1. Baledi bena Kristo mbasue kujadika tshinyi kumpala kua muanabu kubatijibua?

MUANETU wa bakaji Blossom Brandt wakumvuija malu akenzeka dîba divuaye mupangadije bua kubatijibua, wamba ne: ‘Munkatshi mua ngondo mivule, tshivua ndekela kuambila tatu ne mamu ne: mvua musue kutambushibua, ne bavua bakula nanyi misangu mivule pa muanda eu. Bavua basue kupeta dishindika dia se: mvua mujingulule mushinga wonso wa dipangadika dianyi. Mu dia 31/12/1934, dituku dia muanda eu wa mushinga mukole mu matuku anyi a muoyo, ndekelu wa bionso diakafika.’ Lelu baledi bena Kristo badi ne dijinga dia muomumue edi padibu bambuluisha bana babu bua kuangata mapangadika a meji. Kuladikija malu bua muanabu kubatijibua kakuyi bualu kudi mua kunyanga malanda ende ne Nzambi. (Yakobo 4:17) Kadi baledi mbasue kujadika ne: kumpala kua muanabu kubatijibua, ikale mukumbane bua kuambula bujitu bua dikala muyidi wa Kristo.

2. a) Bamue batangidi ba bijengu badi badiabakena bua bualu kayi? b) Ntshinyi tshitualonga mu tshiena-bualu etshi?

² Bamue batangidi ba bijengu badi badiabakena bualu badi bapeta bansonga ba bidimu bitue ku 20 anyi kupita apu badi bakolele  mu mêku a bena Kristo kadi kabayi banji kubatijibua to. Ba bungi ba kudibu badi babuela mu bisangilu ne bayisha. Badi badimona bu Bantemu ba Yehowa. Kadi badi badikanda bua kudilambula kudi Yehowa ne kubatijibua bua malu kampanda. Mmalu kayi au? Mu imue nsombelu, baledi babu badi babalomba bua kuanji kuladikija dibatijibua. Mu tshiena-bualu etshi, netumone malu manene anayi adi mapangishe bamue baledi bena Kristo bua kuambuluisha bana babu bua baye kumpala too ne ku batismo.

3. Baledi ba Blossom bavua baditatshisha bua bualu kayi?

³ Baledi ba Blossom batudi batele mu tshikoso tshia kumpala bavua baditatshisha bua kumanya bikala muanabu wa bakaji ukavua mukumbane bua kujingulula diumvuija ne bujitu bua batismo. Mmunyi mudi baledi mua kumanya bikala muanabu ukadi mukumbane bua kudilambula mu mushindu udi Nzambi wanyisha?

4. Mmunyi mudi dîyi divua Yezu mutume didi mu Matayi 28:19, 20 mua kuambuluisha baledi padibu balongesha bana babu?

⁴ Bala Matayi 28:19, 20. Mu tshiena-bualu tshishale tuvua bamone ne: Bible ki mmukose bungi bua bidimu bidi muntu ne bua kubatijibua to. Kadi mbimpe baledi belangane meji bikole bua tshidi kuvuija muntu muyidi kumvuija. Muaku wa mu tshiena Greke udi mukudimuna ne: “kuvuija bayidi” udi mu Matayi 28:19 udi umvuija kulongesha muntu ne meji a kumuvuija muyidi. Muyidi mmuntu udi ulonga ne umvua malongesha a Yezu, ne mmudisuike bua kuatumikila. Nunku tshipatshila tshia baledi bena Kristo bonso tshidi ne bua kuikala tshia kulongesha bana babu katshia ku buana ne meji a kubambuluisha bua balue bayidi ba Kristo babatijibue. Tshidibi, muana wa mu maboko ki mmukumbane bua kubatijibua to. Kadi Bible udi uleja ne: nansha bana batekete menemene badi mua kujingulula malongesha a mu Bible ne kuanyisha.

5, 6. a) Tshidi Bible wamba bua Timote tshidi tshitufikisha ku diamba tshinyi bua batismo wende? b) Baledi badi ne busunguluji badi mua kuambuluisha bana babu bimpe mushindu kayi?

