1. Bilondeshile Matayi 28:18-20, ndîyi kayi divua Yezu mutumine bayidi bende?

YEZU mumane kubishibua ku lufu, wakamuenekela bayidi bende bavua badisangishe mu Galela. Uvua ne bualu kampanda bua mushinga bua kubambila. Mbualu kayi abu? Budi mu Matayi 28:18-20.​—Bala.

2. Nnkonko kayi ituandamuna?

² Dîyi divua Yezu mutume dia kuvuija bantu bayidi didi ditangila kabidi mutendeledi yonso wa Nzambi lelu. Bua bualu ebu, tuandamunayi nkonko isatu idi ipetangana ne mudimu udi Yezu mutupeshe. Lua kumpala, pa kumbusha dilongesha bayidi bapiabapia malu adi Nzambi ulomba, ntshinyi tshikuabu tshitudi ne bua kuenza? Luibidi, ntshinyi tshidi bamanyishi bonso ba mu tshisumbu mua kuenza bua kuambuluishabu pabu balongi ba Bible bua kuya kumpala mu nyuma? Luisatu, ntshinyi tshitudi mua kuenza bua kuambuluisha bena kuitabuja netu badi kabatshiyi bayisha ne babuela mu bisangilu bua benze kabidi mudimu wa divuija bantu bayidi?

3. Mbualu kayi busunguluke budi Yezu muambe mu mêyi ende?

³ Mêyi adi Yezu muambe mmatoke. Tudi ne bua kulongesha bantu malu adiye muambe bua kulongesha. Kadi mu mêyi ende mudi bualu kampanda bua mushinga butudi katuyi ne bua kupua muoyo to. Yezu kavua muambe ne: ‘Nubalongeshe malu onso andi munuambile’ to. Kadi uvua muambe ne: Nubalongeshe “mua kutumikila malu onso andi munuambile.” Bua kutumikila bualu busunguluke ebu patudi tulonga Bible ne muntu, kabiena bikengela tumulongeshe anu tshia yeye kuenza to, kadi bidi bikengela kabidi tumuludike. (Bien. 8:31) Bua tshinyi bidi bikengela kuenza nanku?

4. Fila tshilejilu tshidi tshileja mutudi mua kuambuluisha balongi ba Bible bua kutumikila tshivua Yezu muambe?

 ⁴ Mmunyi mutudi mua kulongesha muntu mua kutumikila malu avua Kristo muambe? Tshilejilu tshidi tshilonda etshi tshidi mua kutuambuluisha bua kumvua tshidi tshikengela kuenza. Mmunyi mutu mulongeshi wa diendesha dia mashinyi ulongesha balongi bende mua kutumikila mikenji ya ba kanyemesha? Mulongeshi udi mua kuanji kubalongeshayi mu kalasa. Kadi bua yeye kubalongesha mua kuyitumikila, udi ne bua kuenza bualu bukuabu. Udi ne bua kuya ne balongi bende bua kubaludika padibu benda bendesha mashinyi ne baditatshisha bua kutumikila bidibu balonge. Tshilejilu etshi tshidi tshitulongesha tshinyi?

5. a) Bilondeshile Yone 14:15 ne 1 Yone 2:3, bidi bikengela tulongeshe balongi betu ba Bible bua kuenza tshinyi? b) Fila bilejilu bia malu atudi mua kulejila balongi betu dikasa dia kulonda.

⁵ Patudi tulongesha bantu Bible, tudi tubalongesha tshidi Nzambi utulomba. Kadi katuena ne bua kuimanyina apu to. Tudi ne bua kulongesha balongi betu ba Bible mua kutumikila bidibu balonga mu nsombelu wabu wa buatshia buila. (Bala Yone 14:15; 1 Yone 2:3.) Ku bitudi tuenza, tudi mua kuleja balongi betu mudibu mua kutumikila mêyi manene a mu Bible a nshindamenu mu tulasa, ku mudimu, ne padibu bapitshisha kapepe. Tudi mua kubalondela bualu kampanda bukadi butufikile bua kubaleja muvua kutumikila mibelu ya mu Bible kutukube ku njiwu kampanda anyi kutuambuluishe bua kuangata dipangadika dimpe. Patudi ne balongi betu, tudi mua kusambila Yehowa bua nyuma wende abalombole.​—Yone 16:13.

