1. Nntatu ya mushindu kayi idi bantu ba Yehowa mua kutuilangana nayi?

UDI mu lutatu kampanda lukole anyi? Pamuapa kudi muntu wa mu tshisumbu tshienu udi mukunyingalaje. (Yak. 3:2) Anyi bena mudimu nebe peshi balongi benu badi mua kuikala bakuseka bua muudi wenzela Yehowa mudimu. (1 Pet. 4:3, 4) Bena mu dîku dienu badi mua kuikala pabu bakupangisha mua kubuela mu bisangilu anyi bua kuambila bakuabu malu audi muitabuje. (Mat. 10:35, 36) Wewe ne lutatu lua lukusamisha mutu bikole udi mua kumvua nansha bua kubilekela. Kadi ikala mutuishibue ne: nansha wewe mupete lutatu lua mushindu kayi, Yehowa neakupeshe meji a mua kupita nalu ne bukole bua kunanukila.

2. Bilondeshile Lomo 15:4, dibala dia Dîyi dia Nzambi didi mua kutuenzela tshinyi?

² Mu Bible Yehowa mmufundishamu malu a muvua bantu bapange bupuangane bapite ne ntatu mikole. Bua tshinyi? Bua bitulongeshe. Ke tshivua Yehowa musake mupostolo Paulo bua afunde. (Bala Lomo 15:4.) Patudi tubala malu au bidi mua kutukolesha ku muoyo ne kutupesha ditekemena. Kadi bua malu au kutuambuluishawu, kabiena bikengela tuikale anu tubala Bible patupu to. Tudi ne bua kuenza bua malu atudi tubala mu Bible afumbe meji etu ne alenge muoyo wetu. Ntshinyi tshitudi mua kuenza tuetu tukeba mibelu idi mua kutuleja mua kupita ne lutatu kampanda? Tudi mua kuenza malu anayi aa mudiwu malondangane emu: 1) Kusambila, 2) Kudifuanyikijila malu mu lungenyi, 3) Kuelangana meji, ne 4) Kuteka malu mu tshienzedi. Tumonayi bualu buonso ku bumue ku bumue. * Pashishe netualonde bua kumona tshidi malu avua menzekele mukalenge Davidi ne mupostolo Paulo mua kutulongesha.

3. Ntshinyi tshiudi ne bua kuenza kumpala kua kubala Bible? Bua tshinyi?

 ³ 1) Kusambila. Kumpala kua kubala Bible, sambila bua Yehowa akuambuluishe bua umone mudi malu awabala au mua kukuambuluisha. Tshilejilu, wewe ukeba mibelu ya mua kupita ne lutatu kampanda, lomba Yehowa bua upete mêyi manene a mu Bible adi mua kukulombola bua umanye tshia kuenza.​—Filip. 4:6, 7; Yak. 1:5.

4. Ntshinyi tshiudi mua kuenza bua malu audi ubala mu Bible kumuenekawu ne: avua menzeke bushuwa?

⁴ 2) Kudifuanyikijila malu mu lungenyi. Yehowa mmutufuke ne tshipedi tshia dikema tshia kudifuanyikijila malu mu lungenyi. Bua malu audi ubala kumuenekawu ne: avua menzeke bushuwa, teta kudifuanyikijilawu mu lungenyi ne diteka pa muaba wa muntu udibu bakuila. Teta kumona malu avuaye umona ne teta kumvua muvuaye mua kuikala umvua.

