1, 2. a) Ntshinyi tshitu tshipesha bantu ba Nzambi disanka lelu? b) Mmunyi mudi baledi bena Kristo ne bakulu mua kuambuluisha bansonga bua kumvua tshidi kutambula kumvuija?

MUKULU kampanda wakambila Christopher uvua ne bidimu 12 ne: “Ndi mukumanye katshia bakulela, ndi ne disanka dia kumvua ne: udi usua kutambula. Ndi musue kukuebeja: ‘Bua tshinyi udi musue kutambula?’” Kuvua malu mimpe avua masake mukulu eu bua kuela lukonko elu. Bitu bitusankisha bikole patutu tumona bansonga ba bungi batambula tshidimu tshionso. (Muambi 12:1) Kadi, baledi bena Kristo ne bakulu mu tshisumbu mbasue kujadika ne: bansonga badi badiangatshila nkayabu dipangadika dia kutambula ne mbumvue tshidi kutambula kumvuija.

² Tudi balonge mu Bible ne: kudilambula ne kutambula  nntuadijilu wa nsombelu mupiamupia wa muena Kristo. Nsombelu mupiamupia eu udi upetesha muntu masanka a bungi a kudi Yehowa, ne buluishi bua kudi Satana kabidi. (Nsumuinu 10:22; 1 Petelo 5:8) Ke bualu kayi baledi bena Kristo badi ne bua kuangata dîba bua kulongesha bana babu bua bumvue tshidi kuikala muyidi wa Kristo kumvuija menemene. Padi bansonga kabayi ne baledi bena Kristo, bakulu mu tshisumbu nebabambuluishe ne dinanga dionso bua bumvue tshidi kudilambula ne kutambula biumvuija. (Bala Luka 14:27-30.) Anu mutubi bilomba kudilongolola bua kuibaka nzubu ne kumujikija, bansonga badi ne bua kudilongolola kumpala kua kutambulabu bua benzele Yehowa mudimu ne lulamatu “too ne ku nshikidilu.” (Matayi 24:13) Ntshinyi tshiambuluisha bansonga bua kuangata dipangadika dia kuenzela Yehowa mudimu bua kashidi? Tukonkononayi bualu ebu.

3. a) Mêyi a Yezu ne a Petelo adi atulongesha tshinyi bua mushinga udi nawu batismo? (Matayi 28:19, 20; 1 Petelo 3:21) b) Nnkonko kayi ituandamuna? Bua tshinyi?

³ Biwikala nsonga, udi ne dijinga dia kutambula anyi? Bikalabi nanku, udi ne tshipatshila tshimpe! Kutambula bua kulua Ntemu wa Yehowa ndiakalenga dinene. Mbualu budi kabidi muena Kristo ne bua kuenza, ne ntshidia tshinene bua bantu bapanduka ku dikenga dinene. (Matayi 28:19, 20; 1 Petelo 3:21) Paudi utambula, udi uleja ne: udi mulaye Yehowa bua kumuenzela mudimu bua kashidi. Udi bushuwa musue bua kukumbaja mulayi webe, nunku nkonko idi ilonda eyi neyikuambuluishe bua kumanya ni ukadi mukumbane bua kutambula: 1) Nkadiku mushindame bua kuangata dipangadika anyi? 2) Ndiku ne dijinga edi menemene anyi? 3) Ndiku mumvue bimpe tshidi kudilambula kudi Yehowa kumvuija anyi? Tuandamunayi nkonko eyi.

4, 5. a) Bua tshinyi ki nganu bantu bakulumpe nkayabu badi ne bua kutambula? b) Bidi bikengela tshinyi bua muntu kuluaye muena Kristo mushindame?

⁴ Bible kena wamba ne: anu aba bakadi bantu bakole anyi bakadi ne bidimu bungi kampanda ke badi ne bua kutambula to. Nsumuinu 20:11 udi utuambila ne: ‘Muana mene udi umuenesha tshikadilu tshiende ku bienzedi biende, ne bikala mianda idiye wenza milengele ne miakane.’ Nunku, nansha muana udi mua kumvua tshidi kuenza malu makane ne tshidi kudilambula kudi Mufuki kumvuija. Ke bualu kayi, batismo ntshidia tshia mushinga mukole tshidi tshikengedibua bua nsonga ukadi mushindame ne mudilambule kudi Yehowa.​—Nsumuinu 20:7.

