1-2. Ntshinyi tshivua Yezu musue kuamba mu mêyi adi mu Yone 4:35, 36?

YEZU uvua wendela mu madimi, pamuapa mu a orje itshivua tshibeji anyi miana. (Yone 4:3-6) Tshikunyibua atshi tshivua tshienza ngondo mitue ku inayi bua kutulabu ntete yatshi. Yezu wakamba bualu kampanda buvua bumueneka kabuyi bumvuika to. Wakamba ne: “Bandishayi mêsu enu ne monayi madimi, mmatoke bua kunowa.” (Bala Yone 4:35, 36.) Uvua usua kuamba tshinyi?

² Bidi bimueneka ne: Yezu uvua wakula bua dinowa dia bantu dia mu tshimfuanyi. Mona tshivua tshifuma ku dienzeka. Yezu ukavua muyishe mukaji muena Samalea, yeye kumuteleja! Kadi pabi bena Yuda kabavua bapetangana ne bena Samalea to. Nunku pavuaye wakula bua madimi avua ‘matoke bua kunowa,’ musumba wa bena Samalea ukavua mumvuile bualu bua Yezu kudi mukaji au uvua wenda ulua kudiye bua kumuteleja. (Yone 4:9, 39-42) Mukanda kampanda udi umvuija malu a mu Bible udi wamba bua bualu ebu ne: “Luzuku luvua nalu bantu abu . . . luvua luleja ne: bavua bu ntete ikavua mikole mikumbane kutula.”

3. Wewe umona bantu bu Yezu, neubayishe mushindu kayi?

³ Kadi bua bantu baudi uyisha lumu luimpe? Utu ubamona bu ntete ikadi mikole bua kutula anyi? Biobi nanku, malu asatu aa neenzeke: Tshia kumpala, neuzuke bua kubayisha. Tshikondo tshia kunowa tshitu tshîpi; kakutu dîba dia kujimija to. Tshibidi, paudi umona bantu baudi uyisha bitaba lumu luimpe, newikale ne disanka. Bible udi wamba ne: “Bantu [batu] basanka tshikondo tshia dinowa.” (Yesh. 9:3) Tshisatu, neumone ne: muntu yonso eu udi mua kulua muyidi; nunku neumuyishe bilondeshile malu atuye musue.

4. Ndikasa kayi dia Paulo ditualonga mua kulonda mu tshiena-bualu etshi?

 ⁴ Yezu kavua umona ne: bena Samalea kabavua mua kulua bayidi to; kadi bayidi bende bobu bavua mua kuikala babamona nanku. Mbimpe tuikale tumona petu ne: bantu batudi tuyisha badi mua kulua bayidi ba Kristo. Mupostolo Paulo mmutushile dikasa dimpe dia kulonda. Ndikasa kayi adi? Mu tshiena-bualu etshi, netumone muvuaye 1) mumanye malu kampanda avua bantu bavuaye uyisha bitabuja, 2) ujingulula malu avuabu basue, ne 3) ubamona bu bantu bavua mua kulua bayidi ba Yezu.

5. Ntshinyi tshivua tshienze bua Paulo ikale mumanye bantu bavuaye uyisha mu nsunagoga?

⁵ Paulo uvua utamba kuyisha mu nsunagoga ya bena Yuda. Tshilejilu, mu nsunagoga wa mu Tesalonike, “munkatshi mua mbingu isatu, dituku dionso dia Nsabatu, uvua [weleshisha bena Yuda] meji ne malu a mu Mifundu.” (Bien. 17:1, 2) Bivua bimueneka ne: uvua udiumvua mudilekelele pavuaye mu nsunagoga. Uvua muana wa muena Yuda. (Bien. 26:4, 5) Bu muvua Paulo mumanye bena Yuda, uvua ukumbana kubayisha ne dieyemena anyi ne dishindika dionso.​—Filip. 3:4, 5.

