1. Ntshinyi tshidi tshitujadikila ne: Yehowa mmusue kuikala pabuipi netu?

 YEHOWA udi utulomba bua kusemena pabuipi nende. (Yak. 4:8) Mmusue kuikala Nzambi wetu, Tatu wetu, ne Mulunda wetu. Utu wandamuna masambila etu ne utuambuluisha mu bikondo bikole. Udi utulongesha ku diambuluisha dia bulongolodi buende ne utukuba. Kadi tshia kuenza ntshinyi bua kusemena pabuipi ne Yehowa?

2. Tshia kuenza ntshinyi bua kusemena pabuipi ne Yehowa?

² Mpimpe tuikale tusambila Yehowa, tubala Dîyi diende, ne tuelangana meji a bitudi babalamu; dîba adi netusemene pabuipi nende. Nebitusake bua kumunanga ne kumuleja dianyisha. Nebitusake bua kumona ne: mmukumbane bua tuetu kumutumikila ne kumutumbisha. (Buak. 4:11) Tuetu banange Yehowa bikole, netumueyemene yeye ne bulongolodi buende budiye muteke bua kutuambuluisha.

3. Ntshinyi tshidi Diabolo wenza bua kutupandulula ne Yehowa? Kadi ntshinyi tshiatuambuluisha bua katulekedi Nzambi wetu ne bulongolodi buende nansha kakese? (Misambu 31:13, 14)

³ Kadi Diabolo udi ukeba bua kutupandulula ne Yehowa, nangananga patudi mu ntatu. Mona mayele atuye nawu: udi ubanga kukepesha dieyemena ditudi nadi kudi Yehowa ne kudi bulongolodi buende ku kakese ku kakese. Kadi tudi mua kumukandamena. Tuetu ne ditabuja dikole ne bikale ne dieyemena dietu kudi Yehowa didi kadiyi mua kunyungishibua, katuakulekela Nzambi wetu ne bulongolodi buende nansha.​—Bala Misambu 31:13, 14.

4. Ntshinyi tshituakuila mu tshiena-bualu etshi?

⁴ Mu tshiena-bualu etshi, netuakule bua ntatu isatu idi mua kufumina pambelu pa tshisumbu; lutatu luonso lua kudiyi ludi mua kutekesha dieyemena ditudi nadi kudi Yehowa ne kudi  bulongolodi buende. Mmunyi mudi ntatu eyi mua kutupandulula ne Yehowa? Ntshinyi tshitudi mua kuenza bua Satana adimone muele bua tshiombe musabu?

5. Mmunyi mudi ntatu mua kutupangisha bua kutungunuka ne kueyemena Yehowa ne bulongolodi buende?

⁵ Kudi misangu itutu tutuilangana ne ntatu, bu mudi buluishi bua kudi bena mu dîku dietu anyi mudimu wetu ufua. Mmunyi mudi ntatu ya mushindu eu mua kutupangisha bua kutungunuka ne kueyemena bulongolodi bua Yehowa ne kutupandulula nende? Buluishi bobu bunenge bikole, tudi mua kudiumvua bashikile, batekeshibue mu mikolo. Satana udi mua kubuelelapu bua kutufikisha ku dimona ne: Yehowa ki mmutunange to. Satana mmusue bua tuele meji ne: Yehowa anyi bulongolodi buende ke badi batukebela ntatu. Bualu bua muomumue buakafikila bamue bena Isalele mu Ejipitu. Kumpala bavua bitabuja ne: Yehowa uvua musungule Mose ne Alona bua kubapatula mu bupika. (Ekes. 4:29-31) Kadi pashishe pavua Palô mubakoleshile nsombelu, bakela Mose ne Alona tshilumbu pambidi bua ntatu ivuabu nayi, babambila ne: “Nudi benze bua Palô ne bena mudimu bende batupetule, ne nudi bateke muele wa mvita mu tshianza tshiabu bua kutushipa.” (Ekes. 5:19-21) Bakela batendeledi ba Yehowa ba lulamatu tshilumbu tshia ntatu yabu pambidi. Bia dibungama! Biwikale ne ntatu ikadi minenge bikole, ntshinyi tshiudi mua kuenza bua utungunuke anu ne kueyemena Yehowa ne bulongolodi buende bikole?

