1-2. Bua tshinyi Yezu uvua mupampakane?

YEZU uvua mupampakane dituku diende dia ndekelu pa buloba. Ukavua pa kukenga bibi ne kufua ku bianza bia bantu babi. Kadi kavua mupampakane anu bualu bakavua pa kumushipa to. Uvua munange Tatuende bikole ne uvua musue kumusankisha. Yezu uvua mumanye ne: yeye mushale ne lulamatu mu ntatu ivua mimuindile, uvua ne bua kuenza bua dîna dia Yehowa dibingishibue. Yezu uvua munange kabidi bantu, ne uvua mumanye ne: bua bobu kutekemena muoyo wa tshiendelele, bivua bikengela ashale ne lulamatu too ne ku lufu.

² Nansha muvua Yezu ne malu mamutonde bikole, uvua anu ne ditalala. Wakambila bapostolo bende ne: “Ndi nnupesha ditalala dianyi.” (Yone 14:27) Uvua ne “ditalala dia Nzambi,” mmumue ne: ditukija didi difumina ku dikala mu malanda mimpe ne Yehowa. Ditalala adi diakatukijija muoyo wa Yezu ne lungenyi luende.​—Filip. 4:6, 7.

3. Ntshinyi tshituakonkonona mu tshiena-bualu etshi?

³ Muntu nansha umue kakupeta ntatu ya buena ya Yezu ayi to, kadi bantu bonso badi balonda Yezu nebatuilangane ne ntatu. (Mat. 16:24, 25; Yone 15:20) Anu bu Yezu, nekuikale bikondo bituikala ne bua kupampakana. Ntshinyi tshitudi mua kuenza bua ntatu kayitutondi bikole menemene bitupangisha ne ditalala dia mu lungenyi? Tukonkononayi malu asatu avua Yezu muenze mu mudimu wende wa kuyisha, ne tumone mutudi mua kumuidikija patudi mu ntatu.

4. Mu diumvuangana ne 1 Tesalonike 5:17, fila bilejilu bidi bileja ne: Yezu wakasambila bikole dituku diende dia ndekelu pa buloba.

⁴ Bala 1 Tesalonike 5:17. Yezu wakasambila bikole dituku dia lufu luende. Pavuaye uleja bayidi bende mua kuvuluka lufu luende, wakasambila bua diampa ne mvinyo. (1 Kol. 11:23-25) Wakasambila ne bayidi bende kumpala kua kumbukabu muaba uvuabu badiile Pasaka. (Yone 17:1-26) Pakafikaye ne bayidi bende mu budimi bua Getesemane butuku abu, wakasambila misangu ya bungi. (Mat. 26:36-39, 42, 44) Mêyi a ndekelu akamba Yezu kumpala kua kukulaye muoyo wakaamba mu disambila. (Luka 23:46) Yezu wakasambila Yehowa bua malu onso avua menzeke dituku dia lufu luende adi.

5. Bua tshinyi dikima dia bapostolo diakakepela?

⁵ Bumue bua ku malu avua mambuluishe Yezu bua kutantamena ntatu buvua ne: uvua mueyemene Tatuende, ke bualu kayi uvua umusambila. Kadi bapostolo bende bobu kabavua basuminyine mu disambila butuku abu to. Ke bualu kayi dikima diabu diakakepela pavua lutatu lubakuate. (Mat. 26:40, 41, 43, 45, 56) Patudi mu ntatu, netushale ne lulamatu anu tuetu balonde tshilejilu tshia Yezu ne ‘batungunuke ne kusambila.’ Tudi mua kusambila bua malu kayi?

