Bua tshinyi Yezu uvua muambulule mêyi a Davidi adi mu Misambu 22:1 kumpala kua kukulaye muoyo?

▪ Mu mêyi a ndekelu avua Yezu muambe kumpala kua kukulaye muoyo mudi a mu Matayi 27:46 aa: “Nzambi wanyi, Nzambi wanyi, udi mundekele bua tshinyi?” Pavua Yezu muambe mêyi aa, uvua mukumbaje avua mufundi wa misambu Davidi muambe mu Misambu 22:1. (Mâko 15:34) Tuetu bambe ne: Yezu uvua muambe nanku bualu uvua mutekete mu mikolo peshi bualu uvua muanji mujimije ditabuja, tudi batupakane. Yezu uvua mujingulule bimpe tshivuaye ufuila, ne uvua muanyishe bua kufua. (Mat. 16:21; 20:28) Uvua mumanye kabidi ne: dîba dikalaye utata ne lufu, Yehowa uvua ne bua kumbusha “lupangu lua bukubi” kayi luonso luvua lumunyunguluke. (Yobo 1:10) Nanku Yehowa uvua mulekele bua Yezu aleje ne: neashale anu mumulamate nansha bamumueneshe kasuba mushindu kayi kumpala kua kufuaye.​—Mâko 14:35, 36.

Kadi bua tshinyi Yezu uvua muambulule mêyi a mu Misambu au? Nansha mutudi katuyi bamanye menemene tshivuaye muambidile mêyi au, tuanji tukonkononayi amue malu avua mua kuikala menze bua aambulule. *

Pavua Yezu muambe mêyi aa, uvua usua kuleja ne: Yehowa kavua mua kuenza bualu pavuaye utata ne lufu apu anyi? Bivua bikengela ne: Yezu afute tshia kupikulangana natshi Yehowa kayi mumukuatshishe to. Uvua pende muntu wa mashi  ne mâyi ne bivua bikengela afue bua “alabuile muntu yonso lufu.”​—Eb. 2:9.

Pavua Yezu muambulule mêyi makese a mu Musambu au, uvua ujinga bua bantu bavuluke mêyi makuabu onso a muomu anyi? Tshikondo atshi bena Yuda bavua ne tshibidilu tshia kukuata mêyi a bungi a mu mukanda wa Misambu ku muoyo. Bobu babatelele mêyi a mu mvese kampanda, bavua bavuluka Musambu wonso mujima diakamue. Pikalabi ne: ke tshivua Yezu musue kuenza, nanku uvua mua kuikala muambuluishe bayidi bende bena Yuda bua bavuluke mêyi a bungi a buprofete adi atangila lufu luende adi mu Musambu wa 22 eu. (Mis. 22:7, 8, 15, 16, 18, 24) Kabidi lua ku ndekelu kua muine Musambu eu, badi batumbisha bumfumu bua Yehowa baleja mudibu butangalake too ne ku ntengu ya buloba.​—Mis. 22:27-31.

Pavua Yezu muambulule mêyi a Davidi aa, uvua usua kuleja ne: kavua ne bualu bubi buvuaye muenze anyi? Kumpala kua yeye kufua, bavua bakose tshilumbu tshiende bibi bamba muvuaye mupende Nzambi. (Mat. 26:65, 66) Bena ku Tshilumbuluidi tshinene bavua benze tshisangilu tshia lukasa lukasa butuku bua kulumbuluisha Yezu. Mikenji kayivua ibanyishila bua kuenza tshisangilu dîba adi to. (Mat. 26:59; Mâko 14:56-59) Pavua Yezu muambulule mêyi au bu udi wela lukonko, uvua mua kuikala ukoka ntema ya bantu bua bamanye ne: kavua muenze bualu bubi buvuabu ne bua kumushipela to.

Yezu uvua kabidi usua kuvuluija bantu ne: nansha muvua Davidi mufundi wa Musambu au mukenge, kabiena bileja ne: Yehowa uvua mumubenge anyi? Lukonko lua Davidi kaluena luleja ne: uvua mujimije ditabuja to. Yeye mumane kuela lukonko alu, wakamba muvuaye mutuishibue ne: Yehowa neapandishe bantu bende, ne Yehowa wakatungunuka ne kumubenesha. (Mis. 22:23, 24, 27) Bia muomumue, nansha muvua Yezu “Muana wa Davidi” ukenga ku mutshi kuvuabu bamupopele, kabiena biumvuija ne: Yehowa uvua mumubenge to.​—Mat. 21:9.

Yezu uvua uleja kanyinganyinga kakole kavuaye naku bua muvua Yehowa muanji kulekela dimukuba bua lulamatu luende lutetshibue menemene anyi? Yehowa kavua mulongolole katshia ku tshibangidilu bua Muanende akenge ne afue to. Biakalomba bua enze nanku pakenza Adama ne Eva mpekatu. Yezu kavua muenze bualu bubi nansha bumue to, kadi bivua bikengela akenge ne afue bua nkonko ivua Satana mujule ipete mandamuna ne bua afile tshia kupikulangana natshi tshivua mua kukuula tshivua bantu bajimije. (Mâko 8:31; 1 Pet. 2:21-24) Bualu ebu buvua mua kukumbana anu pavua Yehowa wanji ulekela Yezu mu tshipolo kampanda kayi umukuba to, bua musangu wa kumpala katshia wamufuka.

Yezu uvua ujinga bua bayidi bende bamanye bua tshinyi Yehowa uvua muanyishe bua afuile ku mutshi anyi? * Uvua mumanye ne: kufua lufu lua muena tshibawu mupopela ku mutshi lua mushindu au kuvua ne bua kulenduisha bantu ba bungi. (1 Kol. 1:23) Nanku bayidi bende bobu bimanyine pa bualu menemene buvua Yezu mufuile, bavua bafika ku dimanya mushinga wa lufu alu. (Gal. 3:13, 14) Bavua mua kumuangata bu Mupandishi kadi ki mbu muena tshibawu to.

Nansha katuyi bajadike bimpe tshivua Yezu muambuluile mêyi a Davidi au, uvua mumanye yeye muine ne: uvua muenze disua dia Yehowa pavuaye mufuile ku mutshi wa makenga. Katupa kakese mumane kuamba mêyi au, wakamba kabidi ne: “Bualu buakumbanyi!” (Yone 19:30; Luka 22:37) Bushuwa, bu muvua Yehowa muanji kulekela Yezu kayi umukuba bua tshipolo kampanda, biakapesha Yezu mushindu wa kukumbajaye malu onso avuaye muluile pa buloba. Bivua bimupeshe kabidi mushindu wa kukumbaja malu onso avuabu bafunde bua bualu buende “mu Mikenji ya Mose, mu mifundu ya Baprofete ne mu Misambu.”​—Luka 24:44.