1-3. (a) Bilondeshile Misambu 5:4-6, mmunyi mutu Yehowa umvua bua malu mabi? (b) Bua tshinyi tudi tuamba ne: dinyanga bana kadiena dipetangana ne “mukenji wa Kristo”?

YEHOWA NZAMBI mmukine malu mabi a mishindu yonso. (Bala Misambu 5:4-6.) Nunku mmukine mukinyinamu dinyanga bana ne malu a masandi, bualu ntshienzedi tshibi tshitambe tshidi tshienza mubidi mashika! Tuetu Bantemu ba Yehowa tudi bakine dinyanga bana bualu tudi tuidikija Yehowa; katuena tubuikila mêsu padi bualu bua nunku buenzeka mu tshisumbu tshia bena Kristo to.​—Lomo 12:9; Eb. 12:15, 16.

² Tshienzedi tshionso tshia dinyanga bana katshiena tshipetangana ne “mukenji wa Kristo” nansha kakese! (Gal. 6:2) Bua tshinyi tudi tuamba nanku? Anu mutuvua bamone mu tshiena-bualu tshishale, mukenji wa Kristo (mmumue ne: malu onso avua Yezu mulongeshe mu mêyi ne mu ngenzelu wende wa malu) mmushindamene pa dinanga ne udi usaka bantu bua kuenza malu makane. Bu mudi bena Kristo balelela batumikila mukenji eu, badi benzela bana malu bua badiumvue mu bukubi ne bamone ne: mbabanange bushuwa. Kadi dinyanga bana ntshienzedi tshibi tshia budinangi. Tshidi tshifikisha bana ku dimona ne: kakuena muntu udi ubakuba ne udi mubanange to.

³ Bia dibungama, dinyanga bana ne malu a masandi nditue ntanga tshibua, dilenge too ne bena Kristo balelela. Bua tshinyi? Bualu “bantu babi” mbavule; bakuabu badi bakeba kubuela too ne mu tshisumbu tshia bena Kristo. (2 Tim. 3:13) Bualu bukuabu, bamue bantu badi badiamba ne: mba mu tshisumbu tshia bena Kristo mbapange mua kukanda majinga abu a disangila, ne  mbafike ku dinyanga bana. Tukonkononayi malu adi enza bua dinyanga bana dikale mpekatu mubi menemene. Pashishe netumone mudi bakulu balumbuluisha bilumbu bia mpekatu, bu mudi tshia dinyanga bana ne malu a masandi, ne mudi baledi mua kukuba bana babu. *

4-5. Bua tshinyi dinyanga muana mbualu bubi bumuenzela?

⁴ Dinyanga bana ditu dishiya bantu ne tunyinganyinga bidimu bia bungi. Bitu bishala bitonda bana abu ne bantu bonso badi babanange, bu mudi bena mu dîku diabu ne bena Kristo nabu. Dinyanga bana mmpekatu mubi menemene.

⁵ Mbualu bubi buenzela muntu udibu banyange. Kukebela bantu tunyinganyinga ne kubakengesha kakuyi bualu nkuenza mpekatu. Anu mutuamona mu tshiena-bualu tshialonda, muntu udi unyanga muana udi umushiya mu dikenga dibi ditambe. Nansha mudi muana umueyemena, udi umushiya ne kanyinganyinga bualu mmumupangishe mua kudiumvua mu bukubi ne mmumumanyishe malu adi kaayi mamukumbanyine. Tudi ne bua kukuba bana ku malu mabi a nunku, ne bantu bonso bavuabu benzele bibi mushindu eu badi dijinga ne dikankamija ne diambuluisha.​—1 Tes. 5:14.

6-7. Bua tshinyi dinyanga muana mbualu bubi buenzela tshisumbu? Bua tshinyi mbualu bubi ku mêsu kua mbulamatadi?

⁶ Mbualu bubi buenzela tshisumbu. Muntu wa mu tshisumbu yeye munyange muana ne malu a masandi mmunyange lumu lua tshisumbu. (Mat. 5:16; 1 Pet. 2:12) Kuamba ne: tshisumbu tshia bena Kristo tshidi tshianyisha dinyanga bana mbualu bubi butambe bualu kudi bena Kristo ba lulamatu miliyo ya bungi badi ‘baluangana mvita mikole bua ditabuja’! (Yuda 3) Bantu badi benza malu mabi kabayi banyingala ne bapendesha tshisumbu, katutu tuitaba bua bashale munkatshi muetu to.

