TSHIENA-BUALU TSHIA KULONGA 45
Mudi Yehowa utuambuluisha bua tukumbaje mudimu wetu
“Bulelela nebamanye ne: muprofete uvua munkatshi muabu.”—YEH. 2:5.
MUSAMBU WA 67 ‘Ambila bantu Dîyi dia Nzambi’
KADIOSHA a
1. Ntshinyi tshitudi bamanye? Tudi ne dishindika kayi?
TUDI bamanye ne: tudi mua kupeta buluishi patudi tuenza mudimu wetu wa diyisha. Buluishi ebu budi mua kuvula bikole kumpala eku. (Dan. 11:44; 2 Tim. 3:12; Buak. 16:21) Kadi tudi ne dishindika dia ne: Yehowa neatuambuluishe mudibi bikengela. Bua tshinyi? Yehowa utu anu wambuluisha batendeledi bende bua kukumbaja midimu yabu, nansha yoyi mikole. Tshilejilu, tukonkononayi amue malu a mu nsombelu wa muprofete Yehezekele, uvua muyishe bena Yuda bavuabu bakuate baye nabu mu Babilona.
2. Ntshinyi tshivua Yehowa muambe bua bantu bavua Yehezekele ne bua kuyisha? Ntshinyi tshituakonkonona mu tshiena-bualu etshi? (Yehezekele 2:3-6)
2 Mbantu ba mushindu kayi bavua Yehezekele uyisha? Yehowa wakamba muvuabu bena “tshishiku,” ba “mioyo mipape,” ne “bantomboji.” Bavua benzelangana bibi bu tumitshi tua mêba ne mêba atu, ne bavua bakebelangana njiwu bu tuminyiminyi. Ke bualu kayi Yehowa wakambila Yehezekele misangu ne misangu ne: ‘Kutshinyi to’! (Bala Yehezekele 2:3-6.) Yehezekele uvua ukokesha bua kukumbaja mudimu wende wa diyisha bualu 1) Yehowa ke uvua mumutume, 2) nyuma muimpe uvua mumupeshe bukole, ne 3) mêyi a Yehowa avua makoleshe ditabuja diende. Mmunyi muvua malu asatu aa mambuluishe Yehezekele? Mmunyi mudiwu atuambuluisha petu lelu?
YEHOWA KE UVUA MUTUME YEHEZEKELE
3. Mmêyi kayi avua anu makankamije Yehezekele? Mmunyi muvua Yehowa mumujadikile ne: uvua ne bua kumukuatshisha?
3 Yehowa wakambila Yehezekele ne: “Ndi nkutuma.” (Yeh. 2:3, 4) Mêyi aa avua anu makankamije Yehezekele. Bua tshinyi? Kakuyi mpata wakavuluka ne: Yehowa uvua muambe mêyi a muomumue aa pavuaye mupeshe Mose ne Yeshaya mudimu wa buprofete. (Ekes. 3:10; Yesh. 6:8) Yehezekele uvua kabidi mumanye muvua Yehowa muambuluishe baprofete babidi abu bua kukumbaja mudimu mukole uvuabu nawu au. Nunku mêyi avua Yehowa muambile Yehezekele misangu ibidi ne: “Ndi nkutuma,” avua mamushindikile ne: Yehowa uvua ne bua kumukuatshisha. Bualu bukuabu, mêyi aa: “Dîyi dia Yehowa diakalua kundi,” adi mu mukanda wa Yehezekele misangu ya bungi. (Yeh. 3:16) Mêyi makuabu a ne: “Dîyi dia Yehowa diakalua kabidi kundi,” adimu misangu ya bungi. (Yeh. 6:1) Bushuwa, Yehezekele uvua mutuishibue ne: Yehowa ke uvua mumutume. Bu muvuaye kabidi muana wa muakuidi, tatuende uvua pamuapa mumulongeshe malu a muvua Yehowa ujadikila baprofete bende misangu yonso ne: uvua ne bua kubakuatshisha. Yehowa wakambila Izaka ne Yakoba ne Yelemiya, muntu pa nkayende, mêyi aa: “Ndi nebe.”—Gen. 26:24; 28:15; Yel. 1:8.
