1-2. (a) Mmushindu kayi utu Yehowa wakula ne bantu? (b) Ntshinyi tshituamona mu tshiena-bualu etshi?

YEHOWA utu musue kuakula netu. Ku kale, uvua umanyisha bantu malu ende ku diambuluisha dia baprofete, dia banjelu, ne dia Muanende Kristo Yezu. (Amo. 3:7; Gal. 3:19; Buak. 1:1) Lelu, udi wakula netu ku diambuluisha dia Bible, Dîyi diende. Mmutupeshaye bua tumanye meji ende ne tujingulule njila yende.

² Pavua Yezu pa buloba, Yehowa uvua muakuile mu diulu misangu isatu. Tumonayi tshivua Yehowa muambe, tshidi mêyi ende au mua kutulongesha, ne mudiwu mua kutuambuluisha.

3. Ntshinyi tshivua Yehowa muambe mu Mâko 1:9-11 pavua Yezu mubatijibue? Mêyi au akaleja malu kayi manene asatu?

³ Mâko 1:9-11 udi wakula bua musangu wa kumpala uvua Yehowa muakule kumbukila mu diulu. (Bala.) Wakamba ne: ‘Wewe udi Muananyi munanga; ndi mukuanyishe.’ Bivua ne bua kuikala bilenge Yezu bikole pavuaye mumvue Tatuende wamba muvuaye mumunange ne umueyemena! Mêyi a Yehowa akaleja malu asatu manene bua Yezu. Bua kumpala, Yezu mMuanende. Buibidi, Yehowa mmunange Muanende. Buisatu, Yehowa mmuanyishe Muanende. Tukonkononayi malu aa bimpe bumue ku bumue.

4. Mmunyi muvua Yezu mulue Muana wa Nzambi mu mushindu mukuabu pakamubatizabu?

⁴ “Wewe udi Muananyi.” Yehowa uvua muambe mêyi aa bua kuleja muvua Yezu Muanende munanga mudie nende  malanda mapiamapia. Pavua Yezu mu diulu, uvua muana wa Nzambi, muikale ne mubidi wa nyuma. Kadi pakamubatizabu, wakedibua manyi a nyuma muimpe. Dîba adi, Nzambi wakaleja ne: Yezu uvua mulue muanende muela manyi, ne uvua mpindieu mupete ditekemena dia kupingana mu diulu bua kulua Mukalenge ne Muakuidi Munene muteka kudi Nzambi. (Luka 1:31-33; Eb. 1:8, 9; 2:17) Nunku tudi tumvua bua tshinyi pakabatizabu Yezu, Tatuende uvua mumuambile ne: “Wewe udi Muananyi.”​—Luka 3:22.

5. Mmunyi mutudi mua kulonda tshilejilu tshia Yehowa tshia kuleja bantu mutudi babanange ne tubanyisha?

⁵ ‘Wewe udi Muananyi munanga.’ Yehowa mmutushile tshilejilu tshimpe pavuaye muleje muvuaye munange Yezu ne mumuanyishe. Tuetu petu tukebe mpunga ya kukankamija bantu bakuabu. (Yone 5:20) Bitu bitukolesha padi muntu utudi tuangata ne mushinga uleja mudiye mutunange ne utuela kalumbandi bua malu mimpe atudi tuenza. Bia muomumue, bena Kristo netu ne bena mu dîku dietu badi dijinga ne dinanga ne dikankamija. Patudi tubela kalumbandi, tudi tukolesha ditabuja diabu ne tubambuluisha bua kuenzela Yehowa mudimu ne lulamatu. Mbimpe baledi bikale bakankamija bana babu bikole. Padibu babela kalumbandi ne muoyo mujima ne babaleja mudibu babanange, badi babambuluisha bua kuya kumpala.