⁷ Mbualu bubi buenza ku mêsu kua bakokeshi ba mbulamatadi. Bena Kristo badi ne bua ‘kukokela bakokeshi badi ku mutu.’ (Lomo 13:1) Tudi tubakokela patudi tutumikila mikenji ya ditunga. Muntu wa mu tshisumbu yeye mushipe mukenji wa ditunga, bu mudi udi ukandika dinyanga bana, udi wenza bualu bubi ku mêsu kua mbulamatadi. (Fuanyikija ne Bienzedi 25:8.) Bakulu kabena ne bukokeshi bua kunyoka muntu udi ushipa mukenji wa ditunga to. Kadi kabatu bakuba muntu udi munyange muana bua kabamunyoki kudi mbulamatadi to. (Lomo 13:4) Muenji wa bubi udi upuola tshidiye mukune.​—Gal. 6:7.

8. Mmunyi mudi Yehowa umona malu mabi adi bantu benzela bakuabu?

⁸ Mbualu bubi buenzela nangananga Nzambi. (Mis. 51:4) Padi muntu wenzela mukuende bibi, udi kabidi wenzela Yehowa bibi. Tuangate tshilejilu tshia Mikenji ivua Nzambi mupeshe bena Isalele. Kuvua mukenji uvua wamba ne: muntu yeye mushime anyi muibe muena mutumba nende, uvua ‘wenza bualu bua dipanga lulamatu kudi Yehowa.’ (Lew. 6:2-4) Bia muomumue, padi muntu wa mu tshisumbu unyanga muana, udi umupangisha bua kudiumvua mu bukubi; nunku udi wenza bualu bua dipanga lulamatu kudi Yehowa. Muntu au udi upendesha dîna dia Yehowa bibi menemene. Ke bualu kayi dinyanga bana ne malu a masandi mbualu bubi butambe buenzela Nzambi, ne  katuena ne bua kubuikila mêsu pa bualu bua nunku nansha kakese!

9. Mmibelu kayi idi bulongolodi bua Yehowa bufile mu kupita kua bidimu? Bua tshinyi?

⁹ Mu kupita kua bidimu, bulongolodi bua Yehowa mbufile mibelu ya bungi ya mu Bible bua tshilumbu tshia dinyanga bana ne malu a masandi. Tshilejilu, biena-bualu bia mu Tshibumba tshia Nsentedi ne bia mu Tabulukayi! mbileje tshidi bantu bavuabu banyange mua kuenza bua tunyinganyinga tudibu bashale natu, tshidi bakuabu mua kuenza bua kubambuluisha ne kubakolesha, ne tshidi baledi mua kuenza bua kukuba bana babu. Bena mu Kasumbu kaludiki mbapeshe bakulu mêyi a kulonda mimanyine mu Bible bua tshidibu ne bua kuenza padi muntu munyange muana. Badi batungunuka ne kutangilula mushindu udi bakulu ne bua kulumbuluisha bilumbu bia dinyanga bana. Bua tshinyi? Bua bikale bashindike ne: mushindu udi bakulu balumbuluisha bilumbu bia dinyanga bana udi umvuangana ne mukenji wa Kristo.

10-12. (a) Ntshinyi tshidi bakulu ne bua kuvuluka padibu balumbuluisha bilumbu bia mpekatu? Mmalu kayi adibu ne bua kutabalela? (b) Bilondeshile Yakobo 5:14, 15, ntshinyi tshidi bakulu badienzeja bua kuenza?

¹⁰ Padi bakulu balumbuluisha bilumbu bia mpekatu, badi ne bua kuvuluka ne: mukenji wa Kristo udi ubalomba bua kuenzela tshisumbu tshia mikoko malu ne dinanga ne kuenza tshidi tshimpe ne tshiakane ku mêsu kua Nzambi. Bua bualu abu, badi ne malu a bungi adibu ne bua kutabalela padibu bumvua ne: muntu mmuenze mpekatu. Mudimu munene udi nawu bakulu ngua kuenza bua dîna dia Yehowa dijidibue. (Lew. 22:31, 32; Mat. 6:9) Badi kabidi bambuluisha bena mu tshisumbu bua balame malanda abu ne Nzambi, ne mbadiakaje bua kuambuluisha muntu yonso udi mpekatu wa muntu mukuabu mushiye ne tunyinganyinga.

¹¹ Bualu bukuabu, bakulu badi badienzeja bua kuambuluisha muntu wa mu tshisumbu udi muenze mpekatu au bua akajilule malanda ende ne Nzambi bikalaye munyingalale. (Bala Yakobo 5:14, 15.) Muena Kristo udi kayi ukanda majinga ende mabi ne wenza mpekatu, udi usama mu nyuma. Bidi biumvuija ne: katshiena mu malanda mimpe ne Yehowa to. * Tudi mua kufuanyikija bakulu ne baminganga. Badi badienzeja bua “muntu udi usama [bua muaba eu, mmuenji wa mpekatu] umvue bimpe.” Mibelu ya mu Bible idibu bamupesha idi mua kumuambuluisha bua kuakajilula malanda ende ne Nzambi, kadi anu yeye munyingalale ne muoyo mujima.​—Bien. 3:19; 2 Kol. 2:5-10.

