1. Tuetu tuelangana meji a mulayi wa Yehowa wa muoyo wa tshiendelele, bidi bituenzela tshinyi?

 YEHOWA mmutulaye ne: bantu badi bamutumikila nebapete “muoyo wa tshiendelele.” Mmulayi muimpe wa dikema! (Lomo 6:23) Tuetu tuelangane meji a mulayi awu, dinanga ditudi bamunange nadi nedikole bushuwa. Elabi meji kakese, mushindu udi Tatu wetu wa mu diulu mutunange bikole udi wenza bua katuikadi kule nende to.

2. Muoyo wa tshiendelele udi Nzambi mutulaye udi utusaka bua kuenza tshinyi?

² Mulayi wa muoyo wa tshiendelele wa kudi Yehowa eu udi utusaka bua kunanukila mu ntatu. Nansha bobu batufunyina bua kutushipa, katuakulekela kuenzela Nzambi mudimu to. Bua tshinyi? Bualu tudi bamanye kabidi ne: tuetu bafue ne lulamatu, neatubishe ku lufu bikale ne ditekemena dia ne: katuakufua kabidi to. (Yone 5:28, 29; 1 Kol. 15:55-58; Eb. 2:15) Bua tshinyi mbimpe tutuishibue ne: kudi mushindu wa tuetu kushala ne muoyo kashidi? Tukonkonone malu adi alonda aa.

3. Bilondeshile Misambu 102:12, 24, 27, bua tshinyi mbimpe tutuishibue ne: Yehowa udi ne bukole bua kutulama ne muoyo kashidi?

³ Tudi bamanye ne: Yehowa udi ne bukole bua kutulama ne muoyo kashidi bualu yeye ke Mpokolo wa muoyo, ne utuku bua kashidi. (Mis. 36:9) Mona mvese mikese patupu idi ileja ne: Yehowa utu anuku ne neyikale anuku. Misambu 90:2 udi wamba ne: Yehowa udiku “katshia ku bikondo bia tshiendelele too ne ku bikondo bia tshiendelele.” Misambu 102 udi wamba pende bualu bumue bumue ebu. (Bala Misambu 102:12, 24, 27.) Muprofete Habakuka wakamba bua Tatu wetu wa mu diulu ne: “Yehowa wanyi, wewe kuenaku katshia ku bikondo bia tshiendelele anyi? Nzambi wanyi, Wa Tshijila wanyi, wewe kutu ufua to.”​—Hab. 1:12.

4. Bu mutu Nzambi anuku, tudiku ne bua kusamisha mutu patudi katuyi tumvua bualu ebu anyi? Umvuija.

 ⁴ Bitu bikukolela bua kuitaba ne: Yehowa utuku “bua kashidi ne tshiendelele anyi”? (Yesh. 40:28) Biobi nanku, manya ne: kuena nkayebe to. Elihu wakamba bua Yehowa ne: “Bungi bua bidimu biende mbukole mua kubujingulula.” (Yobo 36:26) Dibenga kumvua bualu kampanda kadiena dileja ne: bualu abu mbua dishima to. Tshilejilu, tuetu katuyi tumvua bimpe mutu butoke butokesha, kabiena biumvuija ne: butoke kabutuku to. Bia muomumue, tuetu bantu katuena mua kumvua menemene tshidi tshienza bua Yehowa ikale anuku to. Kadi kabiena biumvuija ne: Nzambi katuku bua kashidi to. Bulelela budi butangila Mufuki wetu kabuena bulondeshila malu atudi tukumbana kumvua ne atudi katuyi mua kumvua to. (Lomo 11:33-36) Yeye ukavuaku kumpala kua bintu bionso bia mu diulu ne pa buloba kuikalaku, kabidi ne kumpala kua dîba ne mitoto. Tudi batuishibue ne: Yehowa ke “Mufuki wa buloba ku bukole buende.” Eyowa, ukavuaku kumpala kua ‘kubalulaye diulu.’ (Yel. 51:15; Bien. 17:24) Mbualu kayi bukuabu budi buleja ne: tudi mua kushala ne muoyo kashidi?

