1, 2. a) Mmunyi mudi dinanga ne ditabuja bipetangana? b) Nnkonko kayi ituandamuna?

TATU wetu Yehowa mmulaye bua kubenesha batendeledi bende ba lulamatu. Eu ke mushindu udi Yehowa uleja mudiye mutunange, ne tudi bamunange “bualu yeye uvua mudianjile kutunanga.” (1 Yone 4:19) Padi dinanga dietu kudi Yehowa dikola, ditabuja dietu kudiye didi padi dikola ne tudi tupeta dishindika dikole dia ne: Yehowa neafute bantu badi bamunange.​—Bala Ebelu 11:6.

² Yehowa mmufutshi wa bantu. Ebu mbualu bunene budi buleja tshidiye ne malu adiye wenza. Nunku bua kuikala ne ditabuja kudi Nzambi, tudi ne bua kuitaba ne: neafute bantu badi bamukeba ne muoyo mujima. Bua tshinyi? Bualu “ditabuja ndindila dishindame dia tshitudi batekemene.” (Ebelu 11:1) Ditabuja didi diumvuija kuikala ne dishindika dikole dia ne: Nzambi neabeneshe bantu badi ne lulamatu kudiye. Kadi mmunyi mudi kutekemena difutu kutuambuluisha? Mmunyi mudi Yehowa mufute batendeledi bende ba kale ne ba lelu? Tukonkononayi.

3. Mmulayi kayi utudi tupeta mu Malaki 3:10?

³ Yehowa Nzambi mmulaye bua kufuta batendeledi bende ba lulamatu.  Udi utulomba bua kumuenzela mudimu ne muetu muonso ne kuikala bajadike ne: neatubeneshe. Yehowa udi wamba ne: ‘Nuntete mpindieu.’ Udi utungunuka wamba ne: ‘Numone bingikala tshiyi mununzuluile biibi bia mu diulu, munulokeshile masanka, kanuyi nukengela bintu bikuabu kabidi.’ (Malaki 3:10) Tudi tuleja dianyisha dietu bua bualu ebu patudi tuitaba dilomba dia Yehowa dia kumuteta.

4. Bua tshinyi tudi ne bua kueyemena mulayi wa Yezu udi mu Matayi 6:33?

⁴ Yezu uvua mulaye bayidi bende ne: bobu bateke Bukalenge pa muaba wa kumpala, Nzambi uvua ne bua kubambuluisha. (Bala Matayi 6:33.) Yezu uvua muambe nunku bualu uvua mumanye ne: milayi ya Nzambi itu misangu yonso ikumbana. (Yeshaya 55:11) Ke bualu kayi tudi petu ne bua kuikala bashindike ne: tuetu ne ditabuja dikole kudi Yehowa, neakumbaje mulayi wende eu: “Tshiakukushiya nansha kakese, tshiakukulekela nansha kakese.” (Ebelu 13:5) Mulayi wa Yehowa eu udi utuambuluisha bua kueyemena mêyi a Yezu adi mu Matayi 6:33.

5. Bua tshinyi diandamuna divua Yezu mupeshe Petelo didi ditukolesha tuetu bonso?

⁵ Mupostolo Petelo wakebeja Yezu umue musangu ne: “Tuetu tudi bashiye bintu bionso, bakulonde; netupete tshinyi?” (Matayi 19:27) Yezu kavua mutandishe Petelo bua muvuaye muele lukonko elu to. Kadi, Yezu wakambila bayidi bende ne: bavua ne bua kupeta difutu bua muvuabu badipangishe amue malu. Bapostolo ne bantu bakuabu ba lulamatu nebakokeshe ne Yezu mu diulu mu matuku atshilualua. Kadi Yezu uvua muleje kabidi ne: kudi difutu didi bantu bapeta nansha mpindieu pakambaye ne: “Muntu yonso udi mushiye nzubu anyi bana babu ba balume anyi ba bakaji  anyi tatu wende anyi mamu wende anyi bana bende anyi madimi ende bua dîna dianyi, neapete bintu misangu ya bungi menemene, neapete kabidi ne muoyo wa tshiendelele.” (Matayi 19:29) Bayidi ba Yezu bonso badi mua kupeta mu tshisumbu lelu batatu, bamamu, bana babu ba balume, bana babu ba bakaji, ne bana. Malu aa adi ne mushinga wa bungi kupita bualu kayi buonso butudi badipangishe bua Bukalenge bua Nzambi.