⁵ Timote uvua muyidi uvua munange bulelela bikole katshia ku buana buende. Mupostolo Paulo wakamba ne: Timote uvua mulonge malongesha a mu Mifundu katshia ku buana. Nansha muvua tatuende kayi muena Kristo, mamuende uvua muena Yuda ne kakuende muntu mukaji bakamuambuluisha bua anange Mifundu, anu bu bena Yuda. Ke bualu kayi, ditabuja diende kadivua ditenkakana to. (2 Tim. 1:5; 3:14, 15) Pavua Timote ne bidimu bitue ku 20 anyi kupita apu, ukavua muyidi wa Kristo mukumbane bua bamuelele meji a kuambula majitu a pa buawu mu tshisumbu.​—Bien. 16:1-3.

⁶ Muana yonso mmushilangane ne bakuabu; bana bonso kabatu bakola mu nyuma mu mushindu wa muomumue to. Bamue batu bajingulula bulelela, bangata mapangadika mimpe, ne baleja dijinga dia kubatijibua patshidibu bana. Bakuabu badi bakumbana bua kubatijibua padibu bakola ndambu. Nunku, baledi badi ne busunguluji kabatu benzeja bana babu ku bukole bua babatijibue to. Kadi badi bambuluisha muana yonso bua kukola mu nyuma bilondeshile lubilu ludiye uya nalu kumpala. Baledi badi mua kusanka padi muanabu uvuluka lungenyi ludi mu Nsumuinu 27:11. (Bala.) Tshidibi, kabena ne bua kujimija tshipatshila tshiabu tshia kuvuija bana babu bayidi ba Kristo to. Baledi bobu ne bualu ebu mu mutu, nebajinge kuandamuna lukonko elu: ‘Muananyi udi ne dimanya dikumbane bua kudilambula kudi Nzambi ne kubatijibua anyi?’

7. Muntu udi ne bua kumanya malu onso a mu Bible bua yeye kubatijibua anyi? Umvuija.

⁷ Bu mudi baledi bikale balongeshi ba  bana babu, mbasue bua bikale ne dimanya dishindame diabambuluisha bua bobu kudilambula. Nansha nanku, ki mbambe ne: muntu amanye malu onso adi Bible ulongesha kumpala kua yeye kudilambula kudi Nzambi ne kubatijibua to. Bayidi ba Yezu bonso badi ne bua kutungunuka ne kuvudija dimanya diabu dijalame panyima pa batismo wabu. (Bala Kolosayi 1:9, 10.) Nunku, bidi bikengela muntu ikale ne dimanya bungi kayi bua yeye kubatijibua?

8, 9. Mmalongesha kayi atudi tupetela ku bualu bua Paulo ne mulami wa buloko?

⁸ Bualu buvua bufikile dîku kampanda mu bidimu lukama bia kumpala budi mua kuambuluisha baledi. (Bien. 16:25-33) Pavua mupostolo Paulo mu luendu luende luibidi lua bumisionere bu mu 50 panyima pa Yezu, wakaya mu Filipoyi. Pavuabu ne muena diende Sila muntu amu, bakabashiminyina malu, kubakuatabu, kubelabu mu buloko. Munkatshi mua butuku, buloba buakakanka, kunyukulabu bishimikidi bia buloko, ne biibi bionso kukangukabi. Bu muvua mulami wa buloko mumvue buôwa, wela meji ne: bena buloko mbanyeme, ukavua usua kudishipa. Ke Paulo kumuelaye dîyi. Paulo ne Sila bakapeta mushindu wa kuyisha mulami wa buloko au ne dîku diende. Dianyisha diabu bua malongesha a Yezu avuabu balonga diakabasaka bua kuenza bualu kayi? Bakabatijibua diakamue. Bualu ebu budi butulongesha tshinyi?

⁹ Bilondeshile bilele bia kale, mulami wa buloko au uvua mua kuikala musalayi wa kale ukavua muangate pasio. Kavua muibidilangane ne Mifundu to. Nunku, bua kupeta dimanya dishindame dia Mifundu, uvua ne bua kulonga malongesha a nshindamenu a mu Bible, kumanya tshidi kuikala muena mudimu wa Nzambi kumvuija, ne kudisuika bua kutumikila malongesha a Yezu. Mu matuku makese, dimanya dia malongesha a nshindamenu a mu Mifundu ne dianyisha divuaye nadi bua malongesha au biakamusaka bua kubatijibua. Kakuyi mpata, wakatungunuka ne kuvudija dimanya diende panyima pa batismo wende. Bu muudi mumanye bualu ebu, ntshinyi tshiudi mua kuenza padi muanebe uleja dianyisha dilelela bua malongesha a nshindamenu a mu Mifundu adi akongoloja diumvuija ne mushinga wa didilambula ne batismo? Udi mua kuitaba bua aye kuyukila ne bakulu bua bamone ni udi ukumbaja malu malomba bua kubatijibua. * Anu bu bayidi bakuabu bakadi babatijibue, neatungunuke ne kuvudija dimanya dia malu a Yehowa matuku ende onso a muoyo, anyi mene bua kashidi.​—Lomo 11:33, 34.