6. Mmunyi mudi ditabuja dituambuluisha bua kushala ne ditalala?

⁶ Tudi mua kusambila bua Yehowa ‘atupeshe ditabuja dia bungi.’ (Luka 17:5; Yone 14:1) Tudi dijinga ne ditabuja bualu Satana neatete bantu bonso badi balonda Yezu. (Luka 22:31) Mmunyi mudi ditabuja dituambuluisha bua  kushala ne ditalala nansha patudi tupeta ntatu milondangane? Patudi tuenza tshionso tshitudi mua kuenza bua kutantamena lutatu kampanda, ditabuja neditusake bua kulekeela Yehowa lutatu alu mu bianza. Tudi ne ditalala mu muoyo ne mu lungenyi bualu tudi bashindike ne: mmumanye tshia kuenza kutupita tuetu.​—1 Pet. 5:6, 7.

7. Malu adi Robert muambe adi akulongesha tshinyi?

⁷ Disambila didi dituambuluisha bua kulama ditalala dia mu lungenyi nansha mu ntatu ya mushindu kayi. Tuangate tshilejilu tshia Robert, mukulu wa lulamatu udi mpindieu ne bidimu 80 ne bia mu njila. Udi wamba ne: “Mubelu udi mu Filipoyi 4:6, 7 mmungambuluishe bua kutantamena ntatu ya bungi. Ntu mupete ntatu ya dipangila makuta. Umue musangu ngakajimija too ne mudimu wa bukulu.” Ntshinyi tshidi tshiambuluishe Robert bua kulama ditalala dia mu lungenyi? Udi wamba ne: “Diakamue padi malu atuadija kuntonda, ntu nsambila. Ndi mumone ne: misangu yonso indi nsambila bikole ne muoyo wanyi mujima, ndi diumvua ne ditalala dia bungi.”

8. Bilondeshile Yone 8:29, mbualu kayi bukuabu buvua buambuluishe Yezu bua kuikala ne ditalala dia mu lungenyi?

⁸ Bala Yone 8:29. Yezu uvua ne ditalala dia mu lungenyi nansha pavuabu bamukengesha bualu uvua mumanye ne: uvua usankisha Tatuende. Pavuabi bimukolele bua kumutumikila, uvua anu utumikila. Bu muvuaye munange Tatuende Yehowa, uvua uteka mudimu uvuaye umuenzela pa muaba wa kumpala. Tshilejilu, pavuaye mu diulu, uvua “muena mudimu  mupiluke” wa Nzambi. (Nsu. 8:30) Pakaluaye pa buloba, wakalongesha bantu malu a Tatuende ne tshisumi. (Mat. 6:9; Yone 5:17) Mudimu au uvua umupetesha disanka dia bungi.​—Yone 4:34-36.

9. Bua tshinyi kuyisha bikole kudi kutuambuluisha bua kushala ne ditalala dia mu lungenyi?

⁹ Tudi mua kuidikija Yezu patudi tutumikila Yehowa ne “bikale amu ne bia bungi bia kuenza mu mudimu wa Mukalenge.” (1 Kol. 15:58) Patudi ‘tudifila bikole’ mu mudimu wa kuyisha, ntatu yetu kayakututonda bikole to. (Bien. 18:5) Tshilejilu, bantu ba bungi batudi tupeta mu buambi batu ne ntatu mikole mipite ne yetu. Kadi padibu balonga mua kunanga Yehowa ne kutumikila mikenji yende, nsombelu wabu utu ulengela ne bapeta disanka. Misangu yonso itutu tumona bualu ebu buenzeka, bitu bitushindikila ne: Yehowa neatutabalele. Dishindika edi ditu dituambuluisha bua kulama ditalala dia mu lungenyi. Muanetu wa bakaji mukuabu utu ne tunyinganyinga tukole ne udimona kayi ne mushinga wakamona mudi bualu ebu bulelela. Udi wamba ne: “Pandi mu buambi, meji anyi atu atukija ne ngumvua disanka. Ndi mumone ne: bidi nanku bualu pandi nyisha, ntu ndiumvua pabuipi ne Yehowa menemene.”