6. Tshilejilu tshia Habakuka tshidi tshitulongesha tshinyi bua mushindu wa kutantamena ntatu? (Habakuka 3:17-19)

⁶ Unzuluila Yehowa muoyo mu disambila, umulombe akukuatshishe. Muprofete Habakuka wakapeta ntatu ya bungi. Musangu mukuabu, wakasua kumona bu ne: Yehowa kavua umutabalela to. Nunku wakasambila Yehowa, umuleja ivuaye nayi munda, wamba ne: “Yehowa wanyi, too ne dîba kayi dindi ne bua kudila ndomba diambuluisha, kadi wewe kuyi uteleja? . . . bua tshinyi udi ulekela dikengeshangana? (Hab. 1:2, 3) Yehowa wakandamuna disambila divua mutendeledi wende eu muenze ne muoyo mujima. (Hab. 2:2, 3) Pavua Habakuka muelangane meji a muvua Yehowa mupandishe bantu bende, wakapetulula kabidi disanka. Wakatuishibua ne: Yehowa uvua umutabalela ne uvua ne bua kumuambuluisha bua kutantamena lutatu kayi luonso. (Bala Habakuka 3:17-19.) Ndilongesha kayi ditudi tupeta? Wewe mupete ntatu, sambila Yehowa, umuambile muudi umvua. Pashishe umulombe akukuatshishe. Dîba adi udi mua kupeta dishindika dia ne: Yehowa neakupeshe bukole bua wewe kunanukila. Wewe mumone mudi Yehowa ukukuatshisha, ditabuja diebe neditambe kabidi kukola.

7. Mulela wa Shirley wakakeba bua kumuitabijija tshinyi? Ntshinyi tshiakamuambuluisha bua kubenga kujimija ditabuja diende kudi Yehowa?

⁷ Lama bibidilu biebe bia mu nyuma. Mona muvua kuenza nunku kuambuluishe muanetu wa bakaji, diende Shirley, wa mu Papouasie Nouvelle Guinée, pavuaye mupete ntatu. b Dîku diabu divua dia bapele, ne bivua bikole bua kupetabu tshiakudia tshikumbane. Mulela wabu kampanda wakakeba bua kutekesha dieyemena divuaye nadi kudi Yehowa, umuambila: “Wewe utu wamba ne: nyuma muimpe wa Nzambi utu unuambuluisha, kadi diodi diambuluisha adi diepi? Dîku dienu ditua anu dia bapele. Udi ujimija dîba mu diyisha.” Shirley udi wamba ne: “Ngakadiebeja ne: ‘Nzambi  udi ututabalela anyi kena ututabalela?’ Nunku ngakasambila diakamue, ngambila Yehowa bualu buonso buvua mu meji anyi. Ngakatungunuka ne kubala Bible ne mikanda yetu, ne ngakatungunuka ne kuyisha ne kubuela mu bisangilu.” Diakamue muanetu eu wakabanga kumona ne: Yehowa uvua utabalela dîku diabu. Kabavua balala ne nzala mu dîku diabu to. Bavua ne disanka. Shirley udi wamba ne: “Ngakumvua ne: Yehowa uvua wandamuna masambila anyi.” (1 Tim. 6:6-8) Wewe mulame anu bibidilu biebe bia mu nyuma, wewe pebe kuakulekela ntatu anyi dielakana bikupandulula ne Yehowa to.