6. Bua tshinyi Yehowa mmulaye bua kufuta batendeledi bende?

⁶ Pa kumbusha masanka a bungi atudi tupeta lelu, tudi bindile ne muoyo kuulu kuulu masanka mapite bungi mu matuku atshilualua. (1 Timote 4:8) Yehowa mmulaye bua kufuta batendeledi bende ba lulamatu, ne kumanya bualu ebu kudi kutuambuluisha bua kutantamena ntatu. Tuetu bashindike ne muoyo mujima ne: Yehowa “udi ulua mufutshi wa badi bamukeba ne muoyo mujima,” netushale ne lulamatu.​—Ebelu 11:6.

7. Mmunyi mudi ditekemena difuanangane ne luongo?

⁷ Yezu wakamba mu Muyuki wende wa pa mukuna ne: “Nusanke, nuikale ne disanka dia bungi, bualu difutu dienu ndinene mu diulu; bualu ke muvuabu bakengeshe baprofete bavua kumpala kuenu.” (Matayi 5:12) Bamue batendeledi ba Nzambi nebapete difutu mu diulu. Bakuabu nebapete difutu dia muoyo wa kashidi pa buloba bukudimuna mparadizu. Ebu mbualu bukuabu budi ne bua kutusaka bua ‘kusanka ne kuikala ne disanka dia bungi.’ (Musambu 37:11; Luka 18:30) Kadi buetu tuetu bonso, ditekemena dietu didi “bu luongo lua muoyo, dikole, dishindame.” (Ebelu 6:17-20) Anu bu mutu luongo lukuba mazuwa padiku tshipepele tshikole, ditekemena dietu dikole didi dituambuluisha bua kushala bashindame. Didi ditupesha bukole bua kutantamena ntatu.

8. Mmunyi mudi ditekemena dietu dikepesha tunyinganyinga?

⁸ Ditekemena dietu didi dituambuluisha bua kukepesha tunyinganyinga tutudi tumvua. Anu bu buanga butu butalaja bisama mu mubidi, milayi ya Nzambi itu italaja tunyinganyinga mu muoyo. Bidi bitukolesha patudi tumanya ne: Yehowa neatutabalele patudi tumupuila bujitu buetu. (Musambu 55:22) Tudi ne bua kuikala ne dishindika dia ne: Nzambi udi mua kuenza “bivule bipitshidile kule ne kule malu onso atudi tulomba.” (Efeso 3:20) Yehowa neatuambuluishe, ki nganu ne bivule anyi ne bivule bipitshidile to, kadi “ne bivulule bipitshidile kule ne kule”!

9. Mmunyi mutudi bamanye ne: Yehowa neatubeneshe?

⁹ Bua kupeta difutu, tudi ne bua kuikala ne ditabuja dikole kudi Yehowa ne kulonda buludiki buende. Mose wakambila tshisamba tshia Isalele ne: ‘Yehowa neanusankishe mu buloba budi Yehowa, Nzambi wenu, munupe bu bupianyi buenu; binumvua dîyi dia Yehowa, Nzambi wenu, bua kutumikila mikenji yonso ingakunuambila lelu. Bualu bua Yehowa, Nzambi wenu, neanusankishe bu muakanulayaye.’ (Dutelonome 15:4-6) Udiku mushindike ne muoyo mujima ne: Yehowa neakubeneshe wewe mutungunuke ne kumuenzela mudimu ne lulamatu anyi? Kudi malu adi ne bua kukusaka bua kuikala ne dishindika edi.

10, 11. Mmushindu kayi uvua Yehowa mufute Jozefe?

¹⁰ Bavua bafunde Bible bua diakalenga dietu. Tudi tupetamu bilejilu bia muvua Nzambi mufute batendeledi bende ba kale. (Lomo 15:4) Jozefe mmushiye tshilejilu tshimpe mu bualu ebu. Tshia kumpala, bana babu bakamupanyisha bu mupika. Pashishe, mukaji wa mfumuende wakamushiminyina bualu ne kumuelabu mu buloko mu Ejipitu. Pavua Jozefe mu buloko, bavuaku bamutapulule ne Yehowa anyi? Nansha kakese! Bible udi wamba ne: ‘Yehowa  uvua anu ne Jozefe, kutungunukaye ne kumuleja dinanga dia lulamatu, Yehowa uvua ne Jozefe, ne Yehowa uvua wenza bua malu onso avuaye wenza atute diakalengele.’ (Genese 39:21, 23, NWT) Nansha pavua Jozefe mu nsombelu mikole ayi, wakindila Nzambi wende ne lutulu.