6. Bua tshinyi tudi mua kueyemena Yezu Kristo?

⁶ “Ndi mukuanyishe.” Mêyi aa adi aleja muvua Yehowa mutuishibue ne: Yezu uvua ne bua kuenza disua dia Tatuende ne lulamatu luonso. Yehowa uvua mueyemene Muanende bikole; nunku mbimpe tuikale petu ne dishindika dikole dia ne: Yezu neakumbaje milayi yonso ya Yehowa. (2 Kol. 1:20) Patudi tukonkonona tshilejilu tshia Yezu, tudi  tudisuika bikole bua kulongela malu kudiye ne kulonda mu makasa ende. Yehowa mmutuishibue kabidi ne: batendeledi bende, mu tshibungi, nebatungunuke ne kulongela malu kudi Muanende.​—1 Pet. 2:21.

7. Bilondeshile Matayi 17:1-5, ndîba kayi divua Yehowa muakuile mu diulu? Wakamba tshinyi?

⁷ Bala Matayi 17:1-5. Musangu muibidi uvua Yehowa muakuile mu diulu ndîba divua Yezu ‘muandamuke.’ Yezu uvua mubikile Petelo, Yakobo, ne Yone bua baye kumufila ku mukuna mule. Pavuabu kuntu aku, bakamona tshikena kumona tshia dikema. Mpala wa Yezu wakatua nsese bu dîba ne bilamba biende biakabalakana. Bimfuanyi bibidi bivua bileja Mose ne Eliya biakatuadija kuyukila ne Yezu bua lufu luende ne dibishibua diende. Nansha muvua mêsu a bapostolo basatu abu “manême ne tulu,” bakamona tshikena kumona tshia dikema atshi pakatabulukabu. (Luka 9:29-32) Pashishe ditutu divua dikenka diakababuikila, kumvuabu dîyi dipatuka mu ditutu amu; divua dîyi dia Nzambi! Anu bu muvuabi dîba dia batismo wa Yezu, Yehowa wakaleja muvuaye muanyishe Muanende ne mumunange, kuambaye ne: ‘Eu udi Muananyi munanga, undi muanyishe.’ Kadi musangu eu Yehowa wakasakidila ne: “Mutelejayi.”

8. Mmunyi muvua tshikena kumona tshiambuluishe Yezu ne bayidi bende?

⁸ Tshikena kumona atshi tshivua tshileja butumbi ne bukole bivua Yezu ne bua kuikala nabi pavuaye ne bua kulua Mukalenge wa Bukalenge bua Nzambi. Bivua bushuwa bikankamije Kristo ne bimukoleshe bua kutantamena makenga ne lufu lubi bivua bimuindile. Tshikena kumona atshi tshivua kabidi tshikoleshe ditabuja dia bayidi ba Yezu ne tshibapeshe bukole bua kutantamena mateta avua mabindile ne kukumbaja mudimu mukole uvuabu ne bua kuenza munkatshi mua bidimu bia bungi. Bidimu bitue ku 30 pashishe, mupostolo Petelo wakakula bua tshikena kumona atshi, uleja muvuatshi katshiyi tshianji kumukupuka mu lungenyi.​—2 Pet. 1:16-18.

9. Mmibelu kayi mimpe ivua Yezu mupeshe bayidi bende?

⁹ “Mutelejayi.” Yehowa wakaleja patoke ne: mmusue bua tuteleje mêyi a Muanende ne tuatumikile. Ntshinyi tshivua Yezu muambe pavuaye pa buloba? Uvua muambe malu a mushinga mukole mapite bungi. Tshilejilu, wakalongesha bayidi bende ne dinanga dionso mua kuyisha lumu luimpe, kubavuluijaye misangu ne misangu bua kushala batabale. (Mat. 24:42; 28:19, 20) Wakabambila kabidi bua kudienzeja ne bukole buonso, kubakankamijaye bua kabatshioki to. (Luka 13:24) Yezu wakimanyina pa mushinga wa kuikala ne dinanga munkatshi muabu, wa kuikala mu buobumue, ne wa kutumikila mikenji yende. (Yone 15:10, 12, 13) Mibelu ivua Yezu mupeshe bayidi bende eyi, mmibelu mimpe ya dikema! Itshidi ne mushinga wa bungi lelu anu bu dîba divuaye muyifile adi.

10-11. Mmunyi mutudi mua kuleja ne: tudi tuteleja Yezu?

