1. Bua tshinyi tudi tuamba ne: mudimu wa kuvuija bantu bayidi udi usungila mioyo ya bantu?

MUDIMU wa kuvuija bantu bayidi mmudimu udi usungila mioyo ya bantu! Bua tshinyi tudi tuamba nanku? Pavua Yezu mutume dîyi didi mu Matayi 28:19, 20, wakamba ne: “Ndayi nuvuije bantu . . . bayidi, nubabatiza.” Bua tshinyi kubatijibua kudi ne mushinga? Muntu yonso udi musue kupeta muoyo wa tshiendelele udi ne bua kubatijibua. Muntu udi musue kubatijibua udi ne bua kumanya ne: tudi tupeta lupandu anu bualu Yezu wakafua lufu lua mulambu ne wakabishibua ku lufu. Ke bualu kayi mupostolo Petelo wakambila bena Kristo nende ne: “Dibatiza [didi] dinupandisha penu mpindieu . . . ku diambuluisha dia dibishibua dia Yezu Kristo ku lufu.” (1 Pet. 3:21) Nunku padi muyidi mupiamupia ubatijibua, udi uditeka mu mulongo wa bantu balua kupeta lupandu.

2. Tudi ne bua kuikala balongeshi ba mushindu kayi bilondeshile 2 Timote 4:1, 2?

² Bua kuvuija bantu bayidi, bidi bikengela ‘tumanye kulongesha.’ (Bala 2 Timote 4:1, 2.) Bua tshinyi? Bualu Yezu wakamba ne: “Ndayi nuvuije bantu . . . bayidi, nubalongesha.” Mupostolo Paulo wakamba bua ‘kusuminyina’ mu mudimu au, “bualu paudi wenza nanku neudipandishe wewe muine ne bantu badi bakuteleja.” Nunku Paulo uvua muambilamu pakambaye ne: “Wikale mudimuke mu . . . dilongesha diebe.” (1 Tim. 4:16) Bu mudi kulongesha kusuikakane ne kuvuija bantu bayidi, tudi basue bua ndongeshilu wetu ikale muimpe menemene.

3. Ntshinyi tshituakonkonona mu tshiena-bualu etshi bua dilonga Bible ne bantu?

³ Tutu tulongesha bantu miliyo ne miliyo bulelela bua mu Bible. Kadi anu mutuvua bamone mu tshiena-bualu tshishale, mbimpe  tumanye mutudi mua kuambuluisha ba bungi ba kudibu bua kuluabu bayidi ba Yezu Kristo babatijibue. Mu tshiena-bualu etshi, netumone malu makuabu atanu adi mulongeshi yonso ne bua kuenza bua kufikisha mulongi too ne ku batismo.

4. Bua tshinyi mulongeshi udi ne bua kuikala udikanda padiye ulongesha muntu Bible? (Tangila kabidi dimanyisha dia kuinshi.)

⁴ Tutu banange malu a mu Dîyi dia Nzambi atutu tulongesha. Nunku muoyo udi mua kutusaka bua kupita kuakula bua malu atudi banange. Kadi nansha muntu yeye ulombola Dilonga dia Tshibumba tshia Nsentedi, Dilonga dia Bible dia tshisumbu, anyi ulongesha muntu Bible, kena ne bua kuikala wakula bia bungi to. Bua kuenza bua Bible nkayende akule, mulongeshi udi ne bua kuikala udikanda, kayi anu ujinga bua kumvuija malu onso adiye mumanye pa mvese kampanda wa mu Bible anyi pa tshiena-bualu kansanga to. * (Yone 16:12) Anji fuanyikijabi dimanya dia malu a mu Bible diuvua nadi dîba diuvua mubatijibue ne diudi nadi mpindieu. Pamuapa dîba adi, uvua mumanye anu malongesha a nshindamenu a mu Bible patupu. (Eb. 6:1) Udi muenze bidimu bia bungi bua kulonga malu audi mumanye lelu. Nanku kujingi bua kulongesha mulongi mupiamupia malu onso musangu umue to.

5. a) Bilondeshile 1 Tesalonike 2:13, ntshinyi tshitudi basue bua mulongi umvue padiye ulonga? b) Mmunyi mutudi mua kukankamija mulongi bua ikale wambila bantu malu adiye ulonga?

