1. Ntshinyi tshidi Dîyi dia Nzambi ditupesha?

BU MUDI Yehowa muikale Mulongeshi wetu Munene, tudi mua kutua lutatu kayi luonso tshiadi. (Yesh. 30:20, 21) Dîyi diende didi ditupesha bintu bionso bitudi nabi dijinga bua ‘tuikale bakumbane menemene, bikale ne bionso bidi bikengedibua bua mudimu wonso muimpe.’ (2 Tim. 3:17) Patudi tutumikila malongesha a mu Bible, tudi tulua bena meji kupita bantu badi bamba ne: mbimpe kulonda “meji a panu apa.”​—1 Kol. 3:19; Mis. 119:97-100.

2. Ntshinyi tshituamona mu tshiena-bualu etshi?

² Anu mutuamona, meji a bena panu atu atamba kusaka bantu ku disankisha majinga abu a mubidi. Nunku bidi mua kuikala bipepele bua kuitaba ngelelu wa meji wa bena panu ne ngenzelu wabu wa malu. Ke bualu kayi Bible udi wamba ne: “Nudimuke bua muntu nansha umue kanukuatshi ku diambuluisha dia nkindi ne mashimi a patupu bilondeshile bilele bia bantu.” (Kolos. 2:8) Mu tshiena-bualu etshi, netumone muvua bantu batuadije kuitaba malu abidi a dishima adi Satana ulongesha. Mu dikonkonona bualu ne bualu buonso, netumone bua tshinyi meji a panu apa adi bupote ne bua tshinyi meji a Nzambi adi mu Dîyi diende mmapite tshintu tshionso tshia bena panu kule ne kule.

3-4. Mmushindu kayi uvua mmuenenu wa bantu bua malu a bikadilu mushintuluke kubangila mu 1900 too ne mu 1930 mu États-Unis?

³ Mu États-Unis, kubangila mu 1900 too ne mu 1930, bantu ba bungi bakashintulula bikole mushindu uvuabu bamona malu a bikadilu. Kumpala bantu ba bungi bavua bitaba ne: disangila dia mulume ne mukaji didi anu bua bantu badi baselangane, ne  kadivua bualu bua kuyukila pa bantu to. Kadi lelu kabitshiena nanku to.

⁴ Bavua babikila bidimu bia kubangila mu 1920 too ne mu 1929 ne: bidimu bia bisankasanka, ne ngenzelu wa malu wa bantu wakashintuluka bikole tshikondo atshi. Mukebuludi wa malu mukuabu udi wamba ne: “Filme, teatre, misambu, mikanda, ne bintu bia kuenza nabi madisuisha biakatuadija kuakula bikole bua malu a disangila.” Tshikondo atshi, bantu bakavua baja maja avua atuma meji a bantu ku malu a disangila, ne bakavua bavuala bibi. Anu mukavua Bible muleje, mu matuku a ku nshikidilu bantu bavua ne bua kulua “banangi ba masanka.”​—2 Tim. 3:4.

5. Mmunyi mudi mushindu udi bantu bamona mikenji ya bikadilu mushintuluke katshia ku bidimu bia 1960?

⁵ Mu bidimu bia 1960, malu bu mudi a dibanjijangana, a disangila dia bantu ba mubidi umue, ne a dishipa mabaka tshianana tshianana akatangalaka bikole mu bantu. Mishindu ya bungi ya dijikija lutetuku ikavua itamba kuleja malu a disangila patoke. Malu aa mmakebeshe tshinyi? Mumanyi mukuabu wakafunda ne: bu mudi “bantu kabatshiyi balonda mikenji ya malu a bikadilu idi yakula bua disangila,” mêku a bungi mmanyanguke, balume anyi bakaji bakadi badikoleshila bana, bantu badi ne tunyinganyinga, bakuabu mbaditue mu ditangila malu a masandi ne diabala, ne kudi ntatu mikuabu ya buena eyi. Dimuangalaka dia masama a mu bilamba bu mudi dia SIDA, mbumue bua ku malu adi aleja ne: meji a panu apa adi bupote.​—2 Pet. 2:19.

6. Bua tshinyi mushindu udi bena panu bamona malu a disangila udi ukumbaja disua dia Satana?

⁶ Mushindu udi bena panu bamona malu a disangila udi ukumbaja disua dia Satana. Kakuyi mpata, udi usanka bikole padiye umona bantu basangila mu mushindu udi Nzambi kayi wanyisha ne bapepeja dibaka. (Ef. 2:2) Padi bantu benda masandi, badi bapepeja bukokeshi bua kulela budi Nzambi mubapeshe ne bidi mua kubapangisha bua kupeta muoyo wa tshiendelele.​—1 Kol. 6:9, 10.

7-8. Mmuenenu kayi muimpe udi Bible uleja bua disangila?