6. Leja muvua bantu ba muaba wa tshisalu tshia mu Atena bashilangane ne bavua Paulo muyishe mu nsunagoga.

⁶ Pakavua baluishi ba Paulo bamuenzeje ku bukole bua kunyema mu Tesalonike ne pashishe mu Beloya, wakaya ku Atena. Muomu amu kabidi, “wakatuadija kueleshishangana meji ne bena Yuda ne bantu bakuabu bavua batendelela Nzambi mu nsunagoga.” (Bien. 17:17) Kadi pavuaye uyisha muaba wa tshisalu, wakapeta bantu ba mushindu mukuabu. Mu bantu abu muvua bena nkindi ne bantu ba bisamba bikuabu bavua bamona mukenji wa Paulo bu “dilongesha dipiadipia.” Bakamuambila ne: “Udi wamba amue malu adi umvuika menyi ku matshi etu.”​—Bien. 17:18-20.

7. Bilondeshile Bienzedi 17:22, 23, mmunyi muvua Paulo mushintulule nyishilu wende?

⁷ Bala Bienzedi 17:22, 23. Paulo kavua muyishe bantu ba bisamba bikuabu mu Atena mushindu wa muomumue ne uvuaye muyishe bena Yuda mu nsunagoga to. Uvua mua kuikala mudiebeje ne: ‘Mmalu kayi adi bantu ba mu Atena aba bitabuja?’ Wakatangila bintu bivua muaba au bimpe bimpe, kumonaye bintu bivua bileja ne: bantu abu bavua batendelela. Paulo wakalua kukeba bualu buvua bupetangana ne ntendelelu wabu eku bupetangana kabidi ne bulelela bua mu Mifundu. Mumvuiji kampanda wa malu a mu Bible udi  wamba ne: “Bu muvuaye muena Kristo muena Yuda, wakajingulula ne: bampangano bena Greke kabavua batendelela Nzambi ‘mulelela’ wa bena Yuda ne bena Kristo to, kadi wakaditatshisha bua kuleja ne: Nzambi uvuaye ubamanyisha kavua mu bulelela Nzambi muenyi kudi bena Atena to.” Nunku Paulo uvua mudiakaje bua kushintulula nyishilu wende. Wakambila bena Atena ne: mukenji wende uvua ufumina kudi “Nzambi udi kayi mumanyike” uvuabu bajinga kutendelela. Nansha muvua bantu ba bisamba bikuabu kabayi bamanye Mifundu, Paulo kakabalekela to. Kadi uvua ubamona bu ntete ikavua mikole bua kunowa, yeye kushintulula mushindu uvuaye ubayisha lumu luimpe.

8. a) Mmunyi muudi mua kujingulula malu atu bantu ba mu teritware webe bitabuja? b) Muntu yeye muambe ne: udi ne tshiende tshitendelelu, udi mua kumuandamuna bishi?

⁸ Anu bu Paulo, ikala utangila mudi muaba uudi. Keba bua kumanya bintu bidi bileja malu adi bantu ba mu teritware webe bitabuja. Mmunyi mudi muntu mulengeje kumbelu kuende? Dîna diende, bilamba bidiye muvuale, mushindu udiye mudilengeje, nansha miaku idiye upatula mukana bidi bileja tshitendelelu tshiende anyi? Pamuapa mmukuambile buludiludi ne: udi ne tshiende tshitendelelu. Patu muntu wambila Flutura, mpanda-njila kampanda wa pa buende nanku, utu umuandamuna ne: “Tshiena mulue bua kukuitabijija malu a mu tshietu tshitendelelu to, kadi mbua kuyukila nebe bua tshiena-bualu etshi . . .”

