1. Ntshinyi tshitu bantu ba bungi benza patu meji ela mbila lelu? (Nsumuinu 1:20, 21)

 MU MATUNGA a bungi, tutu tutamba kumona bamanyishi ba Bukalenge ba bungi mu njila benda bapesha bapitshi ba njila mikanda yetu. Biwikala ukadi muyishe mushindu eu, kakuyi mpata, udi mumvue mêyi a mu tshimfuanyi adi mu mukanda wa Nsumuinu a mudi meji ela mbila miaba ya tshinsangasanga bua bantu bateleje mibelu yawu. (Bala Nsumuinu 1:20, 21.) “Meji malelela,” tuambe ne: meji a Yehowa adi mu Bible ne mu mikanda yetu. Bantu badi dijinga ne meji aa bua kupetabu muoyo wa tshiendelele. Tutu tusanka bikole patu muntu wangata umue wa ku mikanda yetu. Kadi ki mbonso batu bayangata to. Bakuabu batu bitaba bua kushala amu nanku kabayi bamanye tshitu Bible ulongesha. Banga batu batuseka. Batu bela meji ne: Bible kena kabidi ne mushinga lelu, mmukanda wa kale. Bakuabu kabidi batu bakula bibi bua malongesha a mu Bible adi atangila malu a bikadilu bilenga, bamba mudi bantu badi baatumikila bikale bena malu makole, badiangata bakane. Kadi bu mudi Yehowa ne dinanga, udi utungunuka ne kuenza bua bantu bonso bapete meji malelela. Mushindu kayi?

2. Mmuaba kayi utudi mua kupetela meji malelela lelu? Kadi ntshinyi tshitu bantu ba bungi benza?

² Umue mushindu utu Yehowa wenza bua bantu bumvue meji malelela nku diambuluisha dia Bible, Dîyi diende. Bible udiku bua bantu pa kuamba bonso. Kadi bua mikanda yetu idi imumvuija? Yehowa mmuambuluishe bua ikale mu miakulu mipite pa 1 000. Idi yambuluisha bantu badi bateleja, mmumue ne: badi bayibala ne batumikila bidibu balonga. Kadi bantu ba bungi batu balengulula dîyi didi meji malelela ela. Patubu bakeba kuangata dipangadika, batu basue kudieyemena anyi kuteleja  bantu nabu. Pamuapa batu mene batupetula bualu tutu tulonda tshitu Bible wamba. Tshiena-bualu etshi netshileje tshitu tshisaka bantu bua kuenza malu mushindu au. Kadi tuanjayi kukonkonona mushindu utudi mua kupeta meji a kudi Yehowa.

3. Ntshinyi tshitudi ne bua kuenza bua kupeta meji malelela?

³ Tudi mua kumvuija meji bu bukole butudi nabu bua kuangata mapangadika mimpe ku diambuluisha dia bitudi bamanye. Kadi meji malelela owu adi asambuka apu. Bible udi wamba ne: “Ditshina dia Yehowa didi tshibangidilu tshia meji, ne kumanya Mutambe Tshijila kudi dijingulula dia malu.” (Nsu. 9:10) Nunku patudi ne dipangadika dinene dia kuangata, mbimpe tudiangate bilondeshile ngelelu wa meji wa Yehowa, mmumue ne: ‘dimanya dia Mutambe Tshijila.’ Netudiangate bilondeshile dimanya edi patudi tubala Bible ne mikanda yetu idi imumvuija. Dîba adi tudi tuleja mutudi ne meji malelela.​—Nsu. 2:5-7.

4. Bua tshinyi tudi tuamba ne: anu Yehowa ke udi mua kutupesha meji malelela?

⁴ Anu Yehowa ke udi mua kutupesha meji malelela. (Lomo 16:27) Bua tshinyi tudi tuamba ne: yeye ke mpokolo wa meji? Tshia kumpala, bu mudiye Mufuki wetu, mmumanye kalu ne kalu konso kadi katangila bifukibua biende. (Mis. 104:24) Tshibidi, malu onso atu Yehowa wenza atu aleja mudiye ne meji. (Lomo 11:33) Tshisatu, mibelu ya meji ya Yehowa itu anu yambuluisha bantu batu bayitumikila. (Nsu. 2:10-12) Tuetu basue kupeta meji malelela, tudi ne bua kuitaba malongesha malelela aa ne kualekela bua atulombole patudi tuangata mapangadika anyi patudi tukeba kuenza bualu kampanda.

