1. Ntshinyi tshidi muntu ne bua kuenza kumpala kua kutuadijaye kuasa nzubu?

FUANYIKIJABI ne: muntu udi ujinga kuasa nzubu. Mmumanye ne: nzubu udiye usua kuasa ngua mushindu kampanda. Udi mua kuya mu tshisalu musangu umue bua kusumba bia kuibaka nabi nzubu au bua kubanga kumuibaka anyi? Tòo. Kumpala kua kumuibaka, kudi bualu kampanda bua mushinga budiye ne bua kuenza, mmumue ne: kuenza makumi a bungi bua makuta atulaye. Bua tshinyi? Bualu bidi bikengela amanye ni udi ne makuta makumbane a kujikijaye nawu nzubu au. Yeye mudianjile kuenza makumi bimpe bimpe, nebikale bipepele bua kumujikija bimpe.

2. Bilondeshile Luka 14:27-30, mbualu kayi buudi ne bua kuelela meji bimpe bimpe kumpala kua kubatijibua?

² Dinanga diudi munange nadi Yehowa ne dianyisha diebe kudiye mbikusake bua kuela meji a kubatijibua anyi? Biobi nanku, umanye ne: udi kumpala kua dipangadika dia buena dia muntu udi musue kuasa nzubu. Bua tshinyi tudi tuamba nanku? Tuangate mêyi a Yezu adi mu Luka 14:27-30. (Bala.) Yezu uvua umvuija tshidi kuikala muyidi wende kulomba. Bua tuetu kulua bayidi ba Yezu, tudi ne bua kuitaba ne: ‘netutule makuta,’ mmumue ne: kuitaba ntatu ne kudipangisha amue malu. (Luka 9:23-26; 12:51-53) Nanku kumpala kua wewe kubatijibua, bidi bikengela wele meji bimpe menemene bua malu onso awatuilangana nawu pawabatijibua. Dîba adi newikale mudilongolole bimpe menemene bua kutungunuka ne kuenzela Nzambi mudimu.

3. Ntshinyi tshituakonkonona mu tshiena-bualu etshi?

³ Mbimpe kuitaba ntatu bienze bu udi utula makuta bua kulua muyidi wa Kristo anyi? Eyowa! Batismo udi ukunzuluila tshiibi  bua kupeta masanka bungi kabuyi kuamba, mpindieu ne mu matuku atshilualua. Tuanji tukonkononayi imue nkonko ya mushinga idi itangila batismo. Diyikonkonona nedikuambuluishe bua kuandamuna lukonko lua ne: “Nkadi mukumbane bua kubatijibua anyi?”

4. a) Didilambula ntshinyi? b) ‘Kudibenga’ kudibu bakuile mu Matayi 16:24 kudi kumvuija tshinyi?

⁴ Kudilambula ntshinyi? Kumpala kua wewe kubatijibua, udi ne bua kudilambula. Paudi udilambula, udi wenza disambila ne muoyo mujima wambila Yehowa ne: neumuenzele mudimu bua kashidi. Paudi udilambula kudi Nzambi, udi ‘udibenga.’ (Bala Matayi 16:24.) Udi ulua mpindieu wa Yehowa. Ndiakalenga dia dikema! (Lomo 14:8) Udi umuambila ne: kutuadijila ku lelu, neudifile mu mudimu wende, kuyi udifila ku didisankisha anu wewe to. Paudi udilambula, udi uditshipa; tuambe ne: udi ulaya Nzambi bualu bua pa buabu. Yehowa katu utuenzeja bua kuenza mutshipu wa nunku to. Kadi patudi tuwenza, mmuindile bua tuwukumbaje.​—Mis. 116:12, 14.

5. Leja mudi didilambula dipetangana ne batismo.

⁵ Mmunyi mudi didilambula dipetangana ne batismo? Didilambula mbualu buudi wewe nkayebe wenza pa nkayebe, budi pankatshi penu babidi ne Yehowa. Batismo mbualu buudi wenza patoke bantu batangile, nangananga mu mpuilu anyi mu mpungilu. Paudi ubatijibua, udi uleja bantu bakuabu ne: ukavua mumane kudilambula kudi Yehowa. * Nunku batismo webe udi uleja bakuabu ne: udi munange Yehowa Nzambi webe ne muoyo webe wonso, ne anyima webe yonso, ne lungenyi luebe luonso, ne bukole buebe buonso; udi ubaleja kabidi ne: udi mudisuike bua kumuenzela mudimu bua kashidi.​—Mâko 12:30.

6-7. Bilondeshile 1 Petelo 3:18-22, bidi bikengela kubatijibua bua malu kayi abidi?

