Mu Dutelonome 22:25-27 kabena bakula nangananga bua kumanya bikala muntu au uvua mupile to, bualu tshilumbu tshiende tshikavua tshidikose. Mukenji eu uvua ujadika wowu ne: ku muele kua nsongakaji kakuvua mashi to. Tuanji kukonkonona tshidibu bambe mu mvese idi kuulu.

Mvese idi kuulu idi yakula bua muntu uvua musambakene ne nsongakaji “mu tshimenga” pende bamane kumubangila ne mulale nende. Pavua muntu au wenza nanku, uvua upila bua mpekatu wa masandi a basele, bualu nsongakaji au ukavua muenze bu mukaji wa muntu. Kadi bua nsongakaji? “Kavua muele dîyi mu tshimenga” to. Bu yeye mudiele, bantu bakuabu bavua mua kumvua ne kumusungila. Kadi kavua muele dîyi to. Nunku uvua pende muende masandi a basele, ke bualu kayi buonso buabu bavua bapile.​—Dut. 22:23, 24.

Mikenji ya Mose idi ilua kuakula bualu bukuabu, yamba ne: “Kadi bikala muntu musambakene ne nsongakaji udibu babangile mu mpata, ne muntu au yeye mumupite makanda ne mulale nende, muntu uvua mulale nende au udi ne bua kufua yeye nkayende, kadi kuena ne bua kuenzela nsongakaji bualu nansha bumue to. Nsongakaji ki mmuenze mpekatu udi mukumbanyine lufu to. Bualu ebu budi muomumue ne bua muntu udi ubunda mukuende ne umushipa. Bualu muntu au uvua musambakene nende mu mpata, ne nsongakaji udibu babangile uvua muele dîyi, kadi kakuvua muntu uvua mua kumusungila to.”​—Dut. 22:25-27.

Mu tshilumbu etshi, bavua banji bitaba tshivua nsongakaji wamba. Bua tshinyi? Bavua banji bateka ne: “uvua muele dîyi, kadi kakuvua muntu uvua mua kumusungila to.” Nanku kavua muende masandi a basele to. Kadi muntu au yeye uvua upila bua dilala ne nsongakaji mubangila au ku bukole ne diende nende masandi a basele bualu uvua “mumupite makanda ne mulale nende.”

Nanku nansha muvua mukenji au wowu uleja muvua ku muele kua nsongakaji kakuyi mashi, bualu budibu bambamu budi buleja muvua muntu au mupile bua dilala ne nsongakaji ku bukole ne diende nende masandi a basele. Tudi batuishibue ne: balumbuluishi bavua ne bua ‘kukebulula bualu abu bimpe menemene’ ne kuangata dipangadika divua dipetangana ne buludiki buvua Nzambi mufile patoke ne muambulule misangu ne misangu.​—Dut. 13:14; 17:4; Ekes. 20:14.