1. Kulama bieledi bietu bia meji kudi kumvuija tshinyi? (2 Timote 4:5)

 PADI malu adi atunyingalaja enzeka, lulamatu lutudi nalu kudi Yehowa ne kudi bulongolodi buende bidi mua kutetshibua. Tshia kuenza ntshinyi bua kuatantamena? Tudi ne bua kulama bieledi bietu bia meji ne kushala batabale, ‘bashindame mu ditabuja.’ (Bala 2 Timote 4:5.) Tudi tulama bieledi bietu bia meji patudi tushala talala, tuela meji bimpe, ne tudienzeja bua kumona malu mudi Yehowa uamona. Dîba adi, mushindu utudi tumvua kawukulombola meji etu to.

2. Ntshinyi tshituamona mu tshiena-bualu etshi?

² Mu tshiena-bualu tshishale, tuvua bamone ntatu isatu itudi mua kupeta, ifumina kudi bantu ba pambelu pa tshisumbu. Mu tshiena-bualu etshi, netumone ntatu isatu itudi mua kupetela mu tshisumbu idi mua kuteta lulamatu luetu kudi Yehowa. Nyoyi eyi: 1) patudi bamone ne: muena Kristo mmutuenzele bualu bubi, 2) padibu batunyoka, ne 3) patudi tuluangana bua kuibidilangana ne malu adi mashintuluke mu bulongolodi. Ntshinyi tshitudi mua kuenza bua kulama bieledi bietu bia meji ne kushala anu balamate Yehowa ne bulongolodi buende patudi tutuilangana ne ntatu?

3. Muena Kristo netu yeye mutuenzele bualu bubi, tudi mua kumvua bishi?

³ Muena Kristo nebe, bu mudi muanetu udi ne midimu mu tshisumbu, ukadiku mukuenzele bualu bubi anyi? Pamuapa kavua ne meji a kukuenzelabu to. (Lomo 3:23; Yak. 3:2) Nansha nanku, malu avuaye muenze avua pamuapa makufiikishe munda, wewe kupanga kumona ne tulu, wela meji bua bualu abu. Uvua pamuapa mudiebeje ne: ‘Tshidi muanetu eu muenze tshidiku mua kundeja ne: bulongolodi ebu mbua Nzambi bushuwa  anyi?’ Satana mmusue ne: tuele meji mushindu au. (2 Kol. 2:11) Ngelelu wa meji mubi wa mushindu eu udi mua kutupandulula ne Yehowa ne bulongolodi buende. Mpindieu tuetu bamone ne: muanetu wa balume anyi wa bakaji mmutuenzele bualu bubi, mmunyi mutudi mua kulama bieledi bietu bia meji ne kuepuka ngelelu wa meji udi Satana musue?

4. Mmunyi muvua Jozefe mulame bieledi biende bia meji pavuabu bamuenzele malu mabi? Tshilejilu tshiende tshidi tshitulongesha tshinyi? (Genese 50:19-21)

⁴ Kulaminianganyi munda to. Pavua Jozefe tshitende, batutuende bakamuenzela malu mabi. Bakamukina, bamue ba kudibu kujingabu ne bua kumushipa. (Gen. 37:4, 18-22) Ndekelu wa bionso, bakamupana bua kushalaye mupika. Biakakebela Jozefe ntatu mikole munkatshi mua bidimu bitue ku 13. Pamuapa uvua udiambila ne: Yehowa kavua mumunange menemene to, umuendeka ne mpata ya bungi bua bualu abu. Uvua kabidi pamuapa udiebeja bikala Yehowa uvua mumulekele mu tshikondo tshia dikenga atshi. Kadi Jozefe kakalaminangana munda to. Wakashala talala bua kulama bieledi biende bia meji. Pakapetaye mpunga wa kudisombuela, kakenza nanku to, wakaleja bana babu dinanga, kubafuilaye luse. (Gen. 45:4, 5) Jozefe wakabenga kudisombuela bualu uvua wela meji bimpe. Pamutu pa kuimanyina pa ntatu yende, wakimanyina yeye pa tshivua Yehowa musue. (Bala Genese 50:19-21.) Ndilongesha kayi ditudi tupeta? Bobu bakukebele lutatu, kulaminyi Yehowa munda anyi kudiebeji bua kumanya ni mmukulekele to. Kadi elangana meji a mudiye ukuambuluisha bua kunanukila mu lutatu alu. Bualu bukuabu, padi bakuabu bakuenzela malu mabi, dinanga dikusake bua kubabuikidila mapanga abu.​—1 Pet. 4:8.

