1-2. Mmu mushindu kayi mutudi mua kulonda mu makasa a Yezu? Fila tshilejilu.

FUANYIKIJABI ne: udi mu bantu badi benza luendu bapitshila mu tshipela tshia lusenga lua bungi tshia wewe muteke bilele ujimina. Badi banulombola kudi muntu udi mumanye tshipela atshi bimpe. Padiye wenda wenda, makasa ende adi enda azoleka mu lusenga amu. Katupa aka, udi unujimina ku mêsu! Nansha nanku kanuena numvua buôwa to. Kadi wewe ne banudi nabu mu luendu nudi nutuadija kulonda makasa ende au bimpe bimpe!

² Tuetu bena Kristo balelela tudi anu bu badi benza luendu tupitshila petu mu tshipela tshia buena atshi. Tshipela atshi mbulongolodi bubi ebu. Diakalenga, Yehowa mmutupeshe Muanende Yezu Kristo udi Mulombodi muimpe be! Makasa ende ngatudi ne bua kulonda bimpe menemene. (1 Pet. 2:21) Bilondeshile mumanyi kampanda wa malu a mu Bible, muaba eu Petelo udi ufuanyikija Yezu ne mulombodi. Anu bu mulombodi udi wenda ushiya makasa padiye wenda uya, Yezu mmushiye makasa atudi mua kulonda. Tuandamunayi nkonko isatu idi itangila dilonda dia makasa a Yezu eyi: Kulonda mu makasa a Yezu kudi kumvuija tshinyi? Bua tshinyi kualonda? Tshia kuenza ntshinyi bua kualonda?

3. Kulonda mu makasa a muntu kudi kumvuija tshinyi?

³ Kulonda mu makasa a muntu kudi kumvuija tshinyi? Mu Bible muaku “kuenda” ne muaku “makasa” itu imue misangu yumvuija nsombelu wa muntu. (Gen. 6:9; Nsu. 4:26) Tshilejilu tshidi muntu ushiya badi mua kutshifuanyikija ne makasa adiye wenda ushiya padiye wenda uya. Nanku kulonda mu makasa a muntu kudi kumvuija kulonda tshilejilu tshiende, anyi kumuidikija.

4. Kulonda mu makasa a Yezu kudi kumvuija tshinyi?

 ⁴ Kadi mpindieu, kulonda mu makasa a Yezu kudi kumvuija tshinyi? Mu mêyi makese, nkuidikija tshilejilu tshiende. Mu mvese wetu wa nshindamenu, mupostolo Petelo udi wakula bua tshilejilu tshimpe tshia dinanukila mu makenga tshidi Yezu mushiye; kadi kudi mishindu mikuabu ya bungi itudi mua kuidikija Yezu. (1 Pet. 2:18-25) Mu bulelela, nsombelu mujima wa Yezu, mmumue ne: malu onso avuaye muambe ne avuaye muenze, ntshilejilu tshia tuetu kulonda.

5. Bantu bapange bupuangane badi menemene mua kulonda tshilejilu tshia Yezu muntu mupuangane anyi? Umvuija.

⁵ Bu mutudi bantu bapange bupuangane, tudi mua kukumbana menemene bua kulonda tshilejilu tshia Yezu anyi? Eyowa, tudi mua kukumbana. Vuluka ne: Petelo udi utulomba bua “kulonda mu makasa [a Yezu] bimpe menemene”; kadi ki mmuambe bua tualonde mu mushindu mupuangane to. Tuetu balonde mu makasa ende bimpe bimpe, tuenza muetu muonso mua kuenza nansha mutudi bantu bapange bupuangane, netutumikile mêyi a mupostolo Yone a ne: ‘nutungunuke ne kuenda anu bu muvua yeye au [Yezu] muende.’​—1 Yone 2:6.

6-7. Bua tshinyi tudi mua kuamba ne: kulonda mu makasa a Yezu nekutusemeje pabuipi menemene ne Yehowa?

⁶ Kulonda mu makasa a Yezu nekutusemeje pabuipi menemene ne Yehowa. Bua tshinyi tudi tuamba nanku? Tshia kumpala, Yezu mmutushile tshilejilu tshimpe tshitambe tshia mua kuikala ne nsombelu udi usankisha Nzambi. (Yone 8:29) Nanku tuetu tulonda mu makasa a Yezu, netusankishe Yehowa. Netuikale kabidi batuishibue ne: Tatu wetu wa mu diulu neasemene pabuipi ne badi baditatshisha bua kuikala balunda bende.​—Yak. 4:8.

