TSHIDIMU tshishale, mbateke balume binunu bia bungi bakulu ne basadidi mu Bantemu ba Yehowa badi pa buloba bujima. Wewe muikale umue wa ku bana betu bananga aba, udi bushuwa usanka bikole bua mudimu webe mupiamupia eu.

Kadi udi mua kuikala kabidi ne kabuôwa. Jason, mukulu utshidi nsonga, udi wamba ne: “Pakantekabu mukulu, ngakadimona ne midimu mimpite bungi.” Mose ne Yelemiya bakadiumvua pabu kabayi bakumbane pavua Yehowa mubapeshe midimu mipiamipia. (Ekes. 4:10; Yel. 1:6) Biwikala udiumvua pebe nanku, tshiakuambuluisha bua kujikija kabuôwa aku ne kutungunuka ne kuya kumpala ntshinyi? Konkonona tshilejilu tshia Timote, muyidi wa Kristo.​—Bien. 16:1-3.

Timote uvua pamuapa ne bidimu bitue ku 20 anyi bipite apu pavua mupostolo Paulo mumulombe bua ikale umufila mu ngendu ya bumisionere. Bu mutshivua Timote nsonga, pamuapa uvua muanji kudiumvua kayi mukumbane ne pamuapa uvua muelakane bua kuenza mudimu wende mupiamupia au. (1 Tim. 4:11, 12; 2 Tim. 1:1, 2, 7) Kadi bidimu dikumi pashishe, Paulo wakambila bena mu tshisumbu tshia Filipoyi ne: “Ndi ntekemena mu Mukalenge Yezu bua kunutumina Timote mu matuku makese emu . . . Bualu tshiena ne muntu mukuabu udi ne lungenyi bu luende.”​—Filip. 2:19, 20.

Ntshinyi tshivua tshivuije Timote mukulu wa tshitembu? Tangila malongesha asambombo adi tshilejilu tshiende mua kukupetesha.

1. Uvua bushuwa uditatshisha bua bantu. Paulo wakambila bena Kristo ba mu Filipoyi ne: ‘[Timote] neaditatshishe bua malu anudi nawu ne muoyo mujima.’ (Filip. 2:20) Eyowa, Timote uvua uditatshisha bua bantu. Uvua uditatshisha ne muoyo mujima bua bikale mu malanda mimpe ne Yehowa, ne uvua udifila ne muende muonso bua kubambuluisha.

Kuikadi bu muendeshi wa mashinyi udi uditatshisha anu bua kufika pa dîba muaba wonso utu mashinyi imanyina, kayi uditatshisha bua kuambula bantu to. William, mukulu wa kueyemena kukadi bidimu bipite pa 20, udi ubela balume badibu bafuma ku dipesha midimu ne: “Nunange bena Kristo nenu. Nutambe kutabalela majinga abu pamutu pa kuditatshisha anu bua dilongolola malu a mu tshisumbu.”

2. Uvua uteka mudimu wa buambi pa muaba wa kumpala. Paulo wakaleja muvua tshilejilu tshia Timote tshishilangane ne tshia bantu bakuabu, wamba ne: “Bakuabu bonso badi badikebela malu abu, ki nga Yezu Kristo to.” (Filip. 2:21) Paulo uvua ufundila mukanda wende eu mu Lomo. Wakamona ne: bena Kristo bavuamu bavua batamba kuditatshisha bua malu abu. Mu mushindu kampanda, kabavua badifila bikole bua kuyisha to. Kadi Timote yeye kavua nanku to! Pakamueneka mpunga ya kuyisha lumu luimpe bikole, Timote uvua ne meji a buena a Yeshaya wakamba ne: “Mmeme eu! Untume!”​—Yesh. 6:8.

Mmunyi muudi mua kuikala ne nkatshinkatshi pankatshi pa malu ebe ne midimu ya mu nyuma? Tshia kumpala, teka malu adi ne mushinga pa muaba wa kumpala. Paulo wakamba ne: “Nukebe mua kumanya malu adi ne mushinga wa bungi.” (Filip. 1:10) Enza bua malu adi ne mushinga kudi Nzambi ikale kabidi ne mushinga kuudi. Tshibidi, kepesha malu audi nawu.  Umbusha malu adi akudia dîba ne makanda. Paulo wakalomba Timote ne: “Nyema majinga a bunsonga, kadi ipatshila buakane, ditabuja, dinanga, [ne] ditalala.”​—2 Tim. 2:22.