4. Mmêyi kayi adi akankamija avua anu makoleshe Yehezekele?
4 Ntshinyi tshivua bena Isalele ba bungi ne bua kuenza pavua Yehezekele mua kubayisha? Yehowa wakamba ne: “Nzubu wa Isalele neabenge bua kukuteleja bualu ki mbasue kunteleja to.” (Yeh. 3:7) Pavuabu babenga Yehezekele, Yehowa ke uvuabu babenga. Mêyi aa akajadikila Yehezekele ne: dibenga kumuteleja adi kadivua dileja ne: uvua wenza mudimu wende wa buprofete bibi to. Yehowa wakajadikila kabidi Yehezekele ne: pavua dilumbuluisha divuaye umanyisha adi dilua, bantu bavua ne bua ‘kumanya ne: muprofete uvua munkatshi muabu.’ (Yeh. 2:5; 33:33) Kakuyi mpata, mêyi adi akankamija aa akapesha Yehezekele bukole buvuaye nabu dijinga bua kukumbaja mudimu wende.
YEHOWA KE UDI MUTUTUME LELU
Anu bu Yehezekele, tudi mua kutuilangana ne bantu badi babenga mukenji wetu anyi badi batuluisha, kadi tudi bamanye ne: Yehowa udi netu (Tangila tshikoso 5, 6)
5. Bilondeshile Yeshaya 44:8, ntshinyi tshidi tshitupetesha bukole?
5 Bu mutudi bamanye ne: Yehowa ke udi mututume, tudi tupeta bukole. Mmutupeshe lumu padiye utubikila ne: tudi “bantemu bende.” (Yesh. 43:10) Edi ndiakalenga dinene be! Anu muvua Yehowa muambile Yehezekele ne: “kutshinyi,” udi utuambila petu ne: ‘Kanutshinyi.’ Bua tshinyi kakuena tshia tuetu kutshinyina baluishi betu? Anu bu Yehezekele, Yehowa mmututume ne udi utukuatshisha.—Bala Yeshaya 44:8.
6. a) Mmunyi mudi Yehowa utujadikila ne: neatukuatshishe? b) Ntshinyi tshidi tshitukolesha?
6 Yehowa udi utujadikila ne: neatukuatshishe. Tshilejilu, kumpala kua yeye kuamba ne: “Nudi bantemu banyi,” wakamba ne: “Paudi upitshila mu mâyi, meme nengikale nebe, ne paudi upitshila mu misulu, kayakukubuikila. Paudi wendela mu kapia, kuakupia, peshi ndimi ya kapia kayakukuosha to.” (Yesh. 43:2) Patutu tuyisha, imue misangu tutu tutuilangana ne bipumbishi bidi bu mâyi muwule ne tutuilangana kabidi ne ntatu mienze bu kapia. Nansha nanku, Yehowa udi utuambuluisha, tutungunuka ne kuyisha. (Yesh. 41:13) Anu bu mu matuku a Yehezekele, bantu ba bungi lelu badi babenga mukenji utudi tuyisha. Tudi anu bavuluke ne: dibenga diabu adi kadiena dileja ne: katuena tuenza mudimu wetu wa Bantemu ba Yehowa bimpe to. Bidi bitukolesha patudi tumanya ne: Yehowa udi usanka patudi tutungunuka ne kuyisha mukenji wende ne lulamatu luonso. Mupostolo Paulo wakamba ne: “Muntu yonso neapete difutu diende bilondeshile mudimu wende.” (1 Kol. 3:8; 4:1, 2) Muanetu wa bakaji kampanda udi mpanda-njila wa bidimu bia bungi udi wamba ne: “Ndi ngumvua disanka bua mundi mumanye ne: Yehowa udi utufuta bua mutudi tudienzeja.”
NYUMA WA NZAMBI WAKAPESHA YEHEZEKELE BUKOLE
Yehezekele umona mu tshikena kumona Yehowa musombe mu ditempu dia mu diulu. Bidi bitamba kumushindikila ne: Yehowa neamuambuluishe bua kukumbaja mudimu wende (Tangila tshikoso 7)
7. Dîba dionso divua Yehezekele wela meji a tshikena kumona, bivua anu ne bua kuikala bimuenzela tshinyi? (Tangila tshimfuanyi tshia pa tshizubu.)
7 Yehezekele wakamona mu tshikena-kumona muvua nyuma wa Nzambi wambuluisha banjelu ba bukole ne wenza bua nkata ya ditempu dia mu diulu yende. (Yeh. 1:20, 21) Tshiakenza Yehezekele ntshinyi? Wakafunda tshivua tshienzeke, wamba ne: “Pamvua mutshimone, ngakatua mpala panshi.” Yehezekele wakapeta ditshina dikole, yeye kukuluka panshi. (Yeh. 1:28) Pashishe, dîba dionso divuaye wela meji a tshikena kumona tshia dikema atshi, bivua anu ne bua kuikala bitamba kumushindikila kabidi ne: Yehowa uvua ne bua kumuambuluisha ne nyuma wende muimpe bua akumbaje mudimu wende.