6. Ntshinyi tshikuabu tshitudi ne bua kuenza bua kulongesha bakuabu mua kutumikila malu avua Yezu muambe?

⁶ Ntshinyi tshikuabu tshitudi ne bua kuenza bua kulongesha bakuabu mua kutumikila malu avua Yezu muambe? Bidi bikengela tuambuluishe balongi betu ba Bible bua kupeta dijinga dia kuvuija bantu bayidi. Balongi bakuabu badi mua kumvua buôwa bua kuyisha. Nanku bidi bikengela tuikale nabu lutulu patudi tubalongesha malu ikala ne bua kuenda kukolesha lumvu luabu, kulenga mioyo yabu, ne kubasaka ku diyisha. Ntshinyi tshitudi mua kuenza bua kuambuluisha balongi betu bua kupeta dijinga dia kuyisha?

7. Mmunyi mutudi mua kuambuluisha mulongi bua kupeta dijinga dia kuyisha?

⁷ Tudi mua kuela balongi ba Bible nkonko bu mudi eyi: “Mmunyi mudi nsombelu webe mushintuluke bua ditumikila diebe dia tshidi Bible ulongesha? Kuenaku umona ne: bakuabu badi pabu dijinga ne kuteleja mukenji wa mu Bible anyi? Ntshinyi tshiudi mua kuenza bua kubambuluisha?” (Nsu. 3:27; Mat. 9:37, 38) Leja mulongi trakte itu mu Bintu bietu bia kulongesha nabi ne umulekele asungule idiye umona ne: idi mua kusankisha balela bende, balunda bende, anyi bena mudimu nabu. Mupesha ndambu wa trakte eyi. Muleja mua kufila trakte mu mushindu muimpe ne ambulule pende. Bushuwa, pikalabu bakadi banyishile mulongi wetu bua kuyisha, nebikengele bua tuyishe nende bua kumuambuluisha.​—Muam. 4:9, 10; Luka 6:40.

8. Bua tshinyi bidi ne mushinga bua mulongi wa Bible anange Nzambi ne muinende bikole? (Tangila kazubu ka “ Mua kuambuluisha balongi betu ba Bible bua kunanga Nzambi bikole.”)

⁸ Ikala muvuluke ne: Yezu uvua mutuambile bua kulongesha bakuabu mua “kutumikila malu onso” avuaye muambe. Mu malu au mudi kabidi mikenji mitambe bunene ibidi, wa kunanga Nzambi ne kunanga muinetu. Yonso ibidi idi ipetangana bikole ne mudimu wa kuyisha ne kuvuija bantu bayidi. (Mat. 22:37-39) Dipetangana didi ku tshinyi? Dinanga didi muntu munange Nzambi ne muinende ke bualu  bunene budi bumusaka bua kuyisha. Kuyisha lumu luimpe kudi mua kuenza bamue balongi buôwa. Kadi tudi mua kubajadikila ne: Yehowa yeye mubambuluishe, nebafike ku dijikija ditshina dia bantu ku kakese ku kakese. (Mis. 18:1-3; Nsu. 29:25) Kazubu kadi mu tshiena-bualu etshi kadi kumvuija malu atudi mua kuenza bua kuambuluisha mulongi wetu bua kunanga Nzambi bikole. Kadi ntshinyi tshidi bena mu tshisumbu pabu mua kuenza bua kuambuluisha bayidi bapiabapia bua kunangabu Nzambi ne muinabu bikole?