5. Ntshinyi tshidi tshimueneka padi bantu babenga kuitaba ne: Yehowa ke mpokolo wa meji malelela?

⁵ Bantu ba bungi batutu tutuilangana nabu mu buambi batu bitabuja ne: mu bufuki mudi bintu bienza bimpe be! Tshibi babenga kuitaba ne: kudi Mufuki, batumbisha bobu dilongesha dia ne: bintu mbidienze. Bakuabu bobu badi bamba mudibu bitabuja Nzambi, kadi eku bamba mudi mikenji ya mu Bible mimane kukuata dimoma anyi dimomena, benza bidi mioyo yabu misue. Mbapete tshinyi? Dieyemena meji abu pamutu pa a Nzambi ndivuije buloba muaba mulenga anyi? Mbapete disanka dilelela anyi? Badi ne ditekemena bua matuku atshilualua anyi? Malu adi enzeka muaba utudi adi atujadikila bulelela ebu: “Kakuena meji, anyi dijingulula dia malu, peshi lungenyi padiku dibenga kumvuangana ne Yehowa.” (Nsu. 21:30) Mêyi aa adi bushuwa atusaka bua kutungunuka ne kulomba Yehowa meji malelela! Bia dibungama, bantu ba bungi menemene kabatu baalomba to. Bua tshinyi?

6. Bilondeshile Nsumuinu 1:22-25, mbanganyi badi badivuija bampudi matshi padi meji malelela ela mbila?

⁶ Bantu ba bungi batu badivuija bampudi matshi patu meji malelela “ela mbila mu musesu.” Bilondeshile Bible, kudi bisumbu bisatu bia bantu badi babenga meji. Mbiobi ebi: tshia “badi kabayi ne dimanya,” tshia “basekianganyi,” ne tshia “batshimbakane.” (Bala Nsumuinu 1:22-25.) Tukonkononayi ngikadilu idi nayi bantu aba idi ibafikisha ku dibenga meji a Nzambi ne tshitudi mua kuenza bua katuyipetshi.

7. Bua tshinyi bamue batu basungula bua kushala bantu “badi kabayi ne dimanya”?

⁷ Bantu “badi kabayi ne dimanya” mbatshitaba mvinyingu; batu babitabijija malu bipepele anyi babadingakaja. (Nsu. 14:15, dim.)  Tutu tutuilangana ne bantu ba nunku mu buambi misangu ya bungi. Tshilejilu, anji elabi meji bua bantu miliyo ya bungi badibu bapambuisha kudi balombodi ba bitendelelu ne ba tshididi. Bamue batu bumvua bibi patubu balua kumanya ne: balombodi abu bavua babashime. Kadi bantu badibu batele mu Nsumuinu 1:22 mbasungule bua kushala kabayi ne dimanya bualu mbasue kushala anu pabu nanku. (Yel. 5:31) Mbasue anu kuenza tshidi mu meji abu, kabayi basue kulonga tshidi Bible wamba bua kutumikila mikenji idimu to. Ba bungi badi ne mmuenenu wa malu mufuanangane ne wa mamu kampanda uvua udifila bikole mu tshitendelelu kansanga tshia mu Canada, mu Québec. Pavua Bantemu balue kumuyisha, wakabambila ne: “Bikalabi ne: mumpele uvua mutupambuishe, tshilema netshikale tshiende, ki ntshietu to!” Bushuwa, katuena basue kufuana bantu badi basungula bua kushala mu dipanga to!​—Nsu. 1:32; 27:12.

