DILAMBULA milambu divua tshitupa tshinene tshia ntendelelu mulelela munkatshi mua bidimu bia bungi. Bena Isalele bavua balambula milambu ya nyama, ne bena Kristo batu anu bamanyike bikole bua difila ‘mulambu wa kutumbisha’ nawu Nzambi. Kadi kudi milambu mikuabu idi isankisha Nzambi bikole. (Eb. 13:15, 16) Milambu eyi idi itupetesha disanka ne mabenesha, anu bu mudi bilejilu bidi bilonda ebi bileja.

Hana, mutendeledi wa mu tshikondo tshia kale uvua ne lulamatu, uvua ne dijinga dikole dia kulela muana, kadi uvua nkumba. Wakasambila Yehowa uditshipa ne: yeye mulele muana wa balume, uvua ne bua ‘kumufila kudi Yehowa matuku ende onso a muoyo.’ (1 Sam. 1:10, 11) Pakapita matuku, Hana wakapeta difu, kulelaye muana wa balume, diende Samuele. Pakalekela Samuele kuamua dibele, Hana wakaya nende ku ntenta wa tshitendelelu anu muvuaye muditshipe. Yehowa wakabenesha Hana bua lungenyi luende lua didipangisha malu. Wakapeta diakalenga dia kulela bana bakuabu batanu, ne Samuele wakalua muprofete ne wakafunda imue mikanda ya mu Bible.​—1 Sam. 2:21.

Anu bu Hana ne Samuele, lelu bena Kristo badi ne diakalenga dia kudifila mu nsombelu wabu mujima bua kuenzela Mufuki wabu mudimu. Yezu wakalaya ne: Yehowa neatubeneshe bikole bua malu onso atudi tudipangisha bua kumutendelela.​—Mâko 10:28-30.

Mu bidimu lukama bia kumpala, mukaji muena Kristo mukuabu, diende Dôka, uvua mumanyike bikole bua ‘malu a bungi mimpe ne bua bintu bia luse’ bivuaye upeshangana, tuambe ne: malu avuaye wenza bua kuambuluisha bakuabu. Kadi bia dibungama, ‘wakasama, kufuaye,’ bena mu tshisumbu bakabungama bikole. Pakumvua bayidi ne: Petelo uvua mu tshitupa atshi, bakamusengelela bua alue ne lukasa. Elabi meji muvuabu bumvue disanka pakalua Petelo ne pakabishaye Dôka ku lufu; mu Bible, yeye ke muntu wa kumpala uvua mupostolo mubishe ku lufu! (Bien. 9:36-41) Nzambi kavua mupue malu avua Dôka wenza muoyo to. (Eb. 6:10) Muyuki wende wa dipeshangana bintu mmulama mu Dîyi dia Nzambi bu tshilejilu tshimpe tshia tuetu kuidikija.

Mupostolo Paulo mmutushile pende tshilejilu tshimpe bua muvuaye ufila dîba diende ne muoyo mujima, ne utabalela bantu. Wakafundila bena Kristo ba mu Kolinto, wamba ne: “Buanyi meme, nemfile bintu bianyi bionso ne disanka, ne nebamfile meme mujima bua mioyo yenu.” (2 Kol. 12:15) Malu avua mafikile Paulo akamulongesha ne: kudifila bua bakuabu kudi kupetesha muntu disanka, kadi nangananga, kudi kuenza bua Yehowa amuanyishe ne amubeneshe.​—Bien. 20:24, 35.

Bushuwa, patudi tufila dîba dietu ne makanda etu bua kutua malu a Bukalenge mpanda ne bua kuambuluisha bena Kristo netu, Yehowa udi usanka bikole. Kadi kudiku mishindu mikuabu itudi mua kutua mudimu wa kuyisha nyama ku mikolo anyi? Eyowa! Pakumbusha dîba dietu ne makanda etu bitudi tufila ne dinanga, tudi mua kutumbisha Yehowa ne mapa etu a budisuile. Bulongolodi buetu butu buenza nawu mudimu bua kukuatshisha mudimu wa kuyisha udi wenzeka pa buloba bujima. Mu mudimu eu mudi diambuluisha bamisionere ne bena Kristo bakuabu badi mu midimu ya pa buayi ya ku dîba ne ku dîba. Bualu bukuabu, badi benza mudimu ne mapa etu aa bua kulongolola mikanda yetu ne filme ne kubikudimuna, bua kuambuluisha padi bipupu bitulukila bana betu, ne bua kuibaka Nzubu ya Bukalenge mipiamipia. Tuikalayi batuishibue ne: “Muena tshipapayi neabeneshibue.” Kabidi, patudi tupesha Yehowa bintu bietu bitambe buimpe, tudi tumutumbisha.​—Nsu. 3:9; 22:9, NWT.