5. Kuelangana meji ntshinyi? Leja muudi mua kuelangana meji.

⁵ 3) Kuelangana meji. Kuelangana meji kudi kumvuija kuela meji bikole bua malu audi ubala ne kukeba mua kumanya mudiwu akutangila wewe muine. Kudi kuambuluisha bua kutuangaja malu audi umona mu lungenyi ne kumvua bualu buudi ubala mu buondoke. Kubala Bible kakuyi dielangana meji nkuenze anu bu kushala mutangile bitupa bia dikalu ditulakaja diela mu karton. Kuelangana meji nkuenze bu kulamakaja bitupa bia dikalu adi. Bua wewe kuelangana meji bimpe, diele nkonko eyi ne uyandamune: ‘Ntshinyi tshivua muntu udibu bakuile mu bindi mbala ebi muenze bua kujikija lutatu luvuaye nalu? Mmunyi muvua Yehowa mumuambuluishe? Mmunyi mundi mua kutumikila malu andi mulonge muaba eu bua kunanukila mu ntatu indi nayi?’

6. Bua tshinyi tudi ne bua kuteka bitudi tulonga mu tshienzedi?

⁶ 4) Kuteka malu mu tshienzedi. Yezu wakamba ne: tuetu katuyi tuteka malu atudi tulonga mu tshienzedi, tudi benze anu bu muntu udi wibakila nzubu wende mu lusenga. Udi wenza mudimu mukole kadi unyanga makanda ende. Bua tshinyi tudi tuamba nanku? Bualu padi tshipepele tshikole ne mvula bidituta ku nzubu aku udi upuka. (Mat. 7:24-27) Bia muomumue, tuetu tusambila, tudifuanyikijila malu mu lungenyi, ne tuelangana meji kadi katuyi tuteka bitudi tulonga abi mu tshienzedi, netuikale banyange makanda etu. Dîba adi patuapeta ntatu anyi patukengeshabu, ditabuja dietu kadiakuikala dikole to. Kadi patudi tulonga ne tuteka bitudi tulonga abi mu tshienzedi, tudi tuangata mapangadika mimpe, tupeta ditalala dia bungi, ne tukolesha ditabuja dietu. (Yesh. 48:17, 18) Mpindieu tuangate malu anayi atudi bakuile aa bua tumone mudi dibala dia Bible mua kutuambuluisha mu bualu buvua buenzekele mukalenge Davidi.

7. Mbualu kayi bua mu Bible butuakonkonona mpindieu?

⁷ Mulunda webe anyi muena mu dîku mmukunyingalaje anyi? Biobi nanku, wewe mukonkonone bualu bua Abashaloma muana wa Davidi nebikuambuluishe. Uvua mutungile tatuende tshitungu ne mujinge kumunyenga bukalenge.​—2 Sam. 15:5-14, 31; 18:6-14.

8. Ntshinyi tshiudi mua kuenza bua Yehowa akuambuluishe?

⁸ 1) Sambila. Ambila Yehowa muudi umvua bua mushindu mubi udibu bakuenzele malu muikale ne bualu buudi usua kubala abu mu mutu. (Mis. 6:6-9) Kudianganyi mukana to, muambile malu masunguluke. Pashishe mulombe akuambuluishe bua upete mêyi manene adi mua kukuleja tshia kuenza bua unanukile mu lutatu lukole alu.

9. Mu mêyi makese, londa tshivua tshienzeke pankatshi pa Davidi ne Abashaloma.

⁹ 2) Difuanyikijila malu mu lungenyi. Ela meji a  malu avua menzeke, ne fuanyikija muvua mukalenge Davidi mua kuikala mumvue. Abashaloma muana wa Davidi mmuenze bidimu bia bungi usaka bantu bua bamunange. (2 Sam. 15:7) Padiye umona ne: tshikondo tshiakumbanyi, udi utuma batentekedi mu Isalele mujima bua kulongolola bantu bua bamuakidile yeye bu mukalenge. Udi ufikisha too ne umue wa ku balunda ba Davidi bavua bamupesha mibelu diende Ahitofele bua aditue nende mu buntomboji buende abu. Abashaloma udi udimanyisha mudiye mukalenge, pashishe ujinga kukuata Davidi bua kumushipa. Pende Davidi uvua mua kuikala usama bikole tshikondo atshi. (Mis. 41:1-9) Davidi udi umanya bualu bua tshifufu atshi ne unyema upatuka mu Yelushalema. Pashishe basalayi ba Abashaloma badi bakundangana ne basalayi ba Davidi. Badi batshimuna baluishi ba Davidi abu, ne bashipa Abashaloma muana wa Davidi.

