BANA betu ba bungi bavua bumbuke mu matunga abu bua kuya kupeta makuta a bungi mu matunga a bakatenda mutoke mu tshiadi mbapingane mu matunga abu. Dinanga dia Yehowa ne muinabu ndibasake bua kuya miaba idibu dijinga ne bamanyishi ba Bukalenge ba bungi. (Mat. 22:37-39) Mmalu kayi adibu badipangishe? Mmasanka kayi adibu bapete? Bua tuetu kuamanya, tuanjayi kuya mu ditunga dia Cameroun didi ku Ouest kua Afrike.

Mu 1998 muanetu Onésime wakumbuka mu ditunga diabu dimulelela dia Cameroun kuyaye ku babende. Wakenza ku babende aku bidimu 14. Dituku dikuabu yeye mu bisangilu, kumvuaye bafila tshilejilu tshia mudimu wa buambi. Ngamba-malu wakamba ne: “Tutekabi ne: balunda babidi badi baloba miaba mishilangane, umue udi wenda ukuata mishipa ya bungi kupita mukuabu; mukuabu udi wenda ukuata mikese au kakuluaku muaba udi mishipa ya bungi au anyi?”

Tshilejilu atshi tshiakelesha Onésime meji a kupingana mu Cameroun muvua bantu ba bungi basue kulonga Bible bua kuambuluisha bana betu ba mu ditunga adi. Kadi uvua ne malu avua amuelesha meji. Bu mukavuaye muenze bidimu bionso abi ku babende, uvua udiebeja ni uvua mua kukumbana bua kuibidilangana kabidi ne nsombelu wa muabu mu Cameroun. Bua kumanya ni uvua mua kukumbana, wakanji kuluamu bua ngondo isambombo. Pashishe, mu 2012 kupinganaye bua kusombelamu.

Onésime udi wamba ne: “Biakandomba bua kuibidilangana ne luya ne malu muakuabu a mu nsombelu. Mu Nzubu wa Bukalenge, bivua bindomba bua kuibidilangana kabidi ne disomba pa bibasa.” Kadi udi wamba ufukisha mimuemue ne: “Pamvua nshala mutume ntema ku bisangilu, mvua ngenda mpua nkuasa minefuke ya mu Nzubu ya Bukalenge ya kumvua mufume muoyo.”

Mu 2013, Onésime wakasela Géraldine. Yeye pende uvua mupingane mu Cameroun mufume mu ditunga dia France muvuaye muenze bidimu tshitema. Mmasanka kayi akapetabu bua muvuabu bateke mudimu wa Nzambi pa muaba wa kumpala? Onésime udi wamba ne: “Tuetu bonso babidi tuakabuela mu Kalasa ka bamanyishi ba Bukalenge, kulua kuya kabidi ku Betele. Bidimu bishale ebi, balongi ba Bible 20 ba mu tshisumbu tshietu mbabatijibue. Mpindieu ndi mumone ne: ndi muaba muimpe wa ‘kulobela.’” (Mâko 1:17, 18) Géraldine udi usakidila wamba ne: “Ndi mupete masanka a bungi amvua tshiyi muelele meji to.”

Muanetu Judith yeye uvua muye mu ditunga dia États-Unis kadi muoyo uvua anu umusunsuma bua kualabaja mudimu wende wa kuyisha. Udi wamba ne: “Mvua nya kumona dîku dietu mu Cameroun pa tshibidilu, musangu wonso uvua dîba dia kualukila mu États-unis dikumbana, mvua ndila bualu mvua nshiya bantu ba bungi bankavua mubange kulonga nabu Bible.” Kadi Judith wakanji kuelakana bua kupingana mu Cameroun. Uvua ne  mudimu wa makuta uvua umuambuluisha bua kuondopesha tatuende mu Cameroun. Kadi wakeyemena Yehowa, kupinganaye mu Cameroun. Udi wamba ne: kuvua bintu bia bungi bimpe bivuaye nabi pavuaye ku babende bivua bimusamina muoyo. Wakasambila Yehowa bua amuambuluishe ibidilangane ne nsombelu ukavuaye nende, kuluabu kumukankamija kudi mutangidi wa tshijengu ne mukajende.