¹² Bidi bimueneka patoke ne: bakulu badi ne mudimu munene. Badi baditatshisha bikole bua tshisumbu tshia mikoko tshidi Nzambi mubapeshe bua kutangila. (1 Pet. 5:1-3) Mbasue bua bena Kristo nabu badiumvue mu bukubi mu tshisumbu. Ke bualu kayi, badi benza malu ne lukasa padibu bumvua ne: muntu mmuenze mpekatu, bu mudi wa dinyanga muana ne malu a masandi. Ntshinyi tshitubu benza? Tangila nkonko idi kumbangilu kua  tshikoso tshia 13,  tshia 15, ne  tshia 17.

13-14. Bakulu batu batumikila mikenji ya ditunga idi ilomba bua kumanyisha mbulamatadi bualu bua dinyanga bana anyi? Umvuija.

 ¹³ Bakulu batu batumikila mikenji ya ditunga idi ilomba bua kumanyisha bakokeshi ba mbulamatadi padi muntu wamba ne: mbanyange muana anyi? Eyowa. Mu matunga mudi mikenji idi ilomba bua kumanyisha mbulamatadi malu a dinyanga bana, bakulu batu bayitumikila. (Lomo 13:1) Mikenji eyi kayena ibengangana ne mikenji ya Nzambi to. (Bien. 5:28, 29) Nunku padibu bambila bakulu ne: muntu mmunyange muana,  diakamue badi bakeba buludiki bua kumanya mudibu mua kutumikila mikenji ayi.

¹⁴ Bakulu badi bambila muana ne baledi bende ne bantu bakuabu badi bamanye bualu abu ne: badi ne bukenji bua kuya ne tshilumbu atshi kua mbulamatadi. Kadi tshia kuenza ntshinyi bikalabi ne: udi munyange muana mmuntu wa mu tshisumbu, ne bualu abu mbutangalake bikole? Muena Kristo udi muye kumanyisha mbulamatadi bualu abu kedi meji ne: mmupendeshe dîna dia Nzambi to. Muntu udi munyange muana au, yeye ke udi mupendeshe dîna dia Nzambi.

15-16. (a) Bilondeshile 1 Timote 5:19, kumpala kua bakulu kuenza komite wa dilumbuluisha, bua tshinyi mbimpe kuikale bujadiki bua bantemu nansha babidi? (b) Ntshinyi tshitu bakulu benza padibu babambila ne: muntu wa mu tshisumbu tshiabu mmunyange muana?

 ¹⁵ Mu tshisumbu, kumpala kua bakulu kuenza komite wa dilumbuluisha, bua tshinyi mbimpe kuikale bujadiki bua bantemu nansha babidi? Bualu ke tshidi Bible wamba ne: ntshiakane. Padi muntu uvila ne: ki mmumanye bualu, bidi bikengela kuikale bantemu babidi bua kujadika bualu abu. Dîba adi bakulu badi mua kuenza komite wa dilumbuluisha. (Dut. 19:15; Mat. 18:16; bala 1 Timote 5:19.) Abi kabiena biumvuija ne: bua bobu kuya ne tshilumbu tshia dinyanga muana kua mbulamatadi, bidi bikengela anu kuikale bantemu babidi to. Padiku dishipa dia mukenji wa ditunga, kabiena bilomba bantemu babidi bua bakulu anyi bantu bakuabu kuya ne tshilumbu kua mbulamatadi to.

¹⁶ Padibu bambila bakulu ne: muntu wa mu tshisumbu tshiabu mmunyange muana, badi batumikila mikenji idi ilomba bua kumanyisha tshilumbu atshi kua mbulamatadi; pashishe badi bakeba bua kumanya tshidi tshienzeke menemene, ne batangila tshidi Bible wamba bua kumona ni badi mua kuenza komite wa dilumbuluisha. Muntu au yeye muvile, bakulu badi bimanyina pa bujadiki bua bantemu ba bualu abu. Padi bantu nansha babidi bajadika bualu abu (mmumue ne: udi mulue kumanyisha bualu bua dinyanga muana ne mukuabu udi ujadika bualu abu anyi malu makuabu akadi muntu au muenzele bana bakuabu), dîba adi bakulu badi benza komite wa dilumbuluisha. * Padiku kakuyi ntemu muibidi, kabiena biumvuija ne: muntu udi mulue kumanyisha bualu abu mmushime to. Nansha padiku kakuyi bantemu babidi badi mua kujadika tshilumbu, bakulu mbamanye anu ne: kudi mua kuikala bualu bubi menemene budi buenzeke budi bunyingalaja bakuabu bikole. Bakulu nebatungunuke ne kuambuluisha muntu yonso udi bualu bubi abu bunyingalaje. Nebadimukile kabidi muntu udibu bambe ne: mmunyangangane au bua kalu kunyanga bana bakuabu mu tshisumbu.​—Bien. 20:28.

