1. Bua tshinyi mupostolo Paulo wakasengelela bena Kristo bena Ebelu bua batambe kukankamijangana?

TUDI ne bua kutamba kukankamijangana bua tshinyi? Mupostolo Paulo udi uleja tshitudi ne bua kuenzela nanku mu mukanda uvuaye mufundile bena Kristo bena Ebelu. Wakabambila ne: “Tuelelanganayi . . . meji bua kusakangana ku dinanga ne ku bienzedi bimpe, katuyi tulekela kudisangisha kuetu pamue, bu mudi tshilele tshia bakuabu, kadi tuikale tukankamijangana, ne tuenze nunku nangananga bu munudi numona dituku dienda disemena pabuipi.” (Eb. 10:24, 25) Mu bidimu bitanu tshianana, bena Kristo bena Yuda bavua basombele mu Yelushalema bavua mua kumona “dituku dia Yehowa” dienda disemena pabuipi ne kujingulula tshimanyinu tshivua Yezu mubapeshe bua kunyema tshimenga bua kupanduka. (Bien. 2:19, 20; Luka 21:20-22) Dituku dia Yehowa adi diakakumbana mu 70 panyima pa Yezu pavua bena Lomo babutule Yelushalema.

2. Lelu, tudi ne bua kuditatshisha bikole bua kukankamijangana bua tshinyi?

² Lelu, tudi batuishibue ne: dituku ‘dinene’ dia Yehowa didi “dikuatshisha buôwa bikole” dikadi pabuipi. (Yoe. 2:11) Muprofete Sefanya  wakamba ne: “Dituku dinene dia Yehowa didi pabuipi! Didi pabuipi ne didi disemena ne lubilu lukole!” (Sef. 1:14) Didimuija dia buprofete edi didi ditutangila petu lelu. Bu mudi dituku dia Yehowa pabuipi, mupostolo Paulo udi utuambila bua “tuikale tuditatshisha bua [bakuabu] bua kusakangana ku dinanga ne ku bienzedi bimpe.” (Eb. 10:24, dim.) Nunku, tudi ne bua kuditatshisha bikole bua bena Kristo netu bua kubakankamija padibi bikengela.

3. Ntshinyi tshivua Paulo muambe bua dikankamijangana? (Tangila tshimfuanyi tshia ntuadijilu tshia tshiena-bualu.)

³ Bible udi wamba ne: “Kanyinganyinga mu muoyo wa muntu kadi kawunemesha bujitu, kadi dîyi dimpe didi diwusanguluja.” (Nsu. 12:25) Bitu bitufikila tuetu bonso. Tutu bonso dijinga ne dikankamija ku musangu ne ku mukuabu. Paulo wakaleja ne: nansha muntu udi ne bujitu bua kukankamija bakuabu udi pende dijinga ne dikankamija. Wakafundila bena Kristo ba mu Lomo ne: “Ndi ne dijinga dikole dia kunumona bua nnupeshe kupa kampanda kua nyuma bua nuvuijibue bashindame; anyi nansha bua tumone mua kukankamijangana muntu ne muntu ku ditabuja dia mukuabu, dienu ne dianyi.” (Lomo 1:11, 12) Eyowa, nansha muvua Paulo ukankamija bakuabu bikole, kuvua bikondo bivuaye pende dijinga ne dikankamija.​—Bala Lomo 15:30-32.

4, 5. Mbanganyi batudi ne bua kukankamija lelu? Bua tshinyi?

⁴ Bena Kristo netu badi badipangisha amue malu bua kuenzela Yehowa mudimu, mba kuela kalumbandi. Bamue ba kudibu mbampanda-njila ba lulamatu. Ba bungi mbadipangishe malu a bungi bua kupeta mushindu wa kuenza bumpanda-njila. Ke mudibi kabidi bua bamisionere, batangidi ba bijengu ne bakaji babu, ne bana betu badi benza mudimu ku biro bia Betele ne ku biro bia mudimu wa dikudimuna. Bonso aba mbadipangishe malu a bungi bua kudifila bikole ku mudimu wa tshijila. Nanku tudi ne bua kubakankamija. Nansha bana betu batshidi banange mudimu wa ku dîba ne ku dîba kadi bawulekele bua malu kabukabu, mbimpe kubakankamija.