8. Ntshinyi tshiatuambuluisha bua kupeta dimanya dimpe?

⁸ Bible udi ne tshidiye utukankamijila bua katushadi katuyi ne dimanya to, kadi ‘tulue bantu bakole mu ngumvuilu wetu wa malu.’ (1 Kol. 14:20) Tudi tupeta dimanya dimpe patudi tutumikila mêyi manene a mu Bible. Ku kakese ku kakese, netudimuenene mudiwu atuambuluisha bua kuepuka bilumbu ne bua kuangata mapangadika mimpe. Mbimpe tudikonkonone bua kumanya ni tudi tuya kumpala mu tshilumbu etshi. Bikalabi ne: tudi babange kulonga Bible ne tubuela mu bisangilu kukadi matuku, tudi mua kudiebeja bua tshidi tshienza bua tujanguluke bua kuenza malu adi akengela bua kuditshipa ne kubatijibua. Bituikala tukadi babatijibue, tudiku baye kumpala, balue bayishi bimpe ba lumu luimpe badi balulongesha kabidi bimpe anyi? Mapangadika etu atuku aleja ne: mêyi manene a mu Bible atu atulombola anyi? Tutuku tuleja ngikadilu ya buena Kristo mu malanda etu ne bakuabu anyi? Tuetu bamone ne: kudi miaba ya kuakaja, mbimpe tuele meji bikole bua mavuluija a Yehowa; owu ke adi ‘avuija muntu udi kayi ne dimanya muena meji.’​—Mis. 19:7.

9. Mmushindu kayi udi “basekianganyi” baleja ne: badi babenga meji?

⁹ Tshisumbu tshibidi tshia bantu badi babenga meji a Nzambi ntshia “basekianganyi.” Kutu misangu itutu tutuilangana ne bantu ba nunku mu buambi. Batu anu basue kusekangana. (Mis. 123:4) Bible ukavua mutudimuije ne: mu matuku a ku nshikidilu, kuvua ne bua kuikala basekianganyi ba bungi. (2 Pet. 3:3, 4) Anu bu baku ba muntu muakane Lota, bamue bantu lelu kabena bateya ntema ku madimuija a Nzambi to. (Gen. 19:14) Bantu ba bungi badi baseka aba badi batumikila mêyi manene mu nsombelu wabu. “Majinga abu a malu mabi” ke adi abasaka bua kusekangana. (Yuda 7, 17, 18) Tshidi Bible muambe bua basekianganyi etshi ntshikumbanyine bimpe menemene batontolodi ne bantu bakuabu badi babenge Yehowa!

10. Anu mudi Misambu 1:1 uleja, ntshinyi tshitudi mua kuenza bua katulu basekianganyi?

¹⁰ Ntshinyi tshitudi mua kuenza bua katulu petu basekianganyi? Bumue bua ku malu a kuenza nkubenga kusomba ne bantu badi basue kubipishangana. (Bala Misambu 1:1.) Bidi biumvuija kabidi ne: katuena tuteleja malu onso a batontolodi anyi tuabala to. Tudi bamanye ne: tuetu katuyi badimuke, tudi mua kupeta lungenyi lua kubipisha bakuabu, tubanga kupeta dielakana bua Yehowa ne bua buludiki butudi tupeta mu bulongolodi buende. Nunku mbimpe tudiebeje ne: ‘Patubu batupesha buludiki bupiabupia anyi diumvuija dipiadipia kampanda, ntu ne tshibidilu tshia kuakula  bibi anyi? Ntu anu nkeba bua kutula bana betu badi batulombola bilema anyi?’ Tuetu ne tshikadilu etshi ne bakebe bua kutshilekela pa lukasa, Yehowa neasanke bua bualu buetu.​—Nsu. 3:34, 35.

11. “Batshimbakane” batu bamona mikenji ya Yehowa mushindu kayi?

