Tòo, kakuena muaba nansha umue ni mmu Bible anyi mu mikanda ya malu a kale mudibu baleje ne: bidi nanku to.

Mushindu udibu bakudimune mvese eu mu Bible mikuabu mmufikishe bamue bantu ku diela meji ne: mu tshikondo tshia bena Kristo ba kumpala, bantu bavua babatijibua mu mâyi bua bafue. Tshilejilu, mbakudimune mêyi aa mu Mukanda wa Nzambi ne: “Bikala bualu bulelela ne: bafue kabena babika ku lufu, badi babatijibua bua bualu buabo bua tshinyi?”

Teleja tshidi bamanyi ba malu a mu Bible babidi bambe. Gregory Lockwood wakamba ne: Batismo udibu bamba ne: nguvua bantu babatijibua “bua bantu bakavua bafue” uvua ne bua kuikala “batismo wa wende mushindu, tuetu bamulondolole, katuakusangana muikale ne bijadiki mu Bible anyi mu mikanda ya malu a kale to.” Mulongeshi wa tshikunda Gordon Donald Fee wakafunda ne: “Kakuena muaba nansha umue ni mmu Bible anyi mu mikanda ya malu a kale mudibu baleje ne: bavua babatiza bantu nanku to. Kadi Bible wa New Testament kena yeye nansha ubuakula to; ne kakuena tshijadiki tshia ne: dibatiza edi divua dienzeka munkatshi mua bena Kristo ba kumpala peshi mu bitendelelu biakenjibua matuku makese panyima pa lufu lua bapostolo to.”

Bible udi wamba ne: bayidi ba Yezu bavua ne bua ‘kuvuija bantu ba mu bisamba bionso bayidi, bababatiza . . . , babalongesha mua kutumikila malu onso’ avuaye mubambile. (Mat. 28:19, 20) Kumpala kua muntu kulua muyidi wa Kristo mubatijibue, udi ne bua kulonga bua kumanya Yehowa ne Muanende, kubitabuja, ne kubatumikila. Muntu ukavua mumane kufua ne bamujiike kavua mua kuenza malu aa to; anyi muena Kristo utshidi ne muoyo kena mua kumuenzelawu to.​—Muam. 9:5, 10; Yone 4:1; 1 Kol. 1:14-16.

Ntshinyi mpindieu tshivua Paulo usua kuamba?

Bamue bena Kolinto bavua babenga ne: dibishibua dia bantu ku lufu kadienaku to. (1 Kol. 15:12) Paulo wakamba muvua mmuenenu wabu au mubi. Wakaleja ne: ‘Dituku dionso mvua kumpala kua lufu.’ Nansha nanku utshivua ne muoyo. Kadi nansha muvuaye utuilangana ne njiwu, uvua mutuishibue ne: nansha biafuaye, uvua ne bua kubishibua bu tshifukibua tshia bukole, anu bu Yezu.​—1 Kol. 15:30-32, 42-44.

Bivua bikengela bena Kolinto bajingulule ne: bu muvuabu balue bena Kristo bela manyi, bavua ne bua kutuilangana ne ntatu ku dituku ne ku dituku ne bavua mua kufua kumpala kua kubishibua. Nunku bu muvuabu “babatijibue mu Kristo Yezu,” bavua kabidi “babatijibue mu lufu luende.” (Lomo 6:3) Bidi biumvuija ne: anu bu Yezu, bavua ne bua kutuilangana ne ntatu ne kufua kadi pashishe kubishibua ku lufu bua kuya mu diulu.

Bidimu bipite pa bibidi Yezu mumane kubatijibua mu mâyi, wakambila bapostolo bende babidi ne: “Nenubatijibue ne dibatiza didibu bambatiza nadi.” (Mâko 10:38, 39) Yezu kavua ubatijibua kabidi mu mâyi dîba adi to. Usua kuamba ne: nsombelu wa muoyo mutoke uvuaye nende uvua ne bua kumufikisha ku lufu luena dîna. Paulo wakafunda ne: bela manyi bavua ne bua ‘kukenga pamue nende bua [bamone mua] kutumbishibua pamue nende kabidi.’ (Lomo 8:16, 17; 2 Kol. 4:17) Nunku bobu pabu bavua ne bua kufua bua kubishibua ku lufu alu bua kuya mu diulu.

Malu onso aa adi atufikisha ku dikudimuna mêyi a Paulo aa bimpe ne: “Bikalabi kabiyi nanku, bantu badi babatijibua bua kuikala bafue nebenze tshinyi? Bikalabu kabayi ne bua kujula bafue nansha kakese, bua tshinyi badi babatijibua kabidi bua kuikala bafue?”