⁵ Kuikala mushindame kudi kulomba tshinyi? Kuikala mushindame kakuena kulonda bidimu bia muntu anyi dikola dia mubidi to. Bible udi wamba ne: bantu bashindame  mbibidije “bukole buabu bua kujingulula nabu malu” bua kumanya dishilangana didi pankatshi pa tshidi tshimpe ne tshidi tshibi. (Ebelu 5:14) Muntu udi mushindame mmumanye tshidi tshimpe ne mmupangadije mu muoyo wende bua kutshienza. Nunku, kabena mua kumusaka bipepele bua kuenza tshidi tshibi to. Katu misangu yonso dijinga ne muntu mukuabu bua amuambile bua kuenza tshidi tshimpe to. Mbikumbane bua kutekemena ne: nsonga udi utambula neenze malu makane nansha padiye kayi ne baledi bende anyi bantu bakole bakuabu.​—Fuanyikija ne Filipoyi 2:12.

6, 7. a) Leja nsombelu mikole ivua Danyele mupete mu Babilona. b) Mmunyi muvua Danyele muleje ne: uvua mushindame?

⁶ Nsonga udiku bushuwa mua kuleja dishindama dia mushindu eu anyi? Tuangate tshilejilu tshia muprofete Danyele. Uvua mua kuikala ne bidimu dikumi ne pa mutu pavuabu bamumbushe kudi baledi bende baye nende mu Babilona. Diakamue, Danyele wakadipeta munkatshi mua bantu bavua kabayi batumikila mikenji ya Nzambi. Kadi tuakulayi kakese bua nsombelu wa Danyele. Bavua bamuangata bu muntu wa pa buende mu Babilona. Uvua umue wa ku bansonga bakese bavuabu basungule bua kuenzela mukalenge mudimu. (Danyele 1:3-5, 13) Bidi bimueneka ne: Danyele uvua ne muanzu munene mu Babilona mupite uvuaye mua kuikala mupete mu Isalele.

⁷ Kadi ntshinyi tshivua nsonga Danyele muenze? Uvuaku mulekele bena Babilona bamushintulula anyi batekesha ditabuja diende anyi? Tòo. Bible udi wamba ne: pavua Danyele mu Babilona, ‘wakapangadija bualu mu mutshima wende bua kadinyangi,’ bua kabuelakanyi ne bualu nansha bumue  bua mu ntendelelu wa dishima. (Danyele 1:8) Bualu ebu buvua bushuwa buleje muvuaye mushindame!

8. Tshilejilu tshia Danyele tshidi mua kukulongesha tshinyi?

⁸ Tshilejilu tshia Danyele tshidi mua kukulongesha tshinyi? Tshidi tshilongesha ne: nsonga ukadi mushindame nealamate malongesha a mu Bible nansha mu nsombelu mikole. Kakuikala bu lungonyonyi ludi lushintulula mekala bilondeshile muaba udilu to. Kena wenza malu bu mulunda wa Nzambi padiye ku Nzubu wa Bukalenge, kadi ulua mulunda wa malu a pa buloba padiye mu kalasa to. Udi ushala ne lulamatu nansha padiye mu diteta.​—Bala Efeso 4:14, 15.

9, 10. a) Nsonga yeye muele meji bua malu avuaye muenze pavua ditabuja diende ditetshibue matuku mashale aa, nebimuambuluishe mushindu kayi? b) Kutambula kudi kumvuija tshinyi?

⁹ Bushuwa, kakuena muntu nansha umue udi mupuangane to. Tuetu bonso, bansonga ne bakulumpe, tutu tuenza bilema imue misangu. (Muambi 7:20) Wewe musue kutambula, mbimpe wikale mudisuike bua kutumikila mikenji ya Yehowa. Diebeja ne: ‘Ndiku mutumikile Yehowa mu bule bua tshikondo kampanda anyi?’ Ela meji bua muuvua muenze malu musangu wa ndekelu uvua ditabuja diebe ditetshibue. Uvuaku mukumbane bua kuangata dipangadika dia kuenza tshidi tshimpe anyi? Anu bu Danyele, kudiku muntu udi ukusaka bua kuenza mudimu ne mamanya ebe mu bulongolodi bua Satana ebu anyi? Diteta dia nunku diodi dikufikile, udiku mua kujingulula tshidi disua dia Yehowa anyi?​—Efeso 5:17.

