1, 2. a) Ntshinyi tshidi tshileja ne: bantu badi mua kulua balunda ba Nzambi? b) Ntshinyi tshituakonkonona mu tshiena-bualu etshi?

KUTUADIJILA ku diledibua dia muntu too ne ku lufu luende, utu musue bua bamunange. Bantu batu basue kudia bulunda buimpe ne bukole, kadi ki mbulunda bua malu a mananga to. Kadi kupita bionso, tutu basue bua Yehowa atunange. Bantu ba bungi kabatu bitaba ne: bantu badi mua kudia bulunda buimpe ne bukole ne Nzambi to, bualu kena umueneka ne ngua bukole buonso. Kadi tudi bamanye bimpe ne: bantu badi mua kudia nende bulunda.

² Bible udi utuambila ne: kuvua bantu bavua balue balunda ba Nzambi. Bilejilu biabu bidi mua kutulongesha. Bua tshinyi? Bualu kudia bulunda ne Nzambi ntshipatshila tshinene tshitudi mua kuikala natshi. Nunku, tukonkononayi tshilejilu tshia Abalahama. (Bala Yakobo 2:23.) Mmunyi muvuaye mulue mulunda wa Nzambi? Bulunda bukole buvua Abalahama mudie ne Nzambi buvua bushindamene pa ditabuja, ne mmumanyike bu “tatu wa bantu bonso badi ne ditabuja.” (Lomo 4:11) Paudi  ukonkonona tshilejilu tshiende, udiebeje ne: ‘Mmunyi mundi mua kuidikija ditabuja dia Abalahama ne kukolesha bulunda buanyi ne Yehowa?’

3, 4. a) Umvuija tshivua tshimueneka bu diteta ditambe bunene dia ditabuja dia Abalahama. b) Bua tshinyi Abalahama uvua muitabe bua kulambula Izaka?

³ Fuanyikijabi Abalahama ne bidimu bitue ku 125 wenda ubanda mukuna bitekete bitekete. ^[1] (Tangila note ku ndekelu.) Muanende Izaka uvua ne bidimu 25 udi wenda umulonda mu nyima. Izaka mmuambule nkunyi, ne Abalahama mukuate kele ne bintu bia kutemesha nabi mudilu ku bianza. Luendu elu luvua pamuapa lua lutatu lukole lua mu nsombelu wa Abalahama. Kadi ki mbualu ukavua mukulakaje to. Utshivua ne makanda a bungi. Bushuwa, luendu alu luvua lukole bualu Yehowa uvua mumulombe bua kulambula muanende.​—Genese 22:1-8.

⁴ Etshi tshivua pamuapa diteta ditambe bunene dia ditabuja dia Abalahama. Bamue bantu batu bamba ne: Nzambi uvua ne tshikisu pavuaye mulombe Abalahama bua kulambula muanende. Bakuabu batu bamba ne: Abalahama uvua muitabe bua kuenza nanku bualu kavua munange muanende to. Bantu batu bamba malu aa bualu kabena ne ditabuja ne ki mbamanye tshidi ditabuja dilelela anyi mudidi dienza malu to. (1 Kolinto 2:14-16) Kadi Abalahama kavua muitabe bua kutumikila Nzambi tshitabataba to, mmumue ne: kavua mutumikile kayi muele meji to. Uvua mutumikile bualu uvua ne ditabuja dilelela. Uvua mumanye ne: Yehowa kavua mua kumulomba bua kuenza bualu buvua mua kumukengeshisha kashidi to. Abalahama uvua mumanye ne: yeye mutumikile, Yehowa uvua ne bua kumubenesha yeye ne muanende munanga. Ntshinyi tshivua Abalahama mua kuikala natshi dijinga bua kupeta ditabuja dikole dia nunku? Uvua dijinga ne dimanya ne kumona malu kampanda.

5. a) Mmunyi muvua Abalahama mua kuikala mulonge malu a Yehowa? b) Mmunyi muvua dimanya adi dimuambuluishe?

⁵ Dimanya. Abalahama uvua mukolele mu tshimenga tshia Ula. Bantu ba mu tshimenga  etshi bavua batendelela nzambi ya dishima, nansha tatuende pende. (Yoshua 24:2) Kadi mmunyi muvua Abalahama mulonge malu a Yehowa? Bible udi uleja ne: Sheme muana wa Noa uvua mulela wa Abalahama. Wakashala ne muoyo too ne pavua Abalahama ne bidimu bu 150. Sheme uvua ne ditabuja dikole, ne uvua pamuapa muambile balela bende malu a Yehowa. Katuena ne bijadiki to, kadi bidi mua kuikala ne: ke mushindu uvua Abalahama mulonge malu a Yehowa. Malu avua Abalahama mulonge akamufikisha ku dinanga Yehowa, ne dimanya adi diakamuambuluisha bua kupeta ditabuja.