10. Malu adi Brenda muambe adi akulongesha tshinyi?

¹⁰ Tuangate kabidi tshilejilu tshia muanetu wa bakaji mukuabu diende Brenda. Yeye ne muanende wa bakaji batu ne disama dikole. Brenda utu wendela mu kakalu ne udi ne makanda makese. Utu uyisha ku nzubu ne ku nzubu padiye ne mushindu, kadi utu utamba kuyishila kumbelu mu mikanda idiye ufundila bantu. Udi wamba ne: “Pangakajingulula ne: disama dianyi kadiakujika mu ndongoluelu eu, ngadifila bikole mu mudimu wa kuyisha. Mu bulelela, kuyisha kutu kumbusha meji anyi ku malu adi mantonde. Kutu kunsaka bua kudifila bikole bua kuambuluisha bantu bonso bantu nyisha. Kutu kabidi kumvuluija misangu yonso ditekemena dindi nadi bua matuku atshilualua.”

11-13. (a) Ntshinyi tshivua bapostolo ne bantu bakuabu benze bua kuleja ne: bavua balunda bimpe ba Yezu? (b) Diambuluisha diabu diakamuenzela tshinyi?

¹¹ Tshikondo tshionso tshivua Yezu uyisha, bapostolo bende ba lulamatu bavua baleja muvuabu balunda bimpe. Bavua balunda badi Bible wamba ne: “Kudi mulunda udi ulamata bikole kupita muanabu ne muntu.” (Nsu. 18:24) Yezu uvua munange balunda bende abu bikole. Pavuaye uyisha, muanabu nansha umue kakamuitabuja to. (Yone 7:3-5) Umue musangu bana babu bakela too ne meji ne: uvua mupale. (Mâko 3:21) Ke bualu kayi wakafika ku diambila bapostolo bende ba lulamatu butuku bua kumpala kua lufu luende ne: “Nuenu ke badi bashale nanyi mu makenga anyi.”​—Luka 22:28.

¹² Bapostolo bavua imue misangu babungamija Yezu, kadi uvua umona ne: bavua ne ditabuja kudiye ne kavua wimanyina pa bilema biabu to. (Mat. 26:40; Mâko 10:13, 14; Yone 6:66-69) Butuku bua ndekelu buvua Yezu mupitshishe ne bapostolo bende ba lulamatu, wakabambila ne: “Ndi munubikile balunda, bualu ndi munumanyishe malu onso andi mumvue kudi Tatu wanyi.” (Yone 15:15) Kakuyi mpata, balunda ba Yezu bavua bamukankamija bikole. Dimuambuluisha diabu mu mudimu wa kuyisha diakamupetesha disanka dia bungi.​—Luka 10:17, 21.

¹³ Pa kumbusha bapostolo, Yezu uvua ne balunda bakuabu ba balume ne ba bakaji bavua bamukuatshisha mu malu mashilashilangane pavuaye mu mudimu wende wa kuyisha. Bamue ba kudibu bavua bamubikila ku mabu  bua kudia nende. (Luka 10:38-42; Yone 12:1, 2) Bakuabu bavua bamufila mu ngendu yende ne bamuambuluisha ne bintu biabu. (Luka 8:3) Yezu uvua ne balunda bimpe bualu yeye pende uvua mulunda muimpe. Uvua ubenzela malu mimpe ne kavua ubalomba malu avuabu kabayi mua kukumbaja to. Yezu uvua mupuangane, kadi uvua wanyisha dikuatshisha dia balunda bende bapange bupuangane. Kakuyi mpata, balunda abu bavua bamuambuluisha bua kulama ditalala dia mu lungenyi.

14-15. Ntshinyi tshitudi mua kuenza bua kupeta balunda bimpe? Mmunyi mudibu mua kutuambuluisha?