⁵ Mbimpe mulongi wetu umvue ne: malu adiye ulonga adi afumina mu Dîyi dia Nzambi. (Bala 1 Tesalonike 2:13.) Mmunyi mutudi mua kumuambuluisha? Kankamija mulongi bua ikale wambila bantu malu adiye ulonga. Pamutu pa wewe kuikala anu umumvuija mvese yonso, muambila ikale ukumvuija pende mikuabu. Ambuluisha mulongi amone mudi Dîyi dia Nzambi dimutangila yeye. Muela nkonko idi mua kumusaka bua kuleja mudiye wela meji anyi umvua bua mvese idiye ubala anyi bua afile wende mmuenenu bua mvese ayi. (Luka 10:25-28) Tshilejilu, udi mua kumuebeja ne: “Mmunyi mudi mvese eu mukuambuluishe bua kumona umue wa ku ngikadilu ya Yehowa?” “Mmunyi mudi tshidi Bible muambe etshi mua kukuambuluisha?” “Udi umvua bishi bua bualu buudi mulonge ebu?” (Nsu. 20:5) Tshidi ne mushinga ki mbungi bua malu adi mulongi mumanye to, kadi mmushindu udiye munange malu adiye mumanye ne uatumikila.

6. Bua tshinyi bidi mua kuikala bimpe bua kuya ne mumanyishi mupiluke paudi uya kulombola dilonga dia Bible?

⁶ Pautu uya kulombola malonga ebe a Bible, utuku uya ne bamanyishi bakadi balongeshi  bapiluke anyi? Wewe wenza nanku udi mua kubebeja bakuambile ni udi mulombole bimpe ne kabidi ni udi muenze bua Bible ikale ulongesha. Udi ne bua kuikala ne budipuekeshi wewe musue kulengeja mishindu yebe ya kulongesha. (Fuanyikija ne Bienzedi 18:24-26.) Pashishe, webeje mumanyishi mupiluke akuambile bikalaye mumone pende ne: mulongi au udi umvua bidiye ulonga abi. Udi mua kulomba kabidi mumanyishi au bua alombole dilonga adi biwikala mumbuke lumingu lumue anyi mbingu ya bungi. Nunku nebienze bua dilonga dikale dienzeka anu pa tshibidilu ne nebileje mulongi mudi dilonga diende dia Bible dikale ne mushinga. Kuedi meji ne: adi dilonga “ndiebe wewe,” ne muntu mukuabu kena mua kudilombola to. Si utu ujingila mulongi webe malu mimpe, bua ikale uya anu kumpala mu dilonga diende dia bulelela.

7. Ntshinyi tshidi mua kuambuluisha mulongi bua kusankaye bua bidiye ulonga?

⁷ Bidi bikengela mulongi amone ne: udi ne disanka ne udi mutuishibue ne bulelela bua mu Bible. (1 Tes. 1:5) Nanku malu adiye ulonga adi mua kubanga kumusankisha bikole. Biobi bikumbana, muambila mukadi ditumikila dia mêyi manene a mu Bible dikuambuluishe wewe muine. Dîba adi neafike ku dimona ne: mu Bible mudi mibelu idi mua kumuambuluisha pende.

8. Ntshinyi tshiudi mua kuenza bua kubotesha dilonga dia Bible? Bua tshinyi mbimpe kuenza nanku?

⁸ Panudi nulonga, ikala utelela mulongi webe bilejilu bia bena Kristo bavua bapete ntatu ya buena yende ne bayitantamene. Udi mua kuya kulombola dilonga ne muena mu tshisumbu udi tshilejilu tshiende mua kuambuluisha mulongi. Peshi udi mua kupeta malu adi alenga ku muoyo mu site wetu wa jw.org mu biena-bualu bitu bipatuka mu tshitupa tshia “Bible utu ushintulula bantu.” * Biena-bualu bia nunku ne filme idimu nebiambuluishe mulongi webe bua kumona ne: mbimpe kutumikila mêyi manene a mu Bible.