10. Malu avua menzekele Davidi avua mua kumufikisha ku dienza tshinyi?

¹⁰ Pashishe, fuanyikija muvua Davidi ne bua kuikala mumvue pavua malu onso aa enda amuenzekela. Uvua munange Abashaloma ne weyemena Ahitofele. Nansha nanku, bonso babidi bakamuenza kantu. Bakamunyingalaja bibi menemene bajinga too ne bua kumushipa. Malu onso aa avua mua kufikisha Davidi ku dibenga kueyemena balunda bende bakuabu, umona bu ne: bobu bonso bakadi baditue ku tshia Abashaloma. Bivua mua kumufikisha ku diela meji anu buende yeye ne kunyema nkayende. Peshi uvua mua kumona ne: kuende nkujike. Kadi Davidi kakenza bionso abi to. Yeye wakatantamena lutatu lukole alu. Tshivua tshimuambuluishe ntshinyi?

11. Ntshinyi tshivua Davidi muenze mu lutatu lukole luvuaye nalu?

¹¹ 3) Elangana meji. Mmêyi manene kayi audi upeta mu muyuki eu? Andamuna lukonko elu: “Ntshinyi tshivua Davidi muenze bua kumanya tshia kuenza?” Davidi kavua mupampakane muangate mapangadika mabi lubilu lubilu to. Kavua nansha muladikije malu, umueneka mupange tshia kuenza bua bungi bua buôwa to. Kadi wakalomba Yehowa bua amuambuluishe. Wakalomba kabidi balunda bende bua bamuambuluishe. Pashishe wakenza malu ne lukasa bua kukumbaja mapangadika avuaye muangate. Nansha muvuabu banyingalaje Davidi bikole amu, kakabanga kumona bantu bakuabu bibi anyi kushala ubadiila dînu to. Wakashala weyemena Yehowa ne balunda bende.

12. Ntshinyi tshiakenza Yehowa bua kuambuluisha Davidi?

¹² Mmunyi muvua Yehowa muambuluishe Davidi? Wewe muenze makebulula neumone ne: Yehowa uvua mupeshe Davidi bukole buvuaye nabu dijinga bua kunanukila mu lutatu alu. (Mis. 3:1-8; mutu wa mukanda) Yehowa wakabenesha mapangadika avua Davidi muangate ne wakakuatshisha balunda bende bavua bashale bamulamate pavuabu baluangana bua kukuba mukalenge wabu.

13. Mmunyi muudi mua kuidikija Davidi muntu yeye mukuenzele bibi menemene? (Matayi 18:15-17)

¹³ 4) Teka malu mu tshienzedi. Diebeja ne: ‘Mmunyi mundi mua kuidikija Davidi?’ Bidi mua kukulomba bua wenze malu musangu umue bua kujikija lutatu kampanda. Bilondeshile lutatu luudi wewe nalu, udi mua kutumikila mubelu wa Yezu udi mu Matayi nshapita wa 18 anu mudiwu amu anyi kulonda lungenyi lunene ludi mu nshapita au bua kujikija lutatu luudi nalu. (Bala Matayi 18:15-17.) Kadi ki mbimpe kuangata mapangadika lukasa lukasa mu tshiji to. Anji sambila Yehowa bua utukije ne upete meji akuambuluisha bua kumanya mua kupita ne lutatu alu. Kulekedi dieyemena balunda bebe to. Itaba bakuambuluishe. (Nsu. 17:17) Bualu bua mushinga mbua ne: mbimpe kulonda mibelu idi Yehowa ukupesha mu Dîyi diende.​—Nsu. 3:5, 6.

