1. Bua tshinyi bidi mua kukolela bamue bana betu bua kudilongela?

BITU bilomba kudienzeja bikole bua kupeta makuta a kudiambuluisha nawu. Bena Kristo netu ba bungi batu benza mudimu mêba a bungi anu bua kukumbaja majinga a bena mu mêku abu. Bakuabu bungi kabuyi kubala batu benza mêba a bungi mu njila padibu baya ku mudimu ne padibu balukila. Banga pabu batu benza midimu mikole ya bianza bua kudiambuluisha. Ku dilolo, bana betu bonso aba batu bapingana kumbelu bazengele! Dîba adi, ba bungi ba kudibu mbafuane kupangila ne mua kudilongela.

2. Ndîba kayi diutu wewe udilongela?

² Kadi tshidi ne mushinga menemene ntshia ne: tudi ne bua kukeba dîba dia kulonga Dîyi dia Nzambi ne mikanda yetu, tulonga tulongelamu. Didilongela edi ke didi dituambuluisha bua kuikala mu malanda mimpe ne Yehowa ne kulua kupeta muoyo wa tshiendelele. (1 Tim. 4:15, 16) Bana betu ba bungi batu babika patshiatshia dituku dionso patshidi panshi patalale ne mu mutu mutalale bua kudilongela. Bakuabu batu bangata minite nansha mikese dilolo bua kudilongela ne kuelangana meji.

3-4. Bulongolodi mbuenze tshinyi ne bungi bua bintu bitubu bupatula? Bua tshinyi?

³ Pamuapa udi mumanye bimpe ne: kukeba dîba dia kudilongela kudi ne mushinga. Kadi mbintu kayi bitudi mua kulonga? Udi mua kuamba ne: ‘Bintu bia kubala mbia bungi be! Mbikole bua kubibala bionso.’ Bamue bana betu batu ne mushindu wa kubala mikanda yetu yonso ne kutangila filme yetu yonso, kadi bakuabu kabatu nawu to. Kasumbu kaludiki nkamanye bualu ebu bimpe. Ke bualu kayi, matuku adi panshi aa  nkangate dipangadika dia kukepesha bungi bua bintu bidibu bapatula mu mikanda ne ku Enternete.

⁴ Tshilejilu, katutshiena tupatula mukanda wa Annuaire des Témoins de Jéhovah to, bualu tudi mua kupeta malu a bungi adi atukankamija mu jw.org^® ne mu ndongamu ya ku ngondo ya ku TV wa jw.org. Tshibumba tshia Nsentedi tshia bantu bonso ne Tabulukayi! bikadi bipatuka mpindieu anu misangu isatu ku tshidimu. Ki mbakepeshe bintu ebi bua tupete dîba dia kuenza malu makuabu a tshianana to, kadi mbua tudifile bikole ku “malu adi ne mushinga wa bungi.” (Filip. 1:10) Tumonayi mpindieu mutudi mua kumanya malu adi ne mushinga wa bungi ne mudi didilongela mua kutuambuluisha menemene.

5-6. Mbintu kayi bitudi ne bua kudienzeja bua kulonga bimpe menemene?

⁵ Mbintu kayi biudi ne bua kulonga kumpalampala? Mbimpe ukebe dîba dia kulonga Dîyi dia Nzambi dituku dionso. Mbakepeshe bungi bua mvese ya mu dibala dia Bible dia ku lumingu dia tshisumbu bua upete dîba dia bungi dia kuelangana meji bua malu audi ubala ne kuenza makebulula makuabu. Kuikadi anu ne tshipatshila tshia kubala mvese idibu bafile bua lumingu to, kadi enza bua malu audi ubala alenge muoyo webe, ne atungunuke ne kukusemeja pabuipi ne Yehowa.​—Mis. 19:14.