⁶ Bidi anu bikengela menemene bua kubatijibua anyi? Tuangatabi mêyi adi mu 1 Petelo 3:18-22. (Bala.) Pavua bantu bamona buatu bua Noa, bavua bamona ne: uvua ne ditabuja; batismo webe pende udi uleja bantu bimpe ne: udi mudilambule kudi Yehowa. Kadi bidi bikengela anu kubatijibua anyi? Eyowa. Petelo udi umvuija bua tshinyi bidi nanku. Tshia kumpala, batismo udi ‘ukupandisha.’ Batismo udi mua kutupandisha tuetu benze malu adi akengedibua bua kuleja ne: tudi bitabuje Yezu, ne bitabuje ne: uvua mutufuile, kumubishabu ku lufu kuyaye mu diulu, ne udi mpindieu “ku tshianza tshia balume tshia Nzambi.”

⁷ Tshibidi, batismo udi utupetesha “kondo ka muoyo kimpe.” Patudi tudilambula kudi Nzambi ne tubatijibua, tudi tudia nende malanda a pa buawu. Bu mutudi tunyingalala ne muoyo umue ne tuitabuja tshia kupikulangana natshi, Nzambi udi utubuikidila mpekatu. Bua bualu ebu, tudi tupeta kondo ka muoyo kimpe ku mêsu kuende.

8. Ntshinyi tshidi ne bua kukusaka bua kuangata dipangadika dia kubatijibua?

⁸ Ntshinyi tshidi ne bua kukusaka bua kuangata dipangadika dia kubatijibua? Bu muutu ubala Bible ne muoyo mujima, udi mulonge malu a bungi adi atangila Yehowa, tuambe ne: bumuntu buende ne mutuye wenza malu. Malu ende audi mulonge mmakusankishe ne mmakusake bua kumunanga bikole menemene. Dinanga diudi munange nadi Yehowa ke bualu bunene budi ne bua kukusaka bua kubatijibua.

9. Kubatijibua mu dîna dia Tatu, dia Muana, ne dia nyuma muimpe kudibu bambe mu Matayi 28:19, 20 kudi kumvuija tshinyi?

⁹ Bualu bukuabu budi bukusaka bua kubatijibua mmalu adi Bible ulongesha audi  muitabuje. Mona tshivua Yezu muambe pavuaye mutume dîyi dia kuvuija bantu bayidi. (Bala Matayi 28:19, 20.) Bilondeshile mêyi a Yezu, bantu badi babatijibua badi ne bua kuenza nunku “mu dîna dia Tatu, dia Muana, ne dia nyuma muimpe.” Bidi biumvuija tshinyi? Bidi biumvuija ne: udi ne bua kuitabuja malu adi Bible ulongesha bua Yehowa, bua Muanende Yezu, ne bua nyuma muimpe ne muoyo mujima. Malongesha aa adi ne bukole bua bungi ne adi mua kulenga muoyo webe bikole. (Eb. 4:12) Tuambululayibi amue a kudiwu.

10-11. Mmalongesha kayi a mu Bible adi atangila Tatu audi mulonge ne muitabe?

¹⁰ Vuluka dîba diuvua mulonge tshidi Bible ulongesha bua Tatu etshi: Udi ne “dîna dia Yehowa,” yeye ke “Mutambe Bunene pa mutu pa buloba bujima,” ne yeye nkayende ke “Nzambi mulelela.” (Mis. 83:18; Yesh. 37:16) Yeye ke Mufuki wetu, ne “lupandu ndua Yehowa.” (Mis. 3:8; 36:9) Ukadi mulongolole malu bua kutupikula ku mpekatu ne ku lufu ne mmutupeshe ditekemena dia muoyo wa kashidi. (Yone 17:3) Paudi udilambula ne ubatijibua, udi ulua Ntemu wa Yehowa. (Yesh. 43:10-12) Udi ubuela mu dîku dia batendeledi ba Nzambi ba pa buloba bujima badi badiumvua bua kubikidibua ku dîna diende ne kudimanyisha bakuabu.​—Mis. 86:12.

¹¹ Bushuwa, kumvua tshidi Bible ulongesha bua Tatu ndiakalenga dia katshia! Paudi witaba malongesha a mushinga aa, muoyo webe udi ukusaka bua kudilambula kudi Yehowa ne kubatijibua.

12-13. Mmalu kayi adi atangila Muana audi mulonge ne muitabe?