8, 9. a) Ntshinyi tshiakenzekela Yehezekele bua dîyi divua Yehowa mumutumine? b) Mmunyi muvua Yehowa mukoleshe kabidi Yehezekele bua muvuaye mu teritware mukole?
8 Yehowa wakatumina Yehezekele dîyi ne: “Muana wa muntu, imana kuulu bua mmone mua kuyukila nebe.” Dîyi divuabu batumine Yehezekele adi ne nyuma wa Nzambi biakamupesha bukole buvuaye nabu dijinga bua kujuka panshi. Yehezekele wakafunda ne: “Nyuma wakabuela munda muanyi ne kungimanyikaye kuulu.” (Yeh. 2:1, 2) Pashishe “tshianza” tshia Nzambi, tuambe ne: nyuma wende ke ukavua ulombola Yehezekele mu mudimu wende wonso wa diyisha. (Yeh. 3:22; 8:1; 33:22; 37:1; 40:1) Nyuma wa Nzambi wakapesha Yehezekele bukole bua kuenza mudimu uvuaye nawu wa kuyisha bena “mutu mukole ne muoyo mupape” ba muaba uvuaye. (Yeh. 3:7) Yehowa wakambila Yehezekele ne: “Ndi mukoleshe ku mêsu kuebe anu mudi ku mêsu kuabu menemene ne mukoleshe mpala webe anu mudi mpala yabu menemene. Ndi muvuije mpala webe bu dibue dia mbongo, mukole kupita dibue dikole. Kubatshinyi anyi mpala yabu kayikuzakeji” to (Yeh. 3:8, 9) Bivua anu bu Yehowa wambila Yehezekele ne: ‘Kulekedi mutu mukole wa bantu abu ukutekesha mu mikolo to. Nenkukoleshe.’
9 Pashishe, Nyuma wa Nzambi wakambula Yehezekele, kuyaye nende muaba uvuaye ne bua kuyisha. Yehezekele wakafunda ne: “Tshianza tshia Yehowa tshiakasomba pambidi panyi ne bukole.” Biakangata muprofete eu lumingu lujima bua kulonga mukenji uvuaye ne bua kumanyisha au ne kuwumvua bimpe bua kumona mua kuwuyisha ne dishindika. (Yeh. 3:14, 15) Yehowa wakalua kumutuma mu tshibandabanda muvua ‘nyuma mumubuelele munda muende.’ (Yeh. 3:23, 24) Yehezekele uvua pabuipi bua kutuadija mudimu wende.
NYUMA WA NZAMBI UDI UTUPESHA BUKOLE LELU
Ntshinyi tshidi tshituambuluisha bua kukumbaja mudimu wetu anu muvuabi bua Yehezekele? (Tangila tshikoso 10)
10. Ndiambuluisha kayi ditudi nadi dijinga bua kukumbaja mudimu wetu wa diyisha? Bua tshinyi?
10 Ndiambuluisha kayi ditudi nadi dijinga bua kukumbaja mudimu wetu wa diyisha? Bua kuandamuna, vuluka tshivua tshifikile Yehezekele. Kumpala kua kutuadijaye midimu yende ivua itangila diyisha, nyuma wa Nzambi wakamupesha bukole buvuaye nabu dijinga. Lelu, anu muvuabi bua Yehezekele, tudi mua kukumbaja mudimu wetu anu ku diambuluisha dia nyuma wa Nzambi. Bua tshinyi? Bualu Satana udi utuela mvita bua tulekele kuyisha. (Buak. 12:17) Bua mmuenenu wa buntu, tudi mua kumona bu ne: katuena tukumbana bua kutshimuna Satana to. Kadi tudi tuenda tumutshimuna ku diambuluisha dia mudimu wetu wa diyisha! (Buak. 12:9-11) Mushindu kayi? Patudi tuyisha, tudi tuleja mutudi katuyi ne buôwa bua mudiye utufunyina. Musangu wonso utudi tuyisha, bidi bileja ne: tudi batshimune Satana. Nunku tshitudi mua kuamba ntshinyi bua mutudi bakumbane bua kuyisha nansha mudiku buluishi? Tshia kuamba ntshiotshi etshi: nyuma muimpe wa Nzambi ke udi utupesha bukole, ne Yehowa udi utuanyisha.—Mat. 5:10-12; 1 Pet. 4:14.