5. Mmunyi muvua Miqueas mulame bieledi biende bia meji pavuaye mumone ne: bavua nende makole?

⁵ Tuakule bua bualu bua matuku etu aa buvua buenzekele mukulu kampanda wa mu Amerike wa ku Sud, diende Miqueas. b Wakavuluka dîba divuaye mumone ne: bamue bana betu bavua balombola malu mu bulongolodi bavua bamuenzele bualu buvua buleja ne: bavua nende malu makole. Wakamba ne: “Katshia tshivua muanji kumvua bibi bia menemene bu dîba adi to. Ngakumvua buôwa, tshiyi mmona tulu butuku, ne mvua mpuekesha binsonji bia muntu kayi ne wende wa kumuakuila.” Kadi Miqueas wakalama bieledi biende bia meji, yeye kudienzeja bikole bua kudikanda. Uvua usambila misangu ya bungi, ulomba Yehowa bua amupeshe nyuma wende muimpe ne bukole bua kunanukila. Uvua kabidi ukeba malu mu mikanda yetu avua mua kumuambuluisha. Ndilongesha kayi ditudi tupeta? Wewe mumone ne: muena Kristo nebe mmukuenzele bualu bubi, shala talala ne udienzeje bua kukanda meji mabi audi mua kuikala nawu. Pamuapa kuena mumanye malu adi menze ne: muanetu au ambe tshivuaye muamba atshi anyi atshienze nansha. Nunku sambila Yehowa, umulomba bua akuambuluishe bua umone malu mudi muntu mukuabu au uamona. Nebikuambuluishe bua kumona ne: muanetu au kavua ne meji a kukuenzela bualu bubi to, ne neumufuile luse. (Nsu. 19:11) Uvuluke ne: Yehowa mmumanye nsombelu webe ne neakupeshe bukole bua wewe kunanukila.​—2 Kul. 16:9; Muam. 5:8.

6. Bua tshinyi mbimpe kumona dinyoka bu mushindu udi Yehowa uleja mudiye mutunange? (Ebelu 12:5, 6, 11)

⁶ Tudi mua kumvua bibi menemene padibu batunyoka. Kadi tuetu bimanyine pa bibi bitudi tumvua abi, tudi mua kubanga kuela meji ne: dinyoka didibu batupeshe ki ndiakane, anyi ne: didi dileja mudibu netu malu makole.  Ngelelu wa meji au neatupangishe bua kumanya bualu bua pa buabu ebu: dinyoka didi dileja mudi Yehowa mutunange. (Bala Ebelu 12:5, 6, 11.) Tuetu bimanyine pa bibi bitudi tumvua bua mudibu batunyoke, tudi tupesha Satana mpunga wa kutuluisha bipepele. Mmusue bua tubenge dinyoka. Kusemena kule ne Yehowa ne bulongolodi buende ke bualu bubi menemene budiye musue bua butuenzekele. Bobu bakunyoke, mmunyi muudi mua kulama bieledi biebe bia meji?

7. a) Ntshinyi tshivua Yehowa mulue kuenzela Petelo pavuaye muitabe dinyoka? b) Tshilejilu tshia Petelo tshidi tshitulongesha tshinyi?

⁷ Itaba dinyoka ne akaja malu adi akengela. Yezu wakapingaja Petelo mu njila misangu mipite pa umue kumpala kua bapostolo bakuabu. (Mâko 8:33; Luka 22:31-34) Petelo uvua pamuapa mudiumvue mupuekeshibue milongo bibi be! Nansha nanku, Petelo wakashala anu mulamate Yezu. Wakitaba dinyoka, kupetaye dilongesha bua bilema biende. Yehowa wakalua kumufuta bua lulamatu luende alu, kumupeshaye midimu minene mu tshisumbu. (Yone 21:15-17; Bien. 10:24-33; 1 Pet. 1:1) Tshilejilu tshia Petelo tshidi tshitulongesha tshinyi? Katumonyi dinyoka bu mushindu wa kutupuekesha milongo to, mbimpe tuditabe, ne tuakaje malu adi akengela, dîba adi nebituambuluishe tuetu ne bakuabu bikole. Nunku, Yehowa ne bana betu nebatuangate ne mushinga wa bungi.