¹¹ Bidimu bia bungi pashishe, Palô wakapatula Jozefe mu buloko, ne mupika uvua ne budipuekeshi eu kuluaye muntu muibidi wa bukole uvua ukokesha mu Ejipitu. (Genese 41:1, 37-43) Pavua Jozefe ne mukajende balele bana babidi ba balume, ‘Jozefe wakinyika muanabute dîna ne: Manashe; bualu bua yeye wakamba ne: Nzambi wakumpuisha muoyo bua mudimu wanyi mukole ne bua bonso ba mu nzubu wa tatuanyi. Wakinyika muana mukuabu dîna ne: Efelayima; bualu bua wakamba ne: Nzambi wakunkumbaja mu buloba bua dikenga dianyi.’ (Genese 41:51, 52) Yehowa wakafuta Jozefe bua lulamatu luende, ke yeye kupeta bukole bua kusungila bena Isalele ne bena Ejipitu ku tshiyole tshia nzala. Jozefe uvua kabidi mumanye ne: Yehowa ke uvua mumufute ne mumubeneshe.​—Genese 45:5-9.

12. Mmunyi muvua Yezu mushale ne lulamatu pavuaye mu mateta?

¹² Yezu Kristo uvua pende mutumikile Nzambi mu mateta a bungi, ne Yehowa wakamufuta. Ntshinyi tshivua tshiambuluishe Yezu bua kushala ne lulamatu? Dîyi dia Nzambi didi diumvuija ne: “Bua disanka divua dimutekela kumpala, wakatantamena mutshi wa makenga, kulengululaye bundu.” (Ebelu 12:2) Yezu uvua bushuwa usanka bua kutumbisha dîna dia Nzambi. Yezu wakapeta difutu dia kuanyishibua kudi Tatuende ne kupeta midimu ya bungi ya pa buayi. Bible udi wamba ne: “Mmusombe ku tshianza tshia balume tshia nkuasa wa bukalenge wa Nzambi.” Udi wamba kabidi ne: “Nzambi wakamubandisha kuulu kule, kumupeshaye ne bulenga buonso dîna didi ku mutu kua dîna dikuabu dionso.”​—Filipoyi 2:9.

13, 14. Mmunyi mudi Yehowa umvua bua malu atudi tumuenzela?

¹³ Tudi batuishibue ne: Yehowa udi wangata ne mushinga tshionso tshitudi tuenza bua kumuenzela mudimu. Udi utumvuila patudi katuyi tudiangata ne mushinga anyi patudi ne dielakana bua malu atudi tukokesha bua kuenza. Udi ututabalela bikole patudi tusamisha mutu bua mudimu wa bianza anyi bua kukumbaja majinga a bena mu dîku dietu. Udi utumvuila patudi katuyi mua kuenza kabidi bituvua tuenza kumpala mu mudimu wende bua mutudi tusama anyi bikale ne dibungama dikole. Tuikale bashindike ne muoyo mujima ne: Yehowa udi wangata lulamatu luetu ne mushinga wa bungi nansha tuetu ne ntatu.​—Bala Ebelu 6:10, 11.

¹⁴ Ikala kabidi mumanye ne: Yehowa udi ‘umvua milombu.’ Tudi ne bua kuikala batuishibue ne: udi ututeleja patudi tumulomba. (Musambu 65:2) “Tatu wa luse lua bungi ne Nzambi wa busambi buonso,” neatupeshe tshionso tshitudi natshi dijinga bua kushala pabuipi nende. Imue misangu, Nzambi udi mua kuenza mudimu ne bana betu ba balume ne ba bakaji bua kutuambuluisha. (2 Kolinto 1:3) Yehowa udi usanka patudi tuleja bantu luse. ‘Udi ufuila mupele luse udi usombesha Yehowa bintu; yeye neamuenzele bimpe ku buimpe buakumuenzelaye.’ (Nsumuinu 19:17; Matayi 6:3, 4) Ke bualu kayi tuetu tupesha bana betu bintu ne tubambuluisha, Yehowa udi umona malu mimpe atudi tuenza bu dibanza ditudi tumuela. Udi ulaya bua kutufuta bua tshienzedi tshimpe etshi.

15. Ndifutu kayi diudi wewe muindile ne muoyo kuulu kuulu? (Tangila tshimfuanyi tshia ntuadijilu tshia tshiena-bualu.)

¹⁵ Bena Kristo bela manyi badi ne ditekemena dia kupeta “tshifulu tshia butumbi tshia  buakane” bu difutu kudi Yezu. (2 Timote 4:7, 8) Kadi, wewe ne ditekemena dikuabu, Nzambi udi ukuangata anu ne mushinga. “Mikoko mikuabu” ya Yezu miliyo ya bungi mmindile ne muoyo kuulu kuulu difutu dia muoyo wa tshiendelele mu matuku atshilualua mu mparadizu pa buloba. Muomu amu ‘neyisanke mu ditalala dikumbane.’​—Yone 10:16; Musambu 37:11.