Judith udi uvuluka wamba ne: “Mvua ne disanka dia bungi dia mumvua mupete bana ba mu nyuma mu bidimu bisatu.” Judith wakalua mpanda-njila wa pa buende. Lelu, yeye ne bayende Sam-Castel badi mu mudimu wa butangidi bua tshijengu. Kadi ntshinyi tshiakenzaye bua tatuende? Yeye ne bena mu dîku diabu bakapeta lupitadi lukuabu luvua luitabe bua kuambula bujitu bua dipandibua dia tatuende. Diakalenga, dipandibua diende diakapita bimpe.

Muanetu mukuabu pende diende Victor wakaya yeye mu Canada. Yeye mumane kubala tshiena-bualu kampanda tshia mu Tshibumba tshia Nsentedi tshivua tshiakula bua dilonga tulasa tua bifulu bia mabue a masanga, wakela meji bua tulasa tuvuaye ulonga. Wakalekela tulasa atu kubangaye kulonga tua bidimu bikese tua mudimu wa bianza. Udi wamba ne: “Tuakangambuluisha bua kupeta mudimu lukasa ne kuangata bumpanda-njila bumvua nkeba kuonso eku.” Pashishe, Victor wakasela Caroline, bobu bonso babidi kuyabu kuendakana mu Cameroun. Pakayabu kukumbula Betele wa mu ditunga adi, bakabakankamija kudi bena ku Betele aku bua kumona ni bavua mua kulua kuambuluisha mu Cameroun. Victor udi wamba ne: “Katuvua ne bualu bua kubengela to, ne bu mutukavua bapepeje nsombelu wetu, bivua bipepele bua kuitaba.” Nansha muvua mbidi itakanyika Caroline, bakangata dipangadika dia kupingana mu Cameroun.

Victor ne Caroline bakangata bumpanda-njila bua pa tshibidilu bua kuambuluisha bantu bonso bavuabu bapete bavua basue kulonga Bible. Bakenza matuku badiambuluisha ne makuta avuabu balame. Pashishe bakenza mudimu mu Canada ngondo ndambu, biobi kubambuluisha bua kupingana mu Cameroun ne kutungunuka ne bumpanda-njila. Mmasanka kayi avuabu bapete? Bakabuela mu Kalasa ka bamanyishi ba Bukalenge, kuluabu bampanda-njila ba pa buabu, ne mpindieu badi mu mudimu wa luibaku. Victor udi wamba ne: “Dishiya muaba muimpe utuvua ndienze bua tudimuene mudi Yehowa utukuatshisha.”

Mu 2002, muanetu mukuabu diende Alain uvua ulonga tulasa tua bifulu bia mabue a masanga mu ditunga dia Allemagne wakabala trakte wa Bansonga, ntshinyi tshinuenza ne muoyo wenu? Malu avuamu akamusaka bua kudifundila bipatshila bikuabu. Mu 2006, wakabuela mu Kalasa ka dilongesha mudimu, kumutumabu mu Cameroun, kuabu kumulela.

Mu Cameroun amu, Alain wakapetamu mudimu wa kayi uwenza matuku onso to. Pashishe wakapeta mudimu wa makuta, kadi ukavua umuelesha meji bualu uvua mua kukepeshisha mudimu wende wa buambi. Nunku pakamuambilabu bua kuenza mudimu wa bumpanda-njila bua pa buabu, wakitaba kayi welakana to. Mfumuende wa mudimu wakamulaya bua kumubandishila difutu, kadi wakashala mulamate dipangadika diende. Pashishe Alain wakasela Stéphanie uvua musombe mu France bidimu bia bungi. Nntatu kayi ivua Stéphanie mupete pakayaye mu Cameroun?