9. Mmu mishindu kayi idi mulongi ulonga malu a mushinga padiye wendesha mashinyi mulongeshi ku luseke luende?

⁹ Tupingane ku tshilejilu tshia mulongi udi ulonga bua kuendesha mashinyi. Padiye wenda wendesha mashinyi mulongeshi ku luseke luende, udi wenda ulonga. Mushindu kayi? Mpadiye utuleja mulongeshi wende ne umona mudi bendeshi bakuabu bendesha ne ntema. Tshilejilu, mulongeshi udi mua kumuleja muendeshi udi upitshisha muendeshi mukuabu ne lutulu luonso. Anyi udi mua kumuleja muendeshi udi utekesha midilu ya mashinyi ya mpala bua bendeshi bakuabu bamone njila bimpe. Bilejilu bia nunku bidi bilongesha mulongi malu a mushinga adiye mua kutumikila pabangaye pende kuendesha.

10. Ntshinyi tshiambuluisha mulongi wa Bible bua kuya kumpala mu nyuma?

¹⁰ Ke mudibi kabidi, mulongi wa Bible udi utuadija kuendela mu njila udi ufikisha ku muoyo udi ulongela malu kudi mulongeshi wende ne kudi batendeledi bakuabu ba Yehowa badi tshilejilu tshimpe. Bua bualu ebu, ntshinyi tshiambuluisha balongi ba Bible bikole bua kuyabu kumpala mu nyuma? Dibuela mu bisangilu. Bua tshinyi tudi tuamba nanku? Malu a mu Bible adibu balongesha mu bisangilu neavudije dimanya diabu, kukolesha ditabuja diabu, ne kubambuluisha bua kunanga Nzambi bikole. (Bien. 15:30-32) Bualu bukuabu, mu bisangilu, mulongeshi udi mua kuleja mulongi wende kudi bena Kristo badi pabu mua kuikala mu nsombelu wa buena wende. Mbilejilu kayi bidi bileja dinanga dia buena Kristo mu tshienzedi bidi mulongi mua kumona mu tshisumbu? Elabi meji bua bilejilu bidi bilonda ebi.

11. Mmalu kayi adi mulongi mua kumona mu tshisumbu? Adi mua kumusaka ku dienza tshinyi?

¹¹ Mulongi wa Bible udi udikoleshila bana udi umona muanetu wa bakaji muena Kristo udi pende mu nsombelu wa buena wende au. Mushindu udi muanetu wa bakaji au uditatshisha bua kulua ne bana bende ku Nzubu wa Bukalenge udi umulenga ku muoyo. Mulongi wa Bible utshidi upatata bua kulekela makanya udi umanyangana ne mumanyishi uvua unua pende makanya kadi mulue kualekela. Mumanyishi au udi wambila mulongi ne: uvua mufike ku ditumikila mikenji ya Nzambi bualu dinanga divuaye munange nadi Yehowa divua dienda divula. (2 Kol. 7:1; Filip. 4:13) Mumanyishi mumane kumulondela muvuaye mulekele makanya, udi umuambila ne: “Wewe pebe udi mua kualekela.” Mulongi udi ukola ku muoyo ne umona ne: udi mua kuenza pende nanku. Nsongakaji kampanda udi ulonga Bible udi umona muanetu wa bakaji utshidi pende nsonga muikale ne disanka bua mudiye Ntemu. Disanka didi mulongi wa Bible umona kudi muanetu wa bakaji didi dimusaka bua kumanya tshidi tshienza bua muanetu au ikale anu umueneka ne disanka mushindu au.

12. Bua tshinyi tudi mua kuamba ne: muntu yonso wa mu tshisumbu udi ne tshidiye mua kuenza bua kuambuluisha balongi ba Bible?

