BU MUKAVUA mazuwa mu tshinkonya tshia mbuu tshia Belfast enda aya, kasumbu kakese ka bantu bavua bimane pa mutu pawu bakamona muvua kamunya ka mu dinda kakenkesha mikuna ivua ne bisonsa bibishi. Bivua mu ngondo 5/1910. Charles Russell uvua umue wa kudibu, buende yeye luendu elu luvua luitanu mutangile mu Irlande. Kumpala kuende kuvua mazuwa abidi manene avuabu benda benza, mazuwa a Titanic akalua kudina pashishe ne a Olympic. * Kuvua balongi ba Bible 12 bimane dia muamua dia muaba uvuabu benzela mazuwa bindile difika diende.

Bidimu bu 20 kumpala, pavua muanetu Russell ukeba mushindu muimpe wa kumuangalaja lumu luimpe pa buloba bujima, wakapangadija bua kuenza ngendu mu matunga makuabu pambelu pa États-Unis. Mu luendu luende lua kumpala, wakatuadija ne Irlande mu ngondo wa 7/1891. Pavuaye mu mazuwa a City of Chicago benda basemena ku mukuna mu tshimenga tshia Queenstown, wakamona muvua dîba dienda dibuela, kuvulukaye pamuapa malu avua baledi bende bamuambila a mushindu uvua ditunga diabu. Pavua muanetu Russell ne bavuaye nabu mu luendu benda bapitshila mu bimenga bilongolola bimpe ne mu misoko milenga, bakamona ne: bivua budimi “bukumbane, buindile bua kubunowa.”

Muanetu Russell wakaya mu Irlande misangu muanda mutekete mijima. Bidi bimueneka ne: bu muvua bantu banyishe bulelela mu luendu luende lua kumpala, biakenza bua ne: mu ngendu yende yakalonda bantu nkama ne nkama, imue misangu binunu ne binunu, balue kumuteleja. Mu luendu luende luibidi lua mu ngondo 5/1903, bavua benda bamanyisha bisangilu bia patoke bivua ne bua kuenzeka mu Belfast ne mu Dublin mu bikandakanda bia muntu amu. Russell wakamba ne: “Bantu bakateleja ne ntema yonso muyuki uvua wakula bua ditabuja dia Abalahama ne masanka apeta bantu matuku atshilualua.”

Bu muvua bantu ba bungi banyisha bulelela mu Irlande, Russell wakapinganamu kabidi mu luendu luende luisatu lua ku Mputu. Bana betu ba balume batanu bakamuela muoyo pavuaye utuluka mu mazuwa mu Belfast dituku kampanda mu dinda mu ngondo 4/1908. “Bantu batue ku 300” bakalua kuteleja muyuki uvuabu bamanyishe wakenzaye dilolo adi, wa ne: “Dikuluka dia ndongoluelu wa Satana.” Mushindu uvuaye umvuija mvese ya mu Bible wakapuwisha diakamue muena mpata uvua munkatshi muabu. Mu Dublin, muena mpata mukuabu wa kalanda musenga, diende O’Connor, uvua sekretere wa Nsangilu wa bansonga bena Kristo (YMCA) wakakeba bua bantu bapite pa 1 000 batombokele balongi ba Bible. Tshiakenzeka ntshinyi?

