1. Ndikankamija kayi didi Yehowa utupesha?

YEHOWA utu wangata dinanga dia lulamatu ne mushinga wa bungi. (Hosh. 6:6) Udi ukankamija batendeledi bende ne muoyo mujima bua benze pabu bia muomumue. Nzambi wetu udi utusengelela ku butuangaji bua muprofete Mika bua “kunanga dinanga dia lulamatu.” (Mika 6:8, dim.) Kadi kumpala kua tuetu kuenza nanku, mbimpe tuanji tumanye tshidi dinanga dia lulamatu diumvuija.

2. Dinanga dia lulamatu ntshinyi?

² Dinanga dia lulamatu ntshinyi? Tshiambilu “dinanga dia lulamatu” tshidi mu Bible wa nkudimuinu wa bulongolodi bupiabupia misangu mitue ku 230. Dinanga dia lulamatu ntshinyi? Bilondeshile “Diumvuija dia miaku ya mu Bible” didi mu nkudimuinu au, dinanga dia lulamatu didi dileja “dinanga disaka kudi didifila, muoyo mutoke, lulamatu ne dilamata bikole. Badi batamba kuditela bua dinanga didi Nzambi munange nadi bantu, kadi ndinanga didi kabidi bantu balejangana.” Yehowa ke tshilejilu tshitambe buimpe tshia dinanga dia lulamatu. Mu tshiena-bualu etshi netumone mudi Yehowa munange bantu ne dinanga diende dia lulamatu. Mu tshialonda, netumone mutudi tuetu batendeledi ba Nzambi mua kuidikija Yehowa patudi tunangangana petu ne dinanga dia lulamatu.

3. Mmunyi muvua Yehowa mudimanyishe kudi Mose?

³ Matuku makese bena Isalele bamane kupatuka mu Ejipitu, Yehowa wakamanyisha Mose dîna diende ne ngikadilu yende. Wakamuambila ne: “Yehowa, Yehowa, Nzambi wa luse udi uditeka pa muaba wa bakuabu, kena ukuata tshiji lukasa, mmuwule tente ne dinanga dia lulamatu ne bulelela, udi uleja dinanga dia lulamatu  kudi bantu binunu ne binunu; udi ubuikila bilema, dishipa dia mikenji ne mpekatu.” (Ekes. 34:6, 7) Mêyi adi alenga ku muoyo aa adi aleja muvua Yehowa muambile Mose bualu bua pa buabu menemene budi butangila dinanga diende dia lulamatu. Mbualu kayi abu?

4-5. a) Mmunyi muvua Yehowa muleje tshidiye? b) Nkonko kayi ituandamuna?

⁴ Yehowa udi wamba mudiye ne dinanga dia lulamatu, ne mudiye kabidi “muwule tente ne dinanga dia lulamatu.” Mbatele tshiambilu atshi misangu mikuabu isambombo mu Bible. (Nom. 14:18; Neh. 9:17; Mis. 86:5, 15; 103:8; Yona 4:2) Miaba yonso ayi, tshiambilu atshi mbatshitele anu bua Yehowa nkayende, ki mbua bantu nansha. Bidi bituenza disanka dia bungi bua mudi Yehowa uleja tshidiye atshi mu Bible. Nunku tudi tumona bimpe ne: dinanga dia lulamatu didi ne mushinga kudiye. * Ke bualu kayi mukalenge Davidi wakamba ne: “Yehowa, dinanga diebe dia lulamatu ndifike too ne mu diulu . . . Nzambi wanyi, ke mudi dinanga diebe dia lulamatu ne mushinga nunku! Mu mundidimbi wa mapuapua ebe mmudi bana ba bantu banyemena.” (Mis. 36:5, 7) Anu bu Davidi, tutu petu tuangata dinanga dia lulamatu dia Nzambi ne mushinga anyi?

⁵ Bua tuetu kumvua bimpe tshidi dinanga dia lulamatu diumvuija, tuandamunayi nkonko ibidi eyi: Mbanganyi badi Yehowa munange ne dinanga dia lulamatu? Mmunyi mudi dinanga dia Yehowa dia lulamatu mua kutuambuluisha?

6. Mbanganyi badi Yehowa munange ne dinanga dia lulamatu?

⁶ Mbanganyi badi Yehowa munange ne dinanga dia lulamatu? Bible udi uleja ne: tudi mua kunanga bintu bia bungi bu mudi “malu a madimi,” “mvinyo ne mafuta,” “dilongesha,” “dimanya,” ne “meji.” (2 Kul. 26:10; Nsu. 12:1; 21:17; 29:3) Kadi bintu kabatu babinanga ne dinanga dia lulamatu nansha; anu bantu ke batubu bananga ne dinanga dia lulamatu. Yehowa ki mmunange bantu bonso ne dinanga dia lulamatu to. Udi udileja bantu badi badia nende bulunda bukole. Nzambi wetu utu mulamate balunda bende. Mmubalongoluele malu mimpe a dikema, ne neatungunuke anu ne kubananga.