⁶ Mbintu kayi bikuabu biudi ne bua kulonga bimpe menemene? Ikala ulongolola Dilonga dia Tshibumba tshia Nsentedi, Dilonga dia Bible dia tshisumbu, ne malu makuabu a mu tshisangilu tshia munkatshi mua lumingu. Ikala ubala kabidi tshibejibeji tshionso tshidi tshipatuka tshia Tshibumba tshia Nsentedi (tshia kulonga ne tshia bantu bonso) ne Tabulukayi!

7. Wewe kuyi ne mushindu wa kubala anyi kutangila bintu bionso bidi mu site wetu peshi ku TV wetu, mbimpe utekete mu mikolo anyi?

⁷ Udi mua kudiambila ne: ‘Mbimpe, kadi si kudi bintu bikuabu bipite bungi bidi bipatuka mu site wetu wa jw.org ne ku TV wa jw.org!’ Tuangate tshilejilu: Udi uya ku restoran, usangana bateke ngesu ya biakudia bimpe bishilashilangane pa mêsa. Kuakudia biakudia bionso abi to, neusungule anu ndambu. Bia muomumue, wewe kuyi ne mushindu wa kubala bintu bionso bidi mu site wetu anyi kubitangila, kuteketshi mu mikolo to. Bala biudi mua kubala ne tangila biudi mua kutangila. Tumone mpindieu tshidi kudilongela kumvuija ne mudiku mua kukuambuluisha bikole menemene.

8. Leja malu a kuenza paudi ulongolola Tshibumba tshia Nsentedi. Mmunyi mudi kulonga mushindu eu mua kukuambuluisha?

⁸ Kulonga nkubala ne lubatshi luonso bua kumanya bualu kampanda bua mushinga. Ki nkubala malu pamutu pamutu ne kuela mishonyi pa mandamuna to. Tshilejilu, paudi ulongolola Dilonga dia Tshibumba tshia Nsentedi, anji bala kadiosha kadi ku ntuadijilu kua tshiena-bualu. Pashishe bala tshiena-bualu, tumitu tua bualu, ne nkonko ya diambulula ne ubielele meji. Mpindieu bala tshiena-bualu tshionso bitekete bitekete ne ntema yonso. Mu tshikoso tshionso mutu tshiambilu tshitu tshitamba kuleja lungenyi lua tshikoso. Pa tshibidilu tshitu ku ntuadijilu. Utshitabalele. Paudi wenda ubala, dienzeja bua kumona mudi malu adi mu tshikoso tshionso apetangana ne kamutu ka bualu, kabidi ne tshiena-bualu tshinene. Funda miaku yonso iudi kuyi mumanye ne malu audi kuyi mumvue bimpe bua kuakebulula.

9. (a) Bua tshinyi mbimpe kutabalela mvese bikole paudi ulongolola Tshibumba tshia Nsentedi? Mmunyi muudi mua kuenza nanku? (b) Bilondeshile Yoshua 1:8, ntshinyi tshikuabu tshiudi ne bua kuenza wewe mumane kubala mvese?

 ⁹ Patudi tulonga Tshibumba tshia Nsentedi mu tshisumbu, Bible ke utudi tulonga. Nunku tabalela mvese bikole, nangananga ya kubala. Tangila bimpe mudi miaku anyi biambilu bidi mu mvese bipetangana ne lungenyi ludi mu tshikoso. Angata kabidi dîba dia kuelela mvese iudi ubala meji, ne elangana meji a muudi mua kuyitumikila.​—Bala Yoshua 1:8.

10. Bilondeshile Ebelu 5:14, bua tshinyi mbimpe baledi bangate dîba dia kulongesha bana babu mua kudilongela ne kukebulula malu makuabu mu ntendelele wa mu dîku?