6, 7. Mmunyi muvua malu avua mafikile Abalahama makoleshe ditabuja diende?

⁶ Malu avuaye mumone. Mmunyi muvua Abalahama mupete malu avua makoleshe ditabuja diende kudi Yehowa? Bamue bantu batu bamba ne: meji adi muntu wela adi amupetesha dijinga, ne dijinga adi dimufikisha ku dienza bualu kampanda. Abalahama uvua mutume muoyo wende ku malu a Nzambi avuaye mulonge, ne kuenza nunku kuvua kumusake bua kuikala ne kanemu kakole kudi “Yehowa, Nzambi Mutambe Bunene wa mu Diulu, mufuki wa diulu ne buloba.” (Genese 14:22) Bible udi ubikila kanemu kakole aka ne: ‘ditshina dia Nzambi.’ (Ebelu 5:7) Bua tuetu kudia bulunda bukole ne Nzambi, tudi ne bua kuikala ne ditshina dia Nzambi. (Musambu 25:14) Ngikadilu eu ke uvua musake Abalahama bua kutumikila Yehowa.

⁷ Nzambi wakambila Abalahama ne Sala bua kumbuka mu tshimenga tshiabu tshia Ula bua kuya mu ditunga dikuabu. Bakavua bantu bakulumpe ne bavua ne bua kuya kusombela mu ntenta matuku abu onso a muoyo. Nansha muvua Abalahama mumanye ne: kuvua ne bua kuikala njiwu ya bungi, uvua mudisuike bua kutumikila Yehowa. Nzambi wakamubenesha ne kumukuba bua ditumikila diende. Tshilejilu, pavuabu banyenge Abalahama Sala, mukajende muimpe kumona, ne muikale mu njiwu ya kumushipabu, Yehowa wakakuba Abalahama ne Sala mu tshishima misangu ya bungi. (Genese 12:10-20; 20:2-7, 10-12, 17, 18) Malu aa akakolesha ditabuja dia Abalahama.

8. Mmunyi mutudi mua kupeta dimanya ne dimonamona dia malu bidi mua kukolesha bulunda buetu ne Yehowa?

⁸ Tudiku mua kulua balunda ba Yehowa ba pa muoyo anyi? Eyowa. Anu bu Abalahama, tudi ne bua kulonga malu a Yehowa. Tuetu petu tudi mua kupeta dimanya ne malu atudi nawu dijinga. Lelu, tudi ne malu a bungi kupita avua nawu Abalahama. (Danyele 12:4; Lomo 11:33) Bible mmuwule tente ne dimanya dia malu a “Mufuki wa diulu ne  buloba.” Malu atudi tulonga adi atusaka bua kunanga Yehowa ne atuambuluisha bua kuikala ne kanemu kakole kudiye. Dinanga edi ne kanemu katudi naku bua Nzambi bidi bitusaka bua kumutumikila. Patudi tuenza nunku, tudi tumona mudi Nzambi utukuba ne utubenesha, ne bidi bitupetesha dimonamona dia malu didi dikolesha ditabuja dietu. Patudi tuenzela Yehowa mudimu ne muoyo mujima, neatukumbajile majinga etu, netuikale ne ditalala ne disanka. (Musambu 34:8; Nsumuinu 10:22) Patudi tupeta dimanya ne dimonamona dia malu, bulunda buetu nende budi bukola.

9, 10. a) Bua bulunda kukolabu bidi bikengela tshinyi? b) Ntshinyi tshidi tshileja ne: Abalahama uvua munange bulunda buende ne Yehowa ne mubukoleshe?

⁹ Tudi mua kufuanyikija bulunda bukole ne tshiuma tshia mushinga mukole. (Bala Nsumuinu 17:17.) Kabuena bu tshivuadi tshia mushinga wa bungi tshidibu bateke anu bua kulengeja natshi muaba kampanda to. Bulunda budi anu bu tshilongo tshimpe tshidi dijinga ne kutshiela mâyi bua kusampilatshi. Abalahama uvua munange bikole bulunda buende ne Yehowa ne wakabulama. Mmunyi muvuaye muenze nanku?

