Bivua bilomba Balongi ba Bible dikima bua kukumbajabu mudimu wabu. Bivua bikengela bua bamanyishe bapuekele “lumu luimpe” ne bamanyishe kabidi bantu babi “dituku dia disombuela.”

Muanetu Hoskin uvua musombele mu Canada uvua uyisha kayi utshina nansha muvuaku buluishi. Ku ntuadijilu kua tshidimu tshia 1921, wakatuilangana ne muyishi kampanda muena Metodiste. Muanetu Hoskin wakatuadija kuyukila nende wamba ne: “Tuyukilaku malu a mu Mifundu mu buimpe, ne nansha tuetu katuyi bapetangane mu amue malu, tushiyangane mu buimpe ne tushale anu balunda.” Kadi kabiakenzeka nanku to. Muanetu udi ulonda wamba ne: “Tudi benza tuyukila anu minite mikese tshianana, [muyishi au] kukuma tshiibi bikole bia dikema. Bu muvuatshi tshia lumuenu, meme kuela meji ne: lumuenu luonso luatayiki.”

Wakakula utonoka wamba ne: “Bua tshinyi kuena uya kudi bantu badi kabayi bena Kristo bua kubayisha?” Muanetu Hoskin wakashala mupuwa, kadi pavuaye wenda uya, wakadiambila ne: ‘Mvua ngumvua bienze anu bu ne: mvua ngakula ne tshilobo!’

Pakayishaye mu tshitanda tshiabu dituku diakalonda, wakamba malu a dishima avua atangila muanetu Hoskin. Muanetu eu udi uvuluka wamba ne: “Wakadimuija bena kuitabuja bende bua bualu buanyi, wambila bantu mumvua muena dishima wa kalanda musenga utu kayi muanji kuikalaku mu tshimenga atshi, ubambile ne: bivua bikengela banshipa.” Kadi abi kabiakapangisha muanetu Hoskin bua kutungunuka ne kuyisha to, wakayisha bantu ba bungi. Wakamba ne: “Katshia tshitu muanji kuyisha bimpe nunku to. Bantu bakuabu bakafika too ne ku diamba ne: ‘Tudi bamanye ne: udi muntu wa Nzambi!’ ne kungambilabu bua kungambuluisha ne bintu bimvua nabi dijinga.”

Balongi ba Bible bakapatula programe ya dilonga dia Bible mu tshibejibeji tshia L’Âge d’Or, * bua kuambuluisha bantu bavua basue kuteleja bulelela bua kuya kumpala. Programe wa dilonga dia Bible bua bansonga uvua ne nkonko ivua baledi mua kukonkonona ne bana babu. Baledi bavua ne bua “kuela bana babu nkonko eyi ne kubambuluisha  bua bamanye miaba idi mandamuna mu Bible.” Nkonko mikuabu bu mudi lua ne: “Mu Bible mudi mikanda bungi kayi?,” ivua ilongesha amue malu mapepele bua Bible. Mikuabu bu mudi lua ne: “Muena Kristo mulelela yonso udi ne bua kutekemena bua bamukengeshe mu mushindu kampanda anyi kansanga anyi?,” ivua yambuluisha bansonga bua kuyisha ne dikima.

Kuvua kabidi nkonko ya mu Bible ne mandamuna ayi bua bakavua ne dimanya dia Bible dibandile. Mandamuna avua mu volime wa kumpala wa mukanda wa Études des Écritures. Programe eyi yakambuluisha babadi binunu ne binunu, kadi tshibejibeji tshia L’Âge d’Or tshia mu dia 21/12/1921 tshiakamanyisha ne: programe yonso ibidi eyi kayivua ne bua kuikalaku kabidi to. Bua tshinyi?

Bana betu bavua balombola bavua bajingulule ne: bivua bikengela bua balongi bapiabapia ba Bible kulongabu bulelela bua mu Bible tshiena-bualu tshimue ku tshimue. Ke bualu kayi bakapatula mukanda wa La Harpe de Dieu mu ngondo wa 11/1921. Bantu bavua basue kumanya bulelela bavua bangata mukanda eu bavua babafunda kabidi mu kalasa ka diwulonga bualu uvua umvuija malu a mu Bible. Kalasa aka kavua ka muntu udilongela; kakambuluisha babadi ba mukanda au bua kujingulula “tshidi Nzambi mulongolole tshia kupesha bukua bantu muoyo wa tshiendelele.” Kavua kenzeka bishi?

Pavua muntu wangata mukanda au, bavua bamupesha karte kavua kamuleja muaba wa yeye kubala mu mukanda au. Lumingu luvua lulonda bavua bamutumina karte kakuabu kikale ne nkonko ya bungi mielela pa malu avuaye mubale au. Ku ndekelu kua karte aku bavua baleja kabidi muntu muaba uvuaye ne bua kubala bua lumingu luvua lulonda.

Lumingu luonso, bavua batumina mulongi karte kapiakapia kudi bavua batangila kalasa kabu anyi kudi tshisumbu. Bivua bienzeka nanku mu mbingu 12. Bavua batamba kutuma tuarte atu kudi bena mu tshisumbu bakavua bakulakaje anyi bavua kabayi mua kuya ku nzubu ne ku nzubu to. Tshilejilu, muanetu Anna Gardner wa ku Millvale mu Pennsylvanie mu ditunga dia États-Unis udi uvuluka wamba ne: “Pakapatulabu mukanda wa La Harpe de Dieu, biakapesha yayanyi Thayle ukavua katshiyi wenda bimpe mudimu mukuabu uvuaye mua kuenza, wa kuikala kutuminangana tuarte tuvua ne nkonko lumingu luonso.” Pavua kalasa kajika, bavua balua kutangila mulongi kudi muanetu kampanda wa mu tshisumbu bua kumuambuluisha bua kumanya malu makuabu a bungi a mu Bible.

Ku ndekelu kua tshidimu atshi, muanetu Rutherford wakatumina tulasa tuonso mukanda. Uvua muleje ne: “Tshidimu etshi tudi bamanyishe bantu ba bungi menemene bualu bua Bukalenge ne babambuluishe bikole kupita kumpala.” Pashishe kuambaye kabidi ne: “Kudi mudimu wa bungi utshidi mutuindile. Kankamija bakuabu bua baditue pabu mu mudimu muimpe mutambe eu.” Bidi bimueneka bimpe ne: Balongi ba Bible bavua bateleje mubelu au, bualu mu tshidimu tshia 1922 bakayisha ne dikima dionso bambila bantu bualu bua Bukalenge bikole menemene kupita kumpala.