16. Mbualu kayi budi bukolesha butudi tupeta mu 1 Yone 3:19, 20?

¹⁶ Imue misangu tudi mua kumona ne: katuena tuenza bia bungi mu mudimu wa Yehowa, anyi tudi mua kuikala tudiebeja bikala Yehowa wanyisha bitudi tuenza. Tudi mene mua kudiumvua bu katuena bakumbane bua kupeta difutu nansha dimue. Kadi katuena ne bua kupua muoyo ne: “Nzambi mmunene kupita mioyo yetu ne mmumanye malu onso.” (Bala 1 Yone 3:19, 20.) Patudi tuenzela Yehowa mudimu bualu tudi ne ditabuja ne bamunange, netuikale batuishibue ne: neatufute nansha tuetu tumona bitudi tuenza bikale ne mushinga mukese.​—Mâko 12:41-44.

17. Ndifutu kayi ditudi bapete lelu?

¹⁷ Nansha mu matuku a ku nshikidilu wa bulongolodi bua Satana aa, Yehowa udi ubenesha bantu bende. Udi wenza bua tuikale ne dimanya dia bungi ne ditalala bu bana ba mu dîku dimue dia pa buloba bujima. (Yeshaya 54:13) Eyowa, anu muvua Yezu mulaye, Yehowa mmutufute lelu padiye mutupeshe dîku dia bana betu ba balume ne ba bakaji ba pa buloba bujima badi ne dinanga. (Mâko 10:29, 30) Bantu badi bakeba Nzambi ne muoyo mujima badi kabidi bapeta ditalala dia bungi dia mu muoyo ne disanka bu difutu.​—Filipoyi 4:4-7.

18, 19. Mmunyi mudi batendeledi ba Yehowa bumvua bua masanka adibu bapete?

¹⁸ Batendeledi ba Nzambi ba pa buloba bujima mbapete masanka a bungi bu difutu dia kudi Tatu wetu wa mu diulu. Tshilejilu, Bianca wa mu Allemagne udi wamba ne: “Ndi mupange mua kuela Yehowa tuasakidila bua mudiye ungambuluisha mu ntatu yanyi ne mudiye ku luseke luanyi dituku dionso. Nsombelu wa mu bulongolodi ebu mmunyanguke ne mmubi menemene. Kadi pandi ngenza mudimu wa Yehowa, ntu ndiumvua mu bukubi mu maboko ende. Misangu yonso indi ndipangisha bualu kampanda bua bualu buende, udi umpingajila masanka misangu lukama.”

¹⁹ Tuangate kabidi tshilejilu tshia Paula wa mu Canada udi ne bidimu 70 udi ne disama dia muongo mukonyangale didi dimutatshisha bikole. Udi uleja ne: nansha mudi disama edi dimupangisha bua kuenda, kadiena dimupangisha bua kuyisha to. Udi wamba ne: “Ntu nyisha mu mishindu mishilashilangane bu mudi ku telefone ne padi mpunga umueneka. Bua kudikankamija, ntu ne karné kantu mfundila mvese ne ngenyi ya mu mikanda yetu bintu mbalulula ku musangu ne ku musangu. Ntu nkabikila ne: ‘Karné kanyi kadi kangambuluisha.’ Tuetu batuishile mêsu pa milayi ya Yehowa, ditekeshibua mu mikolo ndia tshitupa tshîpi. Yehowa udiku misangu yonso bua kutuambuluisha nansha tuetu mu nsombelu kayi.” Nsombelu webe udi mua kuikala mushilangane bikole ne wa Bianca anyi wa Paula. Kadi udi mua kuela meji bua mishindu idi Yehowa mukufute wewe ne bantu badi bakunyunguluke. Mbitambe buimpe bua kuela meji bua malu mimpe adi Yehowa mukuenzele mu tshikondo etshi ne akuenzelaye mu matuku atshilualua!

20. Ntshinyi tshitudi mua kuindila ne muoyo kuulu kuulu tuetu batungunuke ne kudienzeja bua kuenzela Yehowa mudimu ne lulamatu?

²⁰ Kupu muoyo ne: masambila audi wenza ne muoyo mujima ‘neapete difutu dinene.’ Ikala mushindike ne: wewe ‘mumane kuenza disua dia Nzambi, newangate dikumbana dia mulayi.’ (Ebelu 10:35, 36) Nunku tutungunukayi ne kukolesha ditabuja dietu ne tuenzayi muetu muonso bua kuenzela Yehowa mudimu bashindike ne: neatufute!​—Bala Kolosayi 3:23, 24.