Ukadi mudilongolole bua ‘kupiana buloba’ anyi?
TUETU bonso tudi batekemene mulayi wa Yezu wa ne: “Badi ne malu mapole mba diakalenga, bualu nebapiane buloba.” (Mat. 5:5) Bela manyi nebapiane buloba pikalabu bakokesha mu diulu bu bakalenge ne Yezu. (Buak. 5:10; 20:6) Bena Kristo ba bungi lelu mbatekemene bua kupiana buloba ne kusombelapu bua kashidi, bikale bupuangane, mu ditalala ne disanka. Bua bualu ebu kuenzeka, nebikale ne midimu ya bungi ya kuenza. Tuakulayi bua midimu isatu: kukokesha buloba, kutabalela bantu babishibua ku lufu ne kubalongesha. Mona muudi mua kuleja nansha ku mpindieu ne: udi ne dijinga dia kuenza midimu ayi mu Mparadizu.
IKALA MUDIAKAJE BUA KUKOKESHA BULOBA
Pavua Yehowa mupeshe bantu mudimu wa ‘kuwuja buloba ne kubukokesha,’ uvua usua kuleja ne: buloba bujima buvua ne bua kulua Mparadizu. (Gen. 1:28) Bualu buvua Yehowa muambe katshia ku tshibangidilu abu mbuindile bantu bapiana buloba. Kabakuvuija buloba Mparadizu musangu umue to, bualu budimi bua Edene kabutshituku to. Diakamue panyima pa mvita ya Armagedone, nekuikale mudimu wa bungi wa kuakaja miaba yonso idibu banyange lelu. Kawakuikala mudimu wa bilele to!
Bualu ebu budi butuvuluija mudimu munene uvua bena Isalele ne bua kuenza pakapatukabu mu Babilona. Buloba buabu buvua bushale bikulu bidimu 70. Kadi Yeshaya ukavua mumanyishe ne: Yehowa uvua ne bua kubambuluisha bua kubuakajilula. Mêyi a buprofete au avua amba ne: “Ne neavuije tshipela tshiende bu Edene ne mpata wende wa tshipela bu budimi bua Yehowa.” (Yesh. 51:3) Bena Isalele bakakaja buloba buabu. Bia muomumue, Yehowa neambuluishe bantu bapiana buloba bua kubukokesha anyi kubuvuija Mparadizu. Nansha mpindieu udi mua kuleja muudi ne dijinga dia kuenza mudimu au.
Umue mushindu uudi mua kuenza nanku nkulama nzubu webe ne muaba uudi musombele ne mankenda. Wewe enza nanku nansha bena mutumba bebe kabayi balongolola ku mabu. Udi kabidi mua kuditatshisha bua kulama Nzubu wenu wa Bukalenge anyi wa mpuilu ne mankenda. Koku mushindu, udi kabidi mua kuwuja dilomba bua kuambuluisha bu mudisuile mu mudimu wa diambuluishangana padi bikumina bienzeka muaba unudi. Paudi wenza nanku udi uleja ne: udi mudiakaje bua kuambuluisha bena Kristo nebe pikalabu nebe dijinga. Nunku diebeja ne: ‘Ndiku mua kulonga midimu kampanda yingenza Yehowa yeye munganyishile bua kupiana buloba anyi?’
IKALA MUDIAKAJE BUA KUTABALELA BANTU BABISHIBUA KU LUFU
Pavua Yezu mubishe muana wa bakaji wa Yailo ku lufu, wakamba bua bapeshe muana au tshiakudia diakamue. (Mâko 5:42, 43) Kutabalela muana wa bakaji wa bidimu 12 au kakuvua mua kuikala bualu bukole to. Elabi meji bungi bua mudimu utuenza pakumbaja Yezu mulayi wende wa ne: ‘bantu bonso badi mu nkita ya tshivulukilu nebumvue dîyi diende ne nebapatuke.’ (Yone 5:28, 29) Bible kena umvuija malu a bungi bua mulayi eu to, kadi tudi tuela meji ne: bantu babishibua ku lufu nebikale dijinga ne biakudia, miaba ya kusombela ne bilamba. Kuenaku mua kuleja nansha ku mpindieu muudi mudiakaje bua kuambuluisha bakuabu anyi? Imue nkonko ya kuelela meji:
Ntshinyi tshiudi mua kuenza mpindieu bua kuleja muukadi mudikaje bua kupiana buloba?