10, 11. a) Bamue baledi mbafike ku diela meji kayi? b) Ntshinyi tshiakuba muana bimpe menemene?

¹⁰ Bamue baledi mbafike ku diela meji ne: mbimpe kuladikija batismo wa muanabu bua anji alonge tulasa tutumbuke ne apete mudimu muimpe. Badi mua kuikala ne meji mimpe, kadi ngelelu wa meji eu neambuluishe muana bua kupeta disanka dilelela anyi? Lukonko lua mushinga ludi ne: ngelelu wa meji eu udiku upetangana ne tshidi Mifundu yamba anyi? Dîyi dia Yehowa didi diodi ditulomba tshinyi?​—Bala Muambi 12:1.

¹¹ Mbia mushinga bua kuvuluka ne: bulongolodi ebu ne bionso bidimu bidi bibengangana ne malu adi Yehowa musue ne mushindu udiye wela meji. (Yak. 4:7, 8; 1 Yone 2:15-17; 5:19) Malanda makole ne Yehowa neakube muana bimpe menemene kudi Satana, kudi bulongolodi buende, ne ku ngelelu wa meji wa bena panu. Muledi udi usaka  muana bua kuteka malu a tshianana pa muaba wa kumpala mu nsombelu udi mua kubueja muanende mu tshibuejakaji ne kuteka bipatshila biende bimpe mu njiwu. Baledi bena Kristo badi bushuwa banange muanabu, badiku mua kuanyisha bua bulongolodi ebu bumulongeshe mushindu wa kupeta disanka anyi? Mu bulelela, tudi tupeta disanka ne diakalengele anu patudi tuteka Yehowa pa muaba wa kumpala mu nsombelu wetu.​—Bala Misambu 1:2, 3.

12. Bua tshinyi bamue baledi mbasue bana babu baladikije batismo?

¹² Mamu mukuabu muena Kristo wakumvuija tshivuaye ubengela muanende bua kubatijibua, wamba ne: “Bidi bingenza bundu bua kuamba ne: dipatangana mu tshisumbu ke bualu bunene bumvua mbengela.” Anu bu mamu eu, bamue baledi badi bela meji ne: mbimpe muanabu anji aladikije batismo too ne padi buana bumujika. (Gen. 8:21; Nsu. 22:15) Badi mua kuela meji ne: ‘Bu mudi muananyi kayi muanji kubatijibua, kabena mua kumuipata mu tshisumbu to.’ Bua tshinyi ngelelu wa meji eu mmubi?​—Yak. 1:22.

13. Kuladikija batismo kudiku mua kuenza bua muana kikadi ne tshilumbu kumpala kua Yehowa anyi? Umvuija.

¹³ Baledi bena Kristo kabena mua kuanyisha bua muanabu abatijibue pende kayi muanji kukumbana bua kudilambula mu mushindu udi Nzambi wanyisha to. Kadi bobu bela meji ne: mudi muanabu kayi muanji kubatijibua kena ne tshilumbu kumpala kua Yehowa, badi badishima. Bua tshinyi? Ki nganu bantu badi babatijibue badi ne tshilumbu kumpala kua Yehowa to. Kadi padi anu muana umanya tshidi tshimpe ne tshidi tshibi ku mêsu kua Yehowa, udi ne tshilumbu kumpala kuende. (Bala Yakobo 4:17.) Nanku, pamutu pa baledi ba meji kutekesha muanabu mu mikolo bua kubatijibua, badi badienzeja bikole bua kuikala tshilejilu tshimpe kudiye. Mbasue kuambuluisha muanabu katshia ku buana bua anange mikenji mitumbuke ya bikadilu ya Yehowa ne muoyo mujima. (Luka 6:40) Dinanga edi mbukubi buimpe menemene, bualu nedisake muanebe bua kulamata njila muakane wa Yehowa.​—Yesh. 35:8.