9. Mmushindu kayi uudi mua kukankamija mulongi bua ikale wambila bena mu dîku diabu ne balunda bende bidiye ulonga?

⁹ Mulongi webe yeye mu dibaka, muena dibaka nende udi ulonga pende anyi? Yeye kayi ulonga, mubikila abuele pende mu dilonga adi. Kankamija mulongi bua ikale wambila balunda bende ne bena mu dîku diabu anyi diende bidiye ulonga. (Yone 1:40-45) Mmushindu kayi uudi mua kuenza nanku? Udi mua kumuebeja patupu ne: “Udi mua kumvuija bena mu dîku dienu anyi diebe bualu buudi mulonge ebu bishi?” anyi ne:  “Mmvese kayi uudi mua kubadila mulunda webe bua kumujadikila bualu buudi mulonge ebu?” Wewe wenza nunku, newikale ulongesha mulongi webe bua kuluaye mulongeshi. Pashishe padiye ukumbana, udi mua kubanga kuyisha ne tshisumbu. Udi mua kumuebeja bikalaye mumanye muntu mukuabu udi musue kulonga Bible. Yeye mukuambilaye, monangana ne muntu au musangu umue ne mulomba bua nulonge nende. Muleja filme wa Mmushindu kayi utu dilonga dia Bible dienzeka? *

10. Mmunyi mudi mulongeshi mua kuidikija Paulo bilondeshile 1 Tesalonike 2:7, 8?

¹⁰ Balongeshi badi ne bua kutabalela balongi babu ne muoyo umue, babamona bu bena Kristo nabu ba malaba. (Bala 1 Tesalonike 2:7, 8.) Ki mbipepele bua bobu kulekela balunda babu ba panu ne kushintuluka mudibi bikengela bua kuenzela Yehowa mudimu to. Bidi bikengela tubambuluishe bua bapete balunda balelela mu tshisumbu. Ikala mulunda wa mulongi webe. Kuikadi usomba nende anu panudi nulonga Bible to, ikala usomba nende kabidi mêba makuabu. Ikala umubikilaku ku telefone, umufundilaku mesaje, anyi uya kumutangila kumpala kua nuenu kulua kulonga kabidi bua kuleja ne: udi umutabalela ne muoyo mujima.

11. Tudi basue balongi betu bapete banganyi mu tshisumbu? Bua tshinyi?

¹¹ Lusumuinu lukuabu lua mu ditunga kampanda lutu luamba ne: “Dikolesha muana mbualu bua musoko mujima.” Tudi mua kuamba ne: “Divuija muntu muyidi mbualu bua tshisumbu tshijima.” Ke bualu kayi balongeshi bapiluke ba Dîyi dia Nzambi batu baleja bena mu tshisumbu balongi babu bualu bobu aba badi mua kubambuluisha pabu bua kuya kumpala. Dîba adi, balongi badi mua kupeta dijinga dia kusomba ne bantu ba Nzambi, ne bobu aba badi mua kubambuluisha bua kushemesha bulunda ne Yehowa ne kubakankamija padibu bapeta ntatu. Tudi basue bua mulongi yonso wa Bible umvue ne: ukadi pende muena mu tshisumbu ne muena mu dîku dietu dia mu nyuma. Tudi basue bua dinanga didi mu dîku dietu dia bena Kristo dimukoke. Nunku nebikale bipepele bua yeye kulekela disomba ne bantu badi kabayi bamuambuluisha bua kunanga Yehowa. (Nsu. 13:20) Balunda bende ba kumpala bobu bamulekele, neamanye ne: udi mua kupeta balunda balelela mu bulongolodi bua Yehowa.​—Mâko 10:29, 30; 1 Pet. 4:4.

12. Bua tshinyi tudi ne bua kuambila mulongi wetu bua didilambula dia bena Kristo ne dibatijibua?

¹² Ikala umuambila ne: kudilambula kudi  Yehowa ne kubatijibua kudi ne mushinga. Tuamba eku tuela eku, patutu tulongesha muntu Bible tshipatshila tshietu si tshitu tshia kumuambuluisha bua enzele Yehowa mudimu ne abatijibue. Ngondo mikese nuenu bamane kutuadija dilonga pa tshibidilu ne nangananga pakadi mulongi mutuadije kubuela mu bisangilu, mbimpe amanye ne: tshipatshila tshia dilonga dia Bible ntshia kumuambuluisha bua alue Ntemu wa Yehowa.