7. Ntshinyi tshidi Yehowa muenze bua kuleja ne: mmunange bantu bonso?

⁷ Yehowa mmunange bantu bonso. Yezu wakambila muntu mukuabu diende Nikodemo ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.”​—Yone 3:1, 16; Mat. 5:44, 45.

8-9. a) Bua tshinyi Yehowa mmunange batendeledi bende ne dinanga dia lulamatu? b) Ntshinyi tshikuabu tshituamona?

 ⁸ Anu mutukadi bamone, bantu badi badie bulunda bukole ne Yehowa, tuambe ne: batendeledi bende ke badiye munange ne dinanga dia lulamatu. Bualu ebu budi bumuenekela bimpe mu mêyi avua mukalenge Davidi ne muprofete Danyele bambe. Tshilejilu, Davidi wakamba ne: “Tungunuka ne kuleja badi bakumanye dinanga diebe dia lulamatu.” “Dinanga dia lulamatu dia Yehowa ndia kashidi ne tshiendelele kudi badi bamutshina.” Danyele pende wakamba ne: “Wewe Yehowa Nzambi mulelela, [yeye udi] uleja dinanga dia lulamatu kudi badi bamunange ne balama mêyi ende.” (Mis. 36:10; 103:17; Dan. 9:4) Bilondeshile mêyi mafundisha ku bukole bua nyuma aa, Yehowa mmunange batendeledi bende ne dinanga dia lulamatu bualu mbamumanye, badi bamutshina, mbamunange, ne badi balama mêyi ende. Yehowa mmunange anu bantu badi bamuenzela mudimu mu mushindu udiye wanyisha, tuambe ne: batendeledi bende balelela.

⁹ Kumpala kua tuetu kutuadija kuenzela Yehowa mudimu, tuvua bamone muvuaye mutunange anu bu bantu bonso. (Mis. 104:14) Mpindieu bu mutudi batendeledi bende, tudi tumona kabidi mudiye mutunange ne dinanga diende dia lulamatu. Bushuwa, Yehowa udi ujadikila batendeledi bende ne: “dinanga dianyi dia lulamatu kadiakumbushibua [kunudi to].” (Yesh. 54:10) Anu muvua Davidi pende mudimuenene, “Yehowa neenzele muena lulamatu wende malu mu mushindu wa pa buawu.” (Mis. 4:3) Ntshinyi tshitudi ne bua kuenza bua mudi Yehowa ututabalela mu mushindu wa pa buawu? Mufundi wa misambu wakamba ne: “Muntu udi ne meji neatumikile malu aa ne neakonkonone bienzedi bia Yehowa bia dinanga dia lulamatu ne meji onso.” (Mis. 107:43) Mubelu eu udi ufumina kudi Yehowa. Mpindieu tumonayi mishindu isatu ya mudi bienzedi bia Yehowa bia dinanga dia lulamatu biambuluisha batendeledi bende.

10. Kumanya ne: dinanga dia Nzambi dia lulamatu didi dishalaku kashidi kudi kutuambuluisha mushindu kayi? (Misambu 31:7)

¹⁰ Dinanga dia Nzambi dia lulamatu didi dishalaku kashidi. Mbatele ngikadilu wa mushinga eu misangu 26 mu Misambu 136. Mu mvese wa kumpala, tudi tubala ne: “Elayi Yehowa tuasakidila, bualu yeye udi muimpe; dinanga diende dia  lulamatu didi dishalaku kashidi.” (Mis. 136:1) Mu mvese 2 too ne mu wa 26, mudi mêyi aa: “Bualu dinanga diende dia lulamatu didi dishalaku kashidi.” Patudi tubala Misambu 136, bidi bitulenga ku muoyo bua kumona mudi Yehowa utungunuka ne kutunanga ne dinanga diende dia lulamatu mu mishindu ya bungi. Mêyi a ne: “Bualu dinanga diende dia lulamatu didi dishalaku kashidi” adi atujadikila ne: Nzambi udi utungunuka anu ne kunanga batendeledi bende. Bidi bitukolesha ku muoyo bua kumanya ne: dinanga didi Yehowa munange batendeledi bende kaditu dikupuka lukasa to. Mmunange bantu badi bamuenzela mudimu, udi ubalamata nangananga padibu mu ntatu. Mudibi bituambuluisha: Kumanya ne: Yehowa mmutunange kudi kutupetesha disanka ne bukole butudi tukengela bua kutantamena ntatu ne kutungunuka ne kumuenzela mudimu.​—Bala Misambu 31:7.