14. Ndîba kayi didi 2 Timote 1:12-16; 4:6-11, 17-22 mua kukukankamija?

¹⁴ Bena mu dîku dienu badi bakuluisha anyi? Peshi udi mu ditunga mudibu belele mudimu wetu mikenji mipite bungi anyi mene bawukandike? Pikalabi nanku, mvese idi ilonda eyi idi mua kukukankamija wewe muyibale: 2 Timote 1:12-16 ne 4:6-11, 17-22. * Paulo uvua mufunde mvese eyi pavuaye mu buloko.

15. Ntshinyi tshiudi mua kulomba Yehowa?

¹⁵ 1) Sambila. Kumpala kua kubala mvese eyi, sambila uleje Yehowa lutatu luebe ne muudi udiumvua bua lutatu alu. Muambile malu masunguluke. Pashishe mulomba akuambuluishe bua upete mêyi manene adi mu malu a Paulo adibu balonde adi aleja ntatu ivuaye nayi. Mêyi au neakuambuluishe bua umanye tshia kuenza bua luebe lutatu.

16. Ntshinyi tshivua tshifikile Paulo?

¹⁶ 2) Difuanyikijila malu mu lungenyi. Fuanyikija ne: wewe ke Paulo. Mbamusuike shene mu buloko ku Lomo. Bakavua bamuele mu buloko musangu mukuabu, kadi bua musangu eu mmutuishibue ne: badi bamushipa. Bena diende bakuabu bakadi bamulekele, yeye muine mmuzengele.​—2 Tim. 1:15.

17. Mmeji kayi avua Paulo mua kuela?

¹⁷ Paulo uvua mua kushala wela meji ne: bu yeye nansha kayi mulue muena Kristo wa tshisumi kabavua mua kumuela mu buloko to. Uvua mua kuikala mufiikile bena mu Asia munda bualu bavua bamulekele, ne kubanga kumona balunda bende bakuabu mu mushindu mubi. Kadi kakenza nanku to. Ntshinyi tshivua tshienze bua kushalaye anu mubeyemene ne kutekemena ne: Yehowa neamufute?

18. Ntshinyi tshivua Paulo muenze mu lutatu luvuaye nalu?

¹⁸ 3) Elangana meji. Andamuna lukonko elu: “Ntshinyi tshivua Paulo muenze bua kumanya tshia kuenza mu lutatu luvuaye nalu?” Nansha mukavua lufu lumununkile, kuvua bualu bua mushinga wa bungi buvuaye kayi mupue muoyo to, bua kutumbisha Yehowa. Wakatungunuka ne kuela meji a muvuaye mua kukankamija bakuabu. Wakashala usambila bua kuleja muvuaye mueyemene Yehowa. (2 Tim. 1:3) Pamutu pa kushalaye unyingalala bua muvuabu bamulekele, yeye wakaleja muvuaye ne dianyisha dia bungi bua dikuatshisha dia kudi balunda bende bavua bashale bamuambuluisha. Wakashala kabidi ulonga Dîyi dia Nzambi. (2 Tim. 3:16, 17; 4:13) Bualu bua mushinga mbua ne: uvua ne dishindika dikole dia ne: Yehowa ne Yezu bavua bamunange. Bobu kabavua bamulekele to, bavua ne bua kumufuta bua mudimu uvuaye wenza ne lulamatu.

19. Mmunyi muvua Yehowa muambuluishe Paulo?

¹⁹ Yehowa ukavua mudimuije Paulo ne: bavua ne bua kumukengesha bua muvuaye muena Kristo. (Bien. 21:11-13) Mmunyi muakamuambuluishaye? Uvua wandamuna masambila ende, kumupeshaye ne bukole mu kupita kua matuku. (2 Tim. 4:17) Paulo uvua mutuishibue ne: uvua ne bua kupeta difutu divuaye mutatshile. Yehowa wakasaka kabidi balunda ba Paulo bavua bashale bamulamate bua kumuambuluishabu.

