Tòo. Davidi kavua mufunde tshia tshianana to.

Tumonayi tshivuaye mufunde mu mvese au ne mu mvese mikuabu ya buena eyi: “Nengimbe misambu ya kutumbisha nayi dîna diebe kashidi pandi nkumbaja mitshipu yanyi ku dituku ne ku dituku.” “Ndi nkutumbisha ne muoyo wanyi mujima, wewe Yehowa Nzambi wanyi, ne nentumbishe dîna diebe kashidi.” “Nentumbishe dîna diebe kashidi ne tshiendelele.”​—Mis. 61:8; 86:12; 145:1, 2.

Pavua Davidi mufunde mêyi au, kavua wela meji ne: kakufua to. Uvua mumanye ne: Yehowa ukavua muambe ne: mpekatu uvua ne bua kufikisha bantu ku lufu, ne Davidi uvua mumanye muvuaye muena mpekatu. (Gen. 3:3, 17-19; Mis. 51:4, 5) Uvua mumanye kabidi ne: nansha bantu bavua Nzambi wanyisha bu mudi Abalahama, Izaka, ne Yakoba, bakavua bafue, ne yeye pende neafue. (Mis. 37:25; 39:4) Kadi mêyi ende adi mu Misambu 61:8 adi aleja dijinga divuaye nadi ne muvuaye mudisuike bua kutumbisha Nzambi bua kashidi, mmumue ne: wenza nanku matuku ende onso a muoyo.​—2 Sam. 7:12.

Kuvua misangu ivua Davidi ufunda malu avua mamufikile, anu mudibu baleje mu mêyi a mutu wa mukanda adi mu Misambu 18, 51, ne 52. Mu Misambu 23, Davidi udi ufuanyikija Yehowa ne mulami udi ulombola bantu, ubapeshilula makanda ne ubakuba. Davidi uvua pende mulami wa mushindu au. Uvua musue kuenzela Nzambi mudimu ‘matuku ende onso a muoyo.’​—Mis. 23:6.

Tumanye kabidi ne: Yehowa ke uvua musake Davidi bua kufunda mêyi au ku bukole bua nyuma. Mu mêyi avuaye mufunde au muvua kabidi mêyi a buprofete avua ne bua kulua kukumbana. Tshilejilu mu Misambu 110, Davidi udi wakula bua tshikondo tshivua mukalenge wende ne bua ‘kusomba ku tshianza tshia balume tshia Nzambi’ mu diulu bua kupeta bukole bua bungi. Bua kuenza nabu tshinyi? Bua kukokesha bena lukuna ba Nzambi ne bua ‘kukumbaja dilumbuluisha kudi bisamba’ pa buloba. Davidi uvua nkambua wa Masiya uvua ne bua kukokesha mu diulu ne kuikala “muakuidi bua kashidi.” (Mis. 110:1-6) Yezu wakaleja ne: dîyi dia buprofete didi mu Misambu 110 divua dimutangila yeye ne divua ne bua kulua kukumbana dionso dijima.​—Mat. 22:41-45.

Eyowa, nyuma muimpe ke uvua musake Davidi bua kufunda malu a tshikondo tshiende ne a tshikondo tshiabishibuaye ku lufu bua kutumbisha Yehowa bua kashidi. Bualu ebu budi butuambuluisha bua kumona ne: mêyi adi mu Misambu 37:10, 11, 29 avua makumbane mu Isalele wa kale ne neakumbane kabidi kumpala eku pakumbaja Nzambi milayi yende.​—Tangila tshikoso tshia 8 mu tshiena-bualu tshia ne: “Newikale nanyi mu Mparadizu” tshidi mu tshibejibeji etshi.

Nunku mêyi adi mu Misambu 61:8 ne adi mu mvese mikuabu idi yakula bualu bua muomumue adi aleja muvua Davidi musue bua kutumbisha Yehowa mu Isalele wa kale matuku ende onso a muoyo. Adi aleja kabidi tshikala Davidi mua kuenza pamubisha Yehowa ku lufu kumpala eku.