17-18. Umvuija mudimu udi nawu komite wa dilumbuluisha.

 ¹⁷ Mmudimu kayi udi nawu komite wa dilumbuluisha? Bena mu komite eu badi ne mudimu wa kutangila bikalabi bilomba kuipata muntu udi muenze mpekatu mu tshisumbu anyi kubenga kumuipata. Mudimu wabu ki ngua kutangila bikala mbulamatadi ne bua kunyoka muntu au bualu mmushipe mukenji wa ditunga anyi kubenga kumunyoka to. Badi balekela mbulamatadi nkayende bua angate dipangadika dia mudiye mua kunyoka bantu badi bashipa mikenji yende.​—Lomo 13:2-4; Tito 3:1.

¹⁸ Kadi mudimu wa bakulu badi benza komite wa dilumbuluisha ngua kutangila malu a ntendelelu. Ku diambuluisha dia Bible, badi bamona bikala muntu udi munyange muana unyingalala anyi kayi unyingalala. Yeye kayi munyingalale, badi bamuipata, pashishe bamanyisha tshisumbu. (1 Kol. 5:11-13) Yeye munyingalale, kabena bamuipata to. Kadi bakulu  nebamumanyishe ne: neashale bidimu bia bungi menemene kayi ukumbana bua kumupeshabu midimu anyi majitu mu tshisumbu to; pamuapa too ne muafuaye. Bu mudi bakulu baditatshisha bua diakalenga dia bana, badi mua kuambila muledi ne muledi yonso bua ikale ne dîsu ditonona padi bana bende bikale pabuibi ne muntu au. Padi bakulu benza nanku, badi ne bua kuikala ne budimu bua kubenga kutela mêna a bana badi muntu au munyange.

19-22. Ntshinyi tshidi baledi mua kuenza bua kukuba bana babu? (Tangila tshimfuanyi tshia pa tshizubu.)

¹⁹ Mbanganyi nangananga badi ne mudimu wa kukuba bana bua kababenzedi bibi? Mbaledi. * Bana bebe ndipa dia tshijila, “bumpianyi bua kudi Yehowa.” (Mis. 127:3) Mudimu wa kukuba bana bebe udi pa makaya ebe. Ntshinyi tshiudi mua kuenza bua kubakuba bua kababanyangi?

²⁰ Tshia kumpala, keba bua kumanya malu a dinyanga bana. Keba bua kumanya ne: mbantu ba mushindu kayi batu banyanga bana, ne mmayele kayi atubu babashimakaja nawu. Dimukila njiwu idi mua kumueneka. (Nsu. 22:3; 24:3) Ikala mumanye ne: misangu ya bungi bantu batu banyanga bana mbantu badi bana bamanye bimpe ne beyemena.

²¹ Tshibidi, ikala uyukila ne bana bebe bimpe. (Dut. 6:6, 7) Bidi bikulomba bua wikale ubateleja ne ntema. (Yak. 1:19) Ikala mumanye ne: bana batubu banyange kabatu basue kuambila muntu bualu abu to. Badi mua kuikala batshina ne: muntu kakuitaba tshidibu bamba to, anyi bantu badi babanyange abu badi mua kuikala babakanyine bua kabambi. Wewe mumone ne: kudi bualu, bela nkonko ne budimu bua bakuambilabu ne ubateleje ne lutulu padibu bakuandamuna.

²² Tshisatu, longesha bana bebe. Ikala uyukila ne bana bebe malu a balume ne bakaji bilondeshile bukole buabu. Balongesha tshia kuamba ne tshia kuenza padi muntu ukeba kubalenga mu mushindu mubi. Bulongolodi bua Nzambi mbupatule malu adi mua kukuambuluisha bua kulongesha bana bebe bua kubakuba.​—Tangila kazubu ka “ Keba bua kumanya malu a dinyanga bana, ualongeshe bana bebe.”

23. Mmunyi mututu tumona dinyanga bana? Tshiena-bualu tshialonda netshiandamune lukonko kayi?

²³ Buetu tuetu Bantemu ba Yehowa, dinyanga bana ne malu a masandi mmpekatu mubi menemene, ne ntshienzedi tshibi tshitambe. Bu mudi mukenji wa Kristo utulombola, katutu tukuba bantu badi banyanga bana bua kababanyoki bua malu abu mabi to. Kadi ntshinyi tshitudi mua kuenza bua kuambuluisha bena Kristo netu bonso badibu banyange ne malu a masandi? Tshiena-bualu tshialonda netshiandamune lukonko elu.