¹² Padi balongi ba Bible bamanyangana ne bamanyishi ba lulamatu bashilashilangane, bilejilu biabu bidi bibaleja mua kutumikila dîyi dia Kristo dia kunanga Nzambi ne muinetu. (Yone 13:35; 1 Tim. 4:12) Bualu bukuabu, anu mutukadi bamone, padi mulongi umona  mudi bamanyishi bapita ne ntatu ya buena yende idibu batuilangana pabu nayi, bidi mua kumulongesha ne: yeye pende neakumbane bua kuenza malu adi akengedibua bua kulua muyidi wa Kristo. (Dut. 30:11) Muntu yonso wa mu tshisumbu udi mua kuambuluisha balongi ba Bible mu mishindu mishilashilangane bua kuyabu kumpala mu nyuma. (Mat. 5:16) Ntshinyi tshiutu wewe wenza bua kuambuluisha balongi ba Bible batu balua mu bisangilu?

13-14. Ntshinyi tshivua Yezu muenzele bapostolo bende bua muvuabu batekete mu mikolo?

¹³ Tudi basue kuambuluisha bana betu badi kabatshiyi bayisha bua babange kabidi kuyisha bua kukumbaja mudimu udi Kristo mutupeshe wa kuvuija bantu bayidi. Mushindu uvua Yezu muenzele bapostolo bende bavua batekete mu mikolo malu udi uleja tshitudi mua kuenza petu lelu.

¹⁴ Pakavua mudimu wa Yezu pa buloba ku ndekelu eku lufu luende lununka, bapostolo “bonso bakamushiya, kunyemabu.” (Mâko 14:50; Yone 16:32) Ntshinyi tshivua Yezu muenzele bapostolo bende bua muvuabu banji kuteketa mu mikolo tshikondo kampanda? Katupa kakese Yezu mumane kubishibua ku lufu, wakambila bayidi bende bakuabu ne: “Kanutshinyi to! Ndayi, nuambile bana betu lumu elu [lua ne: ndi mubike ku lufu].” (Mat. 28:10a) Yezu kakabenga bapostolo bende to. Nansha muvuabu bamushiye, yeye uvua anu ubabikila ne: “bana betu.” Yezu uvua pende ufuilangana luse ne ubuikidilangana anu bu Yehowa.​—2 Bak. 13:23.

15. Tudi tumvua bishi bua bantu bakadi balekele kuyisha?

¹⁵ Bia muomumue, muoyo utu utusama bikole bua bantu badi balekela kuyisha. Mbana betu ne tudi babanange! Tutshidi tuvuluka mudimu mukole uvua bena kuitabuja netu aba benze kale ne dinanga dionso, bakuabu mbawenze pamuapa bidimu bia bungi menemene. (Eb. 6:10) Tudi tumvua bibi patudi katutshiyi tubamona! (Luka 15:4-7) Bua kuidikija Yezu, ntshinyi tshitudi mua kuenza bua kuleja ne: tudi tuditatshisha bua bualu buabu?

16. Leja mutudi mua kuleja ne: tudi tuditatshisha bua bana betu badi kabatshiyi bayisha ne babuela mu bisangilu.

¹⁶ Babikila mu bisangilu ne disanka dionso. Umue mushindu uvua Yezu mukankamije bapostolo bende bavua batekete mu mikolo ngua pavuaye mubabikile mu tshisangilu kampanda. (Mat. 28:10b; 1 Kol. 15:6) Lelu tudi petu mua kukankamija badi kabatshiyi bayisha ne babuela mu bisangilu bua bikale babuela mu bisangilu. Tudi bamanye ne: bidi mua kutulomba bua kubabikila misangu ya bungi bua bobu kushisha kulua; dîba dialuabu, netusanke anu muvua Yezu musanke bua muvua bayidi bende bitabe dibikila diende.​—Fuanyikija ne Matayi 28:16 ne Luka 15:6.