Udi wamba ne: “Mibidi yakabanga kuntakanyika, ne bintu bimvua ndia ne nnua, ne malu makuabu kabidi bikavua bitatshisha mubidi wanyi, kadi mvua ngenza bua kuikala kupeta  luondopu pa tshibidilu bua kupeta disulakana.” Bana betu aba bakapeta masanka a bungi bua dinanukila diabu. Alain udi wamba ne: “Patuakaya kuyisha mu musoko kampanda wa kule wa Katé, tuakasanganamu bantu ba bungi bavua basue kulonga Bible. Pashishe, tuakabanga kulongela nabu Bible ku telefone. Babidi ba kudibu bakabatijibua, tuetu kuenza kasumbu ka bamanyishi.” Stéphanie udi usakidila pende wamba ne: “Kakuena disanka didi dipite dia kuambuluisha bantu bafika too ne ku didilambula kudi Yehowa to. Diyisha mu Cameroun nditupeteshe disanka edi misangu ne misangu.” Lelu, Alain ne Stéphanie badi mu mudimu wa butangidi bua tshijengu.

Muanetu kampanda diende Gisèle wakabatijibua pavuaye ulonga tulasa tua baminganga mu Itali. Nsombelu mupepele uvua nende muanetu kampanda ne mukajende bavua bampanda-njila ne bamulongeshe Bible uvua mumukemeshe, yeye kujinga bua kualabaja mudimu wende. Ke kuangataye bumpanda-njila bua pa tshibidilu pakavuaye wenda ujikija tulasa tuende.

Gisèle uvua ne dijinga dia kupingana mu Cameroun bua kuenzela Yehowa mudimu wa bungi, kadi uvua ne malu avua amuelesha meji. Udi wamba ne: “Mvua ne bua kuitaba bua kujimija mikanda yanyi ivua inganyishila bua kusomba mu Itali, kushiyangana ne balunda banyi ne bena mu dîku dietu bavua mu Itali.” Nansha nanku, Gisèle wakapingana mu Cameroun mu ngondo 5/2016. Pashishe bakaselangana ne Léonce. Betele wa mu Cameroun wakabatuma mu tshimenga tshia Ayos muvuabu dijinga ne bamanyishi ba Bukalenge ba bungi.

Nsombelu wa mu Ayos uvua bishi? Gisèle udi wamba ne: “Tuvua tuenza mbingu katuyi nzembu to, tupangila ne mua kuela midilu mu telefone yetu. Misangu ya bungi ivua ishala mijime. Ngakalonga mua kulambila pa nkunyi, ne tuvua tuya kusuna mâyi ku mushimi ne binkalu ne torshe butuku dîba divuaku kakutshiyi bantu ba bungi to.” Ntshinyi tshivua tshibambuluishe bua kunanukila? Gisèle udi wamba ne: “Nyuma wa Yehowa uvua utuambuluisha, tuetu bonso babidi tuvua tuambuluishangana, ne bena mu mêku ne balunda bavua batukankamija ne batuambuluisha ne makuta imue misangu.”

Gisèle udiku ne disanka bua mudiye mupingane mu ditunga diabu dimulelela anyi? Udi wamba ne: “Ndi nadi dia menemene! Tuvua batataku kumpala ne tumvua mu maboko mututeketa, kadi patuakatantamena malu onso au, meme ne bayanyi tuakamona ne: tuvua benze anu tshituvua bajinge bua kuenza. Tudi beyemene Yehowa ne tudi tudiumvua pabuipi nende.” Léonce ne Gisèle bakabuela mu Kalasa ka bamanyishi ba Bukalenge, ne mpindieu batshidi babangilaku bumpanda-njila bua pa buabu.

Anu bu balobi batu baya bua kukuata mishipa kabayi batshina tshintu, bantu batu bapingana mu matunga abu mabalelela batu bitaba bua kudipangisha amue malu bua kuambuluisha bantu badi bitaba mukenji wa Bukalenge. Yehowa kakupanga kuvuluka bamanyishi ba tshisumi aba mu mushindu muimpe bua dinanga didibu baleje bua dîna diende to. (Neh. 5:19; Eb. 6:10) Wewe muikale ku babende, umvua ne: mu ditunga dienu badi dijinga ne bamanyishi ba Bukalenge ba bungi, newitabe bua kupingana anyi? Wewe mupingane, masanka a bungi mmakuindile.​—Nsu. 10:22.