⁷ Bantu badi bitaba meji a panu apa badi bapetula mikenji ya bikadilu idi mu Bible bamba ne: kayena ne kudiyi to. Bantu ba nunku badi mua kudiebeja ne: ‘Bua tshinyi Nzambi uvua mua kutufuka ne majinga a disangila kadi ulua kutuambila bua kubenga kuakumbaja?’ Badi badiela lukonko elu bualu badi badishima bela meji ne: muntu udi ne bua kuenza  tshionso tshidi tshimuluila mu lungenyi. Kadi Bible yeye udi utulongesha ne: tudi ne mushindu wa kukanda majinga mabi. (Kolos. 3:5) Udi utulongesha kabidi ne: Yehowa mmulongolole bua bantu bajikije majinga abu a disangila mu mushindu muakanyine mu dibaka. (1 Kol. 7:8, 9) Dîba adi, mulume ne mukajende badi mua kusangila kakuyi tunyinganyinga ne ntatu bitu bifumina ku dienda masandi.

⁸ Meji a Nzambi adi mu Bible mmashilangane ne a panu apa bualu adi asaka bantu bua kumona disangila mu mushindu muimpe. Bible udi wamba ne: disangila didi mua kupetesha bantu disanka. (Nsu. 5:18, 19) Kadi udi wamba kabidi ne: “Yonso wa kunudi amanye mua kulama mubidi wende mu bunsantu ne bunême, kayi ne majinga makole a kusangila a lukuka adi kaayi bukuatshi bu mudi bisamba bikuabu bidi kabiyi bimanye Nzambi bikale nawu.”​—1 Tes. 4:4, 5.

9. (a) Mu bidimu bia kubangila mu 1900 too ne mu 1930, mmunyi muvuabu bakankamije batendeledi ba Yehowa bua kulonda meji mabandile a Nzambi adi mu Dîyi diende? (b) Mmubelu kayi muimpe udi mu 1 Yone 2:15, 16? (c) Mmalu kayi mabi adibu batele mu Lomo 1:24-27 atudi ne bua kuepuka?

⁹ Mu bidimu bia kubangila mu 1900 too ne mu 1930, mashimi a patupu a bantu bavua “bajimije bikadilu bimpe bionso” kaavua mapambuishe batendeledi ba Yehowa to. (Ef. 4:19) Bavua badienzeja bua kulamata mikenji ya Yehowa bikole. Tshibumba tshia Nsentedi tshia dia 15/5/1926 (mu Anglais) tshiakamba ne: “Muntu mulume yonso anyi muntu mukaji yonso udi ne bua kudilama ne kuikala mukezuke mu lungenyi ne mu bikadilu, nangananga kumpala kua muntu udi kayi mulume nende anyi mukaji nende.” Nansha muvua batendeledi ba Yehowa munkatshi mua bantu bavua benza malu mabi, bavua balonda meji mabandile a Nzambi adi mu Dîyi diende. (Bala 1 Yone 2:15, 16.) Tudi ne dianyisha dia bungi bua mudi Yehowa mutupeshe Dîyi diende! Tudi kabidi ne dianyisha bua mudiye utupesha biakudia bia mu nyuma mu tshikondo tshiakanyine. Biakudia ebi bidi bituambuluisha bua kubenga meji adi nawu bena panu mu malu a bikadilu. *​—Bala Lomo 1:24-27.

10-11. Bible ukavua muambe tshinyi bua matuku a ku nshikidilu?

¹⁰ Bible ukavua muambe ne: mu matuku a ku nshikidilu bantu bavua ne bua kuikala “badinangi.” (2 Tim. 3:1, 2) Nunku padi bena panu basaka bakuabu bua kuikala ne lungenyi lua budinangi, kabiena bitukemesha to. Mukanda kampanda udi wamba ne: mu bidimu bia 1970, “mikanda ivua ne mibelu ya mua kupeta nsombelu mulenga yakatapa bu meshi.” Imue ya kudiyi “ivua ilomba bantu bavua bayibala bua badimanye, bitabe tshivuabu, ne bikale badiumvua bua tshivuabu atshi.” Tshilejilu, umue wa ku mikanda ayi uvua wamba ne: “Udinange bualu udi muntu wa bujitu, muimpe kumona, ne udibu banyisha kupita bantu bonso.” Mukanda au uvua usaka muntu bua “kuikala mu nzambi wa tshidi muoyo musue, udisunguila mudiye musue kuenza malu bilondeshile kondo kende ka muoyo ne bilele bia kuabu bidiye umona ne: mbikumbane.”

¹¹ Ukadi mumvue bualu bua buena ebu anyi? Satana wakasaka Eva bua kuenza bualu bua muomumue. Wakamba ne: uvua mua ‘kuikala bu Nzambi, mumanye tshidi tshimpe ne tshidi tshibi.’ (Gen. 3:5) Lelu bantu ba bungi batu badiangata ne mushinga wa bungi menemene, bibafikisha ku dimona ne: kakuena muntu udi mua kubambila ne: etshi ntshimpe, etshi ntshibi to, nansha Nzambi. Tshilejilu, lungenyi luabu  elu ludi lumuenekela nangananga mu mushindu udi bantu bamona dibaka.