Patubu bamanyisha bua dikumbula dia mutangidi wa tshijengu mu tshisumbu tshienu, utu witaba bua alue kuebe bua kudia anyi? Mudimu wa pa buawu wa ku dîba ne ku dîba wa bana betu badi ku Betele anyi wa batangidi ba bijengu wowu muimane ne babatume mu bisumbu, udiku mua kubambuluisha bua kupetabu muaba wa kusomba anyi? Mpungilu wa pa buende anyi wa rejon yeye wenzekela muaba uudi, udiku mua kufila dîna bua kuambuluisha kumpala kua mpungilu anyi panyima pende peshi kudifila bua kuakidila bana betu ba miaba mikuabu babuelamu anyi?
IKALA MUDIAKAJE BUA KULONGESHA BANTU BABISHIBUA KU LUFU
Bilondeshile Bienzedi 24:15, tudi batekemene ne: bantu nebabishibue ku lufu bungi bu ntunta ne ngenene. Ba bungi nebikale bantu bavua kabayi bapete mpunga wa kumanya Yehowa to. Nebapete mpunga au pababishabu ku lufu. a Bena mudimu ba Nzambi ba lulamatu badi bamanye malu ende bimpe nebalongeshe bantu abu. (Yesh. 11:9) Muanetu mukuabu diende Charlotte udi muyishe ku Mputu, ku Amerike wa ku Sud ne mu Afrike udi ne muoyo kulu kulu muindile bua kuenza mudimu au. Udi wamba ne disanka dionso ne: “Ndi ne muoyo kulu kulu muindile bua kulongesha bantu babishibua ku lufu. Pantu mbala bualu bua muntu uvua ne muoyo kale, ntu ndiambila ne: ‘bu muntu eu yeye mumanye anu Yehowa, nsombelu wende uvua mua kuikale muimpe.’ Tshiakupanga kuambila bantu babishibua ku lufu malu a Yehowa ne muikale nsombelu wabu bobu baatumikile to.”
Nansha bena mudimu ba Yehowa ba lulamatu bavuaku kumpala kua Yezu kulua pa buloba nebikale pabu ne bia bungi bialongabu. Difuanyikijilabi disanka dituikale nadi dia kumvuija Danyele muvua mêyi a buprofete avuaye muambe makumbane nansha muvuaye kayi muumvue. (Dan. 12:8) Netuikale kabidi ne disanka dia kuambuluisha Luta ne Naomi bua kumanyabu muvua dîku diabu dikale mu mulongo wa ndelanganyi ivua mifikishe ku Masiya. Netuikale ne disanka dia bungi dia kuenza petu mudimu udibu balongolole wa kulongesha bantu pa buloba bujima, kakuyi bantu batusuya anyi malu a mu bulongolodi bubi ebu adi mua kutubueja mu ditanaji.
Munyi muudi mua kuleja mpindieu ne: udi mudiakaje bua kuenza pebe mudimu au? Umue mushindu nkudienzeja bua kuakaja nyishilu webe ne kuikala ne tshibidilu tshia kuyisha. (Mat. 24:14) Nansha bikala bukulakaja anyi nsombelu mikuabu bikupangisha bua kuyisha bikole lelu, mushindu uudi udienzeja bua kuyisha udi uleja muudi mudiakaje bua kulongesha bantu babishibua ku lufu.
Mbimpe kuelangana meji a nkonko eyi: Udi bushuwa ne muoyo kulu kulu muindile bua kupiana buloba anyi? Udiku ne disanka bua diakalenga dia kukokesha buloba ne dia kutabalela bantu babishibua ku lufu ne kubalongesha anyi? Udi mua kuleja muudi mudiakaje paudi kuyi uyisha mpunga idiku lelu ya kuenza midimu idi mifuanangane ne idi mituindile patuapiana buloba!
a Tangila tshiena-bualu tshia ne: “Badi bafikisha bantu ba bungi ku buakane,” tshidi mu Tshibumba tshia Nsentedi tshia ngondo wa 9/2022.
