1. Tuetu bonso tudi ne bua kuenza tshinyi?

UDIKU mua kubuela mu lubilu luudi mumanye ne: ndukole nangananga wewe usama anyi mutshioke anyi? Katuena tuela meji nanku to. Kadi mupostolo Paulo wakamba ne: bena Kristo bonso badi mu lubilu. (Eb. 12:1) Tuetu bonso, bakulumpe ne bana, badi ne makanda ne badi kabayi nawu, tudi ne bua kunanukila too ne ku ndekelu bituikala basue kupeta difutu didi Yehowa mututekele.​—Mat. 24:13.

2. Bilondeshile 2 Timote 4:7, 8, bua tshinyi Paulo uvua muakule kayi udia tshibanga?

² Paulo uvua muakule kayi udia tshibanga bualu uvua “munyeme lubilu mufike ku ndekelu.” (Bala 2 Timote 4:7, 8.) Kadi lubilu luvua Paulo muakuile ndubilu kayi menemene?

3. Lubilu luvua Paulo muakuile ndubilu kayi?

³ Kuvua misangu ivua Paulo wakula bua manaya avua enzeka mu Grese wa kale bua kulongesha malu kampanda a mushinga. (1 Kol. 9:25-27; 2 Tim. 2:5) Misangu ya bungi, wakakula bua dinyema lubilu lua ku makasa bua kumvuija nsombelu wa buena Kristo. (1 Kol. 9:24; Gal. 2:2; Filip. 2:16) Muntu udi ubuela mu “lubilu” elu padiye udilambula kudi Yehowa ne ubatijibua. (1 Pet. 3:21) Udi usambuka mushonyi wa ndekelu padi Yehowa umupesha difutu dia muoyo wa tshiendelele.​—Mat. 25:31-34, 46; 2 Tim. 4:8.

4. Mmalu kayi atuamona mu tshiena-bualu etshi?

⁴ Kunyema lubilu lua ku makasa lua ntanta mule ne kuikala ne nsombelu wa buena Kristo mbifuanangane ku tshinyi? Ku malu a bungi. Asatu a kudiwu ngowu aa: Bua kumpala, tudi ne bua kunyemena mu njila muimpe; buibidi, tudi ne bua kutuishila  mêsu ku mushonyi wa ndekelu; ne buisatu, tudi ne bua kumanya mua kupita ne ntatu itudi tupeta mu njila au.

5. Njila kayi utudi ne bua kulonda? Bua tshinyi?

⁵ Bua banyemi ba lubilu kupetabu difutu mu lubilu luetu luena dîna elu, badi ne bua kunyemena mu njila idibu balongolole kudi bantu badi balongolole dinaya dia lubilu adi. Bia muomumue, tuetu basue kupeta difutu dia muoyo wa tshiendelele, tudi ne bua kunyemena mu njila wa buena Kristo anyi mu njila udi ufikisha ku muoyo. (Bien. 20:24; 1 Pet. 2:21) Kadi Satana ne bantu badi bamuidikija mbasue bobu bua tuenze tshikuabu; mbasue bua ‘tutungunuke ne kunyema nabu.’ (1 Pet. 4:4) Badi baseka njila udi ufikisha ku muoyo utudi tulonda ne bamba ne: njila udibu bobu ke wa muimpe ne udi upetesha bantu budikadidi. Kadi badi badishima.​—2 Pet. 2:19.

6. Tshilejilu tshia Brian tshidi tshikulongesha tshinyi?

⁶ Muntu yonso udi unyema ne bantu badibu banyange kudi bulongolodi bua Satana katu unenga ku dimona ne: njila udibu basungule kena upeteshangana budikadidi to; njila au utu ulua kubabueja mu bupika. (Lomo 6:16) Tuangate tshilejilu tshia Brian. Baledi bende bavua bamukankamija bua kulonda njila wa buena Kristo udi ufikisha ku muoyo. Patshivuaye tshitende, uvua umona yeye bu ne: njila au kavua mua kumupetesha diakalenga to. Brian wakapangadija bua kunyema ne bantu bavua balonda Satana. Udi wamba ne: ‘Tshivua mua kuela meji ne: tshivuabu babikila ne: mbudikadidi tshimvua njinga atshi tshivua ne bua kulua kunkuata ku bupika to. Panyima pa matuku nkavua nnua bintu bidi binyungulula mutu, nnua maluvu, ne ngenza buenzavi. Bidimu bia bungi pashishe, nkavua ngenda nnua too ne bintu bia bikole bidi binyungulula mutu, ne ndekelu wa bionso, meme kushala mupika wabi. . . . Ngakatuadija too ne ku dibipana bua kudiambuluisha.’ Ndekelu wa bionso, Brian wakapangadija bua kutuadija kutumikila mikenji ya Yehowa. Wakashintulula njila wa kunyemena, kubatijibuaye mu 2001. Mpindieu udi ne disanka dilelela bua mudiye ulonda njila wa buena Kristo udi ufikisha ku moyo. *