¹⁰ Bua tshinyi bidi ne mushinga bua kupeta mandamuna a nkonko eyi? Bualu adi akuambuluisha bua kumona mudi batismo ne mushinga. Paudi utambula udi uleja bantu bakuabu ne: udi mulaye Yehowa bualu bua mushinga. Udi umulaya bua kumunanga ne kumuenzela mudimu ne muoyo webe mujima bua kashidi. (Mâko 12:30) Muntu yonso udi utambula udi ne bua kuikala mudisuike bua kukumbaja mutshipu wende kudi Yehowa.​—Bala Muambi 5:4, 5.

11, 12. a) Ntshinyi tshidi muntu udi musue kutambula ne bua kuikala mujadike? b) Ntshinyi tshiakuambuluisha bua kumona batismo mudi Yehowa umumona?

¹¹ Bible udi wamba ne: batendeledi ba Yehowa bonso too ne bansonga, badi ne bua kumuenzela mudimu “ku budisuile.” (Musambu 110:3, NWT) Nunku, muntu udi musue kutambula udi ne bua kuikala mujadike ne: ndijinga diende menemene. Bidi mua kukulomba bua kukonkonona dijinga diebe bimpe menemene, nangananga biwikala mukolele mu bulelela.

¹² Paudi wenda ukola, udi mua kuikala mumone mudi bantu ba bungi batambule, pamuapa nansha bamue balunda bebe ne bana benu. Kadi ikala mudimuke bua kutuadiji kuela meji ne: udi ne bua kutambula anu bualu ukadi mukumbaje bidimu bungi kampanda anyi bualu muntu kampanda udi utambula. Mmunyi muudi mua kujadika ne:  udi umona batismo mudi Yehowa umumona? Keba dîba dia kuela meji bua kumanya bua tshinyi batismo udi ne mushinga wa bungi. Neupete malu a bungi mimpe mu tshiena-bualu etshi ne mu tshialonda.

13. Mmunyi muudi mua kumanya bikala dipangadika diebe dia kutambula difumina mu muoyo webe?

¹³ Umue mushindu uudi mua kumanya bikala dipangadika diebe dia kutambula difumina mu muoyo webe ngua kukonkonona masambila ebe. Mmisangu bungi kayi iutu usambila Yehowa? Mmalu kayi autu ulomba mu disambila? Mandamuna a nkonko eyi adi mua kukuleja bikala malanda ebe ne Yehowa makole. (Musambu 25:4) Yehowa utu misangu ya bungi wandamuna masambila etu ku diambuluisha dia Bible. Nunku, mushindu mukuabu uudi mua kumanya biwikala musue kuikala pabuipi ne Yehowa ne kumuenzela mudimu ne muoyo webe wonso nkukonkonona programe webe wa didilongela. (Yoshua 1:8) Diebeja ne: ‘Ntuku ndilongela Bible pa tshibidilu anyi? Ntuku musue kubuela mu ntendelelu wetu wa mu dîku anyi?’ Mandamuna a nkonko eyi neakuambuluishe bua kumanya bikala dipangadika diebe dia kutambula difumina mu muoyo webe.

14. Leja dishilangana didi pankatshi pa didilambula ne batismo.

¹⁴ Bamue bansonga kabena mua kuikala bamanye bimpe dishilangana didi pankatshi pa didilambula ne batismo to. Bamue badi mua kuamba ne: bakadi balambule muoyo wabu kudi Yehowa kadi ki mbakumbane bua kutambula to. Kadi bidi mua kuenzeka anyi? Didilambula ndisambila diudi wenza bua kulaya Yehowa ne: neumuenzele mudimu bua kashidi. Paudi utambula, udi uleja bantu bakuabu ne: ukadi mudilambule kudi Yehowa. Nunku kumpala kua wewe kutambula, udi ne bua kumanya tshidi didilambula kudi Nzambi diumvuija.