¹⁰ Yezu wakamba ne: “Muntu yonso udi ku luseke lua bulelela udi uteleja dîyi dianyi.” (Yone 18:37) Tudi tuleja mutudi tuteleja dîyi diende patudi ‘tutungunuka ne kulejangana lutulu ne kufuilangana luse ne muoyo mujima.’ (Kolos. 3:13; Luka 17:3, 4) Tudi tuleja kabidi mutudi tuteleja dîyi diende patudi tuyisha lumu luimpe ne tshisumi “mu bikondo bimpe ne mu bikondo bikole.”​—2 Tim. 4:2.

¹¹ Yezu wakamba ne: “Mikoko yanyi idi yumvua dîyi dianyi.” (Yone 10:27) Bayidi ba Kristo badi baleja mudibu bumvua dîyi diende padibu bateleja mêyi ende ne baateka  mu tshienzedi. “Tunyinganyinga tua mu nsombelu” katuena tubabueja mu ditanaji to. (Luka 21:34) Kadi badi bateka ditumikila mikenji ya Yezu kumpala kua malu onso, nansha padibi bikole menemene. Bana betu ba bungi badi batantamena ntatu mikole menemene bu mudi buluishi bukole, bupele bukole, ne bikumina. Kadi badi bashala anu ne lulamatu kudi Yehowa nansha bia kumona lufu. Yezu udi ubashindikila ne: “Muntu yonso udi ne mikenji yanyi, uyitumikila, yeye ke udi munnange. Kadi, muntu yonso udi munnange nebamunange kudi Tatu wanyi.”​—Yone 14:21.

12. Mmushindu kayi mukuabu utudi mua kuleja ne: tudi tuteleja Yezu?

¹² Mushindu mukuabu utudi mua kuleja ne: tudi tuteleja Yezu, nkueleshangana diboko ne bantu badiye muteke bua kutulombola. (Eb. 13:7, 17) Bulongolodi bua Yehowa mbuakajilule malu a bungi bidimu bishale ebi, bu mudi mishindu ya kuyisha, bintu bipiabipia bia kuyisha nabi, mushindu wa kuenza tshisangilu tshia munkatshi mua lumingu, ne mushindu wa kuibaka Nzubu ya Bukalenge, kuyilongolola, ne kuyilama. Tudi ne dianyisha dia bungi bua buludiki buelela meji bimpe budibu batupesha ne dinanga! Tudi batuishibue ne: Yehowa neabeneshe bionso bitudi tuenza bua kulonda buludiki budi bulongolodi buende butupesha mu tshikondo tshiakanyine.

13. Patudi tuteleja Yezu, bidi bituambuluisha ku tshinyi?

¹³ Patudi tuteleja malu onso adi Yezu utulongesha, bidi bituambuluisha. Yezu wakajadikila bayidi bende ne: malongesha ende avua ne bua kubapeshilula bukole. Wakamba ne: “Nenupetulule bukole. Bualu mutshi wanyi wa tshikokedi mmuimpe ne bujitu buanyi mbupepele.” (Mat. 11:28-30) Dîyi dia Nzambi (didi ne Evanjeliyo inayi idi yakula bua nsombelu wa Yezu ne mudimu wende) didi ditupeshilula bukole, dituvuija bena meji. (Mis. 19:7; 23:3) Yezu wakamba ne: ‘Bantu badi bateleja dîyi dia Nzambi ne badilama mba diakalenga!’​—Luka 11:28.

14-15. (a) Mmusangu kayi muisatu uvua Yehowa muakuile mu diulu udibu baleje mu Yone 12:27, 28? (b) Bua tshinyi mêyi a Yehowa avua ne bua kuikala masambe Yezu ne mamukoleshe?

¹⁴ Bala Yone 12:27, 28. Evanjeliyo wa Yone udi wakula bua musangu muisatu uvua Yehowa muakuile mu diulu. Yezu uvua mu  Yelushalema bua kusekelela Pasaka wende wa ndekelu matuku makese kumpala kua kufuaye. Wakamba ne: “Ndi ne dipampakana.” Pashishe kusambilaye ne: “Tatu, utumbishe dîna diebe.” Tatuende wakamuandamuna wakuila mu diulu wamba ne: “Ndi muditumbishe, nenditumbishe kabidi.”

