Kabiena mua kuikala nanku to. Diabolo kavua muambile Eva ne: yeye mudie tshimuma tshia mutshi uvua Nzambi mukandike, mubidi wende ke uvua ufua kadi anyima wende ushala ne muoyo muaba kampanda to. Pavua Satana wakuila mukana mua nyoka, uvua usua kuamba ne: bu Eva mudie tshimuma tshia mutshi au, ‘kavua ne bua kufua bulelela to.’ Uvua usua kuamba ne: Eva uvua ne bua kushala yeye anu ne muoyo pa buloba, muikale ne nsombelu mupite uvuaye nende au, katshiyi kabidi ku mukenji wa Nzambi to.​—Gen. 2:17; 3:3-5.

Bikala dilongesha dia dishima dia dibenga kufua dia anyima didibu balongesha lelu kadiyi dituadijile mu Edene, ndîba kayi divuadi dituadije? Katuena bamanye to. Tshitudi bamanye ntshia ne: Mvula wa kabutu wa mu tshikondo tshia Noa wakakupula ntendelelu wa dishima yonso uvuaku. Kakuvua dilongesha dia dishima nansha dimue divua dishale to, bualu anu Noa ne dîku diende (batendeledi balelela) ke bakapanduka.

Nunku dilongesha dia dibenga kufua dia anyima didibu balongesha lelu didi ne bua kuikala dituadije panyima pa Mvula wa kabutu. Pavua Nzambi mukondakaje miakulu ku tshibumba tshia Babela ne bantu batangalake “pa buloba bujima,” bavua ne bua kuikala baye ne lungenyi lua ne: muntu udi ne anyima udi kayi ufua. (Gen. 11:8, 9) Nansha dilongesha dia dishima edi dibange dîba kayi, tudi batuishibue ne: Satana Diabolo, “tatu wa dishima,” uvua panyima padi ne uvua usanka pavuaye udimona dienda ditangalaka.​—Yone 8:44.