Uvuaku mubale bibejibeji bia Tshibumba tshia Nsentedi bishale ebi bimpe menemene anyi? Nanku anji tangila ni udi mua kuandamuna nkonko idi ilonda eyi:

Mmunyi mudi kusambila, kuelangana meji a malu a Yehowa ne kumuteleja mua kutuambuluisha?

Netuikale tuangata mapangadika mimpe, netulue balongeshi bimpe, ditabuja dietu nedikole menemene, ne netunange Yehowa bikole.​—w22.01, dib. 30-31.

Kumanya mua kueyemena Yehowa ne bantu badiye muteke bua kutulombola nekutuambuluishe mushindu kayi?

Etshi ke tshikondo tshia kumanya mua kueyemena mushindu utu Yehowa wenza malu, katuyi tupepeja buludiki ne mapangadika a bakulu to. Patuadija dikenga dinene, netuikale badiakaje bua kutumikila malu atuambilabu bua kulonda nansha owu amueneka bu adi kaayi umvuika anyi kaayi ne mutu.​—w22.02, dib. 4-6.

Ntshinyi tshivua muanjelu musue kuamba pavuaye muambile Zekâya bua “nshinga wa tshiamu tshia plomb mu tshianza tshia [nguvena] Zelubabela”? (Zek. 4:8-10)

Tshikena-kumona etshi tshivua tshijadikila bantu ba Nzambi ne: ntempelo uvua mushadile uvuabu bibake au uvua ne bua kujika ne uvua ne bua kuikala anu muvua Nzambi musue yeye bua ikale.​—w22.03, dib. 16-17.

Mmunyi mutudi mua kuikala “tshilejilu . . . mu ngakuilu”? (1 Tim. 4:12)

Patudi tuakula ne kanemu ne dîyi dimpe mu mudimu wa buambi, tuimba misambu ne muoyo mujima, tuandamuna mu bisamgilu, tuamba bulelela, tuepuka ngakuilu mubi ne tuakula mêyi adi akolesha bakuabu.​—w22.04, dib. 6-9.

Bua tshinyi bimanyinu bia nyama ya luonji inayi (anyi makalenge) idibu batele mu Danyele nshapita wa 7 mbiamba bua nyama anu umue udibu bakuile mu Buakabuluibua 13:1, 2?

Nyama wa luonji wa mu Buakabuluibua 13 kena uleja anu bukalenge bumue, bu mudi bua Lomo to. Kadi udi tshimfuanyi tshia makokeshi onso a tshididi adi makokeshe bukua bantu.​—w22.05, dib. 9.

Mmalu kayi manene atudi ne bua kuenza bua kuleja ne: tudi tueyemena buakane bua Nzambi?

Muntu yeye mutupende, mutunyingalaje, anyi mutuenzele bualu bubi, tutu tudienzeja bua kulekela tshiji ne dilaminangana munda ne kabidi tulekeela Yehowa malu mu bianza. Yeye neajikije ntatu yonso idi mpekatu mukebeshe.​—w22.06, dib. 10-11.

Ntshinyi tshidi muametu wa balume ne bua kuvuluka padiye usambila mu bisangilu?

Katuena tusambila bua kubela bena mu tshisumbu anyi kufila mamanyisha to. Ki mbimpe akule “mêyi a bungi” nangananga padiye wenza disambila dia ntuadijilu to. (Mat. 6:7)​—w22.07, dib. 24-25.

Mmushindu kayi wikala bantu “bavua benze malu mabi” mua kupeta “dibishibua ku lufu dia dilumbuluisha?” (Yone 5:29)

Kabakubalumbuluisha bibi bilondeshile malu avuabu benze kumpala kua kufuabu to. Nebabakonkonone bilondeshile meji abu ne bienzedi biabu bobu bamane kubishibua ku lufu.​—w22.09, dib. 18.

Mbualu kayi bua mushinga buvua muanetu Rutherford mulombe bantu bua kuenza mu mpungilu wa mu 9/1922?

Wakamba mu mpungilu wa mu 1922 mu Cedar Point, mu Ohio, mu États-Unis ne: “Mukalenge udi ukokesha! Nudi ne mudimu wa kumanyisha bantu bualu ebu. Nunku, manyishayi, manyishayi, manyishayi Mukalenge ne Bukalenge buende!”​—w22.10, dib. 3-5.

Mmishindu kayi isatu idi Nzambi utuambuluisha bua kunanukila idibu baleje mu Yeshaya nshapita wa 30?

Nshapita eu udi uleja ne: udi 1) uteleja masambila etu ne ntema yonso ne uandamuna, 2) udi utulombola, ne 3) utubenesha lelu ne mu matuku atshilualua.​—w22.11, dib. 9.

Bua tshinyi tudi tuamba ne: mêyi adi mu Misambu 37:10, 11, 29 avua makumbane kale ne neakumbane kabidi kumpala eku?

Mêyi a Davidi au adi aleja nsombelu muimpe uvua mu Isalele, bu mudi dîba divua Solomo ukokesha. Pavua Yezu muakule bua Mparadizu utudi bindile kumpala eku wakatela mêyi a mu mvese wa 11. (Mat. 5:5; Luka 23:43)​—w22.12, dib. 8-10, 14.