8, 9. Bernardo wakanji kumvua bishi pavuabu bamunyoke? Kadi tshiakamuambuluisha bua kuakaja ngelelu wende wa meji ntshinyi?

⁸ Mona tshivua tshienzekele Bernardo, muanetu wa mu Mozambique. Bakamumbusha mu mudimu wa bukulu. Wakanji kumvua bishi? Udi wamba ne: “Ngakashala mulaminangane munda bualu tshivua munange dinyoka divuabu bampeshe to.” Pavuaye wela meji bua muvua bena mu tshisumbu mua kumumona, bivua bimutonda. Udi wamba ne: “Biakandomba ngondo ndambu bua kumona dinyoka adi mu mushindu muimpe ne bua kueyemena kabidi Yehowa ne bulongolodi buende.” Ntshinyi tshivua tshimuambuluishe bua kupeta mmuenenu muimpe au?

⁹ Bernardo wakakaja ngelelu wende wa meji. Udi umvuija ne: “Pamvua mukulu, mvua ngumvuija bakuabu Ebelu 12:7 bua kubambuluisha bua bamone dinyoka dia kudi Yehowa mu mushindu muimpe. Mpindieu meme kudiebeja ne: ‘nnganyi udi ne bua kutumikila tshidi mvese  eu muambe?’ Mbatendeledi bonso ba Yehowa, ne meme panyi.” Bernardo wakenza malu makuabu kabidi bua kutungunukaye ne kueyemena Yehowa ne bulongolodi buende. Wakabanga kubala Bible bikole ne upitshisha dîba dia bungi bua kuelangana meji bikole a bivuaye ubala. Nansha mutshivuaye umvua bimutonda bua muvua bena Kristo nende bamumona, uvua anu uyisha nabu ne wandamuna mu bisangilu. Bakalua kumuteka kabidi mukulu. Nsombelu webe yeye mufuanangane ne wa Bernardo, kuimanyinyi pa mushindu uudi udiumvua mupuekeshibue milongo to, itaba dinyoka, ne akaja malu adi akengela. c (Nsu. 8:33; 22:4) Wewe muenze nanku, ikale mushindike ne: Yehowa neakufute bua muudi mumulamate yeye ne bulongolodi buende ne muoyo mujima.

10. Ndishintuluka kayi dia malu divua pamuapa diteke lulamatu lua bamue bena Isalele mu diteta?

¹⁰ Padi malu ashintuluka mu bulongolodi, bidi mua kuteka lulamatu luetu mu diteta. Tuetu katuyi badimuke, tudi bafuane kulekela Yehowa. Tshilejilu, mona muvua malu mashintuluke bua bena Isalele. Pavua Mikenji ya Mose kayiyi mianji kuikalaku, bamfumu ba mêku ke bavua benza midimu ya buakuidi. Bavua basa bioshelu, balambulapu milambu bua mêku abu. (Gen. 8:20, 21; 12:7; 26:25; 35:1, 6, 7; Yobo 1:5) Kadi pakelabu Mikenji ya Mose, bamfumu ba mêku bavua ne bua kulekela diakalenga adi. Yehowa wakangata bena mu dîku dia Alona, kubatekaye bakuidi bua bikale balambula milambu. Bu mukavua malu mamane kushintuluka nanku, pavua mfumu wa dîku uvua kayi wa mu ndelanganyi ya Alona utuadija kuenza mudimu wa bakuidi, bavua mua kumushipa. d (Lew. 17:3-6, 8, 9) Dishintuluka dia malu edi ke divua dienze bua Kola, Datana, Abilama, ne bamfumu ba tshisumbu 250 batombokele Mose ne Alona anyi? (Nom. 16:1-3) Katuena ne bijadiki to. Nansha nanku, Kola ne bena diende kabakashala ne lulamatu kudi Yehowa to. Malu owu mashintuluke mu bulongolodi, biteka lulamatu luebe mu njiwu, tshiudi mua kuenza ntshinyi?