11. Bilondeshile Misambu 86:5, tshitu tshisaka Yehowa bua kubuikidilangana ntshinyi?

¹¹ Dinanga dia Nzambi dia lulamatu didi dimusaka bua kubuikidilangana. Padi Yehowa umona muntu udi muenze mpekatu unyingalala ne ulekela malu mabi, dinanga dia lulamatu didi dimusaka bua kumubuikidila. Mufundi wa misambu Davidi wakamba bua Yehowa ne: “Ki mmutuenzele malu bilondeshile mpekatu yetu, peshi mutupingajile tshivua tshikumbanyine bilema bietu to.” (Mis. 103:8-11) Davidi uvua mufike kudimona mudi muntu mua kudipisha, umvua bibi padi kondo kende ka muoyo kamulubakaja. Kadi uvua mulonge kabidi ne: Yehowa ‘mmudiakaje bua kubuikidilangana.’ Tshitu tshisaka Yehowa bua kubuikidilangana ntshinyi? Diandamuna didi mu Misambu 86:5. (Bala.) Eyowa, anu muvua Davidi muambe mu disambila, Yehowa utu ubuikidilangana bualu mmuwule tente ne dinanga dia lulamatu kudi bantu bonso badi bamulomba luse.

12-13. Ntshinyi tshiatuambuluisha tuetu tudipisha bua bilema bituvua benze kale?

¹² Mbimpe ne mbikumbane bua tuetu kumvua bibi patudi tuenza mpekatu. Diumvua bibi adi didi mua kutusaka bua kunyingalala ne kuenza tshidi tshikengela bua kuakaja bilema bietu abi. Kadi bamue batendeledi ba Nzambi batshidi anu badipisha bua bilema bivuabu benze kale. Batshidi anu badiambila ne: Yehowa kakubafuila luse, nansha mukavuabu bamulombalu ne balekele malu mabi avuabu benze au. Biwikala umvua pebe nanku, kumanya ne: Nzambi mmudiakaje bua kunanga batendeledi  bende ne dinanga dia lulamatu nekukuambuluishe.

¹³ Mudibi bituambuluisha: Nansha mutudi bena mapanga, tudi mua kuenzela Yehowa mudimu ne disanka ne kondo ka muoyo kimpe. Tudi tuamba nanku bualu “mashi a Muanende Yezu adi atulengeja ku mpekatu yonso.” (1 Yone 1:7) Wewe mutekete mu mikolo bua bubi kampanda, vuluka ne: Yehowa mmudiakaje, eyowa, udi uzuka bua kubuikidila muntu udi munyingalale bua mpekatu yende. Mona dipetangana divua Davidi muleje didi pankatshi pa dinanga dia lulamatu ne dibuikidilangana. Wakafunda ne: “Anu bu mudi diulu ditumbuke kupita buloba ke mudi dinanga diende dia lulamatu dinene kudi badi bamutshina. Anu bu mudi kudi dîba dipatukila kuikale kule menemene ne kudi dîba dibuelela ke mudiye musemeje dishipa dietu dia mikenji kule menemene netu.” (Mis. 103:11, 12) Bushuwa, Yehowa mmudiakaje bua ‘kutubuikidila mu mushindu mualabale.’​—Yesh. 55:7.

14. Mmunyi muvua Davidi mumvuije mudi dinanga dia Nzambi dia lulamatu ditukuba?

¹⁴ Dinanga dia Nzambi dia lulamatu didi ditukuba mu nyuma. Davidi wakasambila Yehowa ne: “Wewe udi muaba wa tshisokomenu kundi; neunkube ku dikenga. Neunnyunguluke ne mbila ya disanka ya disungila. . . . Muntu udi weyemena Yehowa mmunyunguluka kudi dinanga Diende dia lulamatu.” (Mis. 32:7, 10) Mu bikondo bia kale, bimanu bivua binyunguluke tshimenga kampanda bivua bikuba benamu kudi baluishi. Bienzedi bia Yehowa bia dinanga dia lulamatu bidi pabi bu tshimanu tshidi tshitukuba ku bualu buonso budi mua kunyanga bulunda buetu nende. Dinanga dia Yehowa dia lulamatu didi dimusaka kabidi bua kutukoka kudiye.​—Yel. 31:3.