⁷ Tshibidi, Yezu uvua widikija Tatuende bimpe menemene. Ke bualu kayi wakamba ne: “Muntu yonso udi mummone mmumone kabidi Tatu.” (Yone 14:9) Patudi tuidikija ngikadilu ya Yezu ne  mushindu uvuaye wenzela bantu malu, tshilejilu luse luvuaye mumvuile muena nsudi, muakumvuilaye mukaji uvua ne disama dikole, ne muakaditekaye pa muaba wa bavua bafuishe, tudi tuidikija kabidi Yehowa. (Mâko 1:40, 41; 5:25-34; Yone 11:33-35) Patudi tuenda tuidikija ngikadilu ya Yehowa, tudi tusemena kabidi pabuipi nende menemene.

8. Umvuija bua tshinyi kulonda mu makasa a Yezu nekutuambuluishe bua “kutshimuna” ba pa buloba.

⁸ Kulonda mu makasa a Yezu kudi kutuambuluisha bua bulongolodi bubi ebu kabutubueji mu ditanaji. Yezu wakamba butuku bua muladilu wa lufu luende ne: “Ndi mutshimune ba pa buloba.” (Yone 16:33) Uvua musue kuamba ne: kavua mulekele ngelelu wa meji wa ba pa buloba, ne bipatshila biabu, ne malu avuabu benza bimunyanga to. Yezu kavua mupue bualu buvuabu bamutumine pa buloba muoyo nansha kakese; uvua mulue bua kubingisha Yehowa. Kadi netuambe tshinyi buetu tuetu? Kudi malu a bungi mu bulongolodi ebu adi mua kutubueja mu ditanaji. Kadi tuetu badifile mu dienza disua dia Yehowa kakuyi ditanaji anu bu Yezu, ‘netutshimune’ petu ba pa buloba.​—1 Yone 5:5.

9. Ntshinyi tshitudi ne bua kuenza bua tushale tuendela mu njila udi ufikisha ku muoyo wa tshiendelele?

⁹ Kulonda mu makasa a Yezu kudi kufikisha ku muoyo wa tshiendelele. Pavua nsongalume kampanda mubanji muebeje tshivuaye mua kuenza bua kupetaye muoyo wa tshiendelele, Yezu wakamuandamuna ne: “Luaku, undonde.” (Mat. 19:16-21) Yezu wakambila bena Yuda bakuabu bavua kabayi bitaba muvuaye Kristo ne: “Mikoko yanyi idi . . . indonda. Ndi nyipesha muoyo wa tshiendelele.” (Yone 10:24-29) Yezu wakambila kabidi Nikodemo uvua muena ku Tshilumbuluidi Tshinene ne uvua wanyisha malu avuaye ulongesha ne: bantu bavua baleja “ditabuja kudiye” bavua ne bua kupeta “muoyo wa tshiendelele.” (Yone 3:16) Tudi tuleja ditabuja kudi Yezu patudi tutumikila malu avuaye mulongeshe mu mêyi ne mu bienzedi. Tuetu tuenza nanku netushale tuendela mu njila udi ufikisha ku muoyo wa tshiendelele.​—Mat. 7:14.

10. Ntshinyi tshitudi ne bua kuenza bua ‘kuenda kumanya’ Yezu bimpe menemene? (Yone 17:3)

¹⁰ Kumpala kua kulonda mu makasa a Yezu bimpe menemene, tudi ne bua kuenda kumumanya. (Bala Yone 17:3.) ‘Kuenda kumanya’ Yezu mbualu butudi ne bua kutungunuka ne kuenza. Tudi ne bua kumumanya bimpe menemene, mmumue ne: kumanya ngikadilu yende, ngelelu wende wa meji, kumanya ne mikenji yende. Nansha tuetu ne bidimu bungi kayi mu bulelela, bidi bikengela tutungunuke ne kuenda kumanya Yehowa ne Muanende.

11. Mmalu kayi adi mu Evanjeliyo inayi?

¹¹ Bua dinanga, Yehowa mmufundishe Evanjeliyo inayi mu Dîyi diende idi yenza bua tuende tumanya Muanende. Evanjeliyo eyi idi ilonda malu a mu nsombelu wa Yezu ne a mudimu wende wa buambi. Malu au adi atuleja bivua Yezu muambe, bivuaye muenze, ne atuleja muvuaye udiumvua.  Mikanda inayi eyi idi ituambuluisha bua ‘kuela meji bimpe’ bua tshilejilu tshia Yezu anyi kutshikonkonona bimpe. (Eb. 12:3) Mu mikanda ayi mudi makasa adi Yezu mushiye. Nanku patudi tukonkonona Evanjeliyo, tudi tuenda tumanya Yezu bimpe menemene. Tuetu benze nanku, netulonde mu makasa ende bimpe menemene.