8. Ntshinyi tshidi mua kufikila bana betu badi ne midimu minene mu bulongolodi bua Yehowa?

⁸ Bena lukuna betu batu bamuangalajila bana betu badi ne midimu minene mu bulongolodi bua Yehowa malu a dishima ku tudiomba, mu bikandakanda, ne ku Enternete. (Mis. 31:13) Mbakuate bamue bana betu, bamba mudibu benzavi. Bena Kristo ba mu bidimu lukama bia kumpala bakatuilangana ne bualu bua muomumue pavuabu bele mupostolo Paulo mu buloko bua bualu bumushiminyina. Tshiakenzabu ntshinyi?

9. Ntshinyi tshivua bamue bena Kristo benze pavuabu bele mupostolo Paulo mu buloko?

⁹ Bamue bena Kristo ba mu bidimu lukama bia kumpala bakalekela kutua mupostolo Paulo mpanda pavuaye mu buloko mu Lomo. (2 Tim. 1:8, 15) Bua tshinyi? Bavua bumvua Paulo bundu bua muvua bantu bamumona bu muenzavi anyi? (2 Tim. 2:8, 9) Bavua ne buôwa, batshina ne: kabalu kubakengesha pabu anyi? Nansha biobi ne: bavua bamulekele bua bualu kayi, ela meji muvua Paulo ne bua kuikala mumvue. Pabi uvua mutantamene ntatu ya bungi ne muteke muoyo wende mu njiwu bua bualu buabu. (Bien. 20:18-21; 2 Kol. 1:8) Katufuanyi aba bavua balekele Paulo pavuaye mu dikenga to! Ntshinyi tshitudi ne bua kushala bakuate bua padibu bakengesha bana betu badi ne midimu minene?

10. Ntshinyi tshitudi ne bua kuvuluka padibu bakengesha bana betu badi ne midimu minene? Bua tshinyi?

 ¹⁰ Manya bua tshinyi badi batukengesha, umanye kabidi muntu udi utukengeshisha. 2 Timote 3:12 udi wamba ne: “Bantu bonso badi basue kuikala balamate Nzambi mu buobumue ne Kristo Yezu nebakengeshibue pabu.” Nunku kabiena bitukemesha bua mudi Satana mutue bana betu badi ne midimu minene mutu bua kubaluisha to. Udi utuluisha bua kunyanga muoyo wetu mutoke ne kutujakeja.​—1 Pet. 5:8.

11. Tshilejilu tshia Onezifolo tshidi tshitulongesha tshinyi? (2 Timote 1:16-18)

¹¹ Tungunuka ne kukuatshisha bena Kristo nebe, ubalamate ne muoyo mujima. (Bala 2 Timote 1:16-18.) Muena Kristo kampanda wa mu bidimu lukama bia kumpala, diende Onezifolo wakenza yeye malu mushindu mukuabu pavuabu bele Paulo mu buloko; ‘kavua mumvue bundu bua nkanu ya Paulo to.’ Kadi wakakeba Paulo, ne pakamupetaye, wakakeba mishindu ya kumukuatshisha. Pavuaye muenze nanku uvua muteke muoyo wende mu njiwu. Ndilongesha kayi ditudi tupeta? Katulekedi ditshina dia bantu dituzakeja anyi ditupangisha bua kukuatshisha bana betu badibu bakengesha to. Mbimpe tubakuile ne tubambuluishe. (Nsu. 17:17) Badi bakeba ne: tubaleje dinanga ne tubakuatshishe.

12. Tshilejilu tshia bana betu ba mu Russie tshidi tshitulongesha tshinyi?

¹² Tuakule bua muvua bana betu ba balume ne ba bakaji ba mu Russie bambuluishe bena Kristo nabu bavuabu banange bikole bavuabu bele mu maloko. Patubu balumbuluisha bamue bena Kristo, bana betu ba bungi ba muntu amu batu baya ku tshilumbuluidi bua kubatua mpanda. Ndilongesha kayi ditudi tupeta? Padibu bashiminyina bana betu badi ne midimu minene malu, babakuata, anyi babakengesha; kabikuenji buôwa to, tusambile bua bualu buabu, tutabalele bena mu mêku abu, ne tukebe mishindu mikuabu ya kubakuatshisha.​—Bien. 12:5; 2 Kol. 1:10, 11.