⁵ Bana betu ba balume ne ba bakaji batshidi bajike bualu mbasue kutumikila mubelu wa kuselangana “anu mu Mukalenge,” mba kukankamija pabu. (1 Kol. 7:39) Bia muomumue, bakaji badi benza mudimu bikole batu basanka patu babayabu babambila mêyi adi akolesha. (Nsu. 31:28, 31) Bena Kristo badi bashala ne lulamatu padibu bakengeshibua anyi basama badi pabu dijinga ne mêyi adi akankamija. (2 Tes. 1:3-5) Yehowa ne Kristo batu basamba batendeledi ba lulamatu bonso aba.​—Bala 2 Tesalonike 2:16, 17.

6. Bilondeshile Yeshaya 32:1, 2, mmudimu kayi udi nawu bakulu?

⁶ Bala Yeshaya 32:1, 2. Ku diambuluisha dia bela manyi ne “bakokeshi” ba mu mikoko mikuabu badi babelesha diboko, Yezu udi ukankamija bantu badi ne tunyinganyinga tukole ne batekete mu mikolo, ne ubaludika mu tshikondo tshikole etshi. Anu mutudi bamanye, bakulu kabena ne “bukokeshi” pa ditabuja dia bakuabu to, kadi ‘mbenzejanganyi nabu ba mudimu’ bua disanka dia bena Kristo nabu.​—2 Kol. 1:24.

7, 8. Pa kumbusha kukankamija bakuabu ne mêyi a mukana, ntshinyi tshikuabu tshidi bakulu mua kuenza bua kubakolesha?

⁷ Mupostolo Paulo mmutushile tshilejilu tshimpe. Wakafundila bena Kristo ba mu Tesalonike bavua bakengeshibua ne: ‘Bu mutuvua ne dinanga dikole kunudi, katuvua badisuike bua kunupesha anu lumu luimpe lua Nzambi nkayalu to, kadi bua kudifila kabidi ne tuetu bine, bualu nuvua balue banangibue bikole kutudi.’​—1 Tes. 2:8.

 ⁸ Bua kuleja mudi kukankamijangana ne mêyi a mukana patupu kakuyi kukumbane, Paulo wakambila bakulu ba mu Efeso ne: ‘Nudi ne bua kuambuluisha badi batekete ne nudi ne bua kuvuluka mêyi a Mukalenge Yezu pavuaye yeye nkayende muambe ne: “Disanka dia kufila ndipite dia kuangata.”’ (Bien. 20:35) Paulo kavua anu musue kukankamija bena Kristo nende patupu to, kadi uvua kabidi musue ‘kufila bintu biende bionso ne kudifila yeye mujima’ bua bualu buabu. (2 Kol. 12:15) Bia muomumue, bakulu kabena ne bua kukankamija bena Kristo nabu ne kubasamba anu ne mêyi a mukana patupu to, kadi badi kabidi ne bua kubakolesha, baleja ku malu adibu benza mudibu baditatshisha bua bualu buabu.​—1 Kol. 14:3.

9. Mmunyi mudi bakulu mua kubela bakuabu mu mushindu udi ukankamija?

⁹ Kukolesha bakuabu kudi mua kumvuija kubabela, kadi nansha nanku, Bible udi ne bua kuambuluisha bakulu bua kumanya mua kubela bakuabu mu mushindu udi ukankamija. Yezu mumane kubishibua ku lufu, wakatushila tshilejilu tshitambe buimpe mu bualu ebu. Uvua ne mibelu mikole ya kupesha bena mu bimue bisumbu bia mu Asia mukese, kadi mona muvuaye muyifile. Kumpala kua kubabela, wakela bena mu tshisumbu tshivua mu Efeso, mu Pêgamo, ne mu Tuatila kalumbandi ne muoyo mujima. (Buak. 2:1-5, 12, 13, 18, 19) Wakambila bena mu tshisumbu tshivua mu Laodikiya ne: “Bantu bonso bandi munange bikole, ndi mbabela ne mbanyoka. Nunku, ikala ne tshisumi ne nyingalala bua mpekatu yebe.” (Buak. 3:19) Bakulu badi ne bua kuidikija tshilejilu tshia Kristo padibu babela bakuabu.