¹⁰ Baledi batu basue bua Ntendelelu wa mu dîku wa lumingu luonso ikale usankisha bana. Kadi nansha mudibu mua kuikala balongolola bualu kampanda bua kulonga mu dîku, ki mbimpe badiumvue anu benzejibue bua kuenza malu a pa buawu lumingu luonso to. Badi mua kutangila ndongamu wa ku ngondo wa ku TV wa jw.org mu ntendelelu wabu wa mu dîku anyi kuenza malu a pa buawu ku misangu, bu mudi kuenza buatu bua Noa. Kadi bidi kabidi ne mushinga bua baledi balongeshe bana mua kudilongela. Tshilejilu, mbimpe bana bamanye mua kulongolola bisangilu anyi kuenza makebulula bua bualu kampanda buvua bujuke mu kalasa. (Bala Ebelu 5:14.) Bana batu bakuata malu mu filme bipepele, kadi bobu bangata dîba dia kulonga malu kampanda a mu Bible kumbelu, kabiakubakolela bua kumvua malu makuabu adibu balongesha mu bisangilu, mu mpuilu, ne mu mpungilu to. Mbimpe baledi bakose bule bua dilonga dionso bilondeshile bidimu bia bana ne tshidibu.

11. Bua tshinyi mbimpe kuleja balongi betu ba Bible mushindu muimpe wa bobu kudilongela?

¹¹ Mbimpe balongi betu ba Bible bamanye pabu mua kudilongela. Ku ntuadijilu, bitu bitusankisha bikole padibu balongolola dilonga diabu dia Bible anyi bisangilu benda bela mishonyi pa mandamuna. Kadi mbimpe tubalongeshe mua kuenza makebulula ne mua kumanya kudilongela bimpe. Dîba adi padibu bapeta ntatu, nebamanye mua kukebulula malu mu mikanda yetu bua kupeta mibelu idi mua kubambuluisha pamutu pa kuya diakamue kudi bantu bakuabu mu tshisumbu bua kubebeja tshia kuenza.

12. Mbipatshila kayi biudi mua kuikala nabi paudi udilongela?

¹² Biwikala kutu musue kulonga, udi mua kuela meji ne: kudilongela kakuakukusankisha  dituku nansha dimue to. Kadi kabiena nanku to. Tangila tshia kuenza: tuadija kudilongela mu minite mikese patupu, pashishe enda uvudija minite ayi ku kakese ku kakese. Ikala ne tshipatshila kampanda mu mutu. Tshipatshila tshinene tshidi ne bua kuikala tshia kutungunuka ne kusemena pabuipi ne Yehowa. Kadi kudi bipatshila bikuabu bia kukumbaja pa lukasa, bu mudi kuandamuna lukonko ludibu bakuele anyi kumanya tshia kuenza mu lutatu kampanda luudi nalu.

13. (a) Tela malu adi nsonga mua kuenza bua kufika ku diumvuija balongi babu malu adiye witabuja. (b) Wewe nsonga, leja muudi mua kutumikila mubelu udi mu Kolosayi 4:6.

¹³ Tshilejilu, wewe muikale mulongi, badi mua kuikala bakutatshisha bua muudi kuyi wimba musambu wa ditunga. Udi mua kuikala musue kuleja tshidi Bible wamba bua bualu ebu, kadi pamuapa kuena udiumvua mukumbane to. Mbimpe wenze makebulula. Udi mua kuenza makebulula ne bipatshila bibidi ebi mu mutu: 1) kukolesha dishindika diebe dia ne: kuena ne bua kubuelakana mu malu a panu, ne 2) kumanya mua kumvuija tshidi Bible wamba. (Yone 17:16; 1 Pet. 3:15) Udi mua kuanji kudiebeja ne: ‘Mmalu kayi atu balongi betu badibingisha nawu bua kuimba musambu wa ditunga?’ Pashishe enza makebulula bimpe mu mikanda yetu. Udi mua kulua kumona ne: ki mbikole bua kumvuija malu audi witabuja to. Bantu ba bungi batu bamba ne: mbimpe kuimba musambu wa ditunga anu bualu muntu kampanda utubu banemeka mmubambile ne: bidi bikengela kuwimba. Wewe mupete bualu bumue anyi abidi audi mua kubumvuija, udi mua kuambuluisha muntu udi ukeba kumanya bulelela ne muoyo mujima.​—Bala Kolosayi 4:6.

