Uvuaku mubale bibejibeji bia Tshibumba tshia Nsentedi bishale ebi bimpe menemene anyi? Nanku, anji tangila ni udi mua kuandamuna nkonko idi ilonda eyi:

Ndishindika kayi ditudi tupetela mu Yakobo 5:11 padibu bambamu bua Yehowa ne: udi ne “dinanga dikole menemene” ne “luse”?

Tudi bamanye ne: Yehowa utu utubuikidila mibi yetu bua luse ludiye nalu. Badi batujadikila mu Yakobo 5:11 ne: utu kabidi utuambuluisha ne dinanga dionso. Nebikale bimpe tuetu bamuidikije.​—w21.01, dib. 21.

Bua tshinyi Yehowa uvua mulongolole bua bamue bantu bikale ne bumfumu?

Bualu udi ne dinanga. Mushindu udi Yehowa mulongolole malu eu udi wambuluisha dîku diende dia lulamatu bua kuenza malu mu ditalala ne mu bulongame. Bena mu mêku onso a bantu badi batumikila mudi Yehowa mulongolole malu mbamanye udibu bapeshe bukenji bua kuangata mapangadika a ndekelu ne kuenza bua baakumbaje.​—w21.02, dib. 3.

Bua tshinyi mbimpe bena Kristo bikale ne budimu padibu bafunda malu mu programe mienza bua kufundilangana mesaje mu biamu?

Muntu udi witaba bua kuenza mudimu ne programe ya nunku mbimpe ikale mumanye mua kusungula balunda bimpe. Bitu bikole bua kuenza nanku patudi tufundilangana mesaje mu tusumbu tua bantu ba bungi. (1 Tim. 5:13) Kudi kabidi njiwu mikuabu bu mudi ya dimuangalaja ngumu idi kayiyi ne bijadiki ne njiwu ya diangata nimero ya bana betu bua kubendela mushinga pambidi.​—w21.03, dib. 31.

Bua tshinyi Nzambi uvua mulekele bua Yezu akenge ne afue?

Bualu bua kumpala budi ne: pavuabu bapopele Yezu ku mutshi bivua biambuluishe bua kupikula bena Yuda ku mulawu uvuabu bedibue. (Gal. 3:10, 13) Bualu buibidi budi ne: Yehowa uvua musue bua Yezu alonge mua kulua Muakuidi Munene. Buisatu budi ne: pavua Yezu ushala ne lulamatu too ne ku lufu bivua bifila bujadiki bua ne: bantu badi mua kushala anu ne lulamatu nansha bobu mu mateta makole. (Yobo 1:9-11)​—w21.04, dib. 16-17.

Ntshinyi tshiudi mua kuenza padibi bikole bua kupeta bantu mu buambi?

Udi mua kuyisha mêba mashilashilangane audi mua kubapeta ku nzubu yabu. Udi kabidi mua kushintulula miaba ya kuyishila anyi udi mua kuteta kuyisha mushindu mukuabu bu mudi wa difunda mikanda.​—w21.05, dib. 15-16.

Ntshinyi tshivua mupostolo Paulo musue kuimvuija pavuaye muambe ne: “Ku diambuluisha dia mikenji, mvua mufue pa bidi bitangila mikenji”? (Gal. 2:19)

Mikenji ya Mose ivua ileja mudi bantu bapange bupuangane ne ivua ilombola bena Isalele kudi Kristo. (Gal. 3:19, 24) Ke tshiakasaka Paulo bua kuitaba Kristo. Pavuaye muenze nanku ‘wakafua pa bidi bitangila mikenji’; katshivua kabidi musuikibue ku yoyi to.​—w21.06, dib. 31.

Yehowa mmutushile tshilejilu kayi bua dinanukila?

Yehowa utu unanukila padibu bapenda dîna diende, padibu baluisha bumfumu buende, padi bamue ba ku bana bende bamutombokela, padi Satana umushiminyina malu, padi batendeledi bende bakenga, padi balunda bende bafua, padi bantu babi bakengesha bakuabu, ne padibu banyanga bintu bidiye mufuke.​—w21.07, dib. 9-12.

Ntshilejilu kayi tshimpe tshidi Yozefe mushiye bua lutulu?

Wakananukila pavua bana babu bamuenzele malu mabi. Biakalua kuenza bua bamushiminyine malu mu Ejipitu ne bamuele mu buloko bua bidimu bia bungi.​—w21.08, dib. 12.

Ndinyukula kayi dia mu tshimfuanyi didibu bakuile mu Hagai 2:6-9, 20-22?

Bantu batu babenga mukenji utudi tubayisha, nansha nanku mbakoke ba bungi ba kudibu mu bulelela. Mu katupa kîpi emu nebanyukule bisamba bua musangu wa ndekelu pabibutulabu.​—w21.09, dib. 15-19.

Bua tshinyi katuena ne bua kulekela mudimu wetu wa diyisha?

Yehowa utu umona mutudi tudienzeja ne bidi bimusankisha. Tuetu katuyi batekete mu maboko anyi katuyi balekele mudimu wetu, netupete muoyo wa tshiendelele.​—w21.10, dib. 25-26.

Mmushindu kayi udi Lewitiki nshapita wa 19 mua kutuambuluisha bua kutumikila mubelu wa ne: “Nulue ba tshijila mu bikadilu bienu bionso”? (1 Pet. 1:15)

Bidi bimueneka ne: mêyi adi mu mvese eu mmangatshila mu Lewitiki 19:2. Lewitiki nshapita wa 19 eu udi ne malu a bungi adi aleja mutudi mua kutumikila mubelu udi mu 1 Petelo 1:15 mu nsombelu wetu wa matuku onso.​—w21.12, dib. 3-4.