) Bidi bitulongesha tshinyi? Nansha tuetu bukole kayi, Yehowa udi mua kuenza netu mudimu bua kukumbaja majinga a bena kuitabuja netu ba muaba utudi anyi ba muaba mukuabu badi dijinga ne tshiakudia anyi tshia kuvuala. (Nsu. 3:27, 28; 19:17)  Nansha katuyi ne mushindu wa kudifidila nabi ku tshianza, tudi mua kufila makuta bua mudimu wa pa buloba bujima bua kuikale makuta a kuambuluisha nawu bana betu padibi bikengela.​—2 Kol. 8:14, 15; 9:11.

7. Mmunyi muvua Yehowa muenze mudimu ne Shimeona? Kumanya bualu ebu kudi kutukankamija mushindu kayi?

⁷ Yehowa uvua mulaye mukulakaje mukuabu muena lulamatu wa mu Yelushalema diende Shimeona ne: kavua mua kufua kayi mumone Masiya to. Mulayi au uvua ne bua kuikala mumukankamije bikole bualu kukavua bidimu bia bungi bivuaye muindile Masiya. Ditabuja diende ne dinanukila diende kabiakaya mu mâyi to. Dimue dituku, wakalua mu ntempelo “ku bukole bua nyuma,” yeye kumonamu Yezu utshivua mu maboko. Yehowa wakamusaka bua kuamba mêyi a buprofete avua atangila muana uvua ne bua kulua Kristo eu. (Luka 2:25-35) Nansha muvua Shimeona kayi pamuapa mushale kabidi ne muoyo matuku a bungi bua kumona muvua Yezu ukumbaja mudimu wende pa buloba, uvua ne dianyisha dia bungi bua diakalenga divuaye mupete adi; kadi bia dikema ne dianyina mbimuindile kumpala eku! Mu bulongolodi bupiabupia, muena lulamatu eu neamone muikala bukokeshi bua Kristo mua kupetesha mêku onso a pa buloba mabenesha. (Gen. 22:18) Tuikalayi petu ne dianyisha dia bungi bua mushindu wonso udi Yehowa wenza netu mudimu.

8. Mmunyi mudi Yehowa mua kuenza netu mudimu muvuaye muenze ne Bânaba?

⁸ Mu bidimu lukama bia kumpala, muntu kampanda uvua ne muoyo wa kupa diende Jozefe uvua mudiakaje bua Yehowa enze nende mudimu. (Bien. 4:36, 37) Bidi bimueneka ne: Jozefe uvua mumanye kukankamija bakuabu. Ke bualu kayi bapostolo bakamuinyika ne: Bânaba, mmumue ne: “Muana wa busambi.” Tshilejilu, pakavua Shaula mulue muena kuitabuja, bena Kristo ba bungi bavua bamutshina bualu kumpala uvua ukengesha bisumbu. Kadi Bânaba yeye wakakankamija Shaula ne wakamuambuluisha. Shaula uvua ne bua kuikala ne dianyisha dia bungi bua bualu abu. (Bien. 9:21, 26-28) Pakapita matuku, bakulu ba mu Yelushalema bakamona ne: bivua bikengela kukankamija bena Kristo nabu bavua ntanta mule ku Antiokia wa mu Sulia. Bakatuma nganyi? Bânaba! Kabavua bele bua tshiombe musabu to. Bible udi utuambila ne: Bânaba ‘wakatuadija kubakankamija bonso bua batungunuke mu Mukalenge, badisuike ne muoyo umue.’ (Bien. 11:22-24) Nansha lelu kabidi, Yehowa udi mua kutuvuija ‘bana ba busambi’ bua kuambuluisha bena Kristo netu. Tshilejilu, udi mua kutusaka bua kusamba badi bafuishe. Udi kabidi mua kutusaka bua kuya kutangila muntu udi usama anyi udi ne malu mamutonde bua kumuambila mêyi mimpe anyi kumubikila ku telefone. Newitabe bua Yehowa enze nebe mudimu anu muvuaye muenze ne Bânaba anyi?​—1 Tes. 5:14.