11. Ntshinyi tshiatupesha nyuma muimpe? Tshia kuenza ntshinyi bua tutungunuke ne kutshipeta?
11 Dimanya ditudi nadi dia ne: Yehowa uvua mukoleshe ku mêsu kua Yehezekele ne mpala wende mu ngumvuilu wa tshimfuanyi didi ditujadikila kabidi tshinyi? Didi ditujadikila ne: nyuma wa Nzambi udi mua kutupesha bukole bua tuetu kutantamena lutatu luonso lutudi mua kutuilangana nalu patudi tuyisha. (2 Kol. 4:7-9) Kadi tshia kuenza ntshinyi bua tutungunuke anu ne kupeta nyuma muimpe? Mbimpe tusuminyine anu ne kulomba nyuma eu, batuishibue ne: Yehowa neateleje masambila etu. Yezu wakalongesha bayidi bende ne: “Tungunukayi ne kulomba, . . . tungunukayi ne kukeba, . . . tungunukayi ne kukokola.” Diandamuna dia Yehowa ndia ‘kupesha badi bamulomba nyuma muimpe.’—Luka 11:9, 13; Bien. 1:14; 2:4.
MÊYI A NZAMBI AKAKOLESHA DITABUJA DIA YEHEZEKELE
12. Bilondeshile Yehezekele 2:9–3:3, muvungu uvua ufumina kuepi? Uvua ne tshinyi munda?
12 Mêyi a Nzambi kaavua anu mapeshe Yehezekele dikima patupu to, avua makoleshe kabidi ditabuja diende. Wakamona tshianza tshikuate muvungu mu tshikena kumona. (Bala Yehezekele 2:9–3:3.) Muvungu au uvua ufumina kuepi? Uvua ne tshinyi munda? Mmunyi muvuawu mudiishe Yehezekele? Tuandamunayi. Muvungu uvua ufumina ku nkuasa wa bukalenge wa Nzambi. Pamuapa Yehowa uvua mutume umue wa ku banjelu banayi bakavua Yehezekele mumone bua kumupesha muvungu au. (Yeh. 1:8; 10:7, 20) Muvua mêyi a Nzambi a mukenji munene wa dilumbuluisha uvua Yehezekele ne bua kuambila bantomboji bavuabu bakuate baye nabu. (Yeh. 2:7) Bavua bafunde mukenji au pa mutu ne pa nyima pa muvungu au.
13. Yehowa uvua muambile Yehezekele bua enze tshinyi ne muvungu? Bua tshinyi uvua mushême?
13 Yehowa wakambila muprofete wende bua kudia muvungu au, ‘uwuje nawu tshifu tshiende.’ Wakatumikila, yeye kuwudia wonso. Bivua biumvuija tshinyi? Yehezekele uvua ne bua kulonga mukenji uvuaye ne bua kumanyisha au ne kuwumvua bimpe. Uvua ne bua kuitabuja mukenji au bua bimusake bua kuyisha. Pashishe bualu bua dikema buakenzeka. Yehezekele wakumvua ne: muvungu au uvua “mushême bu buitshi.” (Yeh. 3:3) Bua tshinyi? Bualu bua Yehezekele, diakalenga dia kuikala muleji-mpala wa Yehowa divua bualu bushême, bua disanka. (Mis. 19:8-11) Uvua ne dianyisha dia bungi bua muvua Yehowa muanyishe bua amuenzele mudimu bu muprofete wende.
14. Tshiakambuluisha Yehezekele bua kuikala pabuipi bua kutuadija mudimu wende ntshinyi?
14 Yehowa wakalua kuambila Yehezekele ne: “Mêyi anyi onso andi nkuambila, ualame ku muoyo ne uateleje.” (Yeh. 3:10) Yehowa uvua umuambila bua alame mêyi avua mafunda mu muvungu au mu lungenyi luende ne aelele meji. Au ke mushindu uvuaye ukolesha ditabuja diende. Muvungu au wakamupetesha mukenji mukole wa kuyisha bantu. (Yeh. 3:11) Bu muvuaye nawu mu muoyo wende ne ku mishiku yende, uvua pabuipi bua kutuadija mudimu wende ne kuwujikija.—Fuanyikija ne Misambu 19:14.