14-16. (a) Ntshinyi tshiudi mua kuenza bua kumanya bimpe mukanda kampanda wa mu Bible uutu kuyi mutambe kumanya? (b) Leja muudi mua kumvua mukanda wa Amosa bimpe ku diambuluisha dia mvese idibu bafile.. (Tangila kazubu ka “ Mona bantu badibu batele mu Bible bu badi ne muoyo!”)

¹⁴ Tutekabi ne: mu bisangilu netukonkonone mukanda kampanda muipi wa malu a buprofete wa mu Bible, pamuapa uudi kuyi mutambe kumanya. Anji ikala ne dijinga dikole dia kumanya malu avua muprofete au mufunde. Ntshinyi tshiudi mua kuenza bua kupeta dijinga adi?

¹⁵ Tshia kumpala, diebeja ne: ‘Ntshinyi tshindi mumanye bua mufundi wa mukanda eu? Uvua nganyi? Uvua musombele kuepi? Uvua wenza mudimu kayi?’ Malu aa adi mua kukuambuluisha bua kumanya bua tshinyi mufundi au uvua musungule miaku kampanda anyi bilejilu kansanga. Paudi ubala Bible, keba biambilu bidi bileja tshivua mufundi wa mukanda uudi ubala au muikale.

¹⁶ Tshibidi, mbimpe kumanya dîba divuabu bafunde mukanda au. Udi mua kumanya dîba divuabu bawufunde wewe mutangile mu kazubu ka “Mikanda ya mu Bible” ku ndekelu kua Bible wa Nkudimuinu wa bulongolodi bupiabupia. Bualu bukuabu, udi mua kutangila tablo wa baprofete ne bakalenge mu tshisakidila tshia A6. Mukanda uudi ubala au wowu wa malu a buprofete, mbimpe umanye nsombelu uvuaku tshikondo tshivuabu bawufunde. Mmalu kayi anyi mbilele kayi bibi bivua muprofete wambila bantu bua kulekela? Mbantu kayi bavua ne muoyo tshikondo tshiende? Bua kumvua malu bimpe, bidi mua kukulomba bua kubala mikanda mikuabu ya mu Bible. Tshilejilu, bua kumvua bimpe tshivua tshienzeka mu matuku a muprofete Amosa, udi mua kubala mvese ya mu mukanda wa 2 Bakalenge ne wa  2 Kulondolola. Mvese ayi mmiledila mu Amosa 1:1. Udi kabidi mua kubala mukanda wa Hoshea uvua mua kuikala pende ne muoyo mu matuku a Amosa. Mikanda mikuabu yonso eyi neyikuambuluishe bua kumanya muvua nsombelu tshikondo tshia Amosa.​—2 Bak. 14:25-28; 2 Kul. 26:1-15; Hosh. 1:1-11; Amo. 1:1.

17-18. Bilondeshile bilejilu bidi mu bikoso anyi tshiebe wewe, leja mudi kuteya ntema ku tumalu tudi tumueneka bu tukese mua kukufikisha ku dinanga didilongela Bible.