11. Tshilejilu tshia bamue bena Kohata bena Lewi tshidi tshikulongesha tshinyi?

¹¹ Padi malu ashintuluka, tumikila ne muoyo mujima. Pavua bena Kohata mu luendu mu tshipela, bavua ne mudimu wa pa buawu. Musangu wonso uvua bena Isalele bumbusha tshitudilu, bamue bena Kohata bavua bambula mushete wa tshipungidi kumpala kua bantu bonso. (Nom. 3:29, 31; 10:33; Yosh. 3:2-4) Tshivua diakalenga dinene be! Kadi pakafika bena Isalele mu Buloba Bulaya, malu akashintuluka. Kakuvua kabidi tshibidilu tshia kuya ne mushete wa tshipungidi muaba kampanda to. Nunku tshikondo tshivua Solomo mukalenge, bakateka bamue bena Kohata batungimba, bakuabu kubatekabu balami ba ku biibi, ne banga kubatekabu batangidi ba nzubu ya kulamina bintu. (1 Kul. 6:31-33; 26:1, 24) Kakuena muaba nansha umue mu Bible udibu baleje ne: bena Kohata bavua badilakane anyi balombe anu bua babapeshe kabidi mudimu munene bualu kumpala bavua ne mudimu wa pa buawu to. Ndilongesha kayi ditudi tupeta? Padi mashintuluka amueneka, mbimpe uitabe ne muoyo mujima, nansha mudimu uuvua wenza owu mushintuluke. Ikala ne disanka bua mudimu wonso udibu bakupesha. Vuluka ne:  mudimu uudi nawu ki ngudi wenza bua wikale muntu wa mushinga mukole kudi Yehowa to. Yehowa udi ukuangata wewe ne mushinga wa bungi kupita mudimu kayi wonso uudi mua kuenza.​—1 Sam. 15:22.

12. Mmunyi muvua Zaina mumvue pakamumbushabu ku Betele?

¹² Tuangate tshilejilu tshia Zaina, muanetu wa bakaji wa mu dimue dia ku matunga a mu Moyen-Orient. Bakashintulula mudimu wende, yeye kudimona katshiyi ne mudimu uvuaye munange bikole au. Bakamumbusha ku Betele kukavuaye muenze bidimu bipite pa 23, kumutumabu mu teritware. Udi wamba ne: “Ngakumvua bibi bia menemene, kudimona tshiyi ne mushinga; meme kudiebeja ne: “Mbubi kayi bundi muenze?” Bia dibungama, bamue bena Kristo nende bakamutentekela kanyinganyinga pa kakuabu, bamuambila ne: “Bu wewe muntu muimpe menemene, bulongolodi kabuvua mua kukumbusha ku Betele to.” Zaina wakashala ne kanyinganyinga ka bungi, udila butuku buonso. Kadi udi wamba ne: “Tshiakamba mudi bulongolodi kabuyi bua Nzambi anyi muvua Yehowa kayi munnange to.” Tshiakamuambuluisha bua kulama bieledi biende bia meji ntshinyi?

13. Ntshinyi tshiakenza Zaina bua kanyinganyinga kende kujika?

¹³ Zaina wakafika ku dijikija kanyinganyinga kavuaye naku. Mushindu kayi? Wakabala biena-bualu mu mikanda yetu bivua biakula bua lutatu luende alu. Tshiena-bualu tshia ne: “Udi mua kutantamena diteketa mu maboko!” tshidi mu Tshibumba tshia Nsentedi tshia dia 1/2/2001 tshiakamuambuluisha bikole. Tshivua tshiumvuija muvua Mâko, mufundi wa mukanda wa mu Bible udi ne dîna diende, mua kuikala uluangana ne kanyinganyinga bua muvua mudimu wende mushintuluke. Zaina udi wamba ne: “Tshilejilu tshia Mâko tshivua buanga buvua bujikije ditekeshibua mu mikolo dimvua nadi.” Zaina wakashala anu pabuipi ne balunda bende. Kakaditola to; kavua udiabakena to. Wakamba ne: nyuma wa Yehowa udi wenza malu ku diambuluisha dia bulongolodi buende; kuambaye kabidi muvua bana betu bavua balombola bamutabalela. Kadi wakajingulula kabidi ne: bulongolodi bua Nzambi budi ne bua kuenza tshionso tshidi tshikengela bua mudimu wa Yehowa wenjibue.