MÊYI A YEHOWA ADI AKOLESHA DITABUJA DIETU LELU
15. Bua kunanukila, ntshinyi tshitudi ne bua ‘kulama ku muoyo’?
15 Bua kunanukila mu mudimu wetu, mbimpe tutungunuke petu ne kulonga mêyi a Nzambi. Malu onso adi Yehowa utuambila, tudi ne bua ‘kualama ku muoyo.’ Lelu, Yehowa udi wakula netu ku diambuluisha dia Bible, Dîyi diende. Ntshinyi tshitudi mua kuenza bua Dîyi dia Nzambi ditungunuke ne kulombola meji etu, mushindu utudi tudiumvua, ne majinga etu?
16. Ntshinyi tshitudi ne bua kuenza ne Dîyi dia Nzambi? Mmunyi mutudi mua kudibueja mu muoyo wetu?
16 Anu mudi biakudia bikolesha mubidi wetu patudi tubidia ne bitatshika bimpe munda, patudi tulonga Dîyi dia Nzambi ne tuelangana meji a bitudi tulonga, ditabuja dietu didi dikola. Tudi tuvuluka dilongesha ditudi bapete bua muvungu. Yehowa mmusue bua ‘tuwuje tshifu tshietu’ ne Dîyi diende, mmumue ne: tudiumvue bimpe. Bua kuenzekabi nanku, bidi bikengela tuikale tusambila, tubala ne tuelangana meji. Tshia kumpala, tudi tusambila bua kulongolola muoyo wetu bua kubuejamu meji a Nzambi. Tshibidi, tudi tubala mvese wa mu Bible, ne tshisatu tuimana bua kuelangana meji, kuanana bikole bua bitudi babale. Tshienzeka ntshinyi? Patudi tuelangana meji nanku, muoyo wetu wa mu tshimfuanyi neumine Dîyi dia Nzambi.
17. Bua tshinyi kuelangana meji a bitudi tubala mu Bible kudi ne mushinga wa bungi?
17 Bua tshinyi kubala Bible ne kuelangana meji a bitudi tubala kudi ne mushinga wa bungi? Bualu kudi kutupesha bukole bua tumone mua kuyisha mukenji wa Bukalenge lelu ne kumanyisha mukenji mukole udi usama ku muoyo wa dilumbuluisha utuikala mua kuyisha mu matuku makese emu. Bualu bukuabu, patudi tuelangana meji bua ngikadilu milenga ya Yehowa, malanda mimpe atudi badie nende neashême. Dîba adi netupete tshintu tshishême bushuwa, tshidi tshisankisha, mmumue ne: ditalala dia mu muoyo, tusanka ne bitudi nabi.—Mis. 119:103.
BASAKIBUE BUA KUYISHA
18. Ntshinyi tshitaba bantu ba mu teritware wetu? Bua tshinyi?
18 Tudi bashilangane ne Yehezekele bualu katuena benzeja ku bukole bua nyuma bua kuambila bantu mêyi a buprofete to. Kadi tudi badisuike bua kutungunuka ne kuambila bantu mukenji mufundisha ku bukole bua nyuma. Yehowa mmulame mukenji eu mu Dîyi diende difunda. Netuwumanyishe too ne pajika mudimu wa diyisha wonso mudiye musue. Pakumbana tshikondo tshia dilumbuluisha, bantu ba mu teritware wetu kabakuikala ne tshiabasaka bua kuamba ne: kabavua bapete didimuija, anyi ne: Nzambi uvua mubalengulule to. (Yeh. 3:19; 18:23) Kadi nebalue anu kuitaba ne: mukenji utuvua tuyisha uvua wa kudi Nzambi.
19. Ntshinyi tshiatupesha bukole bua kukumbaja mudimu wetu?
19 Ntshinyi tshiatupesha bukole bua kukumbaja mudimu wetu? Mmalu asatu avua mambuluishe Yehezekele au. Tudi tutungunuka ne kuyisha bualu tudi bamanye ne: mbatutume kudi Yehowa, nyuma muimpe mmutupeshe bukole, ne Dîyi dia Nzambi ndikoleshe ditabuja dietu. Bu mudi Yehowa utukuatshisha, bidi bituambuluisha bua kukumbaja mudimu wetu ne kunanukila “too ne ku nshikidilu.”—Mat. 24:13.
MUSAMBU WA 65 Ndaku anu kumpala!
a Mu tshiena-bualu etshi, netukonkonone malu asatu adi aleja muvua Yehowa muambuluishe muprofete Yehezekele bua kukumbaja mudimu wende wa kuyisha. Abi nebikoleshe dishindika ditudi nadi dia ne: neatuambuluishe petu bua tukumbaje mudimu wetu.