¹⁵ Yezu uvua upampakana bualu uvua ne bujitu bunene bua kushala ne lulamatu kudi Yehowa. Uvua mumanye ne: bavua ne bua kumuela mfimbu mikole ne kumushipa mu mushindu mubi. (Mat. 26:38) Tshivua tshitambe kumutonda bikole ntshia ne: uvua musue kutumbisha dîna dia Tatuende. Bavua bamufunde ne: uvua mupende Nzambi, ne bivua bimutonda bua kumona ne: lufu luende luvua mua kupendeshisha dîna dia Nzambi. Mêyi a Yehowa au avua ne bua kuikala makankamije Yezu bikole be! Uvua mutuishibue ne: dîna dia Yehowa divua ne bua kutumbishibua. Mêyi a Tatuende avua ne bua kuikala mamusambe bikole ne mamukoleshe bua kutantamena ntatu ivua mimuindile. Pamuapa anu Yezu nkayende ke uvua mujingulule tshivua Tatuende muambe tshikondo atshi. Nansha nanku, Yehowa wakenza bua batufundile tuetu bonso mêyi avuaye muambile Yezu au.​—Yone 12:29, 30.

16. Bua tshinyi malu adi mua kupendeshisha dîna dia Yehowa adi mua mua kututonda imue misangu?

¹⁶ Anu bu Yezu, malu adi mua kupendeshisha dîna dia Yehowa adi mua kututonda  petu. Pamuapa anu bu Yezu, badi batukengesha bibi petu katuyi benze bualu. Anyi malu a dishima adi baluishi betu batumuangalajila adi mua kuikala atutonda. Tudi mua kuela meji bua mudi malu aa apendeshisha dîna dia Yehowa ne bulongolodi buende. Mu bikondo bia nunku, mêyi a Yehowa au adi atusamba bikole. Katuena ne bua kutamba kusamisha mutu to. Tuikale batuishibue ne: “Ditalala dia Nzambi didi dipite dijingulula dionso dia malu nedilame mioyo [yetu] ne bieledi [bietu] bia meji ku butuangaji bua Kristo Yezu.” (Filip. 4:6, 7) Yehowa kakupanga kutumbisha dîna diende nansha kakese. Ku diambuluisha dia Bukalenge buende, nealongolole malu mabi onso adi Satana ne ndongoluelu wende benzele batendeledi bende ba lulamatu.​—Mis. 94:22, 23; Yesh. 65:17.

17. Bilondeshile Yeshaya 30:21, mmunyi mudi Yehowa wakula netu lelu?

¹⁷ Nansha tuetu lelu, Yehowa udi wakula netu. (Bala Yeshaya 30:21.) Mu bulelela, katuena tumvua dîyi dia Nzambi difumina mu diulu to. Kadi mmutupeshe Bible, Dîyi diende difunda, mudiye utuambila tshia kuenza. Nyuma wa Yehowa udi kabidi usaka “mulami wa lulamatu” bua kutungunuka ne kupesha batendeledi bende biakudia. (Luka 12:42) Tudi tupeta biakudia bipite bungi! Mu biakudia amu mudi mikanda yetu, biena bualu bidi mu jw.org, filme, ne bintu bia kuteleja.

18. Mmunyi mudi mêyi a Yehowa akolesha ditabuja diebe ne akupesha dikima?

¹⁸ Tushale balame mêyi avua Yehowa muakule pavua Muanende pa buloba mu lungenyi. Mêyi a Nzambi adibu bafunde mu Bible atupeshe dishindika dia ne: Yehowa udi ne malu onso mu bianza ne nealongolole malu mabi onso adi Satana ne ndongoluelu wende mubi batuenzele. Tudisuikayi kabidi bua kuteleja dîyi dia Yehowa ne ntema yonso. Tuetu tuenza nanku, netutantamene malu onso atudi tutuilangana nawu lelu, nansha atuatuilangana nawu kumpala eku. Bible udi utuvuluija ne: “Nudi dijinga ne dinanukila, bua ne: nuenu bamane kuenza disua dia Nzambi, nuangate dikumbana dia mulayi.”​—Eb. 10:36.