15. Ndipetangana kayi didi pankatshi pa dinanga dia Yehowa dia lulamatu ne muaba wa kusokomena anyi tshinyemenu?

¹⁵ Davidi wakatela muaku mukuabu wa difuanyikija nawu udi uleja mudi Nzambi ukuba batendeledi bende. Wakafunda ne: “Nzambi ntshinyemenu tshianyi tshikole, Nzambi mundeji wa dinanga dia lulamatu.” Wakamba kabidi bua Yehowa ne: “Yeye udi dinanga dianyi dia lulamatu ne muaba wanyi wa kusokomena, tshinyemenu tshianyi tshia bukubi ne musungidi wanyi, ngabu wanyi, ne Yeye mmuaba undi nsokomena.” (Mis. 59:17; 144:2) Bua tshinyi Davidi wakafuanyikija dinanga dia Yehowa dia lulamatu ne muaba wa kusokomena anyi tshinyemenu? Nansha tuetu basombele muaba kayi pa buloba, bu mutudi batendeledi ba Yehowa, yeye neatukube mudibi bikengela bua tumone mua kulama bulunda buetu bua mushinga mukole butudi badie nende. Mbatujadikile kabidi bualu ebu mu Misambu 91. Mufundi wa Misambu 91 wakamba ne: “Nengambile Yehowa ne: ‘Wewe udi tshinyemenu tshianyi ne muaba wanyi mukolesha wa kusokomena.’” (Mis. 91:1-3, 9, 14; 90:1) Mose wakatela pende muaku wa muomumue wa difuanyikija nawu pavuaye muakule bua tshinyemenu. (Mis. 90:1, dim.) Bualu bukuabu, pakavua Mose mikolo ku tshina, wakakula bua bualu bukuabu budi butukolesha ku muoyo, wamba ne: “Nzambi udi tshinyemenu katshia ku bikondo bia kale, maboko ende a tshiendelele adi muinshi muebe.” (Dut. 33:27) Tshiambilu tshia ne: “Maboko ende a tshiendelele adi muinshi muebe” tshidi tshiumvuija tshinyi bua Yehowa?

16. Mmishindu kayi ibidi idi Nzambi utubenesha? (Misambu 136:23)

¹⁶ Padi Yehowa tshinyemenu tshietu, tudi tudiumvua mu bukubi. Kadi misangu mikuabu tudi mua kutungunuka ne kumvua batekeshibue mu mikolo. Mu bikondo bia nanku, Yehowa neatuenzele tshinyi? (Bala Misambu 136:23.) Neatuele mu maboko ende a tshiendelele, utujula ne bulenga buonso, ne utuambuluisha bua kumvua bimpe. (Mis. 28:9; 94:18) Mudibi bituambuluisha: Tudi bamanye ne: tudi mua kueyemena Nzambi misangu yonso. Dimanya adi didi dituambuluisha bua kuvuluka ne: Nzambi udi utubenesha mu mishindu ibidi. Wa kumpala, nansha tuetu basombele muaba kayi, tudi bamanye ne: Yehowa neatukube misangu yonso. Muibidi, Tatu  wetu wa mu diulu udi mutunangane udi ututabalela bikole.

17. Bua tshinyi tudi bashindike ne: Nzambi neatunange anu ne dinanga dia lulamatu? (Misambu 33:18-22)

¹⁷ Anu mutudi bamone, patudi tupeta lutatu kampanda, tuikalayi bashindike ne: Yehowa neatuambuluishe bua tulame anu muoyo wetu mutoke. (2 Kol. 4:7-9) Muprofete Yelemiya wakamba ne: “Mbua dinanga dia lulamatu dia Yehowa butudi katuyi bafike ku nshikidilu wetu, bualu luse luende kalutu lushikila.” (Muad. 3:22) Tudi batuishibue ne: Yehowa neatunange anu ne dinanga diende dia lulamatu bualu anu mudi mufundi wa misambu mutujadikile “dîsu dia Yehowa didi ditangila badi bamutshina, badi bindila dinanga diende dia lulamatu.”​—Bala Misambu 33:18-22.

18-19. a) Mbualu kayi butudi ne bua kuvuluka? b) Ntshinyi tshituamona mu tshiena-bualu tshidi tshilonda?

¹⁸ Mbualu kayi butudi ne bua kuvuluka? Kumpala kua tuetu kutuadija kuenzela Yehowa mudimu, tuvua bamone muvua Nzambi mutunange anu mudiye munange bantu bonso. Kadi bu mutudi batendeledi bende mmutunange kabidi ne dinanga diende dia lulamatu. Dinanga adi didi dimusaka bua kutuela mu maboko ende a bukubi. Neikale anu pabuipi netu ne neakumbaje malu onso malenga adiye mutulaye. Mmusue bua tuikale balunda bende bua kashidi. (Mis. 46:1, 2, 7) Ke bualu kayi nansha tuetu bapete lutatu lua mushindu kayi, Yehowa neatupeshe bukole budi bukengela bua tulame anu muoyo wetu mutoke.

¹⁹ Tudi bamone mudi Yehowa unanga batendeledi bende ne dinanga diende dia lulamatu. Mmutekemene bua tunangangane petu ne dinanga dia lulamatu. Mmunyi mutudi mua kunangangana nanku? Tshiena-bualu tshidi tshilonda netshiakule bua bualu bua mushinga ebu.