15. Kudilambula kudi kumvuija tshinyi?

¹⁵ Paudi ulambula Yehowa muoyo webe, udi umuambila ne: ukadi muntu wende. Udi umulaya ne: kumuenzela mudimu ke kuikala bualu bua mushinga mukole mu nsombelu webe. (Bala Matayi 16:24.) Kuditshipa kudi Nzambi mushindu eu ki mbualu bua bilele to! (Matayi 5:33) Mmunyi muudi uleja ne: udi mumanye ne: kuena kabidi mudikadile, kadi udi mpindieu muntu wa Yehowa?​—Lomo 14:8.

16, 17. a) Fila tshilejilu bua kumvuija tshidi kudipidia kumvuija. b) Padi muntu udilambula, udi mu bulelela wamba tshinyi?

¹⁶ Tuangatayi tshilejilu. Fuanyikija ne: mulunda webe udi ukupesha kado ka mashinyi. Udi ukupesha mikanda ya mashinyi ne ukuambila ne: “Mashinyi aa ngebe.” Kadi pashishe udi ukuambila ne: “Meme nendame nsapi. Meme ke wikala uendesha, ki nguewe to.” Mmunyi muudi mua kumona kado aka? Mmunyi muudi mua kumona mulunda webe udi mukupeshe mashinyi?

¹⁷ Padi muntu ulambula Yehowa Nzambi muoyo wende, udi umuambila ne: “Ndi nkupesha muoyo wanyi. Ndi muntu webe.” Yehowa udi ne bukenji bua kutekemena bua muntu eu akumbaje mutshipu wende. Ntshinyi tshienzeka bikala muntu eu mutuadije kubenga kutumikila Yehowa pa kutantshilangana mu musokoko ne muntu udi kayi mutendeledi wa Nzambi? Anyi ntshinyi tshienzeka bikala muntu eu witaba bua kuenza mudimu udi umupangisha dîba dia kuyisha  anyi dia kubuela mu bisangilu pa tshibidilu? Kakukumbaja mutshipu uvuaye muenze kudi Yehowa to. Nebikale anu bu kupesha muntu mashinyi kadi kushala mulame nsapi yawu. Padi yonso wa kutudi ulambula Yehowa muoyo wende, udi umuambila ne: “Ndi nkupesha muoyo wanyi, kawutshiena wanyi to.” Nunku, netuenze misangu yonso tshidi Yehowa musue nansha bikalabi kabiyi bitusankisha tuetu. Tuidikijayi Yezu wakamba ne: “Tshiena mufume mu diulu bua kuenza disua dianyi, kadi mbua kuenza disua dia udi muntume.”​—Yone 6:38.

18, 19. a) Mmunyi mudi mêyi a Rose ne a Christopher aleja ne: kutambula ndiakalenga didi dipetesha masanka? b) Mmunyi muudi udiumvua bua diakalenga dia kutambula?

¹⁸ Bushuwa, batismo ki ndipangadika dia bilele to. Kudilambula kudi Yehowa ne kutambula ndiakalenga dinene. Bansonga badi banange Yehowa ne bumvue tshidi kudilambula kumvuija kabena belakana bua kulambula mioyo yabu kudi Nzambi ne kutambula to. Kabena banyingalala bua dipangadika diabu to. Rose udi ne bidimu dikumi ne pa mutu ne ukadi mutambule udi wamba ne: “Ndi munange Yehowa, ne kakuena bualu bukuabu budi mua kumpetesha disanka pa kumbusha kumuenzela mudimu to. Mu nsombelu wanyi mujima, dipangadika dia kutambula ke dindi muangate ne muoyo mujima.”

¹⁹ Netuambe tshinyi bua Christopher utukadi bakuile ku ntuadijilu kua tshiena-bualu etshi? Mmunyi mudiye udiumvua bua dipangadika divuaye muangate bua kutambula pavuaye ne bidimu 12? Udi uleja ne: udi ne disanka dia bungi bua muvuaye muangate dipangadika edi. Wakalua mpanda-njila wa pa tshibidilu pakakumbajaye bidimu 17, kuluaye musadidi wa mudimu ne bidimu 18. Lelu udi wenza mudimu ku Betele. Udi wamba ne: “Ditambula dianyi divua dipangadika dimpe dimvua muangate. Nsombelu wanyi mmuwule tente ne disanka bua mudimu undi ngenzela Yehowa ne bulongolodi buende.” Wewe musue kutambula, mmunyi muudi mua kudilongolola? Tshiena-bualu tshidi tshilonda netshiandamune lukonko elu.