Uvuaku mubale bibejibeji bia Tshibumba tshia Nsentedi bishale ebi bimpe menemene anyi? Nanku, anji tangila ni udi mua kuandamuna nkonko idi ilonda eyi:

Mmunyi mutudi mua kumona bela manyi?

Tudi tuanyisha ditabuja didibu nadi; kadi katuena tubanyisha tupitshisha to. Tudi tuepuka tshilele tshia ‘dianyisha bantu bakuabu.’ (Yuda 16, dim.) Katuena tubela nkonko idi itangila ditekemena diabu to.​—w20.01, dib. 29.

Ntshinyi tshidi tshikujadikila ne: Yehowa mmukumanye?

Bible udi uleja ne: ukavua mukumanye kumpala bua kukulelabu. Utu kabidi uteleja masambila ebe. Mmumanye meji audi wela ne malu adi mu muoyo webe; malu audi wenza adi mua kumusankisha anyi kumunyingalaja. (1 Kul. 28:9; Nsu. 27:11) Mmukukoke kudiye.​—w20.02, dib. 12.

Ndîba kayi ditudi mua kuakula ne ndîba kayi ditudi mua kushala bapuwe?

Tshilejilu, tudi tuakula bua Yehowa ne disanka dionso. Tudi tuakula patudi tumona muntu wenda ulonda njila mubi. Bakulu batu bakula bua kufila mibelu padibi bikengedibua. Mu matunga adibu bakandike mudimu wetu, tudi tupuwa patudi tubenga kuebeja bana betu badimu mudi mudimu wetu wenzekamu anyi bituikala mu matunga au, tubenga kusokoluela bakuabu malu a mudiwu wenzekamu. Katuena tuamba malu adi ne bua kushala masokoka to.​—w20.03, dib. 20-21.

Mpasu ya mu Yoele nshapita 2 mmishilangane ne ya mu Buakabuluibua nshapita 9 ku tshinyi?

Yoele 2:20-29 udi wamba ne: Nzambi udi utuma mpasu kule ne udi ulaya bua kufuta bintu bidiye minyange. Panyima pa bualu abu, Nzambi udi witshikija nyuma wende. Malu aa akakumbana pavua bena Babilona balue kukuata buloba bua Isalele ne pashishe. Buakabuluibua 9:1-11 udi uleja mudi bela manyi bikale bu mpasu bua mudibu bamanyisha bena mu bulongolodi bubi ebu mêyi a dilumbuluisha a Nzambi, owu aa adi asombesha benamu kasekaseka bibi be!​—w20.04, dib. 3-6.

Nnganyi udi mukalenge wa ku nord patudi tuambangana apa?

Ditunga dia Russie ne matunga adi madisange nadi. Mmakokeshe muaba udi bantu ba Nzambi buludiludi anyi mmabakengeshe, mmakandike mudimu wa kuyisha ne mmakine Bantemu. Mukalenge wa ku nord utshidi anu uluishangana ne mukalenge wa ku sud.​—w20.05, dib. 13.

Ngikadilu tshitema idibu batele mu Galatiya 5:22, 23 ke yonso idi yenza ngikadilu ya “dimuma dia nyuma” anyi?

Tòo. Nyuma muimpe utu utuambuluisha bua kupeta ngikadilu mikuabu mimpe, bu mudi buakane. (Ef. 5:8, 9)​—w20.06, dib. 17.

Ngimue njiwu kayi ituku padi muntu wela foto anyi filme yende ku Enternete?

Bintu bidi muntu wela ku Enternete bidi mua kuleja bakuabu mudiye udibandisha, kabiyi bibaleja mudiye udipuekesha to.​—w20.07, dib. 6-7.

Ntshinyi tshidi bamanyishi ba lumu luimpe mua kulongela kudi balobi bapiluke?

Batu baloba muaba udibu mua kukuata mishipa ya bungi ne baloba dîba didibu mua kuyikuata. Batu bamanye kuloba ne tshintu tshidi tshikengedibua. Batu kabidi baloba ne dikima dionso nansha kuulu kuoku kuenda kunyanguka. Ke mutudi mua kuenza petu mudimu wetu wa buambi.​—w20.09, dib. 5.

Ngimue mishindu kayi itudi mua kuambuluisha balongi ba Bible bua kunangabu Yehowa bikole?

Tudi mua kubakankamija bua kuikala kubala Bible dituku dionso ne kuelangana meji a bidibu babala. Tudi kabidi mua kubalongesha mua kusambila.​—w20.11, dib. 4.

Tshiambilu tshia ne: “mu Kristo bonso nebapete muoyo” tshidi tshitangila banganyi?​—1 Kol. 15:22.

Mupostolo Paulo kavua wamba ne: muntu yonso uvua ne bua kubishibua ku lufu to. Uvua wakula bua bena Kristo bela manyi, “badibu bajidile mu buobumue ne Kristo Yezu.” (1 Kol. 1:2; 15:18)​—w20.12, dib. 5-6.

Ntshinyi tshienza bela manyi pikalabu bakadi bamane ‘kukudimunyibua mu mupodi wa dîsu, mu tshikondo tshia mpungi wa ndekelu’?​—1 Kol. 15:51-53.

Nebakokeshe bantu ne dikombo dia tshiamu pamue ne Kristo. (Buak. 2:26, 27)​—w20.12, dib. 12-13.