Mu mukanda kampanda badi bamba bua mutshipu ne: “ndîyi didi muntu upatula anyi bualu budiye ulaya bua kukumbaja kabiyi bia bilele to. Misangu ya bungi batu batelamu Nzambi bua kujadika mudiye muteleje.” Mutshipu udi mua kuikala wa mukana peshi mufunda.

Bamue badi mua kuela meji ne: ki mbimpe kuditshipa to, bualu Yezu uvua muambe ne: “Kanuditshipi nansha kakese . . . Dîyi dienu dia ne: ‘Eyowa,’ dikale anu eyowa; dia ne: ‘Tòo,’ dikale anu tòo; bualu dîyi disakidila didi difuma kudi mubi.” (Mat. 5:33-37) Bushuwa, Yezu uvua mumanye ne: Mikenji ya Mose ivua ilomba bena Isalele bua kuditshipa mu malu kampanda, kabidi ne: batendeledi ba Yehowa ba lulamatu bavua baditshipe mitshipu. (Gen. 14:22, 23; Ekes. 22:10, 11) Uvua mumanye kabidi ne: Yehowa muine pende uvua muditshipe. (Eb. 6:13-17) Nunku Yezu kavua usua kuamba ne: katuena ne bua kuditshipa mitshipu to, nansha kakese. Kadi, uvua udimuija bantu ku diditshipa mitshipu ya malu a tshianana peshi idi kayiyi ipetesha bualu bua nsongo. Tudi ne bua kuikala tukumbaja malu atudi tulaya bua kuenza, bualu ke tshidi Yehowa musue bua tuenze.

Mpindieu, ntshinyi tshiudi mua kuenza bobu bakulombe bua kuditshipa mutshipu? Tshia kumpala, ikala mujadike ne: neukumbaje bualu buudi muditshipile. Wewe mumone ne: kuakukumbana to, nebikale bimpe wewe kuyi muditshipe to. Badi batudimuija mu Dîyi dia Nzambi ne: “Mbimpe wewe kubenga kuditshipa pamutu pa kuditshipa kadi kubenga kukumbaja.” (Muam. 5:5) Bualu buibidi, konkonona mêyi manene adi akula bua mitshipu, pashishe wenze malu bipetangana ne tshidi kondo kebe ka muoyo kadi kalongesha bimpe kakuambila bua kuenza. Mmêyi manene kayi atudi mua kukonkonona?

Mitshipu mikuabu itu ipetangana ne disua dia Nzambi. Tshilejilu, patu Bantemu ba Yehowa baselangana batu balayangana malu a mushinga a kutumikila mu dibaka. Malu au adi pawu mutshipu. Mulume ne mukaji batu balayangana malu ku mêsu kua Yehowa ne ku mêsu kua bantu badibu nabu muaba au. Batu balayangana bua kunangangana, kutabalelangana ne kunemekangana “matuku abu onso a muoyo.” (Bantu bakuabu badi baselangana badi mua kubenga kuamba mêyi aa anu mudiwu emu, tshibi badi benza anu mutshipu kumpala kua Nzambi.) Nunku badi balua mulume ne mukaji, benzejibue bua kusomba pamue matuku abu onso a muoyo. (Gen. 2:24; 1 Kol. 7:39) Mutshipu wa dibaka eu mmuakanyine, ne udi mu diumvuangana ne disua dia Nzambi.

Mitshipu mikuabu kayena ipetangana ne disua dia Nzambi to. Tshilejilu, muena Kristo mulelela kena mua kuditshipa bua kuambula tshingoma kuluangena ditunga, peshi bua kulekela buntemu to. Kuenza nanku nkudiatakaja mikenji ya Nzambi. Bena Kristo kabena ne bua ‘kuikala ba pa buloba’  to. Nanku katuena ne bua kubuelakana mu bilumbu bia bena mu bulongolodi ebu anyi mu mvita idibu baluangana to.​—Yone 15:19; Yesh. 2:4; Yak. 1:27.

Mitshipu mikuabu mbualu bua muntu ne kondo kende ka muoyo. Imue misangu kumpala kua kuditshipa mutshipu, bidi mua kutulomba bua kuelangana meji a mubelu wa Yezu wa ne: “nufute Kaisa bintu bia Kaisa, kadi nufute Nzambi bintu bia Nzambi.”​—Luka 20:25.

Fuanyikijabi ne: muena Kristo udi uwuja mabeji bua kulua muena mu ditunga kampanda, peshi bua kulomba mukanda wa njila, kadi ulua kumanya pashishe ne: bidi bikengela aditshipe bua bualu abu. Mu matunga bu au, kuditshipa aku kuoku kumvuija ne: udi uditshipa bua kuenza malu adi abengangana ne mikenji ya Nzambi, kondo kende ka muoyo kalongesha kudi Bible kakakumuanyishila bua kuitaba bualu abu to. Kadi mbulamatadi udi pamuapa mua kumuanyishila bua kushintulula mêyi atubu bamba bua kuditshipa au, bua apetangane ne tshidi kondo kende ka muoyo kitaba.

Kuitaba bua kuamba mêyi mashintulula au bua kuditshipa kudi mua kupetangana ne dîyi dinene didi mu Lomo 13:1 dia ne: “Muntu yonso akokele bakokeshi badi ku mutu.” Nunku muena Kristo udi mua kumona ne: kakuena bualu bubi yeye muitabe bua kuditshipa bua bualu bukavua Nzambi mutumine muntu yonso dîyi bua kuenza.

Mbimpe ulonde kabidi tshidi kondo kebe ka muoyo kakuambila bobu bakulomba bua kukuata tshintu kampanda, anyi kuenza jeste kansanga dîba diudi uditshipa. Bena Lomo ne bena Sekutiya ba mu bikondo bia kale bavua baditshipa bakuate miele yabu ya mvita, balomba bukole bua nzambi kampanda wa mvita bua tshikale tshijadiki tshia ne: muntu uvua uditshipa au ngua kueyemena. Bena Greke bavua bela tshianza muulu dîba divuabu baditshipa. Pavuabu benza nanku, bavua bitaba ne: kudi bukole bua nzambi kampanda uvua uteleja bivuabu bamba anyi benza abi, nzambi udi bantu ne bua kubadila malu.

Tudi bamanye ne: batendeledi ba Yehowa kabena mua kuditshipa kumpala kua dibendele dia ditunga didi mu malanda ne bitendelelu bia dishima to. Kadi tshiudi mua kuenza ntshinyi wewe ku tubadi, bakulomba bua kutenteka tshianza pa Bible ne kuditshipa bua kuamba anu bulelela? Bua bualu ebu, udi mua kuitaba bua kuenza nanku bualu mu Bible badi bakula bua bantu ba lulamatu bavua benze jeste kampanda bua kuditshipa. (Gen. 24:2, 3, 9; 47:29-31) Mbimpe wikale mumanye ne: paudi wenza mutshipu wa mushindu au, udi uditshipa kumpala kua Nzambi ne: newambe bulelela. Bidi bikengela udilongolole bua kuamba bulelela mu bualu buonso budibu mua kukuebeja.

Bu mutudi tuangata malanda etu ne Yehowa ne mushinga wa bungi, mbimpe tusambile ne tuelangane meji a mutshipu kayi wonso udibu batulomba bua kuenza. Tuikale bajadike ne: udi mu diumvuangana ne kondo ketu ka muoyo, ne kawena ubengangana ne mêyi manene a mu Bible to. Wewe muitabe bua kuenza mutshipu, udi ne bua kuwunemeka.​—1 Pet. 2:12.