12. Mmushindu kayi udi bena panu bamona dibaka?

¹² Bible udi ulongesha mulume ne mukajende bua kunemekangana ne kukumbaja mitshipu yabu ya dibaka. Udi ubalomba bua bashale balamatangane, wamba ne: “Mulume neashiye tatuende ne mamuende, nealamate mukajende, ne nebalue mubidi umue.” (Gen. 2:24) Kadi bantu badi balonda meji a bena panu badi bamba bobu ne: mulume anyi mukaji udi ne bua kutangila anu majinga ende. Mukanda mukuabu udi wakula bua dishipa dia dibaka udi wamba ne: “Mu imue miaba, patu bantu baselangana, batu benza mitshipu bamba ne: netusombe ‘matuku onso atuikala nebe ne muoyo.’ Kadi bantu ba bungi mbakepeshe matuku a kusomba mu dibaka bamba ne: netusombe ‘matuku onso atuikala banangangane.’” Kumona dibaka mushindu eu nkutapulule mêku a bungi ne nkukebeshe tunyinganyinga tua bungi. Mbimueneke bimpe ne: mushindu udi bena panu bamona dibaka eu udi bupote.

13. Yehowa mmukine bena lutambishi bua tshinyi?

¹³ Bible udi wamba ne: “Muntu yonso udi ne lutambishi mu muoyo udi tshintu tshibi kumpala kua Yehowa.” (Nsu. 16:5) Bua tshinyi Yehowa mmukine bena lutambishi? Bumue bualu mbua ne: bantu badi ne budinangi ne badi basaka bakuabu bua kuikala nabu, badi ne lutambishi anu bu Satana. Anji elabi meji, Yezu ke uvua Nzambi muenze nende mudimu bua kufuka bintu bionso; kadi dimue dituku Satana udi udikuma pa tshiadi, udiambila ne: Yezu uvua ne bua kumukukuila ne kumutendelela! (Mat. 4:8, 9; Kolos. 1:15, 16) Lutambishi lua buena elu ludi bantu nalu ludi lujadika mudi meji a bena panu mikale bupote kumpala kua Nzambi.

14. Mmunyi mudi Lomo 12:3 utuambuluisha bua kuikala ne nkatshinkatshi mu mushindu utudi tudimona?

¹⁴ Bible udi utuambuluisha bua kuikala ne nkatshinkatshi mu mushindu utudi tudimona. Bilondeshile Bible, kudinanga mu mushindu muakanyine ki nkubi to. Yezu wakamba ne: ‘Nanga  mukuebe muudi mudinange.’ Dîyi edi didi dileja ne: mbimpe kutabalela majinga etu mu mushindu mukumbanyine. (Mat. 19:19) Kadi Bible kena ulongesha ne: tudi ne bua kudimona bapite bakuabu to. Udi wamba ne: “Kanuenji bualu nansha bumue ne lungenyi lua dikokangana anyi lua kudimona bapite bakuabu, kadi ne didipuekesha, numone bakuabu bu banupite nuenu.”​—Filip. 2:3; bala Lomo 12:3.

15. Ntshinyi tshidi tshikujadikila ne: mibelu idi Bible ufila bua mushindu utudi ne bua kudimona mmimpe?

¹⁵ Lelu bantu ba bungi badibu bamona bu bena meji badi mua kupepeja mubelu wa mu Bible udi ukandika diditambisha. Badi mua kuamba ne: kumona bakuabu bu bakupite kudi kukuvuija muntu wa musempasempa udi bantu bonso bamuenena. Kadi lungenyi lua budinangi ludi Satana mutampakaje elu ndukebeshe tshinyi menemene? Anji ambabi, wewe udi mumone tshinyi? Bena budinangi batu ne disanka anyi? Batu ne disanka mu mêku abu anyi? Batu ne balunda balelela anyi? Batu mu malanda makole ne Nzambi anyi? Buebe wewe, meji a bena panu ne meji a Nzambi adi mu Dîyi diende, adi apatula bipeta bimpe ngepi?

16-17. Mbualu kayi butudi ne bua kulejila dianyisha? Bua tshinyi?

¹⁶ Bantu badi balonda mibelu ya aba badi bena panu bamona bu bena meji badi anu bu muena luendu webeja muena luendu nende njila pabu buonso buabu bajimine. Yezu wakamba bua “bena meji” ba tshikondo tshiende ne: “Mbalombodi bampofu. Nunku, bikala mpofu ulombola mpofu mukuabu, bonso babidi nebakuluke mu tshina.” (Mat. 15:14) Bulelela, meji a panu apa adi bupote kumpala kua Nzambi.

¹⁷ Mibelu mimpe ya mu Bible itu misangu yonso ‘yambuluisha bua kulongesha, bua kubela, bua kulongolola malu, bua kunyoka mu buakane.’ (2 Tim. 3:16, dim.) Tudi ne dianyisha dia bungi bua mudi Yehowa mutuepule ku meji a panu apa ku diambuluisha dia bulongolodi buende! (Ef. 4:14) Biakudia bia mu nyuma bidiye mutupeshe mbitupeteshe bukole budi bukengedibua bua kushala balamate mikenji yende idi mu Bible. Kulombodibua kudi meji a kueyemena adi mu Bible ndiakalenga dinene!