9. Mmalu kayi autu witabuja audi mua kusangana kudi muntu udi utendelela?

⁹ Mbiena-bualu kayi biudi mua kuyukila ne muntu udi utendelela? Keba bua kumanya malu adi muntu au witabuja autu witabuja pebe. Udi mua kuikala utendelela anu Nzambi umue, witaba pamuapa ne: Yezu ke Musungidi wa bantu, anyi pamuapa witabuja ne: tudi mu tshikondo tshia malu mabi tshikadi pa kujika. Buelela pa malu anudi nuenu bonso nuitabuja bua kumuambila mukenji wa mu Bible mu mushindu udi umukoka ntema.

10. Ntshinyi tshitudi ne bua kukeba bua kumanya? Bua tshinyi?

¹⁰ Tumanye ne: bantu kabatu bitabuja malu onso atubu babalongesha mu bitendelelu biabu to. Nunku nansha wewe mumane kujingulula tshitendelelu tshia muntu, keba bua kumanya malu atuye yeye nkayende witabuja. Mpanda-njila kampanda wa pa buende wa mu Australie diende David udi wamba ne: “Bantu ba bungi lelu badi basambakaja nkindi ne malongesha a mu bitendelelu biabu.” Donalta wa mu Albanie udi wamba ne: “Bantu bakuabu batudi tuyisha badi bamba ne: batu baya mu nzambi, kadi pashishe balua kuamba ne: kabatu bitabuja Nzambi menemene to.” Muanetu  kampanda udi misionere mu Argentine udi uleja ne: kudi bantu badi bamba ne: badi bitabuja Busantu bunsantu kadi kabayi mua kuikala bitabuja mu bulelela ne: Tatu, Muana, ne nyuma muimpe nNzambi umue to. Udi wamba ne: “Kumanya bualu abu kudi kuenza bua bikale bipepele menemene bua kumanya malu adi muntu witabuja atudi petu tuitabuja.” Nunku keba bua kumanya tshidi bantu bitabuja menemene. Dîba adi, anu bu Paulo, udi mua ‘kulua malu onso kudi bantu ba mishindu yonso.’​—1 Kol. 9:19-23.

11. Bilondeshile Bienzedi 14:14-17, mmunyi muvua Paulo muyishe bantu ba mu Luseta mu mushindu uvua ubasankisha?

¹¹ Bala Bienzedi 14:14-17. Paulo wakajingulula malu avua bantu bavuaye uyisha basue, pashishe kubayishaye bilondeshile malu au. Tshilejilu, bantu bavuaye muyishe mu Luseta bavua ne dimanya dikese dia Mifundu anyi kabavua bayimanye muine to. Nunku Paulo wakabeleshisha meji mu mushindu uvuabu mua kumvua. Wakakula bua dikuama dia bia pa madimi ne mushindu udi Nzambi mutufuke bua kusanka ne muoyo utudi nawu. Wakamba mêyi, kufilaye ne bilejilu bivua bantu mua kumvua lukasa.

12. Ntshinyi tshiudi mua kuenza bua kujingulula malu adi muntu musue bua umuyishe bilondeshile malu au?

¹² Ikala ne busunguluji bua kumanya malu adi bantu ba mu teritware webe basue ne ubayishe bilondeshile malu au. Ntshinyi tshiudi mua kuenza bua kumanya malu adi muntu musue paudi uya kudiye anyi ubuela kuende? Tudi tuambulula, ikala utangila mudi muaba uudi. Pamuapa muntu au udi udima mu mpata, ubala mukanda, ulongolola moto, anyi wenza mudimu mukuabu. Biobi bikumbana, tuadija nende muyuki bilondeshile tshidiye wenza atshi. (Yone 4:7) Nansha bilamba bidi muntu muvuale bidi mua kukuambila bualu. Bidi mua kuikala bileja ditunga diabu, mudimu wende, anyi manaya atuye munange. Gustavo udi wamba ne: “Ngakatuadija muyuki ne nsongalume kampanda wa bidimu 19 uvua muvuale triko muzola muimbi wa misambu kansanga muende lumu. Meme kumuebeja bua muimbi wa misambu  au, yeye kungambila bua tshinyi uvua mumunange. Muyuki au wakamufikisha ku dilonga Bible, ne lelu ukadi muanetu.”

