UKADIKU mudiebeje ne: “Ntu ndimona bu muntu utu ulejangana dianyisha anyi welangana tuasakidila anyi?” Elu ndukonko ludi yonso wa kutudi ne bua kudiela. Bible ukavua muambe ne: tshikondo tshietu etshi, bantu bavua ne bua kuikala “kabayi ne dianyisha.” (2 Tim. 3:2) Udi mua kuikala ukadi mutuilangane ne bantu batu bamona bu ne: malu adi bakuabu babenzela ngadibu nawu ne bukenji anyi bu ne: bintu bidi bantu babapeshe mbienze bu biabu bobu. Badi bu batu bela meji ne: kabena ne bualu bua kulejila dianyisha bua bintu bidibu babapesha to. Udi mua kuikala ukadi mumone ne: kusomba ne bantu ba mushindu eu kudi kutonda.

Kadi mbambile batendeledi ba Yehowa bobu bua ‘kuikala bena dianyisha.’ (Kolos. 3:15) Mu bulelela, mbimpe tuikale ne lungenyi lua kulejangana dianyisha. Kudi malu a bungi adi aleja bua tshinyi mbimpe tuikale nanku.

Bumue bua ku malu manene adi atusaka bua tuikale ne lungenyi lua kulejangana dianyisha mbua ne: ludi lutuambuluisha bua kudiumvua bimpe. Muntu utu welangana tuasakidila utu pamuapa udiumvua bimpe, ne muntu udiye wela tuasakidila utu udiumvua pende bimpe menemene. Bua tshinyi bitu bienzeka nanku? Tuangate tshilejilu etshi: Wewe mumone ne: bantu bakuabu mbasue kukupesha tshintu kampanda, kabienaku bileja ne: mbamone ne: tshintu atshi ntshikukumbanyine anyi? Badi benza nanku bualu badi bakutabalela. Paudi umona mudibu bakutabalela, neudiumvue bimpe. Ke muvuabi mua kuikala bua Luta. Boaza wakapesha Luta bintu ne tshianza tshilekelela. Kakuyi mpata, bualu abu buakasankisha Luta bikole bualu wakamona ne: kuvua muntu uvua umutabalela.​—Luta 2:10-13.

Mbimpe tuikale tutamba kuleja Nzambi dianyisha. (1 Tes. 5:18) Kudi misangu iudi mua kuikala muele meji bua bintu bia bungi bia mu nyuma ne bia ku mubidi bidiye mukupeshe ne bitshidiye ukupesha. (Dut. 8:17, 18; Bien. 14:17) Kadi pamutu pa kutuma meji anu kakese ku malu mimpe adi Nzambi mukuenzele, bua tshinyi kubenga kuangata dîba dia kuelangana meji bua malu mimpe a bungi adiye mukuenzele wewe, muenzele kabidi bantu baudi munange. Wewe welangana meji bua bintu bidi Mufuki webe ukupesha ne tshianza tshilekelela, dianyisha diudi nadi kudiye nedivule ne neutambe kumona mudiye mukunange ne ukumona mikolo bunene.​—1 Yone 4:9.

Kadi kuikadi anu utuma meji ku bintu bidi Yehowa ukupesha ne tshianza tshilekelela ne welangana meji bua malu mimpe adiye mukuenzele to; ikala kabidi umuela tuasakidila bua buimpe buende. (Mis. 100:4, 5) Kuleja bantu dianyisha kutu kutamba kubapetesha disanka.

Bualu bukuabu budi buleja ne: mbimpe wikale ulejangana dianyisha mbua ne: didi dikolesha malanda. Tuetu bonso tutu basue kumvua ne: bantu bakuabu badi batuanyisha. Paudi wela muntu tuasakidila ne muoyo mujima bua bualu buimpe budiye mukuenzele, malanda enu nende adi ashêma. (Lomo 16:3, 4) Bualu bukuabu, bantu bena dianyisha batu nangananga ne muoyo wa kuambuluishangana. Padibu bamona malu mimpe adi bakuabu babenzela, muoyo udi ubasaka bua kubenzelawu pabu. Bushuwa, kuambuluisha bakuabu kutu kupeteshangana disanka. Bidi anu muvua Yezu muambe: “Disanka dia kufila ndipite dia kuangata.”​—Bien. 20:35.