13. Mmunyi mudi dituseka mua kutupangisha bua kutungunuka ne kueyemena Yehowa ne bulongolodi buende?

¹³ Balela betu, bena mudimu netu, anyi balongi betu badi kabayi Bantemu badi mua kutuseka bua mutudi tuyisha anyi tutumikila mikenji ya Yehowa ya bikadilu bilenga. (1 Pet. 4:4) Badi mua kuamba ne: “Tudi bakunange wewe, kadi tshitendelelu tshienu tshidi tshikolesha malu ne bitu bienzekamu bikadi bia kale.” Bamue badi mua kutubipisha bua mututu tuenzelangana malu ne bantu badi bipatshibue mu tshisumbu, bamba ne: “Nuamba munudi ne dinanga, tshibi nuipatangana.” Mêyi a mushindu eu adi mua kutufikisha ku didiebeja bikala mikenji ya Yehowa miakane. Tudi mua kubanga kudiebeja muntu pa nkayende ne: ‘Yehowa udi undomba bua kuenza malu andi tshiyi mua kukumbaja anyi? Bulongolodi buende mbupitshishe ne diela dia mikenji anyi?’ Wewe udiebeja mushindu eu, ntshinyi tshiudi mua kuenza bua kushala pabuipi ne Yehowa ne bulongolodi buende?

14. Ntshinyi tshitudi ne bua kuenza padi bakuabu batuseka bua mutudi tutumikila mikenji ya Yehowa? (Misambu 119:50-52)

¹⁴ Disuika bua kuenza anu tshidi Yehowa wamba ne: ntshiakane. Yobo uvua muntu uvua anu wenza malu avua makane ku mêsu kua Yehowa nansha muvuabu bamuseka bua bualu abu. Umue wa ku balunda ba Yobo ba ba ku dîna wakakeba mene too ne bua kumuitabijija ne: nansha yeye muenze malu makane, kabiakuikala ne mushinga kudi Nzambi to. (Yobo 4:17, 18; 22:3) Kadi Yobo kakitaba dishima adi to. Uvua mumanye ne: mikenji ya Yehowa ya  tshidi tshimpe ne tshidi tshibi itu anu mijalame. Nunku uvua mudisuike bua kuyitumikila. Kakalekela bakuabu bamupangishisha bua kushala ne muoyo wende mutoke to. (Yobo 27:5, 6) Ndilongesha kayi ditudi tupeta? Kulekedi tuseku tua bantu tukufikisha kudimona ne: mikenji ya Yehowa ki mmiakane nansha. Ela meji bua malu akadi makufikile. Kuvuaku mumone misangu ne misangu ne: mikenji ya Yehowa mmiakane ne idi ikuambuluisha anyi? Ikala mudisuike bua kutua bulongolodi bua Nzambi mpanda. Buobu ke budi buimanyina mikenji eyi. Pashishe, nansha tuseku tua bantu bungi kayi katuakukupandulula ne Yehowa nansha.​—Bala Misambu 119:50-52.