9. Mushindu uvua Yehowa muambuluishe Vasily bua kulua mulami muimpe wa mikoko udi utulongesha tshinyi?

⁹ Yehowa wakambuluisha muanetu mukuabu diende Vasily bua kulua mulami muimpe wa mikoko. Pavua Vasily mulue mukulu, uvua ne bidimu 26. Kadi uvua ne buôwa wela meji ne: kavua mukumbane bua kuambuluisha bena Kristo nende to, nangananga bavua mu ntatu. Kadi bakulu bakavua bamonemone malu bakamuambuluisha bikole, ne wakalonga kabidi malu a bungi mu Kalasa ka mudimu wa Bukalenge. Vasily wakadienzeja bikole bua kumbusha buôwa. Tshilejilu, wakadifundila bipatshila bikese bivuaye ne bua kukumbaja. Pavuaye wenda ubikumbaja tshimue ku tshimue, buôwa buende buvua buenda buya kuabu. Lelu udi wamba ne: “Malu avua angenza buôwa tshikondo atshi ke akadi ampetesha disanka dia bungi mpindieu. Patu Yehowa ungambuluisha bua kupeta mvese udi ukengela bua kuambuluisha nende muena Kristo nanyi mu tshisumbu, bitu bingenza disanka dia bungi be!” Bana betu, nuenu badiakaje bua Yehowa enze nenu mudimu anu bu Vasily, udi mua kunuambuluisha  bua nukumbane penu bua kuambuluisha tshisumbu bikole.

10. Ntshinyi tshivua Abigayila muenze? Tshilejilu tshiende tshidi tshikulongesha tshinyi?

¹⁰ Bavua benda bipatangana ne Davidi ne bantu bende kudi mukalenge Shaula; nunku bavua dijinga ne diambuluisha. Bantu ba Davidi bakaya kudi muena Isalele kampanda uvua mubanji diende Nabala bua kumulomba ndambu wa biakudia, tshionso tshivuaye mua kubapesha. Bakamona ne: bavua mua kumulomba bualu bavua bamulamine mikoko mu tshipele. Kadi bu muvua Nabala ne minu mikole, kakabapesha kantu nansha kamue to. Davidi wakafiika munda bikole, kupangadijaye bua kuya kushipa Nabala ne muntu mulume yonso wa kuende. (1 Sam. 25:3-13, 22) Kadi Abigayila mukaji wa Nabala uvua ne busunguluji bua malu ne uvua muimpe kumona. Wakaleja muvuaye ne dikima dikole, kudielaye ku makasa a Davidi umusengelela bua kadisombuedi bualu uvua mua kupia dibanza dia mashi. Wakamubela ne bukalanga buonso bua ashiye malu au mu bianza bia Yehowa. Mêyi a Abigayila mamba ne budipuekeshi ne bienzedi biende bia meji biakalenga Davidi, kufikaye ku dijingulula ne: Yehowa ke uvua mutume mukaji au. (1 Sam. 25:23-28, 32-34) Abigayila uvua muditatshishe bua kuikala ne ngikadilu ivua mienze bua Yehowa enze nende mudimu. Lelu Yehowa udi mua kuenza kabidi mudimu ne bana betu ba bakaji badi baditatshisha bua kuikala ne busunguluji bua malu ne baditatshisha bua kuakula ne bukalanga bua kukolesha mêku abu ne bana betu bakuabu mu tshisumbu.​—Nsu. 24:3; Tito 2:3-5.

11. Ntshinyi tshivua bana ba bakaji ba Shaluma benze? Lelu eu badi babidikija mbanganyi?

¹¹ Bidimu bia bungi pashishe, Yehowa wakenza mudimu ne bamue bantu bua kuibakulula bimanu bia Yelushalema. Mu bantu abu muvua kabidi bana ba bakaji ba Shaluma. (Neh. 2:20; 3:12) Nansha muvua tatuabu Shaluma mukalenge, bana ba bakaji abu bavua badiakaje bua kuenza mudimu mukole uvua ne njiwu au. (Neh. 4:15-18) Bavua bashilangane bikole ne bena Tekoa bakuabu bavua bende lumu “bakabenga bua kudipuekesha bua kuenza” pabu mudimu au! (Neh. 3:5) Fuanyikijabi disanka divua bana ba bakaji abu mua kuikala nadi pavua mudimu au muenze anu matuku 52 tshianana! (Neh. 6:15) Lelu, bana betu ba bakaji batu ne disanka dia kuambuluisha mu midimu kampanda ya pa buayi, bu mudi ya dibakila Yehowa nzubu ne diyilama bimpe. Mamanya abu, musangelu wabu, ne lulamatu luabu bitu biambuluisha bua mudimu eu wikale wenzeka bimpe.

12. Mmunyi mudi Yehowa mua kuenza netu mudimu muvuaye muenze ne Tabita?

¹² Yehowa wakasaka Tabita bua ikale wenzelangana ‘malu mimpe a bungi ne upeshangana bintu bia luse,’ ubienzela nangananga bakaji bakamba. (Bien. 9:36) Bu muvuaye muntu wa pa buende mu dipeshangana bintu ne tshianza tshilekelela ne wenzelangana malu malenga, bantu ba bungi bakamudila pakashiyanganaye ne buloba. Kadi pakamubisha mupostolo Petelo, miadi yabu yakakudimuka masanka. (Bien. 9:39-41) Tshilejilu tshia Tabita tshidi tshitulongesha tshinyi? Nansha tuetu bana anyi bakulumpe, balume anyi bakaji, tuetu bonso tudi mua kuenza malu kampanda bua kuambuluisha bena Kristo netu.​—Eb. 13:16.