13. Mmushindu kayi udi usankisha muntu uudi mua kumulomba bua kulonga nende Bible?

¹³ Paudi ulomba muntu bua kulonga nende Bible, enza bua bimusankishe; umuleje muikala dilonga mua kumuambuluisha. (Yone 4:13-15) Tshilejilu, mamu kampanda uvua musue kulonga Bible wakabueja muanetu mukuabu diende Poppy mu nzubu muende. Pakamona Poppy diploma ku tshimanu divua dileja ne: uvua mulongeshi munene uvua mulonge tulasa tua bulongeshi, wakamuleja pende ne: tuetu petu tutu tulongesha bantu ku diambuluisha dia dilonga dia Bible ne bisangilu bietu. Wakitaba bua kulonga, kuyaye mu bisangilu dituku diakalonda, ne kuluaye kubuela kabidi mu mpuilu wa tshijengu. Tshidimu tshimue pashishe, yeye kubatijibua. Diebeja ne: ‘Mmalu kayi atu bantu bantu mpinganyina basue? Ndi mua kubumvuija mutu dilonga dietu dia Bible dienzeka, mbumvuija mu mushindu udi mua kubasankisha anyi?’

14. Mmushindu kayi uudi mua kulongesha mulongi yonso wa Bible bilondeshile tshidiye?

¹⁴ Paukadi mutuadije kulongesha muntu Bible, ikala udilongolola kumpala kua wewe kuya kumulongesha, mumanye nsombelu wende ne malu atuye musue. Paudi udilongolola, sungula mvese iwabala, filme iwaleja, ne bilejilu bidi mu bikoso biwumvuija nabi malongesha a mu Bible. Diebeja ne: ‘Ntshinyi tshidi mua kutamba kusankisha mulongi wanyi eu ne kulenga muoyo wende?’ (Nsu. 16:23) Mu Albanie, muntu mukaji mukuabu uvua ulonga ne mpanda-njila kampanda diende Flora. Wakamba wosha ne munu muiku ne: “Meme tshiena mua kuitaba dilongesha dia dibishibua dia bantu ku lufu to.” Flora kakamuenzeja to. Udi wamba ne: “Ngakamona ne: bivua bikengela anji afike ku dimanya Nzambi udi mulaye dibishibua dia bantu ku lufu.” Kutuadija dîba adi, misangu yonso ivua Flora ulonga nende, uvua utamba kumuleja mudi Yehowa ne dinanga, ne meji, ne bukole. Panyima pa matuku, mulongi wende wakitabuja dibishibua dia bantu ku lufu ne lukasa luonso. Lelu udi Ntemu wa Yehowa wa tshisumi.

15. Bilondeshile Bienzedi 17:16-18, mbikadilu kayi bivua mu Grese wa kale bivua bisamisha Paulo mutu? Bua tshinyi kavua mulekele kuyisha bena Atena?

¹⁵ Bala Bienzedi 17:16-18. Nansha muvua tshimenga tshia Atena tshiuwule ntente ne mpingu, ne malu a masandi, ne nkindi ya bampangano, Paulo kavua mulekele bua kubayisha to; kavua nansha mulekele malu avuabu bamuamba amutekesha mu mikolo to. Paulo muine wakalua muena Kristo nansha muvuaye “mupendi wa Nzambi, mukengeshanganyi ne mupange bukalanga.” (1 Tim. 1:13) Anu muvua Yezu umona ne: Paulo uvua mua kulua muyidi, ke muvua Paulo umona pende bena Atena. Kavua muele bua tshiombe musabu to.​—Bien. 9:13-15; 17:34.

16-17. Ntshinyi tshidi tshileja ne: bantu ba mishindu yonso badi mua kulua bayidi ba Kristo? Fila tshilejilu.