¹⁴ Balunda bimpe nebatuambuluishe bua kushala balamate Yehowa. Mushindu mutambe buimpe wa kupeta balunda bimpe nkuikala tuetu bine balunda bimpe. (Mat. 7:12) Tshilejilu, Bible udi utukankamija bua kudifila bua kuambuluisha bakuabu, nangananga aba badi ‘bakengela bintu.’ (Ef. 4:28) Kudi muntu uudi mua kuambuluisha mu tshisumbu tshienu anyi? Udi pamuapa mua kuyila muntu udi usama anyi ukadi mukulakaje mu tshisalu. Udi nansha mua kupesha bena mu dîku kampanda badi ne lutatu lua makuta biakudia. Wewe mumanye mua kubuela mu site wa jw.org^® ne mua kuenza mudimu ne programe wa JW Library^®, udi mua kuambuluisha bantu bakuabu mu tshisumbu bua bamanye pabu mua kupeta bintu bimpe bidimu. Patudi tudifila bikole bua kuambuluisha bakuabu, kakuyi mpata netupete disanka.​—Bien. 20:35.

¹⁵ Balunda betu nebatukuatshishe patudi tutuilangana ne ntatu, bituambuluisha bua kulama ditalala dia mu lungenyi. Anu muvua Elihu muteleje Yobo pavuaye wakula bua ntatu  yende, balunda betu badi batuambuluisha padibu batuteleja ne lutulu luonso patudi tubakuatshila malu adi matutonde. (Yobo 32:4) Katukebi bua balunda betu batuangatshile mapangadika to, kadi mbimpe tuteleje mibelu ya mu Bible idibu batupesha. (Nsu. 15:22) Anu muvua mukalenge Davidi muitabe diambuluisha dia balunda bende ne budipuekeshi buonso, tuikale petu tudipuekesha ne tuitaba diambuluisha dia balunda betu patudi mu ntatu. (2 Sam. 17:27-29) Bulelela, balunda bimpe ndipa dia kudi Yehowa.​—Yak. 1:17.

16. Bilondeshile Filipoyi 4:6, 7, mmushindu kayi umuepele utudi tupetela ditalala? Umvuija.

¹⁶ Bala Filipoyi 4:6, 7. Bua tshinyi Yehowa udi utuambila ne: tudi mua kupeta ditalala didiye ufila “ku butuangaji bua Kristo Yezu”? Bualu tudi mua kupeta ditalala mu lungenyi ne mu muoyo ne kudilama anu tuetu bumvue mudimu udi nawu Yezu ne bawitabuje. Tshilejilu, Nzambi udi mua kutubuikidila mpekatu yetu yonso ku diambuluisha dia mulambu wa Yezu wa tshia kupikulangana natshi. (1 Yone 2:12) Bualu ebu budi butukolesha ku muoyo bikole! Bu mudi Yezu Mukalenge wa Bukalenge bua Nzambi, nealongolole malu onso adi Satana ne ndongoluelu wende banyange. (Yesh. 65:17; 1 Yone 3:8; Buak. 21:3, 4) Edi nditekemena dimpe dia dikema! Nansha mudi Yezu mutupeshe mudimu mukole wa kuenza, udi netu, ne udi utuambuluisha mu matuku a ku nshikidilu wa ndongoluelu wa malu eu. (Mat. 28:19, 20) Bidi bitupesha dikima dia dikema! Dikola ku muoyo, ditekemena, ne dikima mmalu a mushinga mukole adi atuambuluisha bua kuikala ne ditalala dia mu lungenyi.

17. (a) Ntshinyi tshidi muena Kristo mua kuenza bua kulama ditalala dia mu lungenyi? (b) Bilondeshile Yone 16:33, netuikale bakumbane bua kuenza tshinyi?

¹⁷ Nunku ntshinyi tshiudi mua kuenza bua kulama ditalala dia mu lungenyi paudi ne ntatu mikutshibuile panshi? Enza malu avua Yezu muenze. Tshia kumpala, sambila ne suminyina mu disambila. Tshibidi, tumikila Yehowa ne yisha ne tshisumi nansha padibi bikole. Tshisatu, itaba diambuluisha dia balunda. Dîba adi, ditalala dia Nzambi nedilame muoyo webe ne lungenyi luebe. Anu bu Yezu, neutshimune ntatu nansha ya mushindu kayi.​—Bala Yone 16:33.