Uvuaku mubale bibejibeji bia Tshibumba tshia Nsentedi bishale ebi bimpe menemene anyi? Nanku, anji tangila ni udi mua kuandamuna nkonko idi ilonda eyi:

Bua tshinyi baledi badi basombele ku babende badi ne bua kukonkonona bimpe tshilumbu tshia muakulu padibu bambuluisha bana babu bua kukoleshabu malanda abu ne Yehowa?

Pamuapa bana nebalongele muakulu wa muaba udibu basombele mu kalasa anyi kudi balunda babu. Muana yeye mumanye miakulu ya bungi mbimpe be! Baledi badi ne bua kukonkonona bua kumanya tshisumbu tshidi bana babu mua kulongela bimpe bulelela ne kukola mu nyuma. Bidi mua kuikala tshisumbu tshia muakulu wa muaba udibu basombele anyi tshia muakulu wa kudibu bafumine. Pamutu pa baledi bena Kristo kuteka malu adibu basue kumpala, badi bateka malanda adi bana babu badie ne Nzambi kumpala.​—w17.05, dib. 9-11.

Yezu wakebeja Petelo ne: “Udi munnange kupita ebi anyi?” “Ebi” bivuaye wamba mbinganyi? (Yone 21:15)

Bidi bimueneka ne: Yezu uvua wakula bua mishipa ivua muaba au anyi bua mudimu wa diloba, peshi bua bionso bibidi. Panyima pa lufu lua Yezu, Petelo wakapingana ku mudimu wende wa diloba. Bena Kristo badi ne bua kukonkonona muaba udi nawu mudimu wa bianza mu mioyo yabu.​—w17.05, dib. 22-23.

Bua tshinyi Abalahama wakambila mukajende bua adimanyishe ne: uvua muanabu? (Gen. 12:10-13)

Mu bulelela, Sala ne Abalahama bavua ne tatu umue bashilangane ku bamamu. Bu Sala muambe ne: uvua mukaji wa Abalahama, bavua mua kushipa Abalahama ne kavua mua kupatula kankanunuina kavua Nzambi mulaye to.​—wp17.3, dib. 14-15.

Mmayele kayi avua Elias Hutter mupatule bua kuambuluisha bantu badi basue kulonga tshiena Ebelu?

Uvua musue kuambuluisha balongi bua bamanye mua kutapulula miaku minene ya mu tshiena Ebelu idi mu Bible ne maleta onso avuabu basakidile kumpala kua miaku ayi anyi ku ndekelu kuayi. Ke bualu kayi, wakafunda miaku minene ayi mu maleta matuile bikole, kadi maleta masakidila kumpala kua miaku anyi ku ndekelu kuayi kaavua matuile to. Mbenze bia muomumue mu mamanyisha adi kuinshi kua mabeji mu Bible wa Les Saintes Écritures. Traduction du monde nouveau (avec notes et références).​—wp17.4, dib. 11-12.

Mmêyi kayi manene adi mua kuambuluisha muena Kristo mu tshilumbu tshia kuikala ne tshingoma bua kudikuba kudi bantu bakuabu?

Amue a kudiwu ngowu aa: muoyo ntshintu tshia tshijila kudi Nzambi. Yezu kavua muambile bayidi bende bua kuikala ne miele ya mvita bua kudikuba to. (Luka 22:36, 38) Tudi ne bua kufula miele yetu ya mvita kuyivuija nkasu ya kudima nayi. Muoyo udi ne mushinga wa bungi kupita bintu bia ku mubidi. Tudi tunemeka kondo ka muoyo ka bakuabu, ne tudi basue kuikala bantu ba tshitembu. (2 Kol. 4:2)​—w17.07, dib. 31-32.

Bua tshinyi malu adi Matayi ne Luka balonda bua ntuadijilu wa nsombelu wa Yezu mmashilangane?

Matayi mmutambe kuimanyina pa malu a Jozefe, bu mudi tshivuaye usua kuenza pakamanyaye ne: Mariya uvua ne difu, ne mikenji ya kudi Nzambi yakapetaye bua kunyemena mu Ejipitu ne pashishe kualukila kuabu. Kadi Luka yeye mmutambe kuimanyina bikole pa malu adi atangila Mariya; tshilejilu, mmuakule bua muvua Mariya muye kutangila Elizabeta, ne bua tshivuaye muenze pavua Yezu mushale ku ntempelo.​—w17.08, dib. 32.

Bible uvua mupanduke ku malu kayi?

Mu kupita kua bidimu, diumvuija dia miaku ne biambilu bia mu Bible ndishintuluke. Dishintuluka dia malu a tshididi divua ne buenzeji pa miakulu ivua bantu ba bungi bakula. Bakudimunyi bavua kabidi bapete buluishi bua muvuabu bakudimuna Bible mu miakulu idi bantu ba bungi bakula.​—w17.09, dib. 19-21.

Tudi ne banjelu batu batulama anyi?

Tòo. Yezu wakakula bua banjelu ba bayidi bende bavua bamona mpala wa Nzambi. (Mat. 18:10) Uvua usua kuamba ne: banjelu badi batabalela bayidi bende bonso, kadi kavua usua kuamba ne: muyidi wende yonso utu ne muanjelu utu umukuba mu tshishima to.​—wp17.5, dib. 5.

Ndinanga dia mushindu kayi didi dipite mishindu mikuabu ya dinanga?

Padi dinanga dia agape dimanyine pa mikenji miakane didi dipita mishindu mikuabu yonso ya dinanga. Didi mua kukongoloja dinanga dikole dia buwetu ne dinanga ditudi tumvua bua muntu kampanda. Kadi didi dileja mêyi manene adi amuenekela ku malu mimpe atudi tuenza bua diakalenga dia bantu bakuabu.​—w17.10, dib. 7.