¹⁶ Mu bidimu lukama bia kumpala, bantu ba mishindu yonso bakalua bayidi ba Yezu. Pavua Paulo ufundila bena Kristo ba mu tshimenga tshia Kolinto tshia mu Grese, wakamba ne: kumpala bena mu tshisumbu atshi bakuabu bavua benji ba malu mabi anyi bena buenzavi bua dikema. Kuluaye kuamba ne: “Ke muvua bamue ba munkatshi muenu nanku. Kadi nudi basukudibue.” (1 Kol. 6:9-11) Uvuaku mua kuela meji ne: bantu abu bavua mua kushintuluka ne kulua bayidi anyi?

¹⁷ Lelu, bantu ba bungi mbasue kushintulula malu adi akengela bua kulua bayidi ba Yezu. Tshilejilu, mu Australie, mpanda-njila kampanda wa pa buende diende Yukina wakafika ku  dimona ne: bantu ba mishindu yonso badi mua kuitaba mukenji wa mu Bible. Dimue edi pavuaye muaba kampanda wa kusumbishila bintu, wakamona nsongakaji mukuabu ne nsalu pambidi muvuale bilamba bimuzebelelangane. Yukina udi wamba ne: “Ngakanji kuelakana, kadi pashishe meme kutuadija kuyukila nende. Ngakalua kumona ne: uvua munange malu a mu Bible bikole, bualu mu nsalu ivuaye nayi pambidi kuvua mikuabu ivua ya mvese ya mu mukanda wa Misambu!” Nsongakaji au wakatuadija kulonga Bible ne kubuela mu bisangilu. *

18. Bua tshinyi ki mbimpe kudianjila kuela meji ne: bantu nebashintuluke anyi kabakushintuluka?

¹⁸ Yezu uvua mumone ne: bia pa madimi bikavua bikole bua kubinowa bualu uvua muindile ne: bantu ba bungi nebamulonde anyi? Tòo. Mifundu ivua midianjile kuleja ne: bavua ne bua kumuitabuja anu kudi bantu bakese. (Yone 12:37, 38) Yezu uvua kabidi ne tshipedi tshia dikema tshia kumanya malu avua mu mioyo ya bantu. (Mat. 9:4) Nansha nanku, Yezu wakatamba kudifila bua bantu bakese bavua mua kulua kumuitabuja; kadi uvua uyisha kabidi bantu bonso ne tshisumi. Tuetu katuena mua kumanya bidi mu mioyo ya bantu to, nunku katuena ne bua kudianjila kuelela muntu anyi bena mu teritware wetu meji ne: nebitabe anyi kabakuitaba to. Kadi tuikale tumona ne: badi mua kushintuluka. Muanetu mukuabu misionere mu Burkina Faso diende Marc udi uleja bualu ebu mushindu eu: “Bantu bantu ngelela meji ne: nebaye kumpala ke batu batamba kulekela kulonga. Kadi bantu mmona ne: kabakuya kule, ke batu baya kumpala bimpe. Nunku ngakalua kumona ne: kulekela nyuma wa Yehowa utulombola nkutambe buimpe.”

19. Mmunyi mutudi ne bua kumona bantu ba mu teritware wetu?

¹⁹ Bidi mua kuanji kumueneka bu ne: kakuena bantu ba bungi mu teritware badi bu ntete ikadi mikole bua kutula to. Kadi vuluka tshivua Yezu muambile bayidi bende. Madimi mmatoke, mmumue ne: akadi makumbane kunowa. Bantu badi mua kushintuluka ne kulua bayidi ba Kristo. Yehowa udi umona bantu badi mua kulua bayidi aba bu “bintu bia mushinga.” (Hag. 2:7) Tuetu tumona bantu mudi Yehowa ne Yezu babamona, netumanye malu a mu nsombelu wabu ne adibu basue. Katuakubamona bu benyi to, kadi bu bantu badi mua kulua bena Kristo netu.