¹² Uvua mumvue bishi pauvua mulonge malu adi atangila Muana? Uvua mulonge ne: Yezu ke muntu muibidi bua mu diulu ne pa buloba. Yeye ke Mutupikudi. Wakitaba bua kufila muoyo wende bua bualu buetu. Patudi tuleja ku bienzedi bietu ne: tudi bitabuje tshia kupikulangana natshi, badi batubuikidila mpekatu yetu, tudi tudia bulunda ne Nzambi, ne tupeta muoyo wa tshiendelele. (Yone 3:16) Yezu mMuakuidi wetu munene. Mmusue kutuambuluisha bua tupete masanka adi afumina ku tshia kupikulangana natshi ne tuikale pabuipi ne Nzambi. (Eb. 4:15; 7:24, 25) Bu mudiye Mukalenge wa Bukalenge bua Nzambi, Yehowa neenze nende mudimu bua kujidila dîna diende, kumbusha malu mabi, ne kutuadila bantu masanka a kashidi mu Mparadizu. (Mat. 6:9, 10; Buak. 11:15) Yezu ke dikasa dia tuetu kulonda. (1 Pet. 2:21) Mmutushile tshilejilu pavuaye mudifile mu dienza disua dia Nzambi.​—Yone 4:34.

¹³ Paudi witaba tshidi Bible ulongesha bua Yezu, udi ufika ku dinanga Muana munanga wa Nzambi. Dinanga adi didi dikusaka bua kudifila mu dienza disua dia Nzambi anu bu Yezu. Bua bualu abu, udi umvua muoyo ukusaka bua kudilambula kudi Yehowa ne kubatijibua.

14-15. Mmalu kayi adi atangila nyuma muimpe audi mulonge ne muitabe?

¹⁴ Kadi uvua mumvue bishi pauvua mulonge malu adi atangila nyuma muimpe? Uvua mulonge ne: nyuma eu ki mmuntu to, mbukole buenzeji bua Nzambi. Yehowa wakafundisha Bible ku bukole bua nyuma muimpe; nyuma eu udi utuambuluisha bua kumvua malu atudi tubalamu ne kuatumikila. (Yone 14:26; 2 Pet. 1:21) Ku diambuluisha dia nyuma eu, Yehowa udi utupesha “bukole budi bupite bua pa tshibidilu.” (2 Kol. 4:7) Nyuma eu utu utupesha bukole bua kuyisha lumu luimpe, kutantamena mateta, ditekeshibua mu mikolo, ne kunanukila mu ntatu. Udi utuambuluisha bua kuikala ne ngikadilu mimpe idi yenza “dimuma dia nyuma.” (Gal. 5:22) Bantu batu beyemena Nzambi ne bamulomba nyuma wende ne muoyo mujima utu ubapeshaye tshianana.​—Luka 11:13.

¹⁵ Patudi tumanya ne: batendeledi ba Yehowa  badi mua kueyemena nyuma muimpe bua abambuluishe bua kuenzela Nzambi mudimu, bidi bitukankamija ne bitukolesha ku muoyo bikole! Paudi witaba malu audi mulonge bua nyuma muimpe, muoyo newukusake bua kudilambula kudi Yehowa ne kubatijibua.

16. Ntshinyi tshiudi mulonge too ne mpindieu?

¹⁶ Paudi wangata dipangadika dia kudilambula kudi Nzambi ne kubatijibua, udi wela tshidia tshinene. Anu mutukadi bamone, udi ne bua kuitaba ne: neutule makuta, mmumue ne: kuitaba ntatu ne kudipangisha amue malu. Kadi masanka awapeta mmabipite kule ne kule. Batismo udi mua kukusungila, ne udi ukupetesha kondo ka muoyo kimpe ku mêsu kua Nzambi. Dinanga diudi munange nadi Yehowa Nzambi webe ke bualu bunene budi ne bua kukusaka bua kubatijibua. Malu audi mulonge bua Tatu, bua Muana, ne bua nyuma muimpe, udi ne bua kuitabuja ne muoyo webe wonso. Paudi umona malu atudi bakonkonone too ne mpindieu, udi mua kuandamuna lukonko elu bishi: “Nkadi mukumbane bua kubatijibua anyi?”