¹⁰ Abalahama wakatungunuka ne kukolesha ditshina diende dia Nzambi ne ditumikila. Tshilejilu, pakayaye mu Kanâna ne bena mu dîku diende ne bena mudimu bende, wakatungunuka ne kulonda buludiki bua Yehowa mu mapangadika avuaye wangata manene ne makese. Tshidimu tshimue kumpala kua Izaka kuledibuaye, pavua Abalahama ne bidimu 99, Yehowa wakamulomba bua kutengula balume bonso ba mu nzubu muende. Abalahama uvuaku muele Yehowa mpata anyi mukebe bua kudibingisha bua kubenga kuenza tshivua Nzambi mumulombe anyi? Tòo, wakeyemena Yehowa ne wakamutumikila anu “dituku adi mene.”​—Genese 17:10-14, 23.

11. a) Bua tshinyi dibutuka dia Sodoma ne Amola divua ditonde Abalahama? b) Mmunyi muvua Yehowa mumuambuluishe?

¹¹ Bu muvua Abalahama utumikila Yehowa misangu yonso nansha mu tumalu tukese, bulunda buabu buakakola. Uvua udiumvua mupepele bua kuyukila ne Yehowa bua bualu kayi buonso, nansha bua kumulomba diambuluisha pavuaye ne ntatu. Tshilejilu, pavua Yehowa muambe ne: uvua ne bua kubutula tshimenga tshia Sodoma ne Amola, biakatonda Abalahama. Bua tshinyi? Bualu uvua ne buôwa bua ne: bantu bimpe kabalu kufua pamue ne bantu babi. Uvua pamuapa mumvue bibi bua Lota, muana wa muanabu, ne dîku diende bavua basombele mu Sodoma. Abalahama uvua mueyemene Yehowa, “Mulumbuluishi wa buloba buonso,” nunku wakayukila ne Yehowa ne budipuekeshi bua malu avua mamutonde au. Yehowa uvua muleje mulunda wende lutulu ne muleje mudiye Nzambi wa luse. Yehowa wakamumvuija ne: padiye musue kubutula bantu, utu ukeba bantu bimpe bua kubashiya ne muoyo.​—Genese 18:22-33.

12, 13. a) Mmunyi muvua dimanya dia Abalahama ne dimonamona diende dia malu bilue kumuambuluisha? b) Ntshinyi tshidi tshileja ne: Abalahama uvua ne ditabuja kudi Yehowa?

¹² Bidi bimueneka patoke ne: dimanya dionso ne dimonamona dia malu bivua Abalahama mupete biakamuambuluisha bua kulama bulunda buende ne Yehowa bukole. Ke bualu kayi panyima pa matuku, pavua Yehowa mulombe Abalahama bua kumulambula muanende, uvua mumanye ne: Yehowa utu misangu yonso ne lutulu ne luse, Nzambi wa kueyemena ne mukubi. Abalahama uvua mutuishibue ne: Yehowa kavua mushintuluke diakamue mulue muena tshikisu ne muena malu makole to. Bua tshinyi tudi tuamba nanku?

¹³ Kumpala kua Abalahama kushiyangana ne bena mudimu bende, wakamba ne: ‘Nuenu nushale kuneku ne nyama wa mpunda; tuetu netuye ne nsongalume, netutendelele, netupingane kunudi.’ (Genese 22:5) Ntshinyi tshivua Abalahama usua kuamba? Uvuaku ubashima ne: uvua ne bua kupingana ne Izaka, pende mumanye ne: uvua ne bua kumulambula anyi? Tòo. Bible udi wamba ne: Abalahama uvua mumanye ne: Yehowa uvua ne bukole bua kujula Izaka ku lufu. (Bala Ebelu 11:19.) Abalahama uvua kabidi mumanye ne: Yehowa uvua mumupeshe bukole bua kupeta muana wa balume nansha mukavuaye yeye ne Sala bakulakaje bikole. (Ebelu 11:11, 12, 18) Nunku, wakajingulula ne: kakuvua tshivua mua kukolela Yehowa to. Abalahama kavua mumanye tshivua ne bua kuenzeka dituku adi to. Kadi uvua ne ditabuja dia ne: koku mushindu, Yehowa uvua ne bua kubisha muanende ku lufu bua milayi yonso ya Nzambi ikumbane. Ke bua tshinyi badi babikila Abalahama ne: “tatu wa bantu bonso badi ne ditabuja.”

14. a) Nntatu kayi iutu upeta paudi wenzela Yehowa mudimu? b) Mmunyi mudi tshilejilu tshia Abalahama mua kukuambuluisha?