¹¹ Tshisumbu tshisatu tshia bantu badi babenga meji ntshia “batshimbakane.” Mbatshimbakane bualu badi babenga kutumikila mikenji ya Nzambi ya bikadilu bilenga. Badi benza tshidi tshiakane ku mêsu kuabu. (Nsu. 12:15) Bantu ba mushindu eu badi babenga Yehowa, Mpokolo wa meji. (Mis. 53:1) Patutu tutuilangana nabu mu buambi, misangu ya bungi batu batuamba bikole bua mutudi tutumikila mêyi a mu Bible. Kadi kabena ne tshia nsongo tshiatuambilabu tshiatupetesha nsombelu muimpe to. Bible udi wamba ne: “Bua mutshimbakane mbikole bua kufikaye ku meji malelela; kena ne tshia kuamba ku tshiibi tshia tshimenga.” (Nsu. 24:7) Mutshimbakane katu ne mêyi a meji malelela a kuambilangana to. Ke bualu kayi Yehowa udi udimuija yonso wa kutudi ne: “Ikala kule ne muntu mutshimbakane!”​—Nsu. 14:7.

12. Ntshinyi tshiatuambuluisha bua kubenga kuenza malu bu batshimbakane?

¹² Tuetu tudi tudienzeja bua kunanga ngelelu wa meji wa Yehowa ne mikenji yende. Tudi bashilangane ne bantu badi bakine mibelu ya Nzambi. Bua kuvudija dinanga ditudi nadi edi, mbimpe tufuanyikije malu atudi tupeta dîba ditudi tutumikila mikenji ya Nzambi ne atudi tupeta dîba ditudi katuyi kuyitumikila. Umone ntatu mishilashilangane idi bantu badikebela anu bualu butshimbakane budi bubasaka bua kubenga mibelu mimpe ya Yehowa. Pashishe umone mudi nsombelu webe ulengela bua muudi utumikila Nzambi.​—Mis. 32:8, 10.

13. Yehowa utu utuenzeja bua kutumikila mibelu yende anyi?

¹³ Yehowa mmuenze bua bantu bonso bapete meji bipepele, kadi kena ubenzeja to. Tshibi udi uleja tshiafikila aba badi kabayi baateleja. (Nsu. 1:29-32) Bantu badi babenga kutumikila Yehowa “nebambule bipeta bibi bia njila wabu.” Mu kupita kua matuku, nsombelu wabu neikale wa ntatu ne tunyinganyinga, ne ndekelu wa bionso, kabutu. Kadi mbalaye bantu badi bateleja mibelu mimpe ya Yehowa ne bayitumikila ne: “Muntu udi unteleja neasombe mu bukubi ne kakutatshishibua kudi buôwa bua tshipupu.”​—Nsu. 1:33.

14, 15. Nsumuinu 4:23 udi utulongesha tshinyi?

¹⁴ Meji malelela atu anu atuambuluisha patudi tualonda. Anu mutudi bamone, Yehowa mmuenze bua muntu yonso apete meji bipepele. Tshilejilu, mu mukanda mujima wa Nsumuinu mudi mibelu itu anu ne mushinga bikondo bionso. Tuetu bayitumikile, neyakaje nsombelu wetu. Tuakulayi nansha bua inayi tshianana.

 ¹⁵ Kuba muoyo webe wa mu tshimfuanyi. Bible udi wamba ne: “Kumpala kua bintu bionso biudi ulama, ulame muoyo webe, bualu munda muawu mudi mupatuka mishimi ya muoyo.” (Nsu. 4:23) Vuluka mututu tukuba muoyo wetu wa munda eu. Tutu tudia biakudi bidi bimpe, tuibidija mubidi, ne tuepuka bibidilu bibi. Ke tshitutu kabidi tuenza bua kukuba muoyo wetu wa mu tshimfuanyi. Tutu tuwudiisha dituku dionso ne dîyi dia Nzambi. Tutu tulongolola bisangilu, tubuelamu, ne tuandamunamu. Tutu tudibidija mu mudimu wa buambi bua tushale anu ne luya. Tutu tuepuka tshintu tshionso tshidi mua kunyanga meji etu, bu mudi balunda babi ne dijikija dia lutetuku didi ne malu a masandi, tuenza nanku bua katupetshi bibidilu bibi to.