Robert Emmons umue wa ku balombodi ba iniversite wa mu Californie batu balonga tshilumbu tshia kulejangana dianyisha wakamba ne: “Bua kuikala muena dianyisha, bidi bikengela kuanji kumanya ne: muntu yonso utu dijinga ne diambuluisha dia bakuabu. Kudi misangu itudi tufila ne misangu itudi tupeta.” Tshilumbu  tshidi ne: bua tuetu kuikala tshitudi etshi, bantu bakuabu mbatuambuluishe mu mishindu ya bungi. Tshilejilu, badi mua kutupesha biakudia anyi kutuondopesha. (1 Kol. 12:21) Muntu muena dianyisha utu ne dianyisha dia bungi bua malu atu bakuabu bamuenzela. Bu mudibi nanku, utu pebe ne tshibidilu tshia kuela bakuabu tuasakidila bua bidibu bakuenzela anyi?

Bualu bukuabu buudi mua kulejilangana dianyisha mbua ne: kuikala muena dianyisha kudi kukuambuluisha bua kuimanyina pa malu mimpe pamutu pa kuimanyina pa malu mabi. Mu mushindu kampanda, buongo buetu mbuenze anu bu kasengulu. Budi bukuambuluisha bua kuimanyina pa amue malu a mu nsombelu, eku bukupangisha bua kuimanyina pa makuabu. Bidi bikusaka bua kumona malu mimpe kuyi utamba kutuma ntema ku ntatu to. Wewe ne tshibidilu tshia kulejangana dianyisha, neutambe kumona anu malu mimpe, ne bualu abu nebukuvuije kabidi muena dianyisha dia bungi. Kuimanyina pa malu audi mua kulejila dianyisha nekukuambuluishe bua kuenza tshivua mupostolo Paulo mulombe etshi: “Ikalayi nusanka mu Mukalenge misangu yonso.”​—Filip. 4:4.

Neumone ne: lungenyi lua kuleja dianyisha ludi lutuyisha dimona malu mu mushindu mubi. Bitu bikole bua muntu kumvua muoyo wa kuleja dianyisha eku muikale kabidi ne mukawu, mubungame, anyi mufiikilangane munda, ki mmuomu? Bantu bena dianyisha kabatu kabidi batamba kunanga bintu bia ku mubidi to. Batu basanka ne bidibu nabi, kabayi ne muoyo wa kupeta bia bungi to.​—Filip. 4:12.

Bu muudi muena Kristo, udi mumanye ne: Satana mmusue bua ntatu iudi upeta mu matuku a ku nshikidilu aa ikubungamije ne ikutekeshe mu mikolo. Wewe umona malu mu mushindu mubi ne udiabakena, bidi bimusankisha yeye bikole. Lungenyi lua nunku ludi mua kupangisha bantu baudi uyisha bua kukuteleja bimpe. Kadi tumanye ne: kuleja dianyisha ne dimuma dia nyuma muimpe wa Nzambi bitu anu bu mukaba ne tshilamba. Tshilejilu, patutu tumona malu mimpe adi Nzambi mutuenzele, tutu tumvua disanka, ne malu adiye mutulaye adi atupetesha ditabuja.​—Gal. 5:22, 23.

Bu muudi Ntemu wa Yehowa, tudi tuela meji ne: udi muitabe malu adibu bambe mu tshiena-bualu etshi bua kuleja dianyisha. Nansha nanku, udi mumone ne: kuikala muena dianyisha ne kumona malu mu mushindu muimpe kabitu bidiluila nkayabi to. Kadi kabikutekeshi mu mikolo to. Kudi mushindu wa wewe kupeta lungenyi lua kuleja dianyisha ne kumona malu mu mushindu muimpe. Mmushindu kayi au? Dituku dionso, ikala welangana meji a malu a mu nsombelu webe audi mua kulejila dianyisha. Wewe wenza nanku, lungenyi lua kulejangana dianyisha nelubange kudiluila. Bualu ebu nebukupeteshe disanka dia bungi menemene kupita bantu badi bimanyina anu pa ntatu ya mu nsombelu. Imanyina pa malu mimpe adi akukankamija ne akusankisha adi Nzambi ne bantu bakuabu bakuenzele. Udi nansha mua kubanga kuafunda. Udi mua kufundamu kabidi malu abidi anyi asatu adi menze bua umvue muoyo wa kuleja dianyisha dituku dionso.

Tuetu ne tshibidilu tshia kuela bakuabu tuasakidila, bidi mua kushintulula mushindu udi buongo buetu buenza mudimu bua bikale bipepele bua tuetu kudiumvua bimpe. Muntu muena dianyisha utu ne disanka dia bungi. Nanku ikala ubala malu mimpe adibu bakuenzele, ikala usanka ne malu mimpe akadi makuenzekele, ne ikala uleja bakuabu dianyisha! Pamutu pa kumona muebe bu mua Katombe, ‘ela Yehowa tuasakidila, bualu yeye udi muimpe.’ Bushuwa, ‘ikala muena dianyisha.’​—1 Kul. 16:34; Kolos. 3:15.