13. Mmunyi muvua Yehowa muenze mudimu ne Ruth uvua muena bundu? Ntshinyi tshivuaye mulue kuamba?

¹³ Muanetu kampanda wa bakaji diende Ruth uvua musue kulua misionere, kadi uvua muntu wa bundu. Ku buana buende, uvua ne tshisumi mu mudimu wa buambi. Pavuabu bayisha ku nzubu ne ku nzubu, uvua uya lubilu bua kufila trakte. Udi wamba ne: “Mvua munange mudimu au bulelela.” Kadi bivua bimukolela bua kuimana ku tshiibi tshia muntu bua kumuambila bualu bua Bukalenge bua Nzambi. Nansha muvuaye muena bundu amu, wakalua mpanda-njila wa pa tshibidilu ne  bidimu 18. Mu 1946 wakabuela mu Kalasa ka Gilada, pashishe kumutumabu mu Hawaii ne mu Japon. Yehowa wakenza nende mudimu mu mushindu wa dikema bua kumuangalaja lumu luimpe mu matunga au. Panyima pa bidimu bitue ku 80 bikadiye muenze mu mudimu wa kuyisha, udi wamba ne: “Yehowa utu anu unkolesha bikole. Mmungambuluishe bua kujikija bundu. Ndi mutuishibue ne muoyo mujima ne: udi mua kuenza mudimu ne muntu yonso udi umueyemena.”

14. Bilondeshile Kolosayi 1:29, ntshinyi tshitudi ne bua kuenza tuetu basue bua Yehowa enze netu mudimu?

¹⁴ Katshia ku kale, Yehowa mmuenze bua batendeledi bende bakumbaje midimu mishilashilangane. Ntshinyi tshiakuvuijaye? Bidi bitamba kulondeshila mushindu uudi mudiakaje bua kudienzeja. (Bala Kolosayi 1:29.) Wewe mudiakaje bua Yehowa enze nebe mudimu, udi mua kukuvuija mumanyishi wa lumu luimpe wa tshisumi, mulongeshi muimpe, muntu udi ukumbana kusambangana, muenji wa mudimu mupiluke, mulunda udi wambuluisha bakuabu, anyi kukuvuija tshionso tshidiye musue bua kukumbaja disua diende.

15. Bilondeshile 1 Timote 4:12, 15, lelu mbimpe bansonga balombe Yehowa tshinyi?

¹⁵ Kadi buenu nuenu bansonga badi batangile ku dikulumpa? Kudi dijinga dia bungi dia balume ba makanda badi mua kulua basadidi ba mudimu bua kuambuluisha tshisumbu. Mu bisumbu bia bungi, bakulu mbapite basadidi ku bungi. Kakuenaku bansonga badi mua kupeta dijinga dia kuambula majitu makuabu mu tshisumbu anyi? Imue misangu, bana betu bakuabu batu bamba ne: “Tudi basue kushala anu bamanyishi ba lumu luimpe.” Wewe wamba pebe nanku, lomba Yehowa akuambuluishe bua upete dijinga dia kulua musadidi ne akupeshe bukole bua kuenza tshionso tshiudi mua kuenza mu mudimu wende. (Muam. 12:1) Tudi nebe dijinga!​—Bala 1 Timote 4:12, 15.

16. Ntshinyi tshitudi ne bua kulomba Yehowa? Bua tshinyi?

¹⁶ Yehowa udi mua kuenza bua ulue tshionso tshidiye musue bua kukumbaja disua diende. Nunku mulomba bua akupeshe dijinga dia kumuenzela mudimu, pashishe mulomba kabidi bukole buudi nabu dijinga. Nansha wewe muana anyi mukulumpe, angata dîba diebe, makanda ebe, ne bintu bikuabu biudi nabi bua kutumbisha nabi Yehowa mpindieu. (Muam. 9:10) Paudi upeta mpunga kampanda wa kuenza bia bungi mu mudimu wa Yehowa, kubengi lukasa lukasa wela meji ne: kuakukumbana bua kuwenza to. Kuenza tshionso tshitudi mua kuenza bua kupesha Tatuetu wetu wa dinanga butumbi budi bumuakanyine ndiakalenga dia dikema ditudi nadi!