16. Bua tshinyi Nsumuinu 23:4, 5 udi ne mushinga wa bungi lelu?

¹⁶ Nsanka ne biudi nabi. Bible udi utupesha mubelu eu: “Kudisunsudi bua kupeta bubanji. . . . Paudi welaku mêsu ebe, kabuenaku, bualu mu bulelela, nebuase masala bu nyunyi wa mukanku, nebubuke muulu.” (Nsu. 23:4, 5) Bantu badi mua kujimija bubanji buabu bipepele. Kadi lelu babanji ne bapele mbanange makuta bamba kufua, bibafikisha ne ku dienza malu mu mushindu udi ubanyangila lumu, malanda abu ne bakuabu, too ne makanda abu a mubidi. (Nsu. 28:20; 1 Tim. 6:9, 10) Kadi meji adi atuambuluisha bua kuikala ne nkatshinkatshi bua makuta. Nunku nebituambuluishe bua kubenga kuikala ne lukuka, ne nebienze bua tutambe kusanka ne bitudi nabi.​—Muam. 7:12.

17. Mmunyi mutudi mua kupeta “ludimi lua bena meji” ludibu batele mu Nsumuinu 12:18?

¹⁷ Ela meji kumpala kua kuakula. Tuetu katuyi badimuke, tudi mua kuenzelangana bibi ne mêyi etu a mukana. Bible udi wamba ne: “Mêyi mamba kaayi melela meji adi bu kutapa kua muele wa mvita, kadi ludimi lua bena meji ludi luondapu.” (Nsu. 12:18) Tudi tushala mu ditalala ne bakuabu patudi katuyi tubajana bua bilema biabu. (Nsu. 20:19) Tudi ne bua kuwuja muoyo wetu ne dimanya dia mu dîyi dia Nzambi, dîba adi mêyi atuamba kaakunyingalaja bakuabu to, kadi neabondape.  (Luka 6:45) Patudi tuelangana meji a tshidi Bible wamba, mêyi etu adi mua kulua bu “Mpokolo wa meji” udi upetesha bakuabu tshiashima.​—Nsu. 18:4.

18. Mmunyi mudi kutumikila Nsumuinu 24:6 kutupetesha diakalengele mu mudimu wa buambi?

¹⁸ Londa buludiki. Bible udi utupesha mubelu muimpe udi utupetesha diakalengele eu: “Ku bulombodi bua meji neuluangane mvita yebe, ne mu bungi bua bafidi ba ngenyi mudi diakalengele.” (Nsu. 24:6, dim.) Elabi meji a mudi kutumikila dîyi dinene edi kutupetesha diakalengele mu mudimu wetu wa diyisha ne wa dilongesha. Tutu tuyisha bantu ne tubalongesha bilondeshile ngenyi itu bulongolodi bufila, ki mbilondeshile ngenyi yetu tuetu to. Tutu tupetela bulombodi bua meji ebu mu bisangilu bietu bia bena Kristo. Bafidi ba mibelu badi ne dimanya batu benzamu miyuki ya malu a mu Bible ne manaya a tshilejilu bua kutulongesha. Bualu bukuabu, bulongolodi bua Yehowa butu butupesha mikanda ne filme bia mushinga mukole bidi mua kuambuluisha bantu bua kumvua malu a mu Bible. Udi wenda ulonga mua kuyisha nabi bimpe anyi?

19. Udi umvua bishi bua meji adi Yehowa utupesha? (Nsumuinu 3:13-18)

¹⁹ Bala Nsumuinu 3:13-18. Tudi ne dianyisha dia bungi bua mibelu mimpe itudi tupeta mu Dîyi dia Nzambi! Tuvua mua kuikala tshinyi dîba edi bu tuetu katuyi nayi! Mu tshiena-bualu etshi, tudi bakonkonone bimue bilejilu bia mibelu mimpe itudi mua kupeta mu mukanda wa Nsumuinu. Bushuwa, mu Bible mudi mibelu ya meji idi Yehowa utupesha. Tuikalayi anu badisuike bua kuenza malu bilondeshile meji adi Yehowa utupesha. Bena panu kabena bangata meji a Nzambi ne mushinga to, kadi tuetu tudi batuishibue ne: ‘Nebabikile badi batungunuka ne kukuata meji bikole ne: mba diakalenga.’