DIANA udi ne bidimu bipite pa 80. Bayende uvua ne disama dia mu buongo (Alzheimer) ne uvua muenze bidimu ndambu mu lupitadi kumpala kua kufuaye. Uvua kabidi ne bua kutantamena lufu lua bana bende ba balume babidi eku utantamena kabidi kansere ka ku dibele kavuaye naku. Nansha nanku, pavua bena mu tshisumbu tshiabu bamumona mu bisangilu anyi mu buambi, bavua bamona ne: uvua anu ne disanka.

John uvua mutangidi muenda ngendu mu bidimu bipite pa 43. Uvua munange mudimu wende au bikole, ujinga nansha kufuilamu! Kadi wakawimanyika bua kutabelela mulela wende uvua usama, mpindieu ukadi mushadile wenzela mudimu mu tshisumbu. Padi bantu bavua bamumanye kumpala batuilangana nende mu mpuilu anyi mu mpungilu, batu anu bamumona ne disanka kayi mushintuluke nangananga to.

Mmunyi mudibi mua kuenzeka ne: Diana ne John bikale ne disanka? Mmunyi mudi muntu udi ne tunyinganyinga ne usama mua kuikala ne disanka? Mmunyi mudi muntu udi katshiyi kabidi ne midimu ivuaye munange mu bulongolodi mua kuikala amu ne disanka? Bible udi ututanduila tshidi tshipetesha disanka adi wamba ne: “Muntu muakane neasankile mu Yehowa.” (Mis. 64:10) Tudi mua kumvua bulelela bua mushinga ebu bimpe menemene tuetu bajingulule tshidi tshipetesha disanka dia mu muoyo ne tshidi katshiyi tshidipetesha.

Udi mumanye bimpe ne: amue malu atuku anu apetesha muntu disanka. Tshilejilu, mulume ne mukaji badi banangangane badi babuela mu dibaka, kulua muledi, anyi kupeta midimu ya mu bulongolodi. Malu a nunku adi apetesha disanka, bidi nanku menemene, bualu adi afuma kudi Yehowa. Yeye ke wakenza dibaka, kuenza bua bantu bikale balela, ne yeye ke utu upesha bantu midimu mu tshisumbu tshia bena Kristo.​—Gen. 2:18, 22; Mis. 127:3; 1 Tim. 3:1.

Nansha nanku, amue malu atu apeteshangana disanka adi mua kuikala a tshitupa tshîpi. Muena dibaka udi mua kupanga lulamatu kudi muena dibaka nende anyi kufua. (Yeh. 24:18; Hosh. 3:1) Bamue bana badi bapanga kutumikila baledi babu ne Nzambi, pamuapa bipatshibua ne mu tshisumbu. Bana ba Samuele kabavua benzela Yehowa mudimu mu mushindu uvuaye wanyisha to, malu avua Davidi muenze akamukebela dikenga divua difumine mu nzubu muende yeye. (1 Sam. 8:1-3; 2 Sam. 12:11) Malu a  nunku atu atuala ntatu ne tunyinganyinga. Kaena mua kupeteshangana disanka to.

Bia muomumue, midimu itudi tuenza munkatshi mua bantu ba Nzambi idi mua kuimana, pamuapa bua masama, bua majitu a dîku, anyi bua mashintuluka adi enzeka mu bulongolodi. Bana betu ba bungi badi mashintuluka aa malenge mbitabe ne: kabatshiena ne disanka dia buena divuabu nadi pavuabu beyenza to.

Tudi bumvue bimpe ne: malu adi apetesha disanka a nunku adi mua kuikala a tshitupa tshîpi mu mushindu kampanda. Kadi kudiku disanka dikuabu didi diodi mua kushala nansha malu kaayi mende bimpe anyi? Didi ne bua kuikalaku, bualu Samuele, Davidi, ne bantu bakuabu bakashala anu ne disanka nansha mu ntatu.

Yezu uvua mumanye tshivua disanka dilelela. Patshivuaye mu diulu dîba divua nsombelu muimpe menemene, uvua ‘usanka kumpala kua [Yehowa] dîba dionso.’ (Nsu. 8:30) Kadi pavuaye pa buloba wakatuilangana ne ntatu mikole bimue bikondo. Nansha nanku, uvua ne disanka dia kuenza disua dia Tatu wende. (Yone 4:34) Kadi pavuabu bamukengesha kumpala kua kufuaye? Bible udi wamba ne: “Bua disanka divua dimutekela kumpala, wakananukila pa mutshi wa makenga.” (Eb. 12:2) Ke bualu kayi tudi ne kabingila kimpe kadi katusaka bua kukonkonona malu abidi a ku avua Yezu muambe bua kupeta disanka dilelela.

Umue musangu bayidi 70 bakapingana kudi Yezu bafuma mu mudimu wa diyisha muvuaye mubatume. Bavua ne disanka bualu bavua benze midimu ya bukole, bipate too ne bademon. Pashishe Yezu wakabambila ne: “Kanusanki bua mudi nyuma ikokeshibua kunudi, kadi nusanke bua mudi mêna enu mafunda mu diulu.” (Luka 10:1-9, 17, 20) Bushuwa, kuanyishibua kudi Yehowa kuvua ne mushinga kupita kuikala ne mudimu kampanda wa pa buawu. Nzambi uvua ne bua kuvuluka bayidi ba lulamatu aba. Bualu ebu buvua bubapetesha disanka dia bungi.

