“MUKAJI.” Eu ke mushindu uvua Yezu ubikila bantu bakaji imue misangu. Tshilejilu, pavuaye muondope muntu mukaji uvua mutekete ne mukobame munkatshi mua bidimu 18, wakamuambila ne: “Mukaji, udi musuludibue ku butekete buebe.” (Luka 13:10-13) Yezu wakenza mudimu ne ngakuilu uvuabu bangata bu wa bukalanga tshikondo atshi pavuaye muyukile ne mamuende. (Yone 19:26; 20:13) Kadi, kuvua ngakuilu mukuabu uvua uleja bukalanga ne malu makuabu.

Mu Bible, mbenze mudimu ne ngakuilu kampanda udi uleja luse ne diditeka pa muaba wa bakuabu padibu bakula bua bamue bantu bakaji. Yezu wakenza mudimu ne ngakuilu eu pavuaye muyukile ne mukaji uvua ne disama dia mashi apueka munkatshi mua bidimu 12. Mushindu uvua mukaji eu muye kudi Yezu uvua mubengibue mu Mikenji ya Nzambi ivua ileja ne: muntu uvua mu nsombelu wa buena wende uvua ne bukoya. Mikenji ivua ilomba bua ikale pa nkayende bua muvuaye ne bukoya. (Lew. 15:19-27) Kadi, mukaji eu uvua mushikile. Bualu “uvua mukenge bikole ku bianza bia baminganga, mutule bionso bivuaye nabi kayi mumvue bimpe, kadi disama divua anu dienda dikola.”​—Mâko 5:25, 26.

Mukaji eu wakadifinya munkatshi mua musumba wa bantu, kuluilaye panyima pa Yezu ne kulengaye ku luzembe lua tshilamba tshiende tshia pa mutu. Mashi avua apueka akakama diakamue! Mukaji eu uvua wela meji ne: uvua mua kuya muntu kayi mumumone, kadi Yezu wakebeja ne: “Nnganyi udi mundenge?” (Luka 8:45-47) Dîba adi, buôwa ne luzakalu biakamukuata, kudielaye kumpala kua Yezu, “e kumuambila malu onso.”​—Mâko 5:33.

Bua Yezu kutukija mukaji eu, wakamuambila ne bulenga buonso ne: “Kolesha muoyo muananyi wa bakaji!” (Mat. 9:22) Bilondeshile bamanyi ba malu a mu Bible, badi mua kuenza mudimu ne muaku wa mu tshiena Ebelu ne wa mu tshiena Greke udibu bakudimune ne: “muananyi wa bakaji” bua kuleja “luse ne diditeka pa muaba muntu.” Yezu wakatungunuka ne kumukolesha ku muoyo pakamuambilaye ne: “Ditabuja diebe ndikuondope. Ndaku mu ditalala, umvue bimpe ku disama diebe dibi.”​—Mâko 5:34.

‘Muananyi wa bakaji.’ Eu ke mushindu uvua Boaza muena Isalele uvua ne bubanji mubikile Luta muena Moaba. Yeye pende uvua ne malu avua mamufikishe ku dikala ne dielakana bualu uvua wangula bintu mu budimi bua muntu uvuaye kayi mumanye. Boaza wakamuambila ne: ‘Teleja, muananyi wa bakaji.’ (NWT) Pashishe wakalomba Luta bua kutungunuka ne kuangula bintu mu madimi ende. Luta wakatua mpala wende panshi kumpala kua Boaza, kumuebejaye bua tshinyi uvua mumuleje luse pende muikale muenyi. Boaza wakamuandamuna ne mêyi adi akolesha aa: ‘Bakamana kungambila malu onso awakenzela mamuenebe [Naomi, mukaji mukamba]. Yehowa akufute bua mudimu webe.’​—Luta 2:8-12.

Bushuwa, Yezu ne Boaza mbashile bakulu bena Kristo tshilejilu tshimpe. Imue misangu, bakulu babidi badi mua kutuilangana ne muanetu wa bakaji udi dijinga ne mibelu ya mu Bible ne dikankamija. Bakulu bobu bamane kusambila bua kukeba buludiki bua Yehowa ne bateleje muanetu wa bakaji eu ne ntema yonso, nebapete mushindu wa kumukankamija ne kumukolesha ne Dîyi dia Nzambi.​—Lomo 15:4.