17. Ngamue malu kayi adi afikisha ku batismo?

¹⁷ Wewe mumone ne: ukadi mukumbane bua kubatijibua, kakuyi mpata, ukadi muenze malu a bungi bua kudia bulunda ne Yehowa. * Bu muutu ne tshibidilu tshia kudibadila Bible, udi mufike ku dimanya malu a bungi adi atangila Yehowa ne Yezu. Ukadi ne ditabuja. (Eb. 11:6) Udi muitabe milayi yonso ya Yehowa idi mu Bible ne muoyo mujima, ne udi mutuishibue ne: ditabuja diebe dia mulambu wa Yezu didi mua kukusungila ku mpekatu ne ku lufu. Ukadi munyingalale ku mpekatu yebe; udi umvua bikutonda bikole bua malu mabi auvua muenze, ne udi mulombe Yehowa bua akubuikidile. Udi mushintulule nsombelu webe, mulekele malu mabi auvua wenza mualekeelamu ne mubange kuenza adi asankisha Nzambi. (Bien. 3:19) Muoyo udi ukuzuka bua kuambila bakuabu malu audi muitabuje. Wakakumbana bua kulua muambi wa lumu luimpe, wewe kutuadija kuyisha ne tshisumbu. (Mat. 24:14) Yehowa udi udisua nebe bua malu a mushinga audi muenze aa. Udi musankishe muoyo wende bibi be!​—Nsu. 27:11.

18. Mmalu kayi makuabu audi ne bua kuenza kumpala kua wewe kubatijibua?

¹⁸ Kumpala kua wewe kubatijibua, kudi malu makuabu makese audi ne bua kuenza. Anu mutukadi bamone, udi ne bua kudilambula kudi Nzambi. Musambila pa nkayebe ne muoyo mujima, umulaye ne: neudifile bua kuenza disua diende. (1 Pet. 4:2) Pashishe, wambile mutangidi wa malu a kasumbu ka bakulu ne: udi musue kubatijibua. Nealombe bamue bakulu bua bayukile nebe. Kabikutondi bua kuyukila nabu to. Vuluka ne: bana betu aba bakadi bakumanye ne bakunange. Nebakonkonone nebe malongesha  a mu Bible a nshindamenu aukadi mulonge. Mbasue kutuishibua ne: udi umvua malongesha au ne udi mumanye mushinga udi nawu didilambula ne batismo. Bobu bitabe bua wewe kubatijibua, nebakuambile ne: udi mua kubatijibua mu mpuilu anyi mpungilu udi ulua.

19-20. Mmalu kayi audi ne bua kuenza paukadi mubatijibue? Mmunyi muudi mua kuenza nanku?

¹⁹ Nebikengele bua wenze tshinyi paudi ubatijibua? * Vuluka ne: didilambula mmutshipu, ne Yehowa mmuindile bua uwukumbaje. Nunku paudi ubatijibua, udi ne dibanza dia kukumbaja malu auvua mulaye Nzambi. Udi mua kuenza nanku mushindu kayi?

²⁰ Shala pabuipi ne tshisumbu. Bu muukadi mubatijibue, ukadi pebe mu “tshisumbu tshijima tshia bana betu.” (1 Pet. 2:17) Bena Kristo nebe ba mu tshisumbu ke badi benza dîku dienu dia mu nyuma. Wewe ubuela mu bisangilu pa tshibidilu, neukoleshe nabu malanda. Ikala ubala Dîyi dia Nzambi dituku dionso ne welangana meji a biudi ubala. (Mis. 1:1, 2) Wewe mumane kubala mvese ya mu Bible bungi kampanda, angata dîba dia kuelangana meji bua mvese ayi. Dîba adi malu adimu nealenge muoyo webe. ‘Tungunuka ne kusambila.’ (Mat. 26:41) Masambila ebe menza ne muoyo wa munda neakusemeje pabuipi ne Yehowa. ‘Tungunuka ne kukeba tshia kumpala Bukalenge.’ (Mat. 6:33) Udi mua kuenza nanku wewe muteke mudimu wa buambi pa muaba wa kumpala mu nsombelu webe. Wewe uyisha pa tshibidilu, neukoleshe ditabuja diebe, ne newambuluishe bakuabu bua kumata mu njila udi ufikisha ku muoyo wa tshiendelele.​—1 Tim. 4:16.

21. Batismo neakunzuluile njila bua kupeta tshinyi?

²¹ Dipangadika dia kudilambula kudi Yehowa ne kubatijibua ndipangadika dinene diwikala kuyi mua kuangata kabidi. Bushuwa, neupete ntatu idi mienze bu kutula makuta. Ntatu ayi idi ne bualu buayi anyi? Eyowa! Ntatu yonso iudi ne bua kupeta pa buloba bukadi bunyanguke ebu nya ‘tshitupa tshîpi ne mmipepele.’ (2 Kol. 4:17) Kadi batismo neakunzuluile njila bua kupeta nsombelu wa disanka mpindieu ne “muoyo wa bushuwa” kumpala eku. (1 Tim. 6:19) Nunku tudi tukulomba bua wele meji bimpe bimpe ne usambile bua kuandamuna lukonko luetu lua ne: “Nkadi mukumbane bua kubatijibua anyi?”