10. Mmunyi mutudi tuetu bonso mua kukoleshangana?

¹⁰ Kukankamijangana ki mbujitu bua bakulu nkayabu to. Paulo wakalomba bena Kristo bonso bua kuakula ‘dîyi dimpe didi mua kukolesha bakuabu padibi bikengela, bua dibakuatshishe.’ (Ef. 4:29) Yonso wa kutudi udi ne bua kuela meji bua tshidiye mua kuenza bua kuambuluisha bakuabu. Paulo wakabela bena Kristo bena Ebelu ne: “Koleshayi bianza  bidi bilembelele ne binu bidi bitekete, ne tungunukayi ne kululamijila makasa enu njila, bua tshidi ne bulema katshipawuki, kadi tshiondopibue.” (Eb. 12:12, 13) Tuetu bonso, nansha bana kabidi, tudi mua kukoleshangana ne mêyi adi akankamija.

11. Pavua Marthe mupitshile mu disama dia dibungama dikole, ndiambuluisha kayi diakapetaye?

¹¹ Muanetu wa bakaji kampanda diende Marthe, * uvua mupitshile mu disama dia dibungama dikole, udi wamba ne: “Dimue dituku ngakasambila Yehowa bua ankankamije, pashishe meme kutuilangana ne muanetu kampanda wa bakaji mukulumpe, yeye kungenzela malu ne dinanga ne luse bimvua nabi dijinga menemene tshikondo atshi. Wakandondela lutatu lua buena luanyi luvuaye mupete, meme kumvua ne: tshivua anu nkayanyi to.” Pamuapa, muanetu wa bakaji au kavua nansha mujingulule tshivua mêyi ende mimpe mua kuenzela Marthe to.

12, 13. Mmu mishindu kayi mimpe mutudi mua kutumikila mubelu udi mu Filipoyi 2:1-4?

¹² Paulo wakabela bena mu tshisumbu tshia mu Filipoyi bonso ne: “Nunku bikalaku dikankamija kayi dionso mu Kristo, bikalaku busambi bua dinanga kayi buonso, bikalaku buwetu bua mu nyuma kayi buonso, bikalaku dinanga dikole ne diumvuilangana luse kayi dionso, nuenze bua disanka dianyi divulangane pa kuikala ne meji amue ne kuikala ne dinanga dia muomumue, kuikala mu buobumue mu bionso, kuikala ne meji amue. Kanuenji bualu nansha bumue ne lungenyi lua dikokangana anyi lua kudimona bapite bakuabu, kadi ne didipuekesha, numone bakuabu bu banupite nuenu, panudi kanuyi nutangila anu malu enu nkayenu, kadi nutangila kabidi malu a bakuabu.”​—Filip. 2:1-4.

¹³ Eyowa, tuetu bonso tudi ne bua kudienzeja bua tuikale tuditatshisha bua bakuabu, ‘tusambangana bua dinanga’ ne tulejangana “buwetu bua mu nyuma” ne “dinanga dikole ne diumvuilangana luse” bua kukankamija bena Kristo netu.

14. Tshidi mua kufila dikankamija ntshinyi?

¹⁴ Patudi tumvua ne: bantu batuvua bambuluishe kale mbashale anu ne lulamatu bidi bitukankamija bikole, anu muvuabi bikankamije mupostolo Yone wakafunda ne: “Tshiena ne disanka dinene kupita edi: bua meme kumvua ne: bana banyi badi batungunuka ne kuenda mu bulelela.” (3 Yone 4) Bampanda-njila ba bungi badi mua kutujadikila ne: bitu bibakankamija bikole patubu bumvua ne: bamue bantu bavuabu bambuluishe bua kumanya bulelela kukadi bidimu, batshidi anu ne lulamatu ne pamuapa mbalue pabu bampanda-njila. Nanku, kuvuluija patupu mpanda-njila udi mutekete mu mikolo masanka avuaye mupete kale, kudi mua kumusamba bikole.

