Kudi bena Kristo batu bayikila ne ba mu mêku abu anyi Bantemu nabu ku diambuluisha dia biamu bia buena lelu. Nansha nanku, muena Kristo udi mukole mu nyuma mmumanye mubelu eu bimpe: “Muntu mudimuke udi umona njiwu, udi usokoma, kadi badi kabayi ne dimanya badi batungunuka ne kuyaku ne badi bakenga bua malu abakuata.”​—Nsu. 27:12.

Tudi bamone ne: Yehowa mmusue kutukuba. Nanku katuena basue kubuelakana ne bantu badi bakebesha matapuluka, badi bipatshibue mu tshisumbu, anyi badi bakonyangaja malongesha a mu Bible to. (Lomo 16:17; 1 Kol. 5:11; 2 Yone 10, 11) Bantu bakuabu badi badisangisha netu kabatu anu batumikila mikenji ya mu Bible to. (2 Tim. 2:20, 21) Mbimpe tuvuluke bualu ebu patudi tudia bulunda ne bantu. Kadi bidi mua kutukolela bua kumanya bantu ba nunku patudi tukeba bua kubuela mu tusumbu tua ba kufundilangana nabu mesaje mu biamu.

Kumanya mua kusungula balunda bimpe kudi nangananga ne mushinga dîba ditudi tujinga kufundilangana mesaje mu tusumbu tua bantu ba bungi. Kudi Bantemu badi babuele mu tusumbu tua buena etu ne mbibafikishe kubi. Kadi ntshinyi tshidi muena Kristo mua kuenza bua kuleja ne: udi ne budimu padiye ujinga kubuela mu kasumbu ka bantu ba bungi menemene bua kufundilangana nabu mesaje? Kakuikala ne mushindu wa kumanya tshidi muntu yonso wa mu kasumbu aku, ni nkumanya mudi buena Kristo buende to. Badi bamba mu Misambu 26:4 ne: “Tshiena ndamatangana ne bena mashimi, ndi ngepuka badi basokoka tshidibu.” Mêyi aa kaenaku aleja ne: mbimpe kufundilangana anu ne bantu baudi mumanye bimpe anyi?

Nansha kasumbu koku ka bantu bakese, mbimpe muena Kristo amanye dîba didiye upitshisha nabu ne malu adibu bakuila. Kabiena bisua kumvuija ne: tudi ne bua kuela nseka ku malu onso adibu bafunda ne katuyi tutshintshikila dîba ditudi tupitshisha nabu to. Paulo wakadimuija Timote bua epuke “bena bijanu ne badi babuelakana mu malu a bakuabu.” (1 Tim. 5:13) Lelu muntu udi mua kubuelakana mu malu a bende mu difundilangana mu biamu.

Ntemu udi mushindame mu nyuma kakuditua mu dijana bena Kristo nende anyi kuteleja badi benza nanku, peshi mene kudibueja mu malu a bakuabu adi kaayi mamutangile to. (Mis. 15:3; Nsu. 20:19) Neepuke kabidi malu adi anyingalaja bakuabu padibu baalonda banekesha peshi malu adi kaayi ne bijadiki. (Ef. 4:25) Tuetu tutu tupetela biakudia bia mu nyuma bivule ne mamanyisha mimpe a kueyemena mu site wetu wa jw.org ne mu ndongamu ya ku ngondo ya ku TV wa jw.org.

Kudi Bantemu batu bafundilangana mesaje a mu biamu aa bua kupana bintu anyi kubisumba, kuenza madisuisha a bintu kampanda, peshi bua kukeba bantu ba kuangata ku mudimu. Au mmalu a mishinga, ki mmatangile ntendelelu wetu to. Muena Kristo udi musue bua nsombelu wende “kikadi wa dinanga dia makuta” neakandamene lungenyi lua kuendela bana betu mushinga pambidi.​—Eb. 13:5.

Kadi bua difundilangana mesaje mu biamu bua kulombangana makuta a kuambuluisha nawu bena Kristo netu badi mu lutatu anyi badi bipupu bikuate? Misangu ya bungi dinanga ditu ditusaka bua kuambuluishangana ne kukankamijangana. (Yak. 2:15, 16) Kadi kufundila bantu ba bungi mesaje mu biamu bua kuenza nunku kudi mua kunyanga malu adibu balongolole kudi Betele anyi kudi tshisumbu bua kuambuluisha bana betu abu. (1 Tim. 5:3, 4, 9, 10, 16) Tudi bamanye ne: kakuena muntu nansha umue wa kutudi udi musue kuleja bakuabu ne: yeye ke udibu bapeshe mudimu wa kulama mikoko ya Nzambi to.

Tudi basue kuenza malu adi atumbishisha Nzambi. (1 Kol. 10:31) Nanku paudi ujinga kufunda malu mu programe kampanda wa kufundilangana mesaje, ela meji a njiwu iudi mua kulua kupeta ne wikale ne budimu.