Udi mua kuandamuna nkonko idi miangatshila mu Tshibumba tshia Nsentedi tshia 2019 eyi anyi?

Mulayi wa Nzambi wa ne: “Tshia mvita tshionso tshienza bua kukuluisha natshi katshiakutshimuna to” udi umvuija tshinyi? (Yesh. 54:17)

Tuikale batuishibue ne: Nzambi neatukube kudi baluishi badi bakeba kutubulula badi benze bu “ditayika dia bena tshikisu.” (Yesh. 25:4, 5) Bena lukuna betu kabakukokesha bua kutuenzela bualu nansha bumue budi butukengesha buashala kashidi to.​—w19.01, dib. 6-7.

Mmunyi muvua mushindu uvua Nzambi muenzele bena Kanâna ne bena Isalele ba mutu mukole malu uleja ne: udi ne buakane?

Nzambi wakanyoka bantu bavua baditue mu buenzavi ne bavua bakengesha bakaji ne bana. Wakabenesha bavua bamutumikila ne benzela bakuabu malu makane.​—w19.02, dib. 22-23.

Ntshinyi tshitudi ne bua kuenza tuetu muaba udi muntu udi kayi muena kuitabuja netu usambila?

Tudi mua kushala bapuwe ne kuleja kanemu kadi katuyi tuamba “amen” anyi tukuatangana ku bianza ne bantu bakuabu badi muaba au to. Tudi mua kudienzela dietu disambila munda munda.​—w19.03, dib. 31.

Bua tshinyi dinyanga bana mbualu bubi menemene?

Dinyanga bana mpekatu muenzela muana udibu banyange, muenzela tshisumbu, muenzela bakokeshi ba mbulamatadi, ne Nzambi. Muaba udi mikenji ya mbulamatadi ilomba bua kumanyisha mbulamatadi bualu bua dinyanga bana, bakululu badi bayitumikila.​—w19.05, dib. 9-10.

Mmunyi muudi mua kushintulula ngelelu wa meji udi ulombola meji ebe anyi kumuakaja?

Malu manene a kuenza ngowu aa: Sambila Yehowa. Elangana meji ne tshipatshila tshia kudikonkonona. Sungula bantu baudi usomba nabu ne meji.​—w19.06, dib. 11.

Ntshinyi tshitudi mua kuenza ku mpindieu bua kudilongolola bua dikengeshibua?

Bidi bikengela tukoleshe malanda etu ne Yehowa. Ikala mujadike ne: mmutunange ne kakutulekela to. Ikala ubala Bible dituku dionso, ne usambila pa tshibidilu. Ikala mutuishibue ne: netupete malu mimpe a mu Bukalenge bua Nzambi. Kuata imue mvese iutu munange ku muoyo, ukuate kabidi misambu ya kutumbisha nayi Yehowa.​—w19.07, dib. 2-4.

Ntshinyi tshitudi mua kuenza bua balela betu kusungidibua?

Tuikale tuditeka pa muaba wa bakuabu, bienzedi bietu bimpe bikale bifila bumanyishi buimpe, ne tuikale ne lutulu ne tuikale nabu bimpe.​—w19.08, dib. 15-17.

Mmunyi mutudi tupetulula bukole bilondeshile mulayi wa Yezu udi mu Matayi 11:28?

Tudi ne balami bena Kristo ba dinanga, balunda bimpe menemene, ne mudimu muimpe menemene.​—w19.09, dib. 23.

Mmunyi mudi Nzambi utupesha dijinga ne bukole bua kuenza malu? (Filip. 2:13)

Patudi tubala Dîyi dia Nzambi ne tuelangana meji a bitudi tubala, Nzambi udi mua kutupesha dikanda, utupesha dijinga dia kuenza disua diende ne bukole bua kuenza malu. Nyuma wende udi mua kutuambuluisha bua kuenza malu a dikema ne bipedi bietu.​—w19.10, dib. 21.

Mmalu kayi a meji atudi ne bua kuenza kumpala kua kuangata dipangadika dinene?

Tuenze malu atanu aa: Tuenze makebulula bikole. Tulombe Yehowa meji. Tukonkonone tshidi tshitusaka bua kuangata mapangadika. Tuikale ne bipatshila bisunguluke. Tumone malu mudiwu ne tuitabe tshidiwu atshi.​—w19.11, dib. 27-29.

Dilongesha dia ne: muntu udi ne anyima udi kayi ufua ndifumine ku tshivua Satana muambile Eva anyi?

Kabiena mua kuikala nanku to. Satana wakambila Eva ne: kavua mua kufua to, kadi ki nne: tshivua tshifua mmubidi, kadi anyima ushala ne muoyo muaba mukuabu to. Kakuvua dilongesha dia dishima nansha dimue divua mua kuikala dishale panyima pa Mvula wa kabutu to. Dilongesha dia dibenga kufua dia anyima divua mua kuikala dituadije pakavua Nzambi mutangalaje bantu bavua bibaka tshibumba tshia Babela.​—w19.12, dib. 15.