13. Mmalu kayi adi mulongi wenza padiye uya mutangile ku dibatijibua?

¹³ Ku kakese ku kakese, mulongi udi ulonga Bible ne muoyo umue udi mua kukumbaja tshipatshila tshia kubatijibua! Tshia kumpala, mulongi udi ufika ku dimanya Yehowa, umunanga, ne umuitabuja. (Yone 3:16; 17:3) Pashishe udi udia bulunda ne Yehowa ne ubudia kabidi ne bana betu ba mu tshisumbu. (Eb. 10:24, 25; Yak. 4:8) Ndekelu wa bionso, udi ulekela bienzedi bibi ne unyingalala bua mpekatu yende. (Bien. 3:19) Pine apu, ditabuja diende didi dienda dimusaka bua kuambila bakuabu bulelela bua mu Bible. (2 Kol. 4:13) Udi udilambula kudi Yehowa ne pashishe ubatijibua bua kuleja ne: ukavua mudilambule. (1 Pet. 3:21; 4:2) Dituku adi ditu dituku dia disanka dia dikema bua muntu yonso! Padi mulongi wenda ukumbaja malu malomba bua kufika ku dibatijibua, ikala umuela kalumbandi ne muoyo umue kuyi ukuatshidila to, ne ikala umukankamija bua aye mutangile anu kumpala.

14. Mmunyi mudi mulongeshi mua kuela luendu lua mulongi wende ku tshipimu?

¹⁴ Patudi tuenda tuambuluisha mulongi bua afike ku didilambula ne ku dibatijibua, bidi bikengela tuikale ne lutulu. Kadi tshikondo kampanda nebikengele bua tujingulule ni udi ne dijinga dia kuenzela Yehowa Nzambi mudimu. Kudiku bimanyinu bidi bikuleja ne: mulongi au udi uditatshisha bua kutumikila mêyi a Yezu anyi? Peshi mmusue anu kulonga malu kampanda a mu Bible adi amusankisha anyi?

15. Mmalu kayi adi mulongeshi ne bua kumona kudi mulongi adi mua kumuleja ne: udi ne luendu luimpe?

¹⁵ Ikala ne tshibidilu tshia kukonkonona luendu lua mulongi webe. Tshilejilu, utu wakula bua Yehowa anyi? Utu usambila anyi? (Mis. 116:1, 2) Utu musue kubala Bible anyi? (Mis. 119:97) Utu ubuela mu bisangilu pa tshibidilu anyi? (Mis. 22:22) Ukadi mushintulule nsombelu wende anyi? (Mis. 119:112) Ukadi mubange kuambila bena mu dîku diende anyi diabu ne balunda bende bidiye ulonga anyi? (Mis. 9:1) Tshidi ne mushinga menemene ntshia ne: Yeye muine mmusue kulua  Ntemu wa Yehowa anyi? (Mis. 40:8) Mulongi yeye kayi ne luendu luimpe nansha mu bumue bua ku malu atudi batele aa, teta bua kumanya tshidi tshimupangisha ne pashishe uyukile nende bualu abu ne dîyi dimpe tshibi kuyi udia tshibanga to. *

16. Ntshinyi tshidi mua kukuleja ne: mbimpe kuimanyika dilonga dia Bible?

¹⁶ Ku musangu ne ku musangu, ikala utangila bua kumona ni bidi bikengela kutungunuka ne kulonga ne mulongi kampanda. Diebeja ne: ‘Mulongi katu ulongolola dilonga anyi? Katshiena musue kubuela mu bisangilu anyi? Utshidi ne bikadilu bibi anyi? Utshidi anu mu tshitendelelu tshiabu atshi anyi?’ Mandamuna a nkonko yonso eyi owu mikale ne: eyowa, kutungunuka ne kulonga nende nekuenze anu bu kuditatshisha bua kulongesha muntu mua kuowela pende kayi musue kubola mâyi to! Mulongi yeye katshiyi musue kulonga ne kayi musue kushintuluka, udi utungunuka ne kulonga nende bua tshinyi?

17. Bilondeshile 1 Tim. 4:16, ntshinyi tshidi balongeshi ba Bible bonso ne bua kuenza?

¹⁷ Katutu tuela bilele mu mudimu utudi nawu wa kuvuija bantu bayidi to, ne tudi basue kuambuluisha balongi betu bua baye too ne ku batismo. Ke bualu kayi netulekele bua Bible ikale wakula ne netulongeshe ne disanka ne dituishibua. Netukankamije balongi betu bua kudia bulunda ne bena mu tshisumbu. Netuikale kabidi tubambila bua didilambula ne dibatijibua, eku tutangila luendu luabu ku musangu ne ku musangu. (Tangila kazubu ka “ Bua wewe mulongeshi kufikisha mulongi ku batismo bidi bikengela . . .”) Tudi ne disanka bua mutudi tuenza petu mudimu udi usungila mioyo ya bantu eu! Tudisuikayiku bua kuenza muetu muonso bua kulombola malonga a Bible adi aye too ne ku batismo.