7. Bilondeshile Matayi 7:13, 14, njila kayi ibidi idi kumpala kuetu?

⁷ Kusungula njila muimpe wa kunyemena kudi ne mushinga wa bungi be! Satana mmusue bua tuetu bonso tulekele dinyemena mu njila mubumbakane udi “ufikisha ku muoyo” tubuele mu njila mualabale udi ne bena panu ba bungi. Bantu ba bungi mbasue njila au ne  mbipepele bua kuyilamu. Kadi udi “ufikisha ku kabutu.” (Bala Matayi 7:13, 14.) Bua tuetu kushala mu njila muimpe katuyi tusesuka, tudi ne bua kueyemena Yehowa ne kumuteleja.

8. Munyemi wa lubilu yeye mudishinde, utu wenza tshinyi?

⁸ Padi banyemi ba lubilu mu lubilu lua mutantshi mule, batu batangile anu panshi kumpala kuabu bua kabadishindi to. Kadi banyemi nabu badi mua kudikuma kudibu anyi bobu bine badi mua kuela dikasa mu tshiinina. Bobu badishinde, badi balandapuka, batungunuka ne kunyema. Kabatu bimanyina nangananga pa tshidi tshibashindishe to, kadi mpa mushonyi wa ndekelu ne difutu didibu batekemene.

9. Tuetu badishinde, tudi ne bua kuenza tshinyi?

⁹ Mu luetu lubilu palu, tudi mua kudishinda misangu ne misangu, mmumue ne: tuenza bilema mu diakula ne mu bitudi tuenza. Anyi banyemi netu badi mua kutuenzela bilema bidi mua kutunyingalaja. Katubimonyi bu bualu buenyi to. Tuetu bonso tudi bapange bupuangane, ne tudi tunyemena bonso mu njila mubumbakane umue umue udi ufikisha ku muoyo. Nunku nekuikale misangu ituikala tukumakanangana. Paulo wakaleja ne: nekuikale misangu ituikala “tshilumbu” ne muanetu. (Kolos. 3:13) Kadi pamutu pa tuetu kushala bimanyine pa tshidi tshitushindishe, mbimpe tuimanyine pa difutu ditudi tuipatshila. Tuetu badishinde, mbimpe tulandapuke, tutungunuke ne lubilu. Tuetu bashale bakuatshilangane tshiji anyi balaminangane munda, tulekela kuenzela Yehowa mudimu, katuakusambuka mushonyi wa ndekelu ne kupeta difutu to. Bualu bukuabu, tudi mua kulua tshilenduishi kudi bakuabu badi baditatshisha bua kunyemena mu njila mubumbakane udi ufikisha ku muoyo.

10. Bua kuepuka dilua “tshilenduishi” kudi bakuabu, tudi mua kuenza tshinyi?

¹⁰ Mushindu mukuabu muimpe utudi mua kuepuka dilua “tshilenduishi” kudi banyemi netu ba lubilu ngua kuitaba bidibu basue padiku mushindu pamutu pa kusunsuma anu bua bitabe tshietu. (Lomo 14:13, 19-21; 1 Kol. 8:9, 13) Tuetu tuenza nunku, netushilangane ne banyemi ba lubilu luetu lua ku makasa elu. Bobu batu bajinga kupitangana ku lubilu, ne muntu yonso utu udienzeja bua kupeta difutu  anu buende yeye. Muntu yonso utu umona anu disanka diende yeye. Nunku badi mua kujinga kusakila bakuabu bua babapite. Kadi tuetu katuena tujinga kupitangana ku lubilu to. (Gal. 5:26; 6:4) Tshipatshila tshietu ntshia kuambuluisha bantu ba bungi bua basambuke mushonyi wa ndekelu ne bapete difutu dia muoyo. Ke bualu kayi tutu tuditatshisha bua kutumikila mubelu uvua Paulo mufunde ku nyuma wa kubenga ‘kutangila anu malu etu nkayetu, kadi kutangila kabidi malu a bakuabu.’​—Filip. 2:4.

11. Munyemi wa lubilu utu mutume meji ku tshinyi? Bua tshinyi?

¹¹ Banyemi ba lubilu kabatu batangila anu panshi kumpala kuabu to, batu batume kabidi meji ku mushonyi wa ndekelu. Nansha mudibu kabayi mua kumona mushonyi au, badi mua kudimona bakadi bawusambuke ne bapete difutu. Padibu batuma meji ku difutu, bidi bibapesha makanda a kunyema.