¹⁷ Paudi ubala Bible, mbimpe kuikala ne dijinga dikole dia kumanya malu a bungi. Tutekabi ne: udi ubala nshapita wa 12 wa Zekâya udi ne dîyi dia buprofete didi diakula bua lufu lua Masiya. (Zek. 12:10) Paudi ufika mu mvese wa 12, udi ubala ne: “dîku dia nzubu wa Natana” divua ne bua kudila bikole menemene bua lufu lua Masiya. Pamutu pa kupita lubilu, anji imana, udiebeje ne: ‘Ndipetangana kayi didi pankatshi pa nzubu wa Natana ne Masiya? Kudi mushindu wa kumanya malu makuabu anyi?’ Enza makebulula. Mu mvese amu badi baledila mvese wa 2 Samuele 5:13, 14 udi uleja ne: Natana uvua umue wa ku bana ba Davidi. Mbaledilamu kabidi Luka 3:23, 31, mudibu baleja ne: Yezu uvua wa mu ndelanganyi menemene ya Natana, luseke lua bamamuende Mariya. (Tangila Tshibumba tshia Nsentedi tshia bantu bonso No. 3, 2016, dib. 9, tshik. 1-3.) Bidi bikoka ntema yebe, bualu uvua mumanye kuonso eku muvuabu balaye ne: Yezu uvua ne bua kupatukila mu ndelanganyi ya Davidi. (Mat. 22:42) Kadi Davidi uvua ne bana ba balume bapite pa 20. Kabiena bikukemesha bua muvua Zekâya muleje ne: nzubu wa Natana ke uvua nangananga ne bua kudila bua lufu lua Yezu anyi?

¹⁸ Tuangate tshilejilu tshikuabu. Luka nshapita wa kumpala udi uleja muvua muanjelu Gabaliele  mulue kumanyisha Mariya bualu bua muana uvuaye ne bua kulela. Wakamuambila ne: “Yeye eu neikale munene, nebamubikile ne: Muana wa Mutambe Bunene, ne Yehowa Nzambi neamupeshe nkuasa wa bukalenge wa tatuende Davidi, ne neakokeshe bu Mukalenge ku mutu kua nzubu wa Yakoba bua kashidi.” (Luka 1:32, 33) Udi mufuane kuimanyina wewe anu pa mêyi a Gabaliele a ne: bavua ne bua kubikila Yezu ne: “Muana wa Mutambe Bunene.” Kadi wakamanyisha kabidi ne: Yezu uvua ne bua ‘kukokesha bu Mukalenge.’ Nunku udi mua kudiebeja tshivua Mariya mua kuikala muele meji bua mêyi a Gabaliele aa. Uvua muele meji ne: Gabaliele uvua muambe ne: Yezu uvua ne bua kupingana pa muaba wa mukalenge Helode anyi pa muaba wa umue wa ku bantu bavua mua kumupingana mu nkuasa mu Isalele anyi? Bu Yezu mulue mukalenge, Mariya uvua ne bua kuikala mamuende wa mukalenge, ne bena mu dîku diende bavua ne bua kusombela mu dibalasa dia bukalenge. Kadi kakuena muaba nansha umue udi Bible uleja ne: Mariya uvua muakule ne Gabaliele bualu bua nanku to; anyi ki mbaleje ne: uvua mulombe bua kuikala ne muaba wa pa buawu mu Bukalenge, bu muvua bayidi babidi ba Yezu balombe to. (Mat. 20:20-23) Kabualu kakese aka kadi katujadikila ne: Mariya uvua ne budipuekeshi bua bungi!

19-20. Bilondeshile Yakobo 1:22-25 ne 4:8, mbipatshila kayi biudi ne bua kuikala nabi paudi udilongela?

¹⁹ Vuluka ne: paudi ulonga Bible anyi mikanda yetu mikuabu, tshipatshila tshiebe tshinene ntshia kutungunuka ne kusemena pabuipi ne Yehowa. Didilongela dikuambuluishe kabidi bua kumona ‘mushindu uudi’ anyi tshiudi, ne kumona malu audi ne bua kushintulula bua kusankisha Nzambi. (Bala Yakobo 1:22-25; 4:8.) Ke bualu kayi, dîba dionso diudi ukeba kudilongela, anji lomba Yehowa nyuma wende. Mulomba bua malu audi ulonga akuambuluishe bikole ne bua udimone mudiye ukumona.

²⁰ Tuetu bonso tuikale bu muntu wa Nzambi udibu bambe mu Misambu 1:2, 3 ne: “Disanka diende didi mu mikenji ya Yehowa, ne udi ubala mikenji Yende ne dîyi dia panshi panshi munya ne butuku. . . . Malu onso adiye wenza neende bimpe.”