Tupingajayi meji kakese tudifuanyikijile muvua malu mua kuikala menzeke. Muntu mulume kampanda udi musue kumanya bulelela bua mu Bible udi upangadija bua kuya kuteleja muyuki wa patoke uvuabu bamanyishe mu tshikandakanda tshia The Irish Times. Udi udienzeja bua kupeta muaba mu nzubu mukavua bantu bapate. Udi uteleja ne ntema yonso ngamba-malu udi ne nsuki mitoke ne tshisasa tshia muedi ne muvuale tshizaku tshile tshifiike. Padi ngamba-malu wenda wenza muyuki, udi utua eku ne eku pa tshibumba tshia kuakuila wenza jeste  mudilekelele, umvuija bimpe mvese ku mvese ne ukangula lungenyi lua muntu au lua kujingulula bulelela bua mu Bible. Nansha mudiku kakuyi biamu bia mêyi, dîyi dia ngamba-malu didi dituangana mu nzubu au mujima, ne bantu badi bamuteja ne ntema munkatshi mua dîba dijima ne tshitupa. Pashishe mu tshitupa tshia nkonko ne mandamuna, O’Connor ne bena diende badi bamuelesha mpata, kadi yeye udi ubingisha mukenji wa mu Bible mudibi bikengela. Bateleji badi banyisha batuta bikashi. Padi ditalala dibuela, muntu au udi ulomba bana betu bua bamulongeshe malu a bungi. Bilondeshile bantu bavua badimuenene malu aa, bantu ba bungi bakalonga bulelela mu mushindu eu.

Mu ngondo 5/1909 pavua muanetu Russell ukeba kuenza luendu luende luinayi mu mazuwa a Mauretania umbuka mu New York, wakangata muanetu Huntsinger uvua mufundi (sténographe) bua pikalabu benda baya pa mâyi ikale umuambila malu a biena-bualu bia kufunda mu Tshibumba tshia Nsentedi. Bantu 450 bavua bateleje muyuki wa patoke uvua muanetu Russell muenze mu Belfast, bantu batue ku 100 ba kudibu bavua bimane kuulu bualu kakuvua miaba ya kusomba to.

Mu luendu luitanu, lutudi bakuile ku ntuadijilu, bualu bua muomumue buakenzeka. Russell mumane kuenza muyuki wa patoke mu Dublin, wakandamuna ne Bible nkonko ya muena teoloji kampanda muende lumu uvua O’Connor mulue nende, bantu bakasanka bikole. Dituku diakalonda, Russell ne bena diende bakabuela mu mazuwa a lubilu lua bungi avua ambula mikanda mifundila bantu, bakaya batangile ku Liverpool ne pashishe bobu kubuela mu mazuwa mamanyike a Lusitania bua kupingana mu New York. *

Mu luendu luisambombo ne lua muanda mutekete luvua Russell muenze mu 1911, wakenza kabidi miyuki ya patoke. Mu ngondo 4, balongi ba Bible 20 ba mu Belfast bakakidila bantu 2 000 bavua balue kuteleja muyuki wa ne: “Tshidi tshitufikila panyima pa lufu.” O’Connor wakalua kabidi mu Dublin ne muntu mukuabu bua ele Russell nkonko, kadi bateleji bakatuta bikashi bua mandamuna a mu Bible avuaye umupesha. Mu ngondo wa 10 ne wa 11 wa tshidimu tshimue tshimue atshi, Russell wakaya mu bimenga bikuabu muvua bantu ba bungi balue kumuteleja. O’Connor wakalua ne bena tshimvundu 100 bakeba bua kunyanga kabidi tshisangilu tshia mu Dublin, kadi bateleji bakatua ku tshia ngamba-malu ne tshisumi tshionso.

Nansha muvua muanetu Russell udienzela nkayende miyuki tshikondo atshi, uvua witaba ne: “Kakuena muntu udi ne mushinga kupita bakuabu to,” bualu “mudimu eu ki ngua muntu to, ngua Nzambi.” Miyuki ivuabu bamanyisha eyi, idi milue Tshisangilu tshia patoke, ivua mpunga mimpe ya kulongesha bantu malongesha malelela a mu Bible. Mbipeta kayi bivua bimueneke? Miyuki ya patoke ivua miambuluishe bua lumu luimpe kumuangalakalu, ne bisumbu biakavulangana ne lukasa mu bimenga bia bungi mu Irlande mujima.​—Mu bintu bietu bia kale bia mu Grande-Bretagne.