17. Ntshinyi tshitudi ne bua kuenza padi muanetu ukadi mulekele buambi ne bisangilu udiata mu bisangilu?

¹⁷ Bakidila ne muoyo mujima. Yezu wakenza bua bayidi bende bumvue ne: mmubakidile pavuabu batuilangane nende; yeye ke uvua mubange kuyukila nabu wa kumpala. (Mat. 28:18) Netuenze tshinyi dîba didi muntu ukavua mulekele buambi ne bisangilu udiata ku Nzubu wa Bukalenge? Tudi ne bua kuikala ba kumpala ku dimuakidila. Bidi mua kuanji kututonda bua kupanga tshia kumuambila. Kadi bua kubenga kumutondesha nsombelu, tudi nansha mua kumuambila ne: tudi ne disanka dia kukumona.

18. Mmunyi mutudi mua kukankamija bantu bakadi balekele buambi ne bisangilu?

¹⁸ Bakankamija ne muoyo mujima. Bayidi ba Yezu bavua mua kuikala bamone ne: mudimu uvuaye mubapeshe wa kuyisha buloba bujima uvua mubapite makanda. Yezu wakabakankamija  wamba ne: “Ndi nenu matuku onso.” (Mat. 28:20) Mêyi aa avuaku mabambuluishe anyi? Eyowa. Abidi mmale asatu mmîpi, bakaditua mu “kulongesha ne kuamba lumu luimpe.” (Bien. 5:42) Bamanyishi bakadi balekele buambi ne bisangilu badi pabu dijnga ne dikankamijibua. Badi mua kumvua buôwa bua kubanga kuyisha kabidi. Tudi mua kubajadikila ne: kabakuyisha nkayabu to. Pikalabu pabuipi ne kuyisha, tudi mua kuya nabu mu buambi. Nebikale ne disanka bua diambuluisha dituabapesha dîba didibu babanga kuyisha kabidi. Tuetu tumona ne: bantu bakadi balekele buambi ne bisangilu mbana betu ne tubenzela malu bu bana betu, badi mua kupetulula kabidi luya, ne bualu ebu nebusankishe tshisumbu bikole.

19. Tudi badisuike bua kuenza tshinyi? Bua tshinyi mbimpe kuenza nanku?

¹⁹ Netutungunuke ne kuvuija bantu bayidi too ne dîba kayi? Tòo ne ku nshikidilu kua ndongoluelu wa malu eu. (Mat. 28:20; Tangila “Nshikidilu wa ndongoluelu wa malu” mu Diumvuija dia miaku ya mu Bible.) Netukumbane bua kukumbaja mudimu udi Yezu mutupeshe eu anyi? Tudi badisuike bua kuenza nanku! Tudi ne disanka dia kufila dîba dietu, makanda etu, ne makuta etu bua kupeta bantu badi “bakaje muoyo wabu bimpe bua kupeta muoyo wa tshiendelele.” (Bien. 13:48) Patudi tuenza nanku, tudi tulonda tshilejilu tshia Yezu. Wakamba ne: “Biakudia bianyi nkuenza disua dia yeye udi muntume ne kujikija mudimu wende.” (Yone 4:34; 17:4) Ke dijinga dinene ditudi petu nadi adi. Tudi basue kujikija mudimu udiye mutupeshe. (Yone 20:21) Tudi basue kabidi bua bakuabu, too ne bakadi bawulekele, batungunuke pabu ne kuwenza pamue netu.​—Mat. 24:13.

20. Bilondeshile Filipoyi 4:13, bua tshinyi tudi mua kukumbaja mudimu udi Yezu mututumine dîyi bua kuenza?

²⁰ Kadi ki mbitekete bua kukumbaja mudimu munene udi Yezu mutupeshe to. Nansha nanku, katuena bawutue tshiadi nkayetu to. Yezu uvua mulaye ne: neikale netu. Patudi tuenza mudimu wa kuvuija bantu bayidi, tudi “benzejanganyi ba mudimu ne Nzambi” ne “bikale pamue ne Kristo.” (1 Kol. 3:9; 2 Kol. 2:17) Bu mudibi nanku, tudi mua kuwukumbaja. Kuenza mudimu eu ne kuambuluisha bakuabu bua kuwukumbaja ndiakalenga ne disanka dia dikema!​—Bala Filipoyi 4:13.