20. Bilondeshile Lomo 8:38, 39, mmunyi mutudi mua kuidikija Paulo?

²⁰ 4) Teka malu mu tshienzedi. Diebeja ne: ‘Mmunyi mundi mua kuidikija Paulo?’ Anu bu Paulo, tudi bamanye ne: nebatukengeshe petu bua ditabuja dietu. (Mâko 10:29, 30) Bua tuetu kushala ne lulamatu mu ntatu bidi bikengela tuikale tusambila Yehowa bua kuleja ne: tudi bamueyemene ne tuikale tulonga Dîyi diende pa tshibidilu. Tudi ne bua kuikala tuvuluka kabidi ne: bualu bunene butudi mua kuenza nkutumbisha  Yehowa. Tuikale batuishibue ne: Yehowa kakutulekela nansha kakese ne kakuena tshintu nansha tshimue tshidi muntu mua kuenza tshidi mua kumupangisha bua yeye kutunanga to.​—Bala Lomo 8:38, 39; Eb. 13:5, 6.

21. Ntshinyi tshivua tshiambuluishe Aya ne Hector bua kutantamena ntatu ivuabu nayi?

²¹ Nansha tuetu ne lutatu kayi, bilejilu bia bantu badibu bakuile mu Bible bidi mua kutupesha bukole. Tshilejilu, muanetu Aya udi mpanda-njila mu Japon udi wamba ne: muyuki wa bualu bua Yona uvua mumuambuluishe bua kujikija buôwa buvuaye nabu bua kuyisha muaba udi bantu ba bungi. Tshilejilu tshia Luta ntshiambuluishe muanetu Hector wa mu Indonésie bua kulonga malu a Yehowa ne kumutendelela. Baledi bende bobu kabena batendelela Yehowa to.

22. Ntshinyi tshiudi mua kuenza bua drama ya malu a mu Bible anyi biena-bualu bia “Nuidikije ditabuja diabu” bikuambuluishe bikole?

²² Mmuaba kayi uudi mua kupetela bilejilu bia mu Bible bidi mua kukukolesha? Mu filme yetu, mu drama ya diteleja patupu, ne biena-bualu bia “Nuidikije ditabuja diabu.” Bintu ebi bidi biambuluisha bua malu audi ubala mu Bible amueneke ne: avua menzeke bushuwa. * Mbenze makebulula bimpe menemene bua kupeta malu au; nanku kumpala kua wewe kumona filme, kuteleja drama, anyi kubala bualu bua muntu kampanda, lomba Yehowa akuambuluishe bua upete malongesha a mushinga audi mua kutumikila. Ikala udifuanyikija pa muaba wa muntu udibu bakuila. Elangana meji a tshivua batendeledi ba Yehowa ba lulamatu abu benze ne muvuaye mubambuluishe bua kutantamena ntatu. Pashishe wangate malongesha audi upeta adi akutangila uateke mu tshienzedi. Ela Yehowa tuasakidila bua diambuluisha dikadiye mubange kukupesha. Keba mishindu iudi mua kukankamija bakuabu ne kubakuatshisha bua uleje muudi ne dianyisha bua diambuluisha adi.

23. Bilondeshile Yeshaya 41:10, 13, Yehowa mmutulaye bua kutuenzela tshinyi?

²³ Nsombelu udiku pa buloba budibu bakokesha kudi Satana ebu udi mua kukola mua kupita nende, imue misangu tupanga tshia kuenza. (2 Tim. 3:1) Yehowa mmumanye ntatu idi itufikila, nunku katuena ne bua kusamisha mutu peshi kumvua buôwa to. Patudi dijinga ne diambuluisha, udi utulaya bua kutukuata ne tshianza tshiende tshia balume tshia bukole. (Bala Yeshaya 41:10, 13.) Tudi batuishibue ne: Yehowa neatuambuluishe, ne Bible udi utupesha bukole butudi nabu dijinga bua kutantamena lutatu kayi luonso.