12. Ntshinyi tshitudi mua kuenza bua Evanjeliyo kutuambuluishayi bikole?

¹² Bua malu adi mu Evanjeliyo au kutuambuluishawu bikole, ki mbimpe tuabala anu tshianana to. Bidi bikengela tukebe dîba dia kualonga bimpe bimpe ne kuelela meji bikole. (Fuanyikija ne Yoshua 1:8, dimanyisha dia kuinshi kua dibeji.) Mpindieu tumonayi ngenyi ibidi idi mua kutuambuluisha bua kuelangana meji a malu a mu Evanjeliyo atudi tubala ne kuatumikila.

13. Ntshinyi tshiudi mua kuenza bua malu adibu balonde mu Evanjeliyo amueneke ne: avua menzeke bushuwa?

¹³ Tshia kumpala, enza bua malu a mu Evanjeliyo au amueneke ne: avua menzeke bushuwa. Difuanyikijila malu avua menzeke au mu lungenyi. Teta kuamona, kuumvua, ne kumvua muvua bantu badibu bakuile bumvua. Bua wewe kuenza nanku, enza makebulula mu mikanda yetu ya kulonga nayi. Konkonona malu adi mu mvese idi kumpala ne idi ilonda mvese iudi ulonga. Keba malu adi umvuija muvua bantu ne miaba idibu bakuile mu mvese ayi. Fuanyikija mvese iudi ulonga ne mvese ya mu Evanjeliyo mukuabu idi ilonda bualu bumue bumue abu. Imue misangu mufundi wa Evanjeliyo umue udi mua kuikala mufunde bualu kampanda bua mushinga budi mukuabu yeye kayi muambe to.

14-15. Ntshinyi tshitudi mua kuenza bua kutumikila malu a mu Evanjeliyo mu nsombelu wetu?

¹⁴ Tshibidi, teka malu a mu Evanjeliyo au mu tshienzedi. (Yone 13:17) Paukadi mumane kulonga malu kampanda a mu Evanjeliyo bimpe, dikonka ne: ‘Mu bindi mulonge ebi, kudiku bualu bundi mua kutumikila mu nsombelu wanyi anyi? Mmushindu kayi undi mua kuambuluisha muntu mukuabu ne malu andi mulonge aa?’ Ela meji bua muntu kampanda uudi mumanye, pashishe ukebe dîba dimpe diudi mua kuyukila nende bualu buudi mulonge abu ne dîyi dimpe ne kanemu.

 ¹⁵ Mpindieu tumonayi tshilejilu tshia mutudi mua kulonda ngenyi ibidi idibu bafile eyi. Netukonkonone bualu bua mukaji mukamba mupele uvua Yezu mumone mu ntempelo.

16. Umvuija malu muvuawu menzeke paudi ubala Mâko 12:41.

¹⁶ Enza bua malu adibu balonde amueneke ne: avua menzeke bushuwa. (Bala Mâko 12:41.) Difuanyikijila mu lungenyi muvua malu menzeke. Tudi mu dia 11 Nisana, tshidimu tshia 33, nkushadile Yezu matuku makese bua yeye kufua. Mmupitshishe mêba a bungi dituku adi ulongesha mu ntempelo. Balombodi ba bitendelelu mbasombe bamuluisha anu kumuluisha. Kumpala bamue ba kudibu bavua bamuebeje bua kumanya kuvua bukokeshi buende bufumine. Bakuabu pabu bavua bamuele nkonko ya kapangishe. (Mâko 11:27-33; 12:13-34) Mpindieu Yezu udi uya muaba mukuabu mu ntempelo amu. Bimueneka ne: mmuye muaba uvuabu babikila ne: Lubanza lua Bakaji, uvuaye mua kumona tushete tua makuta tuvua lua ku tshimanu tshia ntempelo bimpe. Udi usomba utuadija kutangila muvua bantu benda bela mapa abu mu tushete atu. Udi umona babanji ba bungi bela makuta a binjanja a bungi. Pamuapa udi lua pabuipi menemene ne tushete atu, nunku udi umvua mudi makuta au amatamu.

17. Ntshinyi tshivua mukaji mukamba udibu bakuile mu Mâko 12:42 muenze?

¹⁷ Bala Mâko 12:42. Katantshi aka, Yezu udi umona mukaji mukuabu. Mukaji au mmupele, ‘mukaji mukamba mukengi.’ (Luka 21:2) Udi mu nsombelu wa lutatu lua dikema; bidi bimueneka ne: utu uluangana bikole bua kupeta nansha tshiakudia tshietu etshi. Nansha nanku, udi uya ku kashete kamue ne welamu tukuta tukese tua binjanja tubidi mu mushindu wa bantu kabayi bamona; katuena nansha tumvuika muditu tudila paditu tumata mu kashete to. Yezu yeye mmumanye bungi bua makuta adiye muele, mmuele lepitona ibidi anyi tukuta tubidi tua tukese menemene tuvuaku tshikondo atshi. Tuine atu katuena tukumbana bua kusumba natu nansha mushamusha umue to. Mishamisha ke ivua tunyunyi tua mushinga mushadile menemene tuvuabu bapana bua kudia.