5. Ndiakalenga kayi divua nadi Adama ne Eva?

⁵ Pa kumbusha bantu, Yehowa kavua mufuke bintu bikuabu bionso bidi ne muoyo pa buloba bua bishale ne muoyo kashidi to. Wakapesha bantu diakalenga dia kushala ne muoyo kashidi. Kadi wakadimuija Adama ne: “Bua mutshi wa dimanya dia tshidi tshimpe ne tshidi tshibi, kuena ne bua kuwudia to, bualu dituku diwawudia neufue bulelela.” (Gen. 2:17) Bu Adama ne Eva batumikile Nzambi kabavua mua kufua to. Kabiena bikemesha bua kuamba ne: mu kupita kua matuku, Yehowa uvua mua kulua kubanyishila bua kudia “mutshi wa muoyo.” Pavuabu bawudia bivua bibajadikila ne: bavua mua “kushala ne muoyo kashidi.” b​—Gen. 3:22.

6-7. a) Mbualu kayi bukuabu budi buleja ne: bantu kabavua bafukibue bua kufua? b) Mmalu kayi adi akusankisha awajinga bua kuenza? (Tangila tshimfuanyi.)

⁶ Bidi bikemesha bua mudi bamanyi ba malu a bia panu bafike ku dipeta bijadiki bia mudi buongo buetu mua kulama malu a bungi kupita atudi mua kumanya patutshidi ne muoyo. Tshiena-bualu tshia mu tshikandakanda kampanda tshia mu 2010 tshivua tshitshinka ne: buongo buetu budi mua kulama malu atudi mua kutangila ku TV dituku dionso munya ne butuku mu bidimu bipite  pa 300. (Scientific American Mind) Bidi bimueneka ne: buongo buetu buobu budi mua kulama malu a bungi kupita apu. Nunku bidi bileja ne: Yehowa mmuenze buongo buetu ne bukole bua kulama malu a bungi kupita atudi mua kulonga mu bidimu 70 anyi 80 patupu.​—Mis. 90:10.

⁷ Yehowa mmutufuke kabidi ne dijinga dikole dia kuikale anu muoyo. Bible udi wamba bua bantu ne: Nzambi ‘mmuteke lungenyi lua dikalaku tshiendelele mu muoyo wabu.’ (Muam. 3:11) Abu mbumue bua ku malu adi enza bua tumone lufu bu muena lukuna. (1 Kol. 15:26) Patutu tusama bikole, tutu tushala bavunge maboko bindile lufu anyi? Tòo. Pa tshibidilu, tutu tuya kudi munganga anyi pamuapa tunua buanga bua disama dijike. Mu bulelela tutu tuenza tshionso tshia kuenza bua katufu to. Kabidi patutu tufuisha muntu nansha yeye muana anyi mukole, tutu tumvua bibi tushala ne kanyinganyinga matuku a bungi. (Yone 11:32, 33) Bushuwa, Mufuki wetu wa dinanga kavua mua kutupesha dijinga ne bukole bua kuikala anu ne muoyo bu yeye kayi mulongolole bua bantu bashale ne muoyo kashidi to. Kadi kudi malu makuabu adi atusaka bua kuitaba ne: tudi mua kushala ne muoyo kashidi. Tumonayi amue avua Yehowa muenze kale ne adiye wenza lelu adi aleja ne: ki mmushintulule tshivuaye mulongoluele bantu to.

8. Ndishindika kayi ditudi tupeta mu Yeshaya 55:11 bua tshidi Yehowa mutulongoluele?

⁸ Nansha muvua Adama ne Eva benze mpekatu ne basambulujile bana babu lufu, Yehowa ki mmushintulule tshivuaye mulongoluele  bantu to. (Bala Yeshaya 55:11.) Utshidi anu ne dijinga dia ne: bantu ba lulamatu bashale ne muoyo kashidi. Tshitudi tuamba etshi ntshilelela bualu malu adiye muambe ne muenze adi ajadika ne: utshidi anu ne dijinga edi.