3. Uvua wenza mudimu wa tshijila bikole. Paulo wakavuluija bena Filipoyi ne: “Nudi bamanye tshijadiki tshivua [Timote] mufile bua bualu buende ne: anu bu muana ne tatu, wakenza nanyi mudimu bu mupika bua kutungunuja lumu luimpe.” (Filip. 2:22) Timote kavua ne lulengu to. Wakenza mudimu ne Paulo bikole, bobu kulua kunangangana be!

Midimu ya kuenza ki mmipangike mu bulongolodi bua Nzambi lelu to. Midimu eyi idi ikupetesha disanka dia bushuwa ne ikusemeja pabuipi ne bena Kristo nebe. Nanku, difundila tshipatshila tshia kuikala amu ne “bia bungi bia kuenza mu mudimu wa Mukalenge.”​—1 Kol. 15:58.

4. Uvua utumikila malu avuaye ulonga. Paulo wakafundila Timote ne: ‘Wewe udi mulonde bimpe menemene dilongesha dianyi, nsombelu wanyi, tshipatshila tshianyi, ditabuja dianyi, lutulu luanyi, dinanga dianyi, [ne] dinanukila dianyi.’ (2 Tim. 3:10) Bu muvua Timote utumikila bivuaye ulonga, wakakumbana bua kuenza midimu minene.​—1 Kol. 4:17.

Udiku ne mulunda mushindame ukadi mumonemone malu udi mua kukuambuluisha bua kuenza mudimu webe bimpe anyi? Wewe kuyi nende, kuenaku mua kumukeba anyi? Tom udi mukulu kukadi bidimu bia bungi udi uvuluka wamba ne: “Mukulu kampanda mumonemone malu wakangela mu diboko, kundongeshaye mudimu bimpe bitambe. Mvua ne tshibidilu tshia kumulomba mibelu ne kuyitumikila. Kuenza nunku kuakanshindamija ne lukasa.”

5. Wakatungunuka ne kudibidija. Paulo wakalomba Timote ne: “Dibidija ne tshipatshila tshia kulamata Nzambi.” (1 Tim. 4:7) Tshilejilu, muena manaya udi mua kuikala ne muntu udi umulongesha, kadi yeye pende udi ne bua kudibidija pa nkayende. Paulo wakabela Timote ne: “Tungunuka ne kudifila ku dibala kumpala kua bantu, ku didimuijangana ne ku dilongesha. . . . Elela malu aa meji; udifilaku ne muoyo webe mujima, bua bantu bonso bamone patoke muudi uya kumpala.”​—1 Tim. 4:13-15.

Wewe pebe udi ne bua kutungunuka ne kulengeja bipedi biebe. Kuena ne bua kushala tshibombo mu nyuma anyi kushala anu mulame mishindu ya kale ya dienza malu mu tshisumbu to. Kabidi, kutambi kudieyemena, pamuapa wela meji ne: ukadi kakasu ka kapamba kamonemone malu, nunku udi mua kujikija tshilumbu kayi tshionso nansha kuyi muenze makebulula bimpe to. Anu bu Timote, “wikale mudimuke mu malu audi wenza ne mu dilongesha diebe.”​—1 Tim. 4:16.

6. Uvua weyemena nyuma wa Yehowa. Bua mudimu uvua Timote wenza, Paulo wakamuvuluija ne: “Lama tshintu tshia mushinga mukole tshidi tshitekesha kuudi etshi ku diambuluisha dia nyuma muimpe udi muikale munda muetu.” (2 Tim. 1:14) Bua Timote kulama mudimu wende, uvua ne bua kueyemena nyuma wa Nzambi.

Donald udi mukulu kukadi bidimu bia bungi udi wamba ne: “Balume badi ne midimu badi ne bua kuangata malanda abu ne Nzambi ne mushinga wa bungi. Bobu benza nunku, ‘bukole buabu nebuende anu buvula.’ Bobu basambila bua kupeta nyuma wa Nzambi ne benza bua kuikala ne dimuma dia nyuma eu, nebikale dibenesha dilelela kudi bena Kristo nabu.”​—Mis. 84:7; 1 Pet. 4:11.

Patudi tukumona wewe ne bana betu bakuabu badi bafuma ku dipeta midimu nuya kumpala mu mudimu wa Nzambi, bidi bitukankamija bikole. Jason, utudi batele ku ntuadijilu, udi wamba ne: “Katshia ngalua mukulu, ndi mulonge bia bungi ne ndi mulue kushindama bikole. Ndi munange mpindieu mudimu wanyi bikole ne ndi nguwumona bu diakalenga dia dikema!”

Neutungunukaku ne kuya kumpala mu mudimu wa Yehowa anyi? Difundila tshipatshila tshia kuidikija Timote. Nunku, wewe pebe newikale dibenesha kudi bantu ba Nzambi.