Bu mukavula bana betu bavua bayisha, bakapeta dijinga dia kuikala ne mikanda ya bungi ya kuyisha nayi. Bena ku Betele wa ku Brooklyn bavua bapatula bibejibeji pa mabeji patupu; batshivua banyemena kudi biapu bikuabu bia dipatula bintu pa mabeji bua babenzele mikanda. Bu mutuvua tushala ngondo ya bungi katuyi nangananga ne mikanda, bipangisha mudimu wa buambi bua kuenzekawu, muanetu Rutherford wakalomba muanetu Martin, uvua utangila tshibambalu tshietu tshia dipatula bibejibeji atshi bua ne: ni kuvua mushindu wa kubanga kudipatuila mikanda.

Muanetu Martin wakamba ne: “Luvua lungenyi luimpe lua katshia, bualu bivua biumvuija ne: tuvua tubanga kudienzela bionso bitu bikengela kuenza bua kupatula mukanda mujima.” Bana betu bakafutshila nzubu mu 18 Concord Street ku Brooklyn bua bualu abu, bobu kupeta bionso bivua bikengela bua mudimu au.

Kabiakasankisha bantu bonso to. Mulombodi wa tshiapu tshivua tshitupatuila mikanda wakalua kumona muaba wetu mupiamupia eu, kuambaye ne: “Bushuwa, nudi ne biamu bimpe menemene bia dipatula nabi mikanda, kadi kakuena udi mumanye mua kuenza nabi mudimu ku nudi eku to. Mu ngondo isambombo, bionso ebi bidi bishala bimbalakata.”

Muanetu Martin wakamba ne: “Kavua anu mushime to, kadi tuvua bamanye ne: Yehowa uvua ne bua kutuambuluisha, ne uvua anu netu.” Ke tshiakenzeka. Mu matuku makese, tuakabanga kupatula mikanda 2 000 ku dituku.

Pa kumbusha dipatula imue ya ku mikanda yetu, bantu ba Yehowa bakatuadija kuyisha lumu luimpe mu mushindu mukuabu, mmumue ne: ku kadiomba. Mu dia 26/2/1922 mu Dia lumingu, mu mapingaja, muanetu Rutherford wakakula bua musangu wa kumpala ku kadiomba ka KOG kavua mu Los Angeles, mu Californie, ku États-Unis; kuenzaye  muyuki wa ne: “Bantu miliyo ya bungi badi ne muoyo lelu kabakufua nansha.”

Badi batshinka ne: bantu 25 000 bakateleja muyuki au. Bamue ba kudibu bakafunda mikanda baleja dianyisha diabu. Muanetu Willard Ashford, wa mu Santa Ana, mu Californie uvua mufunde pende, wela muanetu Rutherford kalumbandi bua muvuaye muenze muyuki “muimpe uvua mutusanguluje.” Yeye kuamba kabidi ne: “Ndi ne bantu basatu basama mu nzubu muanyi, kabayi mua kupatuka pambelu. Nunku nansha bu wewe mulue kuenzela muyuki eu pabuipi netu, katuvua anu mua kupeta mushindu wa kulua kukuteleja to.”

Mbingu yakalonda, bakenza miyuki mikuabu anu ku kadiomba. Ku ndekelu kua tshidimu, Tshibumba tshia Nsentedi tshiakatshinka ne: “bantu bobu bakese bavua 300 000 bavua bapete mukenji ku kadiomba.”

Biakakankamija Balongi ba Bible, bobu kudisuika bua kuasa kadiomba mu lupangu kampanda mu tshidiila tshia Staten Island, pabuipi ne Betele wa Brooklyn. Bidimu biakalonda, Balongi ba Bible bakavua bayisha mukenji wa Bukalenge bikole ku kadiomba ka WBBR.

Tshibumba tshia Nsentedi tshia dia 15/6/1922 tshiakamanyisha ne: bavua ne bua kuenza mpungilu mu Cedar Point, mu Ohio, mu dia 5/9–13/9/1922. Pavua Balongi ba Bible bapueka mu Cedar Point amu, bavua ne disanka dia katshia.

Pavua muanetu Rutherford mujingile bantu difika dilenga, wakabambila ne: “Ndi mufike ku dituishibua ne muoyo mujima ne: Mukalenge . . . Neabeneshe mpungilu eu ne neafile kabidi bumanyishi bua bungi menemene mutuye kayi muanji kubufila pa buloba apa.” Bangamba-malu bonso ba mu mpungilu bavua anu bakankamija bantu bua mudimu wa kuyisha.

Pashishe mu Ditanu dia 8/9/1922, bantu 8 000 bakuwula mu lutanda tente, bindile ne muoyo kuulu kuulu muyuki uvua Rutherford ne bua kuenza. Bavua bindile bua ambe tshivua maleta “ADV” avuabu babafunde pa mabeji a dibikila umvuija. Pakavuabu basombe, kakuyi mpata, bamue ba kudibu bakamona mukaba munene wa tshilamba kuulu kua tshiakuidi. Arthur Claus uvua mufumine mu Tulsa, mu Oklahoma, ku États-Unis,  wakasombela muaba uvuaye mua kutelejila muyuki bimpe bualu tshikondo atshi kakuvua mikro anyi biamu bia difuatula nabi mêyi to.