9. Bilondeshile Danyele 12:2, 13, ntshinyi tshidi Nzambi mulaye?

⁹ Yehowa mmulaye bua kubisha bantu ku lufu ne bua kubapesha mushindu wa kuikala ne muoyo wa tshiendelele. (Bien. 24:15; Tito 1:1, 2) Yobo muena lulamatu uvua mutuishibue ne: Yehowa udi uzuka bua kubisha bantu ku lufu. (Yobo 14:14, 15) Muprofete Danyele uvua mumanye ne: bantu badi ne diakalenga dia kubishibua ku lufu bua kupeta mushindu wa kuikala ne muoyo wa tshiendelele. (Mis. 37:29; bala Danyele 12:2, 13.) Bena Yuda ba mu matuku a Yezu bavua bamanye ne: Yehowa udi mua kupesha bena mudimu bende ba lulamatu “muoyo wa tshiendelele.” (Luka 10:25; 18:18) Yezu uvua muakule bua mulayi eu misangu ne misangu, ne Tatuende wakamubisha yeye muine ku lufu.​—Mat. 19:29; 22:31, 32; Luka 18:30; Yone 11:25.

10. Dibishibua dia bantu ku lufu divua dienzeke kale didi ditujadikila tshinyi? (Tangila tshimfuanyi)

¹⁰ Yehowa ke mupeshanganyi wa muoyo ne udi ne bukole bua kubisha bantu ku lufu. Wakapesha muprofete Eliya bukole bua kubisha muana wa balume wa mukaji mukamba wa ku Salefata ku lufu. (1 Bak. 17:21-23) Pashishe, Yehowa wakambuluisha Elisha bua kubisha muana wa balume wa mukaji muena Shunema ku lufu. (2 Bak. 4:18-20, 34-37) Bantu bavuabu babishe ku lufu aba ne bakuabu badi tshijadiki tshia ne: Yehowa udi ne bukole bua kubisha bantu ku lufu. Pavua Yezu pa buloba, wakabisha bantu ku lufu bua kuleja muvua tatuende mumupeshe bukole abu. (Yone 11:23-25, 43, 44) Lelu eu Yezu udi mu diulu ne mbamupeshe “bukokeshi buonso mu diulu ne pa buloba.” Nanku mmukumbane bua kukumbaja mulayi wa ne: “bantu bonso badi mu nkita ya tshivulukilu” nebabishibue ku lufu bikale ne ditekemena dia kushala ne muoyo kashidi.​—Mat. 28:18; Yone 5:25-29.

11. Bua tshinyi tshiakupikulangana natshi mmpunga wa kupetela muoyo wa kashidi?

¹¹ Bua tshinyi Yehowa wakanyisha bua Muanende munanga kufua lufu lua dikenga? Yezu wakandamuna pakambaye ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16) Yehowa mmutupeshe mpunga wa kupeta muoyo wa tshiendelele padiye mufile Muanende bu tshiakupikulangana natshi bua kutubuikidila mpekatu. (Mat. 20:28) Mupostolo Paulo wakaleja mushinga udi nawu kabidi bualu budi Nzambi mulongoluele bantu pakambaye ne: “Bu muvua lufu lufumine kudi muntu umue, dibishibua dia bafue didi difumina padi kudi muntu umue. Bualu anu bu mudi bantu bonso bafua mu Adama, nunku kabidi mu Kristo bonso nebapete muoyo.”​—1 Kol. 15:21, 22.

12. Mmunyi muakumbaja Yehowa malu adiye mulongolole?

¹² Yezu wakalongesha bayidi bende bua kusambila bua Bukalenge bua Nzambi bulue ne bua disua diende dienzeke pa buloba. (Mat. 6:9, 10) Nzambi mmulongolole kabidi bua bantu bikale ne muoyo kashidi pa buloba. Bua kukumbaja bualu ebu, Yehowa mmuteke Muanende Mukalenge wa Bukalenge bua Masiya. Ukadi mutuadije kusangisha kabidi bantu 144 000 ba pa buloba bua benze mudimu ne Yezu bua kukumbaja disua diende.​—Buak. 5:9, 10.

