Uvuaku mubale bibejibeji bia Tshibumba tshia Nsentedi bishale ebi bimpe menemene anyi? Nanku, anji tangila ni udi mua kuandamuna nkonko idi ilonda eyi:

Mbijadiki kayi bia mu Bible bidi bileja ne: Nzambi udi utumvuila?

Pavua bena Isalele bapika mu Ejipitu, Nzambi uvua mumanye bimpe makenga abu ne uvua umvua muvuabu bumvua amu. (Ekes. 3:7; Yesh. 63:9) Tudi bafukibue mu tshimfuanyi tshia Nzambi, ne tudi mua kumvuilangana. Udi utumvuila nansha tuetu mua kumona bu ne: katuena bakumbanyine dinanga diende to.​—wp18.3, dib. 8-9.

Mmunyi muvua malongesha a Yezu mambuluishe bantu bua kulekela dielelangana meji mabi?

Bena Yuda ba bungi ba tshikondo tshia Yezu bavua belelangana meji mabi. Kristo wakatamba kuleja muvuabi bikengela kuikala ne budipuekeshi ne kulejaye muvuaye kayi wanyisha diditambisha bua dikoba. Wakalomba bayidi bende bua bangatangane bu bana ba muntu.​—w18.06, dib. 9-10.

Tshivua tshisake Nzambi bua kubengela Mose bua kubuela mu Buloba Bulaya tshidi tshitulongesha tshinyi?

Mose uvua ne malanda masheme ne Yehowa. (Dut. 34:10) Pakavua bena Isalele bakeba kujikija bidimu 40 mu tshipela, bakadiabakena musangu muibidi bua dipangila dia mâyi. Nzambi wakambila Mose bua ambile mukuna wa dibue dîyi. Kadi Mose yeye wakawututa. Yehowa uvua mua kuikala mumvue bibi bua muvua Mose kayi mutumikile mêyi ende anyi bua muvua Mose kayi mupeshe Nzambi butumbi bua tshishima atshi. (Nom. 20:6-12) Bualu ebu budi ne bua kutulongesha mushinga wa ditumikila Yehowa ne kumupesha butumbi.​—w18.07, dib. 13-14.

Tuetu tulumbuluisha bilondeshile tshimuenekelu, mmunyi mutudi mua kuya kua tshianana bipepele?

Kudi malu asatu adi asaka bantu ba bungi bua kulumbuluisha bakuabu bilondeshile tshimuenekelu: dikoba anyi tshisa, bubanji anyi bupele, ne bidimu bia muntu. Bidi ne mushinga bua tuetu kudienzeja bua kumona bakuabu anu bu Nzambi katuyi ne kansungansunga! (Bien. 10:34, 35)​—w18.08, dib. 8-12.

Ngimue mishindu kayi idi bena Kristo bakulakaje mua kuambuluisha bakuabu?

Muanetu mukulakaje ukadibu bashintulule midimu udi anu ne mushinga kudi Nzambi ne udi mua kuambuluisha bakuabu bikole. Udi mua kuambuluisha bena dibaka badi kabayi Bantemu, kuambuluisha muanetu udi mulekele bisangilu, kulombola malonga a Bible, ne kuvudija mudimu wende wa buambi.​—w18.09, dib. 8-11.

Mbintu kayi bidi nabi bena Kristo mu Biamu bia mudimu bia kulongesha nabi?

Mudi tuarte tua jw.org ne mabeji a kubikila nawu bantu mu bisangilu. Mudi trakte 8 mienza bimpe ne Tshibumba tshia Nsentedi ne Tabulukayi! Mudi kabidi ndambu ya broshire, mikanda minene ibidi ya kulongesha nayi, ne filme inayi ya mushinga, mu filme ayi mudi wa Bua tshinyi mbimpe kulonga Bible?​—w18.10, dib. 16.

Mmunyi mudi muena Kristo mua ‘kusumba bulelela’ anu mudi Nsumuinu 23:23 ulomba?

Katuena tusumba bulelela ne makuta to. Kadi tudi ne bua kuangata dîba ne kudienzeja bikole bua kubupeta.​—w18.11, dib. 4.

Mushindu uvua Hoshea muenzele mukajende Gomê malu udi utulongesha tshinyi?

Gomê wakenda masandi misangu ne misangu, kadi Hoshea wakamufuila luse, kushalaye nende mu dibaka. Muena Kristo yeye muende masandi, muena dibaka nende udi kayi muende au udi mua kumufuila luse. Padiye usangila kabidi ne muena dibaka nende udi muende masandi, dîba adi bilondeshile Bible, kakuena kabidi bualu bua kushipela dibaka to.​—w18.12, dib. 13.