Bua kuenza bua ne: muyuki kawimanyi, mulombodi wa mpungilu wakamanyisha ne: muntu yonso wafika panyima kabakumuanyishila bua kubuela mu lutanda pikala muanetu Rutherford wenza muyuki to. Mu dîba dia 9:30 mu dinda, Rutherford wakatuadija muyuki ne mêyi a Yezu adi mu Matayi 4:17 a ne: “Bukalenge bua mu diulu mbusemene pabuipi.” Pavuaye uleja muvua bantu mua kuteleja malu a Bukalenge ebu, wakamba ne: “Yezu nkayende wakamba ne: mu tshikondo tshia dimueneka diende neikale ne bua kulombola mudimu wa dinowa dia bantu. Tshikondo atshi, neakoke bantu balelela ba lulamatu kudiye.”

Muanetu Claus uvua musombele mu lutanda lunene, wakamba ne: “Tuvua tuteleja dîyi dionso divuaye wamba ne ntema yonso.” Kadi kusama kua tshimpitshimpi kuakamukuata, kudimona muenzejibue bua kupatuka mu lutanda lunene muvuaye. Yeye kumupatuka ne muoyo mukuatshidile, bualu kabavua mua kumuitabila bua apinganamu to.

Wakumvua bimpe mu minite mikese. Wakamba ne: pakavuaye upingana bua kutungunuka ne kuteleja muyuki, wakumvua tshikashi tshikole tshidila, kushalaye katshiyi ne muoyo munda, ke yeye kupangadija bua kubandila nansha mu malata bua ku kuteleja tshitupa tshia muyuki tshivua tshishale. Muanetu Claus eu uvua ne bidimu 23 tshikondo atshi. Wakafika anu ku dibanda mu malata au! Madidishi a pa mutu pa avua makangula; wakamba ne: pakasemenaye pabuipi nawu, wakabanga kuteleja muyuki bimpe menemene.

Kadi Arthur kavua nkayende to. Bavua ne bana betu bakuabu ku musaka aku. Umue wa kudibu, diende Frank Johnson, wakasemena kudiye, kumuebeja ne: udi ne kele ka kanife anyi?”

Arthur kumuandamuna ne: “Eyowa.”

Frank kumupingajila ne: “Udi diandamuna dia ku masambila etu. Udi mumone mukaba munene  wa tshilamba eu anyi? Ntshimanyinu; mbawusuikile ku misonso. Teleja mulumbuluishi * au ne ntema yonso. Padiye wamba ne: ‘Ne nudi ne bua kumanyisha, manyishayi,’ ukose nshinga inayi eyi.”

Ke Arthur kukuata kele ku tshianza, mushale muindile pamue ne bakuabu abu mêyi avua Rutherford mua kuamba, amupesha njila wa kukosa tshilamba atshi. Pakafika Rutherford pa bunene bua muyuki wende, wakabanga kuwenza ne luya ne tshisumi tshia bungi; ne pamuapa uvua anu muambe ne dîyi dikole ne: “Ikalayi bantemu balelela ba lulamatu ba Mukalenge. Tungunukayi anu ne kuluangana mvita too ne pabutulabu Babilona Munene butubutu. Manyishayi mukenji eu too ne miaba ya kule. Buloba bujima budi ne bua kumanya ne: Yehowa udi Nzambi ne Yezu Kristo udi Mukalenge wa bakalenge ne Mfumu wa ba mfumu. Ntshikondo tshia mushinga mukole tshia katshia ne katshia. Monayi, Mukalenge udi ukokesha! Nudi ne mudimu wa kumanyisha bantu bualu ebu. Nunku, manyishayi, manyishayi, manyishayi Mukalenge ne Bukalenge buende!”

Arthur wakalonda ne: yeye ne bana betu bakuabu abu bakakosa nshinga, tshilamba atshi kupuekatshi panshi bitekete bitekete anu mutu tshilamba kayi tshionso tshipueka. Maleta a mu Anglais a “ADV” avua mafundapu avua ne diumvuija divua diamba ne: “Manyishayi Mukalenge ne Bukalenge buende.”

Mpungilu uvua muenzeke mu Cedar Point wakambuluisha bana betu bua kutamba kudifila ku mudimu wa kuyisha Bukalenge. Bana betu bavua ne lungenyi lua didifila bavua ne disanka dia kuwenza. Kolportere mukuabu (utudi tubikila lelu ne: mpanda-njila) wa mu Oklahoma, ku États-Unis wakafunda ne: “Distrikte dietu divua mu provense muvuabu benza makala, benamu bavua ne bupele bua bungi.” Wakamba mu tshikoso ne: misangu ya bungi pavua bantu bumvua mukenji uvua mu tshibejibeji tshia L’Âge d’Or, “bavua badila muadi wa binsonji. Bivua bituenza disanka dia bungi bua kubakolesha.”

Balongi ba Bible bakamona muvua mêyi a Yezu adi mu Luka 10:2 alomba kuenza malu ne lukasa, adi amba ne: “Bia kunowa bidi bia bungi, kadi bena mudimu mbakese.” Pavua tshidimu tshiya tshitangile ku ndekelu, bakadisuika kudisuikilamu bua kumanyisha mukenji wa Bukalenge miaba ya kule.