15. Bua tshinyi bavua baseka Brizit?

¹⁵ Tuakule bua tshivua tshienzekele muanetu wa bakaji wa mu Inde, diende Brizit. Bena mu dîku diabu bavua bamuseka bua ditabuja diende. Matuku makese mumane kubatijibua mu 1997, bayende uvua kayi muena kuitabuja wakajimija mudimu. Ke yeye kupangadija bua kumuangala ne Brizit ne bana babu ba bakaji bua kuya mu tshimenga tshivua baledi bende basombele. Kadi Brizit uvua mua kupeta ntatu mikuabu minene. Bu muvua mudimu wa bayende mufue, uvua ne bua kuenza mudimu matuku onso bua kukuatshisha dîku diende. Bualu bukuabu, tshisumbu tshivuaku pabuipi tshivua mu ntanta wa kilometre 350 ne muaba uvuabu. Diakabi, bena mu dîku dia bayende bavua bamuluisha bua ditabuja diende. Nsombelu wakanyanguka bikole, kuenzabi ne: Brizit ne bayende ne bana babu ba bakaji bamuangale kabidi. Pashishe, bayende wakafua mu tshimpitshimpi. Umue wa ku bana bende ba bakaji kuluaye pende kufua disama dia kansere ne bidimu 12. Bua kunyanga kabidi malu, balela ba Brizit bakamuamba muvuaye mumanye lufu lua bayende ne lua muanende wa bakaji. Bavua bamba ne: bu yeye kayi mulue Ntemu wa Yehowa, lufu luonso elu kaluvua mua kumueneka to. Nansha nanku uvua anu mueyemene Yehowa ne mushale mulamate bulongolodi buende.

16. Mmunyi muvuabu babeneshe Brizit bua muvuaye mushale mulamate Yehowa ne bulongolodi buende?

¹⁶ Bu muvua Brizit musombele kule ne tshisumbu,  mutangidi wa tshijengu wakamulomba bua kuyishila muaba uvuaye musombele au ne bua alombuele bisangilu mu nzubu muende. Kumpala wakamona ne: tshivua mudimu mumupite makanda. Kadi wakatumikila. Uvua uyisha bakuabu lumu luimpe, wenzela bisangilu mu nzubu muende, ne uvua ne dîba dia kuenza ntendelelu wa mu dîku ne bana bende ba bakaji. Kuenza nanku kuakamuambuluisha bua kutuadija malonga a Bible a bungi ne kualombola, ne balongi bende ndambu bakabatijibua. Mu 2005, wakalua mpanda-njila wa pa tshibidilu. Wakafutshibua bua muvuaye mueyemene Yehowa ne mulamate bulongolodi buende. Bana bende ba bakaji abu mbalue batendeledi ba Yehowa, ne patudi tuakula apa kudi bisumbu bibidi muaba udibu au! Brizit mmutuishibue ne: Yehowa uvua mumupeshe bukole bua kutantamena ntatu ne tuseku tuvuabu bamuseka kudi bena mu dîku diabu.

17. Tudi ne bua kudisuika bua kuenza tshinyi?

¹⁷ Satana mmusue tuitaba ne: patudi tupeta ntantu, Yehowa udi utulekela. Mmuesue tuitabe kabidi ne: ditua bulongolodi bua Nzambi mpanda didi ditukebela ntatu. Satana mmusue tuzakale padibu bashiminyina bana betu ba balume badi ne midimu minene malu, babakengesha, anyi babela mu maloko. Udi ubuelela pa tuseku tudibu batuseka bua katutungunuki ne kueyemena mikenji ya Yehowa ne bulongolodi buende. Kadi tukadi bamanye mayele ende mabi, ne kena mua kutudinga to. (2 Kol. 2:11) Ikala mudisuike bua kubenga mashimi a Satana ne bua kushala mulamate Yehowa ne bulongolodi buende. Vuluka ne: Yehowa kakukulekela nansha. (Mis. 28:7) Nunku, kulekedi tshintu nansha tshimue tshikupandulula ne Yehowa to!​—Lomo 8:35-39.

18. Ndukonko kayi lutuandamuna mu tshiena-bualu tshialonda?

¹⁸ Mu tshiena-bualu etshi, tudi bakule bua ntatu itudi mua kupeta pambelu pa tshisumbu. Dieyemena ditudi nadi kudi Yehowa ne kudi bulongolodi buende didi kabidi mua kutetshibua kudi ntatu idi ifumina mu tshisumbu. Mmunyi mutudi mua kufika kuditantamena ntatu ya nunku? Netuandamune lukonko mu tshiena-bualu tshialonda.