18. Bilondeshile Mâko 12:43, 44, ntshinyi tshivua Yezu muambe bua dipa dia mukaji mukamba?

¹⁸ Bala Mâko 12:43, 44. Bualu bua mukaji mukamba eu mbusankishe Yezu bikole. Nunku udi ubikila bayidi bende, ubaleja mukaji au wamba ne: “Mukaji mukamba mupele eu mmuele bia bungi kupita bakuabu bonso.” Pashishe udi umvuija ne: “Bonso [nangananga babanji] mbele biabu bia pa mutu, kadi yeye, nansha mudiye ukenga, mmuele bionso bivuaye nabi, biende bionso bivuaye nabi bua kudidisha.” Pavua mukaji mukamba muena lulamatu au mufile tuende tukuta tuonso tuvuaye mushale natu dituku adi, uvua muteke muoyo wende mu bianza bia Yehowa bua amutabalele.​—Mis. 26:3.

19. Mbualu kayi bua mushinga butudi tulonga mu mêyi avua Yezu muambe bua mukaji mukamba mupele?

¹⁹ Teka bualu ebu mu tshienzedi. Diebeja ne: ‘Mêyi adi Yezu muambe bua mukaji mukamba mupele eu adi andongesha tshinyi?’ Elabi meji bua mukaji au. Uvua mua kuikala mujinge kupesha Yehowa bia bungi. Kadi wakenza tshivuaye mukokeshe; wakapesha Yehowa tshiende tshionso tshivuaye natshi. Yezu uvua mumanye ne: tukuta tuende tuvua ne mushinga wa bungi ku mêsu kua Tatuende. Nanku dilongesha dia mushinga ndiodi edi: Yehowa udi usanka patudi tumupesha tshietu tshionso tshitudi bakokeshe, mmumue ne: kumuenzela mudimu ne muoyo wetu wonso ne anyima wetu yonso. (Mat. 22:37; Kolos. 3:23) Yehowa udi usanka padiye utumona tuenza tshionso tshitudi tukumbana bua kuenza! Bualu ebu budi butangila kabidi bungi bua dîba ne makanda bitudi mua kufila mu malu a ntendelelu wetu, kusakidila ne mudimu wa buambi ne bisangilu.

20. Leja muudi mua kutumikila bualu budi mu muyuki wa mukaji mukamba. Fila tshilejilu.

²⁰ Mmunyi muudi mua kutumikila bualu budi  mu muyuki wa mukaji mukamba? Ela meji bua bantu kampanda badi bajinga bua babajadikile ne: mudimu udibu benzela Yehowa udi umusankisha. Tshilejilu, udi mumanye muanetu wa bakaji kampanda udi mua kuikala udipisha anyi udimona katshiyi ne mushinga bua mudiye katshiyi ne bukole bua mubidi anyi ne makanda a kuyisha bikole muvuaye uyisha kumpala anyi? Peshi kudi muanetu wa balume kampanda uudi mumanye udi mutekete mu maboko bua mudiye katshiyi mua kulua ku Nzubu wa Bukalenge dituku dionso dia bisangilu bua disama dia munanunanu didiye nadi? Bantu ba nanku bambila ‘mêyi mimpe adi mua kubakolesha.’ (Ef. 4:29) Bambila bualu budi bukolesha ku muoyo butudi balonge mu tshilejilu tshia mukaji mukamba mukengi. Mêyi awabakankamija nau adi mua kubajadikila kabidi ne: Yehowa udi usanka padibu bamupesha tshiabu tshionso tshidibu bakokeshe. (Nsu. 15:23; 1 Tes. 5:11) Paudi wela bakuabu kalumbandi bua mudibu bapesha Yehowa tshiabu tshionso tshidibu bakokeshe nansha tshiotshi tshikese, udi ulonda mu makasa a Yezu bimpe menemene.

21. Udi mudisuike bua kuenza tshinyi?

²¹ Tudi ne disanka dia bungi bua mudi malu a mu Evanjeliyo atuleja malu a bungi a nsombelu wa Yezu ne atuambuluisha bua kumuidikija, kulonda mu makasa ende bimpe menemene! Kuenaku mua kulonga Evanjeliyo eyi mu didilongela diebe anyi mu ntendelelu wenu wa mu dîku anyi? Tuvuluke ne: bua dilonga dia nunku kutuambuluishadi bimpe menemene, bidi bikengela tuenze bua malu au amueneke ne: avua menzeke bushuwa ne tuteke bitudi tulonga mu tshienzedi. Pa kumbusha dilonda bivua Yezu muenze, bidi bikengela tuteleje kabidi bivuaye muambe. Mu tshiena-bualu tshialonda, netumone tshidi mêyi a ndekelu avua Yezu muambe kumpala kua kufuaye mua kutulongesha.