Mu 2 Kolinto 12:2, 3, Paulo udi wakula bua muntu kampanda uvua “muambuibue too ne mu diulu disatu.” Muntu au uvua nganyi? Pavua Paulo ufundila tshisumbu tshia mu Kolinto, wakashindika ne: Nzambi uvua wenza nende mudimu bu mupostolo. (2 Kol. 11:5, 23) Pashishe wakakula bua ‘bikena kumona . . . bia kudi Mukalenge ne malu avuaye mumubuluile.’ Paulo kavua wakula bua bena Kristo nende bakuabu to. Nunku, mu bulelela uvua wakula bua yeye muine bu muntu uvua mumone bikena kumona ne malu avuabu bamubuluile au.​—2 Kol. 12:1, 5.

Nunku Paulo ke uvua “muambuibue too ne mu diulu disatu” ne “muambuibue too ne mu mparadizu.” (2 Kol. 12:2-4) Uvua mutele tshiambilu ‘malu avuabu bamubuluile’ bua kuleja bualu buvua ne bua kuenzeka matuku atshilualua.

“Diulu disatu” divua Paulo mumone adi ntshinyi?

Mu Bible, muaku “diulu” udi mua kuleja diulu dietu diena dîna edi. (Gen. 11:4; 27:28; Mat. 6:26) Kadi “diulu” didi mua kumvuija tshintu tshikuabu. Didi mua kuleja bukokeshi bua bantu. (Dan. 4:20-22) Didi kabidi mua kuleja bukokeshi bua Bukalenge bua Nzambi bua mu diulu.​—Buak. 21:1.

Paulo wakamona “diulu disatu.” Tshivuaye usua kuamba ntshinyi? Kutu misangu itu Bible wambulula bualu kampanda misangu isatu bua kubushindika, kuleja bunene buabu anyi kubandisha tshipidi tshiabu. (Yesh. 6:3; Yeh. 21:27; Buak. 4:8) Bidi bimueneka bu ne: pavua Paulo wakula bua “diulu disatu,” uvua uleja butumbuke ne bunene bua bukokeshi bua Bukalenge bua Masiya budi Yezu Kristo ukokesha pamue ne bantu 144 000. (Tangila Étude perspicace des Écritures, Volime 1, dibeji dia 473-474; 476.) Anu mudi mupostolo Petelo mufunde, bilondeshile mulayi wa Nzambi, tudi bindile “diulu dipiadipia.”​—2 Pet. 3:13.

Kadi bua “mparadizu” uvua Paulo mutele?

Muaku “mparadizu” udi pawu mua kumvuija bintu bishilashilangane ebi: 1) Patudi tuvuluka muaba uvua bantu ku tshibangidilu, mu bulelela “mparadizu” udi mua kuleja Mparadizu muena dîna wikala pa buloba kumpala eku. 2) Udi kabidi mua kuleja nsombelu wa mu nyuma wikala nende bantu ba Nzambi mu bulongolodi bupiabupia. 3) Udi mua kuleja kabidi nsombelu muimpe mu diulu, ke “mparadizu wa Nzambi” udibu batele mu Buakabuluibua 2:7.​—Tangila Tshibumba tshia Nsentedi tshia dia 15/7/2015, dib. 8. tshik. 8.

Mbikumbane bua kuamba ne: mu 2 Kolinto 12:4 Paulo uvua wakula bua bintu bionso bisatu ebi pavuaye umvuija bualu buvua bumufikile.

Mu tshikoso:

“Diulu disatu” didibu batele mu 2 Kolinto 12:2 didi mua kuikala Bukalenge bua Masiya budi Yezu Kristo ulombola pamue ne bantu 144 000, mmumue ne: “diulu dipiadipia.”​—2 Pet. 3:13.

Badi badibikila ne: “diulu disatu” bualu Bukalenge abu mbukokeshi butumbuke budi bupite makuabu onso.

“Mparadizu” uvua Paulo “muambuibue” mu tshikena kumona au udi mua kuikala 1) Mparadizu muena dîna wikala pa buloba matuku atshilualua, 2) mparadizu wa mu nyuma wikalaku tshikondo atshi, ne neikale mualabale bikole kupita mparadizu wa mu nyuma udiku lelu, anyi 3) “mparadizu wa Nzambi” wa mu diulu wikalaku pende anu tshikondo tshimue tshimue atshi.

Malu onso aa adi aleja ne: bulongolodi bupiabupia nebuikale nsangilu wa diulu dipiadipia ne buloba bupiabupia. Netshikale ndongoluelu mupiamupia wa malu muenza ne mbulamatadi wa Bukalenge bua mu diulu ne bukua bantu badi benzela Yehowa mudimu mu mparadizu pa buloba.