¹⁴ Kadi lelu, Yehowa kena utulomba bua kumulambula bana betu balela to, kadi udi utulomba bua kutumikila mikenji yende. Imue misangu bidi mua kutukolela bua kumvua tshidibu belele mikenji eyi anyi tudi mua kuyimona mikole bua kuyitumikila. Bualu bua nunku bukadiku bukufikile anyi? Bua bamue bana betu, kuyisha mmudimu mukole. Pamuapa badi mua kuikala ne bundu anyi bamona bibakolele bua kuyukila ne bantu badibu kabayi bamanye. Bakuabu badi batshina bua kabikadi bashilangane ne bantu bakuabu ku mudimu anyi mu tulasa. (Ekesode 23:2; 1 Tesalonike 2:2) Padibu bakulomba bua kuenza bualu kampanda budi bukukolele, ela meji ku tshilejilu tshimpe tshia Abalahama tshia ditabuja ne dikima bivuaye nabi. Patudi tuelangana meji bua bilejilu bia balume ne bakaji bavua ne lulamatu, bidi mua kutusaka bua kubidikija ne kusemena pabuipi ne mulunda wetu Yehowa.​—Ebelu 12:1, 2.

15. Ntshinyi tshidi tshitujadikila ne: Abalahama kavua munyingalale musangu nansha umue bua muvuaye mutumikile Yehowa ne lulamatu?

¹⁵ Abalahama uvuaku munyingalale bua ditumikila mikenji ya Yehowa anyi? Bible udi  wamba ne: Abalahama ‘wakafua mumane kukulakaja bikole, mununu ne musankishibue.’ (Genese 25:8, NWT) Pakavua Abalahama ne bidimu 175, uvua mua kuvuluka malu a bungi a mu nsombelu wende ne kudiumvua ne disanka. Bua tshinyi? Bualu uvua misangu yonso wangata bulunda buende ne Yehowa ne mushinga wa bungi. Kadi, patudi tubala ne: Abalahama uvua ‘mununu ne musankishibue,’ kabiena biumvuija ne: kavua dijinga ne kuikala ne muoyo mu matuku atshilualua to.

16. Mmasanka kayi apeta Abalahama mu Mparadizu?

¹⁶ Bible udi wamba ne: Abalahama “uvua muindile tshimenga tshidi ne bishimikidi bilelela, tshidi Nzambi muikale muenji ne muibaki.” (Ebelu 11:10) Abalahama uvua mutuishibue ne: dimue dituku uvua ne bua kumona tshimenga atshi, mmumue ne: Bukalenge bua Nzambi buakokesha buloba. Bushuwa neabumone! Fuanyikijabi disanka dikala nadi Abalahama dia kusomba mu mparadizu pa buloba ne kutungunuka ne kukolesha bulunda buende ne Nzambi. Neikale ne disanka bua kumanya ne: tshilejilu tshiende tshia ditabuja ntshiambuluishe batendeledi ba Nzambi munkatshi mua bidimu bia bungi. Mu Mparadizu, neajingulule ne: mulambu uvuaye usua kufila ku mukuna wa Moliya uvua tshimfuanyi tshia bualu kampanda bunene. (Ebelu 11:19) Neamanye muvua kanyinganyinga kavuaye naku pavuaye udilongolola bua kulambula muanende Izaka kambuluishe bantu miliyo ya bungi bavua ne lulamatu bua kumvuabu kanyinganyinga kavua naku Yehowa pavuaye mufile Muanende Yezu Kristo bu tshia kupikula natshi bukua bantu. (Yone 3:16) Tshilejilu tshia Abalahama ntshituambuluishe tuetu bonso bua kuikala ne dianyisha dia bungi bua tshia kupikula natshi tshidi tshikale tshienzedi tshinene tshia dinanga tshitu muntu nansha umue kayi muanji kuleja.

17. a) Udi mudisuike bua kuenza tshinyi? b) Netukonkonone tshinyi mu tshiena-bualu tshialonda?

¹⁷ Mbimpe yonso wa kutudi adisuike bua kuidikija ditabuja dia Abalahama. Anu bu Abalahama, tudi dijinga ne dimanya ne dimonamona dia malu. Patudi tutungunuka ne kulonga malu a Yehowa ne kumutumikila, netumone mudiye utubenesha ne utukuba. (Bala Ebelu 6:10-12.) Tuenzayi bua Yehowa ikale Mulunda wetu tshiendelele! Mu tshiena-bualu tshialonda, netukonkonone bilejilu bikuabu bisatu bia bantu bavua ne lulamatu bavua balue balunda ba Nzambi.