15. Mmunyi mutudi mua kukankamija bana betu badi benzela Nzambi mudimu ne lulamatu?

¹⁵ Batangidi ba bijengu ba bungi mbambe ne: patu bena mu bisumbu bitubu bakumbula babafundila bua kubaleja dianyisha, bitu bibakankamija bobu ne bakaji babu bikole. Ke mudi bakulu, bamisionere, bampanda-njila, ne bena mu dîku dia Betele badiumvua pabu patudi tubambila mêyi a dianyisha bua mudimu wabu udibu benza ne lulamatu.

16. Kukankamija bakuabu kudi mua kulomba tshinyi?

¹⁶ Tuetu tuela meji ne: katuena mua kukankamija bakuabu bualu katutu tutamba kuakula, tudi tuenza tshilema. Kukankamijangana kakuena kulomba malu a bungi to, pamuapa kudi mua kutulomba kutua mimuemue tshianana ne disanka patudi tuela muntu muoyo. Yeye kayi mutue pende mimuemue, bidi mua kuleja ne: kudi bualu ne udi ukeba wa kubukuatshila. Tuetu bamuteleje bidi mua kumusamba.​—Yak. 1:19.

17. Ndiambuluisha kayi divua muanetu wa balume mukuabu mupete pavuaye ne dibungama dikole?

 ¹⁷ Muanetu wa balume kampanda diende Henri uvua mubungame bikole menemene pavua balela bende, too ne papa wende uvua mukulu uvuabu banemeka bikole, balekele bulelela. Mutangidi wa tshijengu wakamukankamija, kuyaye nende mu restoran bua kunua tukafe, yeye kumulekela upatula yende yonso ya munda. Henri wakajingulula ne: bua yeye kuambuluisha bena mu dîku diende bua bapingane kudi Yehowa, uvua ne bua kunanukila ne lulamatu. Dibala dia Misambu 46; Sefanya 3:17; ne Mâko 10:29, 30 diakamukolesha bikole.

18. a) Ntshinyi tshivua mukalenge Solomo mufunde bua dikankamijangana? b) Mmubelu kayi uvua mupostolo Paulo mufile?

¹⁸ Tshilejilu tshia Marthe ne tshia Henri bidi bileja ne: tudi mua kukankamija muanetu wa balume anyi wa bakaji kampanda udi dijinga ne busambi. Mukalenge Solomo wakafunda ne: “Dîyi diamba mu tshikondo tshiakane ndimpe be! Kutapa dîsu ne musangelu kudi kusankisha muoyo; lumu luimpe ludi lukolesha mifuba.” (Nsu. 15:23, 30, dim.) Kupita apu, kubadila muntu udi mubungame malu adi mu Tshibumba tshia Nsentedi anyi mu site wetu wa Enternete kudi mua kumupeshilula bukole. Paulo wakaleja pende ne: kuimba misambu ya Bukalenge pamue kudi mua kutukankamija. Wakafunda ne: “Nutungunuke ne kulongeshangana ne kukoleshangana ne misambu, misambu ya kutumbisha nayi Nzambi ne misambu ya mu nyuma mimba ne dianyisha, nuimbila Yehowa mu mioyo yenu.”​—Kolos. 3:16; Bien. 16:25.

19. Mu matuku adi alua, bua tshinyi nebitulombe bua tuetu kukankamijangana bikole menemene?

¹⁹ Bu mudi dituku dia Yehowa “dienda disemena pabuipi,” nebitulombe bua tuetu kukankamijangana bikole menemene. (Eb. 10:25) Anu bu muvua Paulo muambile bena Kristo nende ba tshikondo tshiende, “tungunukayi ne kukankamijangana ne kukoleshangana anu bu munudi nuenza mu bulelela.”​—1 Tes. 5:11.