14. Padi baledi bambuluisha bana babu bua kuya kumpala too ne ku batismo, mmunyi mudi bakulu mua kubelesha diboko?

¹⁴ Bu mudi bakulu bikale balami ba mu nyuma, badi mua kuelesha baledi diboko padibu bakula bimpe bua bipatshila bia mu nyuma. Muanetu wa bakaji mukuabu uvua muenze bumpanda-njila bidimu bipite pa 70 wakavuluka muvua muyuki wende ne muanetu Charles Russell mumukoleshe patshivuaye anu ne bidimu bisambombo. Wakamba ne: “Wakayukila nanyi mu minite 15 bua bipatshila bianyi bia mu nyuma.” Eyowa, mêyi mimpe adi akankamija adi mua kuambuluisha muntu bidimu bia bungi. (Nsu. 25:11) Bakulu badi mua kuenza bua baledi ne bana babu benze midimu ya ku Nzubu wa Bukalenge pamue, bapesha bana midimu idi ikumbanangana ne bidimu ne makanda abu.

15. Mmushindu kayi udi bena mu tshisumbu bakuabu mua kukankamija bana?

¹⁵ Bena mu tshisumbu bakuabu badi pabu mua kuambuluisha padibu batabalela bana mu mushindu muimpe. Bualu ebu budi bulomba kutabalela malu adibu benza adi aleja ne: badi baya kumpala mu nyuma. Tshilejilu, muana kampanda uvuaku mufile diandamuna dilongolola bimpe didi dilenga ku muoyo anyi muenze mudimu mu tshisangilu tshia munkatshi mua lumingu anyi? Uvuaku mutantamene diteta kampanda anyi mubabidile mpunga bua kuyisha mu kalasa anyi? Ikala ne lukasa bua kumuela kalumbandi ne muoyo mujima. Kuenaku mua  kudifundila tshipatshila tshia kuyukila ne muana kampanda kumpala kua bisangilu anyi padibi bijika bua kuleja muudi umutabalela anyi? Mu mishindu eyi ne mikuabu kabidi, bana nebadiumvue ne mushinga mu “tshisumbu tshinene tshia bantu.”​—Mis. 35:18.

16, 17. a) Mmushindu kayi udi batismo upetesha muntu ditekemena dia kupeta muoyo? b) Baledi bena Kristo bonso badi badienzeja bua kupeta disanka kayi? (Tangila tshimfuanyi tshia ntuadijilu tshia tshiena-bualu.)

¹⁶ Kukolesha muana ne “mibelu ne didimuija bia Yehowa” ndiakalenga dinene didi baledi bena Kristo mua kupeta. (Mis. 127:3; Ef. 6:4) Bana ba bena Kristo mbashilangane ne bana ba bena Isalele ba kale bualu bobu kabena baledibua bu bantu badilambule kudi Yehowa to. Bualu bukuabu, kabena baledibua bikale ne dinanga dia Nzambi ne bulelela mu mashi to. Katshia anu ku dituku didi muana uledibua, baledi badi ne bua kuikala ne meji a kumuvuija muyidi, bamuambuluisha bua alue muena mudimu wa Yehowa udi mudilambule ne mubatijibue. Bualu bua mushinga budi ne: didilambula dia muntu, batismo wende, ne mudimu udiye wenzela Nzambi ne lulamatu ke biamubueja mu mulongo wa bantu badi mua kutekemena bua kupanduka mu dikenga dinene dialua.​—Mat. 24:13.

¹⁷ Pavua Blossom Brandt mupangadije bua kubatijibua, baledi bende bavua batshina Nzambi bavua basue kujadika ne: uvua mukumbane bua kuenza bualu bua mushinga mukole mu nsombelu wende ebu. Diakamue pakatuishibuabu ne: uvua mukumbane, bakatua dipangadika diende adi nyama ku mikolo. Butuku bua muladilu wa batismo wende, tatuende wakenza bualu buimpe butambe. Blossom wakamba ne: “Wakatutuisha binu buonso buetu ne wakasambila. Wakambila Yehowa ne: uvua ne disanka bua mushindu uvua muan’ende wa bakaji mutekete muangate dipangadika dia kumulambula muoyo wende.” Bidimu bipite pa 60 bimane kupita, Blossom wakamba ne: “Nudi mua kushindika bua se: tshiakupua dilolo adi muoyo nansha kakese.” Baledi wetu, tudi basue bua nupete penu disanka didi difumina ku dimona bana benu balua bena mudimu ba Yehowa badi badilambule ne babatijibue.