Musangu mukuabu pavua Yezu uyisha musumba wa bantu, mukaji kampanda muena Yuda wakaleja muvuaye udiumvua wamba ne: mamuende wa Yezu, mulongesha wa pa buende eu, udi ne bua kuikala wa diakalenga. Kadi wakamupingaja mu njila wamba ne: “Tòo, kadi, bantu badi bateleja dîyi dia Nzambi ne badilama ke ba diakalenga!” (Luka 11:27, 28) Kuikala muledi udi udiumvua bua muanende kudi mua kuikala bualu buimpe, kadi kuikala mu malanda ne Yehowa  bua dimutumikila ke bualu bunene budi bupetesha muntu disanka.

Bulelela, kudiumvua muanyishibue kudi Yehowa ke kudi kupetesha muntu disanka dia mu muoyo. Nansha mutu ntatu kayiyi isankisha, kayena mua kushintulula mutudi tudiumvua amu to. Kadi muoyo wetu wowu muimpe, tudi tuyitantamena ne muoyo mutoke. (Lomo 5:3-5) Bualu bukuabu, Yehowa udi upesha bantu badi bamueyemena nyuma wende, ne disanka ngumue wa ku ngikadilu ya dimuma dia nyuma eu. (Gal. 5:22) Bidi bituambuluisha bua kumvua ne: Misambu 64:10 mmuambilamu padiye wamba ne: “Muntu muakane neasankile mu Yehowa.”

Bualu ebu ke buvua buenze bua Diana ne John batudi batele ku ntuadijilu bashale anu ne disanka pavuabu mu ntatu. Diana udi wamba ne: “Ndi munyemene kudi Yehowa anu mudi muana mua kunyemena kudi muledi wende.” Mmunyi mudiye mufike ku dimona ne: Nzambi udi umuanyisha? Udi wamba ne: “Ndi mumone ne: Yehowa mmumpeshe bukole bua kuikala kuyisha pa tshibidilu muikale ne mpala wa mimuemue.” John uvua mutungunuke ne kuyisha ne tshisumi nansha muvua mudimu wende wa butangidi buena ngendu uvuaye munange muimane udi umvuija tshivua tshimuambuluishe bikole wamba ne: “Katshia ku 1998 pavuabu bantume bua kulongesha mu Kalasa ka dilongesha mudimu, ndi mudilongele bikole kupita kumpala.” Udi wamba kabidi buende yeye ne bua mukajende ne: “Mushindu utuvua tumona mudimu utuvua tuenzela Yehowa mu kupita kua bidimu bilondeshile makanda atuvua nawu mmuenze bua mashintuluka aa kaatambi kutusama ku muoyo to. Tudi bawenze katuyi tunyingalala.”

Bana betu bakuabu ba bungi mbadimuene pabu bulelela budi mu Misambu 64:10. Tuangate tshilejiu tshia muanetu kampanda wa balume ne mukajende bavua benze bidimu bipite pa 30 ku Betele mu États-Unis. Bakalua kubatuma bu bampanda-njila ba pa buabu. Bakambilamu bamba ne: “Muntu yonso eu udi mua kumvua kanyinganyinga padiye ujimija tshintu kampada tshidiye munange.” Kadi bakamba kabidi ne: “Kakushala ne kanyinganyinga aku bua kashidi to.” Bakaditua ne lukasa luonso mu mudimu wa kuyisha ne bena mu tshisumbu. Bakamba kabidi ne: “Tuakasambila bua malu kampanda masunguluke. Pashishe patuakamona muvua Nzambi muandamune masambila etu, biakatupetesha disanka. Matuku makese tuetu bamane kufika mu tshisumbu, bana betu bakuabu bakangata bumpanda-njila, ne tuakapeta malonga a Bible avua aya kumpala.”

Mu kuamba kuimpe, kabitu anu bipepele bua kuikala ne disanka to, ne nekuikale anu bikondo bia masanka ne bia ntatu. Kadi Yehowa wakafundisha mêyi adi mu Misambu 64:10 adi atukankamija aa ku bukole bua nyuma. Nansha mu bikondo bitudi batekeshibue mu mikolo, tuikale batuishibue ne: bantu badi baleja mudibu ‘bantu bakane’ padibu bashala ne lulamatu nansha koku mashintuluka mu nsombelu wabu ‘nebasankile mu Yehowa.’ Tudi kabidi mua kushala ne muoyo kuulu kuulu bindile dikumbana dia mulayi wa Yehowa udi utangila “diulu dipiadipia ne buloba bupiabupia.” Dîba adi, dipanga bupuangane dionso nediye kuabu. Bantu ba Nzambi bonso ‘nebasanke bikole ne nebikale ne disanka’ bua bidi Nzambi ufuka ne bua bidiye upesha bantu.​—Yesh. 65:17, 18.

Anji elabi meji mutuikala dîba adi: netuikale ne makanda a mubidi mapuangane, tubika dituku dionso ne makanda tumatuma. Nansha tunyinganyinga tutuvua natu kale tuikale tukole mushindu kayi, katuakuvuluka kabidi malu adi atusama ku muoyo to. Tudi bajadike ne: ‘malu a kale kaakutuvuila kabidi mu lungenyi, anyi kutubanda kabidi ku muoyo to.’ Tshishima tshia dibishibua dia bantu ku lufu netshisange bantu ne balela babu. Bantu miliyo bungi kabuyi kubala nebumvue anu bu baledi ba muana wa bakaji wa bidimu 12 uvua Yezu mubishe ku lufu. Bible udi wamba bua baledi abu ne: “Biakabapitshila, kumvuabu disanka dia dikema.” (Mâko 5:42) Ndekelu wa bionso, muntu yonso pa buloba neikale “muntu muakane” mu ngumvuilu wa tshishiki, ne “neasankile mu Yehowa” bua kashidi ne tshiendelele.