14. Vlado uvua mumvue bibi bua kuitaba bualu kayi buvuabu bashintulule? Tshiakamuambuluisha ntshinyi?

¹⁴ Vlado, mukulu wa bidimu 73 wa mu Slovénie, wakumvua bibi bua muvuabu basangishe  bisumbu bibidi, bilue tshisumbu tshimue ne bua muvuabu bakange Nzubu wa Bukalenge uvuaye yeye ubuela. Udi wamba ne: “Tshivua ngumvua tshivuabu bakangile Nzubu wa Bukalenge mulenga nanku to. Mvua mumvue bibi bualu kutshivua matuku makese atuvua tufuma ku dimuakajilula. Ndi muena mabaya, ne mvua muenzaku bintu bia bipiabipia. Bualu bukuabu, kulongolola malu tshiakabidi kuvua kulomba kuakaja bintu bia bungi; nunku buetu tuetu bakavua bakulakaje katshivua bualu bupepele to.” Tshiakambuluisha Vlado bua kuitaba buludiki abu ntshinyi? Udi wamba ne: “Kuitaba mashintuluka adi bulongolodi bua Yehowa buenza kutu anu kupetesha masanka. Bidi bitulongolola bua mashintuluka manene enzeka kumpala eku.” Udi wenda uluangana ne malu a kuakaja bua mudibu basangishe bisumbu pamue peshi bua mudibu bashintulule mudimu webe anyi? Ikala mushindike ne: Yehowa mmumanye muudi udiumvua. Paudi witaba mashintulula a nunku, ne ushala mulamate Yehowa ne bulongolodi budiye wenza nabu malu; neakubeneshe bushuwa.​—Mis. 18:25.

15. Mmunyi mutudi mua kulama bieledi bietu bia meji padi ntatu itudi tupeta ifumina mu tshisumbu?

¹⁵ Bu mutudi tusemena pabuipi ne nshikidilu wa ndongoluelu wa malu eu, tudi tuela meji ne: netupete ntatu ifumina mu tshisumbu. Ntatu ayi neyiteke lulamatu luetu kudi Yehowa mu diteta. Nunku tudi ne bua kulama bieledi bietu bia meji. Wewe mumone ne: muena Kristo nebe mmukuenzele bualu bubi, kumulaminyi munda to. Bobu bakunyoke mu tshisumbu, kuimanyinyi pa mushindu uudi umona bu ne: udi mupuekeshibu milongo au to, itaba dinyoka, ne akaja malu adi akengela. Padi mashintuluka adi enzeka mu bulongolodi bua Yehowa akulenga, mbimpe uitabe ne muoyo mujima ne ulonde buludiki.

16. Ntshinyi tshiudi mua kuenza bua wewe kushala mueyemene Yehowa ne bulongolodi buende?

¹⁶ Kudi mushindu wa wewe kushala mueyemene Yehowa ne bulongolodi buende nansha lulamatu luebe luolu lutetshibue. Kadi bua kuenza nanku, bidi bikengela ulame bieledi biebe bia meji, mmumue ne: ushale talala, wele meji bimpe, ne umone malu mudi Yehowa uamona. Disuika bua kulonga malu a bantu badi Bible wakuila bavua bafike ku ditantamena ntatu ya muomumue ne iudi nayi, ne elangana meji a bilejilu biabu. Sambila, ulomba Yehowa diambuluisha. Kuditodi to. Dîba adi, nansha bia munyi, Satana kakukumbana bua kukupandulula ne Yehowa anyi ne bulongolodi buende nansha.​—Yak. 4:7.