13. Mmalu kayi adi Yehowa wenza? Ntshinyi tshiudi pebe ne bua kuenza?

 ¹³ Yehowa udi wenda usangisha “musumba munene” wa bantu ne ubalongesha bua kukokela Bukalenge buende. (Buak. 7:9, 10; Yak. 2:8) Nansha mudi bantu ba bungi lelu batapuluke bua dikinangana ne bua mvita, bena mu musumba munene eu badi badienzeja bua kubenga kukina muntu mu mushindu kampanda anyi kansanga. Mbienze anu bu ne: bakadi bamane kufula miele yabu ya mvita bayivuije nkasu ya kudima nayi. (Mika 4:3) Badi bambuluisha bantu bua kupeta “muoyo wa bushuwa” padibu babalongesha bua kumanya Nzambi mulelela ne malu adiye mulongolole, pamutu pa kudituabu mu mvita idi ishipesha bantu. (1 Tim. 6:19) Bu mudibu batua Bukalenge bua Nzambi mpanda, bena mu mêku abu badi mua kutuadija kubaluisha anyi badi mua kupeta lutatu lua makuta; kadi Yehowa udi wenza bua bikale ne bidibu nabi dijinga. (Mat. 6:25, 30-33; Luka 18:29, 30) Malu aa adi atujadikila ne: Bukalenge bua Nzambi budiku bushuwa ne nebutungunuke ne kukumbaja malu adi nzambi mulongolole.

14-15. Mmunyi mualua mulayi wa Yehowa wa kubutula lufu bua kashidi kukumbana?

¹⁴ Patudi tuamba apa, Yezu udi ukokesha mu diulu ne neakumbaje malu onso adi Yehowa mulaye. (2 Kol. 1:20) Ukadi mutuadije kukokesha  bena lukuna bende katshia anu ku 1914. (Mis. 110:1, 2) Yezu ne bantu bakokeshaye nabu bakadi pa kubutula bantu babi bonso.​—Buak. 6:2.

¹⁵ Mu bidimu tshinunu biakokesha Yezu, bantu nebabishibue ku lufu, ne bonso batumikila Yehowa nebavuijibue bapuangane. Panyima pa diteta dia ndekelu, bantu bamona Yehowa ne: mbakane “nebapiane buloba, nebasombapu bua kashidi.” (Mis. 37:10, 11, 29) Bualu buenza disanka budi ne: “muena lukuna wa ndekelu” wikala “ne bua kubutudibua ndufu.”​—1 Kol. 15:26.

16. Mbualu kayi bunene budi ne bua kutusaka bua kuenzela Yehowa mudimu?

¹⁶ Mu tshiena-bualu etshi tudi bamone ne: ditekemene dietu dia kuikala ne muoyo kashidi ndishindamene mu Dîyi dia Nzambi. Ditekemene adi didi mua kutuambuluisha bua kushala ne lulamatu mu matuku makole a ku nshikidilu aa. Pa kumbusha dijinga dikole dia kupeta muoyo wa kashidi didi mua kutusaka bua kusankisha Yehowa, tudi ne bua kuenza malu makuabu. Dinanga dikole ditudi banange nadi Yehowa ne Yezu ke bualu bunene budi butusaka bua kushala ne lulamatu kudibu. (2 Kol. 5:14, 15) Kubananga mushindu eu kudi kutusaka bua kubidikija ne kuambila bakuabu ditekemene ditudi nadi. (Lomo 10:13-15) Bu mutudi tulonga bua kutabalela bakuabu ne kubambuluisha, tudi tulua bantu badi Yehowa ujinga bua balue balunda bende bua kashidi.​—Eb. 13:16.

17. Bilondeshile Matayi 7:13, 14, ndibaza kayi ditudi nadi?

¹⁷ Netuikale petu mu bantu bapeta muoyo wa tshiendelele anyi? Yehowa mmutupeshe mpunga wa kuwupeta. Nunku tuetu ke badi bashala ne dibanza dia kuendela mu njila udi ufikisha ku muoyo wa tshiendelele. (Bala Matayi 7:13, 14.) Nsombelu neikale mushindu kayi patuikala ne muoyo wa kashidi? Netuandamune lukonko elu mu tshiena-bualu tshialonda.