12. Mbualu kayi budi Yehowa mutujadikile?

¹² Mu lubilu lutudi tunyema, Yehowa mmutulaye bimpe ne: tuetu banyeme too ne ku ndekelu, netupete difutu didiye mutujadikile, mmumue ne: muoyo wa tshiendelele mu diulu anyi mu Mparadizu pa buloba. Bible mmutupeshe kadiosha ka difutu adi bua tumone mua kudifuanyikijila muikala nsombelu utuikala nende muimpe. Tuetu bashale balame ditekemena adi mu meji etu ne mu muoyo wetu, katuakutamba kulekela tshintu kampanda tshitushindisha bua kashidi to.

13. Tuetu tudi bapite banyemi ba lubilu luetu elu ku tshinyi?

¹³ Banyemi ba lubilu ba mu Grese bavua ne bua kutantamena imue ntatu bu mudi ditshioka ne bisama. Kadi tshivuabu beyemena tshivua anu malu avuabu balonge ne bukole buabu. Tudi petu anu bu banyemi ba lubilu abu bualu mu lubilu lutudi batu batulongesha mua kunyema. Kadi tuetu tudi bapite banyemi ba lubilu luetu elu. Tudi ne muaba utudi mua kupetela bukole bua buyila ne panshi. Patudi tueyemena Yehowa, udi utulaya bua kutulongesha ne kutupesha kabidi bukole bua bungi!​—1 Pet. 5:10.

14. Leja mudi 2 Kolinto 12:9, 10 utuambuluisha bua kutua ntatu tshiadi.

¹⁴ Paulo wakatantamena ntatu ya bungi. Bavua bamupenda ne bamukengesha. Kuvua kabidi misangu ivuaye udiumvua mutekete ne uvua ne bua kutantamena tshivuaye mubikile ne: “dieba mu mubidi.” (2 Kol. 12:7) Kadi pamutu pa kumona ntatu ayi bu katamba ka kuapuka naku, uvua uyimona bu mpunga wa kueyemena Yehowa. (Bala 2 Kolinto 12:9, 10.) Bu muvuaye ne lungenyi lua nunku, Yehowa wakamuambuluisha mu ntatu yende yonso ayi.

15. Tuetu bidikije Paulo, ntshinyi tshituamona?

¹⁵ Badi mua kutupenda petu ne kutukengesha bua ditabuja dietu. Masama adi mua kututatshisha anyi tudi mua kuzengela. Tuetu bidikije Paulo, lutatu luonso ludi mua kulua mpunga wa kumona mudi Yehowa utukuatshisha ne dinanga.

16. Nansha wewe mutekete mubidi, ntshinyi tshiudi mua kuenza?

¹⁶ Udi mu bulalu bua disama peshi mu kakalu ka balema anyi? Mpombombo ya binu ikadi mitshioke peshi umona bitayitayi anyi? Biobi nanku, udi mua kunyema ne bansonga batshidi tumatuma anyi? Eyowa! Bakulakaje ba bungi ne bantu bakadi batekete mubidi badi banyemena mu njila udi ufikisha ku muoyo. Kabena mua kunyema ne makanda abu nkayabu to. Kadi badi bapetela bukole kudi Yehowa padibu batelejila bisangilu ku telefone anyi balonda bia ku Enternete mu JW Stream.  Mbaditue kabidi mu mudimu wa divuija bantu bayidi padibu bayisha baminganga ne balela babu.

17. Mmushindu kayi utu Yehowa umvua bua bantu badi kabatshiyi ne makanda a mubidi?

¹⁷ Kuteketshi mu mikolo wamba ne: bu muudi kutshiyi ne makanda a mubidi, kutshiena ne bukole bua kunyemena mu njila udi ufikisha ku muoyo nansha. Yehowa mmukunange bua muudi mumuitabuje ne munanukile bidimu bia bungi. Udi dijinga ne diambuluisha diende mpindieu bikole kupita kumpala, ne kakukulekela to. (Mis. 9:10) Yeye neasemene pabuipi nebe bikole menemene. Mona tshidi muanetu kampanda udi ne tusamasama wamba: “Bu mudi tusamasama tuenda tumvudila, ndi mumone ne: mpunga ya kuyisha bakuabu bulelela idi yende ikepela. Kadi ndi mumanye ne: nansha mundi nditatshisha bua kuyisha kakese, bidi bisankisha muoyo wa Yehowa, ne bidi bimpetesha disanka.” Paudi udiumvua mutekete mu mikolo, vuluka ne: Yehowa udi nebe. Tuma meji ku tshilejilu tshia Paulo, ne vuluka mêyi ende adi akankamija aa: “Ndi nsankila mu matekete, . . . bualu pandi ne butekete ke pandi ne bukole.”​—2 Kol. 12:10.

18. Ndutatu kayi lukole menemene lutu nalu bantu bakuabu?

¹⁸ Bantu bakuabu badi banyemena mu njila udi ufikisha ku muoyo batu ne lutatu lukuabu. Batu ne malu atu abafikila adi bakuabu kabayi mua kumona anyi mua kumvua to. Tshilejilu, badi mua kuikala ne dibungama dikole anyi ne malu adi abatshiokesha mu lungenyi. Bua tshinyi batendeledi ba Yehowa badiye munange aba batu bapeta lutatu lukole menemene? Bualu muntu yeye mutshibuke diboko anyi mu kakalu ka balema, bantu bonso badi mua kumona lutatu ludiye nalu ne muoyo udi mua kubasaka bua kumuambuluisha. Kadi bantu badi ne masama a mitu kabena mua kumueneka bu badi basama to. Dikenga diabu didi anu bu dia muntu udi mutshibuke mukolo, kadi bu mudi bakuabu kabayi bamona tshidibu basama, badi mua kupanga bua kubumvuila.

19. Tshilejilu tshia Mefibosheta tshidi tshitulongesha tshinyi?

¹⁹ Wewe muikale ne bulema anyi mutekete mubidi ne umona ne: bakuabu kabena bakumvua, tshilejilu tshia Mefibosheta tshidi mua kukupesha bukole. (2 Sam. 4:4) Uvua ne bulema, ne mukalenge Davidi wakamuangata bibi. Mefibosheta kavua muenze bualu nansha bumue buvua bumukebele ntatu eyi to. Nansha nanku, kakapeta meji mabi to; wakaleja dianyisha bua malu mimpe avua mamuenzekele. Wakaleja Davidi dianyisha bua malu mimpe akavuaye mumuenzele. (2 Sam. 9:6-10) Nanku pavua Davidi muangate Mefibosheta bibi, Mefibosheta kavua muimanyine  yeye pa atshi to. Kakashala udiila Davidi dînu bua tshilema atshi to. Kakela nansha Yehowa tshilumbu pambidi bua tshivua Davidi muenze atshi to. Wakimanyina pa tshivuaye mua kuenza bua kukuatshisha mukalenge uvua Yehowa musungule. (2 Sam. 16:1-4; 19:24-30) Yehowa wakafundisha tshilejilu tshimpe tshia Mefibosheta mu Dîyi diende bua tshitulongeshe.​—Lomo 15:4.

20. Bamue bantu batu bumvua bishi patu malu abapita? Kadi bikale batuishibue bua bualu kayi?

²⁰ Bamue bana betu badi ne malu adi abasamisha mutu bikole menemene batu bumvua mijilu ya mu mpala ibimana ne bumvua bibatonda padibu miaba idibu ne bantu bakuabu. Nansha mudibi mua kubatonda bua kuikala munkatshi mua bantu ba bungi, batu anu baya mu bisangilu, mu mpuilu, ne mu mpungilu. Bidi mua kubakolela bua kuyukila ne bantu badibu kabayi bamanye, tshibi bayukila ne bantu mu buambi. Biobi bikuenzekela pebe nunku, umanye ne: nudi ba bungi. Vuluka ne: Yehowa udi usanka bua muudi uditatshisha ne anyima webe yonso. Dibenga diebe dia kumulekela ntshijadiki tshia ne: udi ukubenesha ne ukupesha bukole buudi nabu dijinga. * (Filip. 4:6, 7; 1 Pet. 5:7) Wewe wenzela Yehowa mudimu nansha muudi usama, muikale ne butekete, anyi bua bungi bua malu adi akusamisha mutu, ikala mutuishibue ne: udi usankisha Yehowa.

21. Bu mudi Yehowa utuambuluisha, tuetu bonso netuenze tshinyi?

²¹ Diakalenga, kudi dishilangana pankatshi pa lubilu luetu lua ku makasa elu ne luvua Paulo muakuile. Mu lubilu lua ku makasa ludibu batele mu Bible, anu muntu umue ke uvua upeta difutu. Kadi mu lubilu lua buena Kristo ludi lupetesha muoyo, muntu yonso udi unanukila ne lulamatu udi upeta muoyo wa tshiendelele. (Yone 3:16) Bualu bukuabu, mu lubilu lua ku makasa alu, banyemi bonso bavua ne bua kuikala tumatuma, tshianana bavua mua kupangila kutshimuna. Kadi ba bungi ba kutudi kabena tumatuma to, nansha nanku tudi tunanukila bonso. (2 Kol. 4:16) Bu mudi Yehowa utuambuluisha, tuetu bonso netunyeme lubilu elu too ne ku ndekelu!